Je Naoko, xi kanikʼaxki̱ná kjoaʼmiya xi kafaʼato, kʼoatso jokoanni kisikʼéjna je na̱jno̱. Itso: “Kʼianga tsaʼbe jokjoan Niná kao jmeni xi tjínndajinle kui xi kitsjoanganʼiona nga tsín tikʼoakisʼinña”. Ngayeje jmeni xi koanchoyale yaa faʼaitʼa Biblia. Ningalani tsín faʼaitʼa je én xi na̱jno̱ tso ya Biblia tonga tsoyaná josʼin síkjaʼaitsjen Niná kʼianga na̱jno̱ chjeen. * Nʼio nkjín chjota tjíobinyakao kjoafaʼaitsjen xi faʼaitʼa ya Biblia nga tjíosíkatío je na̱jno̱, kʼoa je xi kje kui síkaojin tjíobinyakao nga tsínkui skén (2 Timoteo 3:16, 17). Janla koya kataʼyaa jokji chʼao síkaoná je na̱jno̱ kʼoa jmeni xi tso Biblia xi tʼatsʼe jebi.

Je xi nicotina ʼmi, xi tjínle na̱jno̱, kui sa xi nʼio mangaʼa je chjota. Ñaki bʼétsaojinle tonga kʼoati chʼao bʼé kon. Kʼianga jngo chjota xi na̱jno̱ kjen, je xi nicotina ʼmi kjitʼanangi ya fisíxájin ya xokoajko̱. Nga ñandia ñandia bʼéxo̱le je na̱jno̱ jngo dosis tsʼe nicotina tjíokanísʼennjin yaole, je chjota xi jngo jté na̱jno̱ kjen nga nyaon nyaon jao siento dosis tsʼe nicotina tíkanísʼenjin yaole, ngisa nʼio tse jmeni xi tíbinyále yaole chjota jebi tikʼoajinni jokji droga binyále yaole jngo chjota. Nga kʼoasʼínntsjai chjota, je nicotina nʼio mangaʼa. Kʼianga jemangaʼa je chjota xi na̱jno̱ kjen, ñaki síjé yaole nga jefejin je nicotina xi nyajin yaole.

Je Biblia basenkaoná nga nda chosonnilee xi tʼatsʼe jebi kʼianga itso: “A tsín ʼyao ʼyanibe xi kʼoailao yaono nga choʼndale koa̱on nga si̱tjosonlao, jon nío xi ñaki choʼndale mao je xi nitjosonlao” (Romanos 6:16). Kʼianga jetokui na̱jno̱ batéxomale jngo chjota, choʼndalee jema. Tonga je Niná, xi Jeobá ʼmi, mele nga ndai kuiyolee kjoa jebi. Tonga ali tsa tokuijin jmeni xi síkitsón yaoná, kʼoati kui jmeni xi síkitsón espírituná, xi tsonile, jonʼia kʼoa jmeni xi nimetokoán (Salmo 83:18; 2 Corintios 7:1). Je chjota xi matsjoake Niná kʼoa bexkón, bení kʼianga kui bakinle Niná xi ñaki tsje tíjna kʼoa jngo chjota xi na̱jno̱ kjen alikui koa̱n sixále Niná nga̱ choʼndale na̱jno̱ kjima kʼoa to kjoabiya kuichokao. Kui jebi xi basenkao jngo chjota nga tsín tikui kajinni.

Olaf, xi Alemania tsʼe, tosʼa tejao nóle nga kisken títjon je na̱jno̱, kʼoa xjaʼaonjngo nó nga na̱jno̱ kisken. Nga títjon kʼoasʼin kisikjaʼaitsjen nga tsín jme xi koa̱nle nga tojngo na̱jno̱ skén. Tonga xi ki nó chan ñaki koanngaʼa. Je Olaf itso: “Ñandia nga ñaki koantsín tsjetsjena je na̱jno̱ kʼoa ñaki koantso koanskána kʼoa tokui kiskoé je chxʼoále na̱jno̱ xi tjíoya jñani sikʼatsaoya, kʼoa tsakʼasjele je na̱jno̱le kʼoa to xo̱n periódiko tsakajté. Kʼianga sikjaʼaitsjen ndʼaibi nga kʼoakisʼian ñaki tomasoana”. Jókoanni kisikʼéjna na̱jno̱ je Olaf. Itso: “Je xi tsakasenkaona kuinga koanmena nga nda koatejna ngixko̱n Niná. Nga nʼio tsjoakená Niná kʼoa nga tsjoáná kjoachoya  kui xi tsakasenkaona nga ñaki tondiaa kisikʼéjna je na̱jno̱”.

