NICHXIN kjoatse jngo én jaʼaitʼa je periódiko xi bitjo ya Corea, itso: “Shim Cheong, jngo chjoón xi nʼio nda kisʼin tonga nijmejinla xi tsabe xi tʼatsʼe Jesús. A yaxótse kinikasén jña lʼí títi” (The Chosun Ilbo).

Je én jebi alikui tokisasentsʼile chjota, nga̱ nʼio tsjoake koan je Shim Cheong. Je chjoón jebi to libro jaʼaitʼa jñani tsoya nga nʼio nda kisikuinda je nʼaile nga tsín matsenle. Jokji nga kinroa nó nʼio tsʼaxki̱ jokisʼin, saʼnda kʼoasʼin ʼyale nga nʼio nda choa̱ tsakʼéjnale ngatsʼi je xtiyánchjín xi tjín ya Corea.

Nʼio nkjín chjota xi tsín sasénle kʼoa xi saʼnda majtile nga kʼoaʼmile nga je Shim Cheong ya tínikjaʼá kjoañʼai jñani lʼí títi xi totʼatsʼe nga tsín kisatendá josʼin bakóya je relijión católica. Kʼoa tsa tsakʼejnalani tsoti jebi, kʼiajin tsakʼejna nga kjesa ʼya xi bichótsoyajin xi tʼatsʼe Cristo ya ʼndele.

Je periódiko jebi kʼoati faʼaitʼa jokitso jngo naʼmi. Kʼianga kichjonangile tsa ya nikasén ngatsʼi je chjota xi tsín tsabe xi tʼatsʼe Jesús ya jña lʼí títi nga jebiya, i kitso: “Likui ʼyaa. Tojejin Niná xi be josíkao je chjota xi tsín tsabe xi tʼatsʼe”.

Je Catecismo de la Iglesia Católica itso: “Je Nainá kʼoatso nga nʼio machjén nga katasaténdá je chjota kʼianga koa̱n kuitjontjai (cf Jn 3,5)”. Kʼoa bersíkulo xi faʼaitʼa yaa kitjoeni Biblia de Jerusalén kʼoa itso: “Je xi tsín jtsín kao nandá kʼoa kao Espíritu alikui kjoaʼasʼen ya Kjoatéxomale Niná”. Tojonásʼin tiʼyaa, tjín je xi kʼoasʼin makjainle nga je chjota xi kje saténdájin nga biya yaa fi jñani lʼí títi kʼoa tsa maije̱ kjoañʼai nikjaʼá.

Tonga nkjín chjota xi tsín sasénle xi tʼatsʼe jebi. Nʼio nkjín miyón chjota tjíobiya xi tsín tjíobe jmeni tso je Biblia. A bakinle chjota jebi nga kjoañʼai kʼoaile tokʼia saʼndani. Jméni xi tso je Biblia xi tʼatsʼe jebi.

Ya Biblia ñaki kʼoatsokixi nga tsín bʼasjengi Niná je chjota xi tsín tsabe jotjín je kjoatéxomale. Hechos 17:30 itso: “Tonga Niná likui kisisin je nichxin xi tsʼe je kjoanjiobi”, xi tsonile, nga totjíonjio kjoafaʼaitsjenle kʼianga kʼien. Tonga jmé kjoachoya xi tjínle chjota jebi nga tsín tsabe xi tʼatsʼe Niná.

Xi tʼatsʼe jebi, yaa bakóyaná je én xi kitsole Jesús jngo chjotaché xi ñatje̱n kinikʼientʼa yá. Je chjota jebi i kitso: “Tikjaʼaitsjennái kʼianga jekoatexomai”. Je Jesús i kitsole: “Ñaki kʼoaxin kjoaixile ndʼaibi: Yaa kuijnakaonái ya ʼNdenaxó” (Lucas 23:39-43, TNM).

A kui xi kitsole Jesús nga ya koai ngʼajmi chjota jebi. Mai, nga̱ chjota jebi alikui tsa kitsin ijngokʼa, xi tsonile, alikui kitsin tʼatsʼe nandá kʼoa tʼatsʼe espíritu, nga̱ kui jebi xi machjénle ʼyani xi ya kjoaʼasʼen kjoatéxomale ngʼajmi (Juan 3:3-6). Je xi kitsole Jesús chjota jebi kuinga ya kʼoéjna “ya ʼNdenaxó”. Chjota jebi judío kitje̱nni kʼoa tjínjinjinle xi tʼatsʼe ʼNdenaxó xi kisʼejna ngasʼa, xi tʼatsʼe ʼndenaxóle Edén xi síkʼaxki̱ je libro xi tíjnatítjon ya Biblia (Génesis 2:8). Je Jesús ñaki jngo kjoachoya kitsjoale chjota jebi, nga kjoaʼáyanile nga jeʼndenaxó koa̱n Sonʼnde.

