1, 2. Jmé xi síchjén je Jeobá nga fákao je choʼndale.

JOKJI nga tínroani nichxin, je Jeobá nkjín koya josʼin tíbándiaale je naxinandále. Nichxin kjoatse kisichjén ánkje, sén kʼoa kao nijñá nga kʼoakitso jme xi koa̱n nichxin xi nroa kʼoa tsa maije̱ kʼianga jngo xá kitsjoale choʼndale (Núm. 7:89; Ezeq. 1:1; Dan. 2:19). Sakʼoaa chjota kiskoejin xi kinchja̱ngajaole, xi kʼoakitsole chjota jmeni xi mele Niná nga sʼin. Tojoyesʼin kichonile énle Niná je chjota, je xi kisitjoson nʼio tse kjoanichikontʼain tsakʼaile.

² Nichxin xi tiyoaa ndʼaibi, kʼianga bándiaaná je Jeobá kui síchjén je Biblia, nganʼiotsjele kʼoa kao jtín (Hech. 9:31; 15:28; 2 Tim. 3:16, 17). Je Jeobá nʼio nda bándiaaná, joxi tinoʼyañá je jta̱le nga títsoná: “Kui jebi je ndiaa. Ya titsomayao” (Is. 30:21). Je Jeobá kʼoati síchjén je Jesús kʼianga fákaoná. Jé ngʼajko̱ kisikʼéjnale je jtín, kʼoa je Jesús jé “choʼnda xi nʼiotʼakon, xi nda be xá” tísíchjén nga tíbándiaale je jtín (Mat. 24:45). Tjínnele nga koanngíntjenngiaa josʼin bándiaaná je Jeobá kʼoa nga si̱tjosonlee, nga̱ tokʼiaa tsa kʼoasʼiaan nga sʼe̱ná kjoabijnachon xi tsínkʼia fetʼa (Heb. 5:9).

3. Jméni xosíkaoná nga tsín nitjosonnilee je Jeobá. (Chótsenlai sén xi faʼaitʼa ibi.)

³ Je Na̱i bení nga kuiyochoán kʼiatsa koanngíntjenngiaa  josʼin tíbándiaaná je Jeobá, kuinga mesínile kʼoechjoaná. Xi ijngosani, je ni̱ma̱ná koaanle kʼoanachaná kʼoa tsín tisi̱tjosonnilee Jeobá (Jer. 17:9). Kataʼyala jósʼin chja̱ʼaxinlee yaoná je che̱n xi bʼéchjoaná nga noʼyá jta̱le Niná. Kʼoati jchaa nga je xi koasenkaoná nga tosi tonda miyole koaan je Jeobá kuiní nga kʼoétsʼoalee ninga tojme xi koa̱n.

4. Jósʼin síkitsón kjoafaʼaitsjenle chjota je Na̱i.

⁴ Je Na̱i síkitsón kjoafaʼaitsjenle chjota kʼoa síchjén énndiso kao je én xi síkʼabíson chjota nga bʼanacha (tʼexkiai 1 Juan 5:19). Je xo̱n, radio, telebisión kao Internet bichó tojña saʼndani. Ningalani machjén jebi, tonga kʼoati kui kaníbason nga kui kʼoakatasʼín chjota je xi kontra tíjnale kjoatéxomale Jeobá (Jer. 2:13). Tobʼelañá, ndasʼin nchja̱ni tʼatsʼe chjota xi tixʼin xínkjín bixankaoni kʼoa tsa je xi tiyánchjín xínkjín bixankaoni. Kʼoa nga kʼoama, je chjota kʼoasʼin síkjaʼaitsjen nga nʼio faʼatone choa̱le jmeni xi tso je Biblia tʼatsʼe chjota xi kʼoasʼín (1 Cor. 6:9, 10).