Jngo libro xi itso: “Ñaki ʼyale nga tsjoáchʼinle ngayeje yaoná nga na̱jno̱ chjeen kʼoa sa nkjín sa nkjín chjota xi chʼin sʼele kʼoa xi biya” (The Tobacco Atlas). Ngatsʼi je chjota bení nga cáncer male je xi na̱jno̱ kjen, nga síkiʼaon je xa̱nle kʼoa kao ni̱ma̱le, ninga tsín bakinná chʼin jebi. Tonga je Organización Mundial de la Salud (OMS) kʼoatso nga je na̱jno̱ nʼio nkjín chjota síkʼien, je chjota xi chʼinʼbi tjínle, jolani tsa chʼintisi.

Je Jeobá kui síchjén je Biblia nga bakóyaná josʼin jchatokoán je kjoabijnachonná, je yaoná kʼoa kao kjoafaʼaitsjenná. Je Jesús i kitso xi tʼatsʼe jebi: “Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli” (Mateo 22:37). Je Niná kui xi mele nga ñaki nda kjuinkoaa je kjoabijnachonná, je yaoná kʼoa nga jchaxkoán. Kʼianga ʼyaa xi tʼatsʼe Niná kʼoa kao jmeni xi tjínndajinle, kui xi basenkaoná nga tsjoacha maa kʼoa nga ʼyachjiá jmeni xi tísʼín xi tʼatsaan. Kʼoa kui xi basenkaoná nga kjin bijnalee jmeni xi síkiʼaonná.

Je Jayavanth, jngo chjinexki xi India tsʼe, kanxjaʼaonjan nó nga na̱jno̱ kisken. Itso: “Tsakʼexkiaña rebista xi tsʼe chjinexki xi kui tínchja̱ni jokji síkiʼaonná je na̱jno̱. ʼBeña nga tsín ndatjín nga na̱jno̱ chjeen. Kʼoa saʼnda kʼoakixinle je chjota xi sixkile nga tsín tina̱jno̱ katakjenni, ninga kʼoani titsín kʼoakoanna an nga kisikʼéjna, ninga aon jaon kʼa tsakʼechjoale yaona”. Tonga, jméni xi tsakasenkao. Itso: “Nga kiskotʼaya Biblia kjitʼanangi kisikʼéjna je na̱jno̱. Je xi tsakasenkaona kuinga mena nga nda koatejna ngixko̱n Niná”.

Je niʼndi̱le na̱jno̱ xi bʼasje je chjota xi tíkjen kʼoa niʼndi̱ xi bitjole je na̱jno̱ nʼio tsjoáchʼinná. Je chjota xi tsín na̱jno̱ kjen tsa ya tíjna jñani kjen na̱jno̱ chjota koaan tsa cáncer sʼe̱le kʼoa tsa kjaʼaísa chʼin sʼe̱le. Nga xki̱ nó, jaon siento jmi chjota xi tsín na̱jno̱ kjen tjíobiya, xi kʼoasʼin tjíobiya yánchjínní kʼoa xtiʼndíní, kʼoa tokui je niʼndi̱le na̱jno̱ xotjíosíkao. Je én xi kitsjoa je OMS itso: “Ninga tochoa niʼndi̱le na̱jno̱ chjenjtá kʼoati síkiʼaonná”.

