Je Biblia kʼoatsokixi jmeni xi sʼin je Jeobá kao Jesucristo, tʼatsʼe kjoachjaʼatokon xi kijnale je Na̱i. Je Biblia itso: “Kui nga tsʼatsenni ʼndíle Niná, jméni nga sikixoyasíni xále na̱i” (1 Juan 3:8). Nichxin xi tiyoaa ndʼaibi, nʼio tjín kjoaxkaiʼa, kjoajticha kʼoa kao kjoatsʼen, tonga kjoa jebi tjóxinní. Xi ijngosani, je Jesús kʼoatso nga “je na̱i xi batéxoma sonʼndebi kuichonsjeni”, xi tsonile, tjóxinní (Juan 12:31). Kʼianga jetjóxin ánkje tsʼen jebi, kʼiaa koaitsʼia je sonʼnde chjotse kʼoa ñaki sʼee kjoanyʼán kʼoa jtín sʼin kuiyoaa (2 Pedro 3:13).

Tonga jókoa̱nni je chjota xi ñaki tsín mele nga sikʼantjaiya yaole kʼoa tosi tonda kui mele kʼoasʼin xi chʼaotjín. Je Biblia itso: “Tojé chjota xi kixi xi koatio i̱ sonʼnde, kʼoa je xi tsín jme jée tjínle je xi i̱ koatio. Tonga je xi tsʼen tjóxin i sonʼnde, kʼoa tjóneyaa je xi bʼanacha” (Proverbios 2:21, 22). Je xi chʼao sʼín tjóxinní kʼoa kjoanyʼán sʼe̱. Kʼianga jenda koa̱nchon, je chjota xi sitjosonle Niná tobijbi tjóxinle je jée xi yʼa (Romanos 6:17, 18; 8:21).

Kʼianga kjoaʼaxin Niná je kjoatsʼen ali tsa robot sikao chjota, ali tsa kjoaʼaxinle je kjoandái xi tjínle. Je xi sʼin Niná kuinga kuitsoyaná je kjoatéxomale kʼoa koasenkaoná nga si̱kʼéjnaa kjoafaʼaitsjen xi tsín kixi tjín kʼoa tsa jmeni xi chʼao nʼia.

Kʼoa jméni xi sikao je kjoaxkón xi satío xi kʼoasikji kjoañʼai tjíosíkjaʼáná. Je Niná jekʼoakitso nga je Chjotaxá xi tsʼe koatexoma i̱ Sonʼnde kʼoa je xi Rey sʼin kisikʼéjna jé Jesucristo. Kʼoa je Jesucristo tjínle nganʼio nga sindaya ngatsʼi je xi chʼin tjínle (Mateo 14:14). Je ʼNdíle Niná kʼoati tjínle nganʼio nga kjoaʼaxin je kjoaxkón xi sʼe (Marcos 4:35-41). Kjoaʼaxin jmeni xi toxijña faʼainená kʼoa jmeni xi tsín choyalee (Eclesiastés 9:11). Kʼianga jekoatexoma Jesucristo, nijngojinla kjoaxkón tikjoaʼaíneni je chjotasonʼnde (Proverbios 1:33).

Kʼoati tjínle kjoachoya je chjota xi miyón mani xi kjoaxkón kʼienjin. Kʼianga kjesa faʼáyajinle je Lázaro, xi miyole koanni je Jesús, i kitso Jesús: “An nía xi sikjaʼáya, kʼoa an nía xi kjoabijnachon” (Juan 11:25). Tojosʼin tiʼyaa, je Jesús tjínle nganʼio nga sikjaʼáyale je chjota xi jekʼien, nga tsjoá ijngokʼanile kjoabijnachon.

Kʼiatsa meli nga ya kuijnai jngo sonʼnde jñani nga tsín tikui xi chʼaotjín kʼoakoa̱ntʼainni je xi nda chjota, chótʼayai je Biblia. Yaa kuitsoyali tʼatsʼe Niná xi kixi kʼoa jmeni xi tjínndajinle. Je testigole Jeobá xi ya tsʼe jñani nga tijnai, koaan kuitsoyali. Koaan tjasjai kʼoa tsa maije̱ koaan chjílai je xi bʼasje rebista jebi.