XI NGISA TÍNCHJA̱NI REBISTA JEBI | A MANDOSINLE NINÁ XI TʼATSI
Je Niná síkuindali
“Je Niná tíkotsenle je ndiaale chjota, kʼoa tíkotsenle josʼin tjíobinyá ndso̱ko̱.” (JOB 34:21)
Kʼianga sʼa ʼndí kjoan je xtiʼndí ngisa machjénle nga koa̱nkuinda
ÁNNI NGA TSÍN MAKJAIN KʼASÍNILE: Tojosʼin tjíokotʼayason je chjotachjine, je galaxia xi tíjnajin sonʼndená jngo sientolaxó jmi miyón planeta tjínle. Nga kʼoasikji tse kijna ngʼajmi, nʼio nkjín chjota xi itso: “Jósʼin skótsennile Niná jmeni xi sʼín je chjota nga toʼinakji ʼndí je sonʼnde xi tjíoson”.
JMÉ XI BAKÓYA JE BIBLIA: Je Jeobá alikui xá kitsjoaniná je Biblia nga tosichajinniná. Je Niná itsoná: “Kʼianga tsjoale kjoafaʼaitsjen skotsenle” (Salmo 32:8).
Tobʼelañá je Agar, jngo chjoón xi Egipto tsʼe, xi kʼia tsakʼejna nga nó 1900 nga kjesa chʼajin nó 1. Ñandia kʼianga jngo kjoa kisʼele je Agar kao Sarai, xi chjoónnaile mani kʼoa yaa ʼndekixí kitokachjinga. A kisichajin Niná je chjoón jebi nga kʼoakisʼin. Mai. Je Biblia kʼoatso nga je ánkjele Jeobá koansjaile kʼoa kitsole: “Je Jeobá tínrʼoé jokji kjoaba tijnajin”. Kʼoa Agar kitso: “Jiní jngo Niná xi tichotsain” (Génesis 16:4-13).
Je Niná kʼoati tíbeli tsanda ji. Tobʼelañá, jngo na̱ síkuindaa ngatsʼi je ʼndíxtile, tonga ngisa síkuinda je xi sʼa ʼndí kjoan nga̱ ngisa machjénle nga koa̱nkuinda. Tikʼoasʼinni je Jeobá, ngisa síkuindaná kʼianga tínroajen tokoán kʼoa nga tínroajen nganʼioná. Je Jeobá itso: “Je ʼnde jña tijna ngʼaní kʼoa tsje chon, kʼoa kʼoati ya tijnakoa je xi kjoaba tíjnajin kʼoa xi nangi kjia kon, ánni nga tsjoanganʼiosínile je xi nangi kjia kon kʼoa nga sinʼiosíña kon je xi kjoaba tjíojin” (Isaías 57:15).
Tsakui nichxin i̱si: “Jósʼin bena Niná. A tokui kotsenle jokjiʼe̱ axo kui kotsenle jotjín je ni̱ma̱na kʼoa a majinle jotjín tokoan”.