Smita, * jngo chjoón xi kanxjaʼaon nóle, xi ya tsʼe Daca (Bangladés), kʼoasʼin tsaʼyale nga nʼio nda chjota. Kʼoatso je chjota nga nʼio tsjoa tjínle chjoón jebi kʼoa nga nʼio tsakasenkao je chjota xi kjaʼaí nga tsakakóyale xi tʼatsʼe Niná. Tonga ñaki tokʼoakoanle je familiale kʼianga jngo chʼin kiskatʼale je Smita kʼoa nga saʼnda tsín jngo xomana kʼienni.

Je James kao chjoónle, xi jeme kanxjaʼaon nóle, kʼoatisʼin tsabekon je chjota josʼin tsaʼyakon je Smita. Jekjoan jngo jao nó kʼianga ya kikonle je miyole xi tjío ya costa oeste ya Estados Unidos tonga tsín tijaʼaini. Yaa kʼien ya yandiaa kʼianga jngo kjoaxkón kisokole ya carretera. Kʼoa nʼio ba kisatiole je xínkjín kʼoa kao miyole.

Je kjoachjaʼatokon kao kjoatsʼen tjín tojñani. Je kjoajchán síkʼien sondado kao xi toxkia chjota. Nkjín jmi chjota mʼe xi tsín jme jée tjínle xi totʼatsʼe kjoaché kao kjoatsʼen. Kʼoa nga toʼi̱ ma jme xi male chjota kʼoa mʼe. Kʼoa je chʼin nga tsaotʼale je chjota, aliʼya xi síchatʼale, kʼoama xi jejchínga, xi sʼa xti, xi tjínle tao̱n kao xi tsínle. Kʼoa je kjoaxkón xi bichóne chjota ñaki síkjeson naxinandá. Kʼoa nyaon nyaon tíchʼasjengi chjota kʼoa to taon tjíoʼya. Tsakui nichxin kʼoati kui kjoa jesa kitjatojin.

Kʼianga kʼoama, sakʼoaa i̱ bixoán:

• Ánni nga kui xi chʼaotjín kʼoamatʼainsíni je xi nda chjota.

• A je Niná tjínle jée.

• A toxijña faʼainená jmeni kjoaxkón xi matʼeen axo jé chjota xosʼín.

• A kui tsokʼoa xi karma ʼmi, xi tsonile, nga kui tibʼechjía jmeni xi chʼao kinʼia kʼianga tsakiyoaa ngasʼa.

• Kʼiatsa tíjna jngo Niná xi nʼio tse nganʼio tjínle, ánni nga tsín síkuindasíni je xi nda chjota.

• A kjoaʼaí nichxin nga tjóxin je kjoatsʼen kao kjoachjaʼatokon.

Kʼianga jchaa xi tʼatsʼe jebi kataʼyala: Ánni nga kui kʼoamasíni xi chʼaotjín. Kʼoa jméni xi sʼin Niná tʼatsʼe kjoa jebi.