Je Niná kui xi mele nga kuinókjoakoaa ngantsjai kʼoa nga kʼoakʼuínlee jmeni xi nikjaojiaan (Lucas 18:1-7). Je nrʼoéná nga̱ mandosinle xi tʼatsaan. Je Nʼainá xi tíjna ngʼajmi tjínle kjoanda nga kʼoatsoná nga koa̱n kuinókjoakoaa. A meli ji nga kuinókjoakoai je Niná. (Tʼexkiai Filipenses 4:6.)

Kʼianga bʼetsʼoalee je Niná ali tsa tokuijin nga katabasenkaoná, kui xá bʼetsʼoanilee nga nichriantʼalee (Salmo 8:3, 4). Kʼianga ñandia ñandia kʼoaʼmilee je Niná jotjín tokoán, je kjoamiyo xi tjínná xi kao je sa mataja sa matajasa. (Tʼexkiai Santiago 4:8.)

Je Niná ali tsakui síjéná tsa síxkón kji ñʼai én xi si̱chjén nga kuinókjoaa kʼoa tsa tojkoaa kuinyaje̱ jmeni xi kuixoán. Kʼoa kʼoati likui kui kʼoatso josʼin kuinyaa nga kʼoétsʼoalee. Je xi mele kuinga ñaki ni̱ma̱ná katanroajinni nga kʼoétsʼoalee (Mateo 6:7). Tobʼelañá, kʼianga tsakatio je chjota israelita, je Ana kui xá tsakʼétsʼoanile Niná nga kʼoakitsole jme kjoa xi tjínle ya yaniʼyale. Xijekoanni, kʼianga jetsjoa kisʼeyani kon, tsakʼétsʼoale Niná nga kitsjoale kjoanda. (Tʼexkiai 1 Samuel 1:10, 12, 13, 26, 27 kao 2:1.)

Nʼio tse kjoanda tjínná nga ma bʼetsʼoalee je Niná. Koaan kʼoakʼuínlee jme kjoa xi tjínná. Kʼoati koa̱n chʼa̱sjengʼaa kʼoa kʼoailee kjoanda nga títsjoáná ngayeje xi machjénná. Kʼoétsʼoalee ngantsjai je Niná. (Tʼexkiai Salmo 145:14-16.)