Kʼianga noʼyalai noticia, tsakui nichxin ʼyai nga nʼio chʼao tjíosʼín chjota kʼoa nga kui relijión sakʼoa síchjén nga kʼoasʼín. Tonga ali tsa to ngatsʼijin relijión nga tʼatsʼe Niná tínroani (Mateo 7:15). Me totíchʼanachale ngatsʼi chjota. (Tʼexkiai 1 Juan 5:19.)

Tonga je Niná bení nga tjín chjota xi ñaki mele skoe̱ xi tʼatsʼe, xi tsjoake xi ñaki kʼoatjín kʼoa kao xi kixi tíjna (Juan 4:23). Kuinga kʼoatsosínile Niná chjota jebi nga katabásjai xi kixi tíjna ya Biblia. (Tʼexkiai 1 Timoteo 2:3-5.)

Je Jeobá jtín sʼin tjíosíkatío je chjota xi kjaʼaí kjaʼaí relijión tjíojin tsakai. Jótísʼínnile. Kui tíbakóyale xi ñaki kʼoatjín kʼoa tíbakóyale nga ñaki tsjoake katama xínkjín (Miqueas 4:2, 3). Kʼoasʼin jchani je relijión xi kixi nga chótsenlai josʼin bekon xínkjín. (Tʼexkiai Juan 13:35.)

Je xi ñaki choʼndale Niná ma makjainle jmeni xi tso je Biblia kʼoa sítjoson jmeni xi tso je kjoatéxomale Niná (2 Timoteo 3:16). Bexkón je jaʼaínle Niná (Salmo 83:18). Xi ijngosani, tsoyason nga tojé je Chjotaxále Niná xi koa̱nle nda sikatío je chjotasonʼnde (Daniel 2:44). Je Jesús kjenngile, jngoyale síʼisenle chjota kʼianga binyakao (Mateo 5:16). Kʼoa kʼoasʼin ʼyanile nga̱ fisíxatʼa je chjota nga fikjákaonajmíni jme kjoanda xi kjoaʼaíkao je Chjotaxále Niná. (Tʼexkiai Mateo 24:14 kao Hechos 5:42; 20:20.)