5. Jméni xi sʼiaan nga tsínkui én xi síkʼabíson Na̱i skénʼndóbʼakjáná.

⁵ Jméni xi koa̱n sʼin je xi tsjoake kjoatéxomale Jeobá nga tsínkui skénʼndóbʼakjá jmeni xi síkʼabíson je Na̱i. Jósʼin skoe̱ni jmeni xi ndatjín kao xi chʼaotjín. Kʼiaa nga “tje̱njintokon kʼoéjna xi tʼatsʼe” Énle Niná (Sal. 119:9). Je kjoafaʼaitsjen xi faʼaitʼa Énle Niná basenkaoná nga ʼyaa jmeni xi ñaki kʼoatjín kʼoa jmeni xi to énndiso (Prov. 23:23). Je Jesús kui kisikʼaxki̱ je én xi faʼaitʼa xo̱nle Niná kʼianga kʼoakitso nga tsín “tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná [Jeobá]” (Mat. 4:4). Jebi kui xi tsonile nga tjínnele koa̱nná si̱chjén je kjoafaʼaitsjen xi faʼaitʼa Biblia. Tobʼelañá, tongini nga kjesa tsjoájin Jeobá je kjoatéxomale, je José koanjinle nga tsín ndatjín tsa je koájnakao je chjoónle Potifar, nga̱ koa̱njngijée xi kao Niná tsa kʼoasʼin. Saʼnda tsínkui kiskaniya jko̱ tsa kjoaʼatone kjoatéxomale Jeobá kʼianga kʼoakitsole chjoónle Potifar nga katabajnakao (tʼexkiai Génesis 39:7-9). * Ninga nʼio tsakʼénele chjoón jebi, je José alikui je kinrʼoéle, jé Jeobá kinrʼoéle. Jméni xi bakóyaná jebi. Kʼianga jchaa jmeni xi ndatjín kʼoa jmeni xi chʼaotjín nʼio machjén nga kuinóʼyalee jta̱le Jeobá kʼoa nga tsínkui kuinóʼyalee je én xi síkʼabíson Na̱i.

6, 7. Jméni xi sʼiaan nga tsín je kjoafaʼaitsjenle Na̱i katabʼanachaná.

⁶ Jmeni xi tsoya relijión kjaʼaí kjaʼaí tso kʼoa je chjota kʼoasʼin síkjaʼaitsjen  nga tsín machjén nga koa̱njngísjai relijión xi ñaki kixi tíjna. Tonga tsa mená kuinóʼyalee je Jeobá, koasenkaoná nga koa̱nsjainá xi ñaki kixi. Tokui xi chjoéjiaan ʼyáni xi kuinóʼyalee. Kʼoa nga tsín ma nga jao chjota noʼyalee nga ñandia, machjén nga jchaa jotso jta̱le Jesús kʼoa nga je kuinóʼyalee, nga̱ jéní xi kiskoejin Jeobá kʼianga sikuinda je barréle (tʼexkiai Juan 10:3-5).

⁷ Je Jesús i kitso: “Tikuindao josʼin noʼyao” (Mar. 4:24). Je kjoafaʼaitsjen xi tsjoá je Jeobá ngotjo majinniná kʼoa ñaki kixiní, tonga machjén nga si̱kʼéjnandaa je ni̱ma̱ná kʼiatsa mená nga kuinóʼyalee. Tsa tsín si̱kuindaa yaoná, tochale je kuinóʼyalee je Na̱i ʼndele nga Niná kuinóʼyalee. Alikui kʼoaiʼndee nga je koatexomaná jmeni xi tjín sonʼnde, jolani tsa músika, video, chjota xi fajtaa, maestro kao chjota xi tsjoá kjoafaʼaitsjen (Col. 2:8).

8. 1) Jósʼin kʼoanachaná je ni̱ma̱ná nga ya jtsaoyaa je che̱nle Na̱i. 2) Jméni xi koa̱nná kʼiatsa tsín kuenta sʼiaan jmeni xi xkón tísíkʼéjnaná.