 Je Jesús kʼoakitso nga je kjoatéxoma xi títjon kuinga tsjoacha katamaa je Niná, kʼoa kʼoakitso nga je xi majaoni xi kʼoati nʼio chjíle kuinga tsjoacha katamaa xíngiaa, xi tsonile, chjota xi tiyojinlee, jolani tsa familianá kao miyoná. I kitso: “Katamatsjoachai xikʼa joni nga tijini” (Mateo 22:39). Kʼia tsakui tosi tonda kʼoasʼiaan jmeni xi síkiʼaon xi ngikʼa, alikuijin tinitjosoán jotso kjoatéxoma jebi. Je kjoatsjoacha xi tjínná kao xíngiaa basenkaoná nga kʼoanʼia jotso je én jebi: “Niʼyajin xi básjai nga nda kʼoéjna xi totsʼeni, tonga katabásjai nga nda kʼoéjna xi kjaʼaí” (1 Corintios 10:24).

Je Armen, jngo chjota xi Alemania tsʼe, itso: “Je familiana nʼio kʼoakitsona nga tsín tina̱jno̱ skenña nga̱ kʼoati tjíosíkiʼaon tsanda je. Kʼoa an alikui kuenta kisʼian ninga kjoaixi xi tjíotso”. Je Armen, kʼoatso jmeni xi kisikʼantjaiya kjoafaʼaitsjenle. Itsosa: “Jmeni xi koanjinna xi tso ya Biblia kʼoa nga koantsjoake Niná kui xi tsakasenkaona nga tsín tina̱jno̱ kiskenña kʼoa nga koanjinna nga tsín tsa toʼan xi tisikiʼoan yaona nga kʼoati tjíosíkiʼaon je xi ngikʼa”.

Je Biblia tsakinyakao je Olaf, je Jayavanth kao Armen nga kisikatío je na̱jno̱ xi kʼoasʼin tjíosíkiʼaon, je kʼoa kao chjota xi ya tjíokao. Ali tsa tokuijin nga koan kisikatíoni je na̱jno̱ nga be nga síkiʼaonná, kuinga tsjoake je Jeobá kʼoa koanmele nda tsakatio ngixko̱n. Je kjoatsjoacha xi síkʼaxki̱ ya 1 Juan 5:3 nʼio tsakinyakao. Itso: “Kʼoasʼin tjaochaa Niná, nga nikjitjosoán kjoatéxomale. Je kjoatéxomale ali ñʼaijin tjín”. Kjoaixiní nga tsín choa̱ ñʼai tíjna nga mangíntjenngiaa kjoafaʼaitsjen xi faʼaitʼa ya Biblia, tonga kʼianga tsjoachaa Jeobá alikui ai maná nga nitjosoán.

Nga tíʼmiyale chjota jngo tjíjtsa Sonʼnde, je Jeobá miyón chjota tjíosíkatíondaí nga tsín tina̱jno̱ tjíokjenni (1 Timoteo 2:3, 4). Jemachrianle nga je Jesucristo, je Chjotaxále Niná xi ya tíjna ngʼajmi nga kjoaʼaxin ngakjijnda jñani xá na̱jno̱ kjima nga kʼoasʼin jngoyale choʼnda tjíosʼín je chjota. Kjoaʼaxin tokʼia saʼndani kjoa jebi kʼoa jé xosʼin nga ñaki tsje katama je yaole kao kjoafaʼaitsjenle je chjota xi sitjoson (Isaías 33:24; Apocalipsis 19:11, 15).

Ali tsa nikinroajenjin tokuin ninga ñʼai kjimali nga tinikʼéjnai je na̱jno̱. Kʼianga koa̱ntsjoachai Niná kʼoa nga kʼoasʼin jchatokuin je na̱jno̱ josʼin bekon je Niná, kui xi koasenkaoli nga si̱kʼéjnai. Je testigole Jeobá nʼio nda koasenkaoli kʼoa kuitsoyali nga si̱chjain je kjoafaʼaitsjen xi faʼaitʼa ya Biblia josʼin kʼuínkoai yaoli. Kʼiatsa meli nga je Jeobá koasenkaoli, tíjnandaní nga tsjoáli nganʼiole (Filipenses 4:13, TNM).