Ya Biblia kʼoatso “nga kjoaʼáyale xi kʼen, nda tsa kao chjota xi tjínle kjoakixi, kao chjotatsʼen” (Hechos 24:15). Je xi “chjotatsʼen” tsole, jéní je chjota xi tsín kisitjoson je kjoatéxomale Niná nga̱ tsínkʼia tsabe jokjoantjínni xi tʼatsʼe Niná. Je Jesús yaa ʼndenaxó xi sʼe̱jna Sonʼnde sikjaʼáyale chjotaché jebi kʼoa nʼiosa nkjín jmi miyón chjota sikjaʼáyale xi totjíonjio kjoafaʼaitsjenle nga kʼien. Kʼianga jesʼe̱jna je ʼndenaxó, ngatsʼi chjota jebi  kʼiaa kʼuínyale jotjínni kjoatéxomale Niná kʼoa jé xi kuitsoni tsa sitjosonle Niná kʼoa tsa ñaki koako nga tsjoake.

Kʼianga jekjoaʼáyale je xi chjotatsʼen tsole je Biblia, a kui kuenta koa̱n jmeni xi kisʼin, josʼin kikao yaole nga títjon. Majain. Ya Romanos 6:7 itso: “Nga̱ je xi kʼen, jetʼa jéele”. Tojo tso én jebi, je chjotatsʼen kao kjoabijnachonle jetsakʼéchjíni je jéele. Xi koa̱njtsoʼa kuiní jmeni xi sʼin nga jekjoaʼáyanile, ali tsakuijin jmeni xi kisʼin nga títjon tsakatio. Kʼoa ánni nga ngisa ndasíni nga kʼoakoa̱n.

Kuinga títjon kjoanla kʼuínyale jmeni xi tso je kjoatéxomale Niná, je xi kʼoasʼin sa̱tíotsen nga tjóʼai je xo̱n xi nchja̱ni Biblia. Kʼoa chjota jebi kao kui koa̱njtsoʼani je “xále”, xi tsonile, tsa sitjoson kʼoa tsa mai je kjoatéxoma xi ya kjoaʼaítʼa (Apocalipsis 20:12, 13). Nʼio nkjín xi tokʼia skoe̱ títjon xi tʼatsʼe Niná kʼoa koaan sitjosonle Niná ánni nga sʼe̱sínile kjoabijnachon xi tsínkʼia fetʼa i̱ Sonʼnde.

Je én jebi, xi bakóya je Biblia, nʼio nkjín chjota tjíobinyakao nga kjimakjain ijngokʼanile xi tʼatsʼe Niná. Tobʼelañá, je Yeong Sug yaa koanjchíngajin relijión católica kʼoa nʼio kisisin. Tjíokʼa xínkjín xi naʼmi koan. Kʼoa nga mele nga madrecita koa̱n je Yeong Sug yaa kikʼejna ya niʼya jña batio je xi madrecita. Tonga tochoatse koanle nga ya tsakʼejna, nga̱ likui kisasenle jmeni xi sʼín je xi ya tjío. Xi ijngosani, kʼoati likui koankjainle tsa kjoañʼai nikjaʼá je chjota ya jña lʼí títi, kʼoakitso nga nʼio chʼaotjín kʼoa nga tsín kixi tíjna nga kʼoasi̱kao jngo chjota.

Xi jeki nichxin, jngo tichjaa tsakakóle jngo testole Biblia jñani tso: “Nga̱ je xi tjíokon bení kʼianga kuiyá; tonga je xi jekʼien nijmejin xi tibeni” (Eclesiastés 9:5). Kʼoakitsole nga je chjotajchíngale alikui ya tjíofaʼá kjoañʼai ya jñani lʼí títi, to jngoyale kjiofení, kʼoa kui tjíokoyale nga kjoaʼáyanile.

Kʼianga be je Yeong Sug nga nʼio nkjín chjota xi tsín be jokjoantjínni xi tʼatsʼe Biblia, kʼoakisʼin jokitso Jesús, kisitjoson je én xi faʼaitʼa ya Mateo 24:14 jñani tso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa”. Kʼoa ndʼai je Yeong Sug, fitsoyale chjota je énnda chjotse, kʼoa fákaoni jmeni xi jekoanjinle tʼatsʼe kjoachoya xi nchja̱ni ya Biblia.

Je Biblia itso: “Niná tongóson fikao ngatsʼi [chjota]. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (Hechos 10:34, 35). Kʼoasʼin tíjna je kjoatéxoma kixile Niná. Ánni. Kuinga “je Niná kui tsjoake xi kixi tíjna kao xi kjoakixi” (Salmo 33:5).