⁸ Je Na̱i bení nga chjotajée maa nga kui ngisa mangíntʼalee xi chʼaotjín. Kʼianga kui síchjén je Na̱i je jée xi kichʼá ngisa nʼio ñʼai maná nga kixi mangíntʼalee je Jeobá (Juan 8:44-47). Tobʼelañá, tsa jngo chjota xi tokui koaini nga nda tísʼele jmeni xi tísʼín kui kʼoasʼin jmeni xi tsín kʼoatjín kon nga sʼin tsakai (Rom. 7:15). Jméni xosikao. Tsakui nichxin tobijbi likui tikisitjosonnile Jeobá. Tsakui nichxin likui tsabe nga xkón jetíbʼejna kʼoa tsa maije̱ tokjoa koanle. Tobʼelañá, tsakui nichxin likui titsakʼétsʼoani, likui tinanda kitsoyasonni kʼoa likui tinanda kini kjoajtín. Xijekoan, chan kui kisikinjele jme xi kisimekon kʼoa kui kʼoakisʼin jmeni xi chʼaotjín. Jméni xi koa̱n sʼiaan nga tsín kʼoakatamaa. Tje̱nyatokon kuiyoaa tsa jme xi xkón tísíkʼéjnaná kʼoa kjitʼanangi si̱kʼantjaiyaa yaoná. Kʼiatsa je jta̱le Jeobá kuinóʼyalee, alikui je kuinóʼyalee je chjota xi yátsʼi̱n binyale (Prov. 11:9).

9. Ánni nga nʼio chjísínile nga ndi̱to̱n si̱kjaʼaitsjenjiaan tsakui xi chʼaotjín kjimametokoán.

⁹ Kʼianga ʼya ndi̱to̱nle jngo chʼin, ngisa tjín xkile. Tikʼoasʼinni, kʼiatsa ndi̱to̱n jchaa nga kui xi chʼaotjín kjimametokoán kʼoa kjitʼanangi si̱ndayaa yaoná, alikui ya jtsaoyaa je che̱nle Na̱i kʼoa alikui kui kʼoasʼiaan josʼin mele (2 Tim. 2:26). Jméni xi sʼiaan kʼiatsa kui tinikjaʼaitsjeen kʼoa kui tinimetokoán jmeni xi tsín sasénle je Jeobá. Tjínnele kjitʼanangi je Jeobá koanngíntʼalee, kuinóʼyá je  kjoafaʼaitsjen xi tsjoá kʼoa si̱tjosoán (Is. 44:22). Kʼiatsa kui kʼoasʼiaan je xi tsín ndatjín nʼio tse kjoaʼaon sikʼéjnajinná ninga je Jeobá kjuintʼa ijngokʼanilee. Ngisa ndatjín nga si̱kjaʼaitsjeen tiʼani nga kje che̱nle Na̱i kayajián.

10, 11. 1) Jméni xi bakó jngo xi kjoangʼakon tíbʼetʼale. 2) Jméni xi bakóyaná jme xi kisʼin je Coré, Datán kao Abiram.

¹⁰ Tjínnele si̱kjaʼaitsjenjiaan nga je ni̱ma̱ná kʼoati koa̱nle sikjinná je Jeobá. Tobʼelañá, je kjoangʼatokon kao kjoaxkaiʼa, koaanle nga jée ska̱nijinná. Jngo chjota xi ngʼakon kʼoasʼin síkjaʼaitsjen nga koa̱n kʼoasʼin jme xi mele kʼoa nga tsín ʼya xi tjínnele kʼoakuitsole jmeni xi sʼin. Kʼoa nga kʼoakjoan tsakui nichxin likui bʼaʼén kʼianga tsjoále kjoafaʼaitsjen je xi ngikʼa kao xi chjotajchínga sʼin tjío kʼoa saʼnda tsín sítjoson jme xi tso je naxinandále Niná. Jngo chjota xi kʼoasʼín likui tinrʼoéni je jta̱le Jeobá.

¹¹ Kʼianga tjíotsoma je chjota israelita ya ʼndekixí, je Coré, Datán kao Abiram kontra tsakatiole Moisés kao Aarón. Je kjoangʼakonle chjota xokjoan kui xokisikao nga toje tsakʼani yaole josʼin tsakʼétsʼoale Jeobá. Tonga jmé xi kisʼin Jeobá. Kisikʼien je kʼoa kao chjotaxíjin xi ngikʼa (Núm. 26:8-10). Jebi kui xi bakóyaná nga nʼio chʼaosʼin bichótsjoá kʼianga bitjatone jmeni xi tso je Jeobá. Kʼoa kʼoati kui síkjaʼaitsjenjinná nga “je kjoangʼatokon síkʼatjenjennginá” (Prov. 16:18; Is. 13:11).

12, 13. 1) Jngo choa̱ tʼejnai xi bakó nga chʼaosʼin bichótsjoá nga xkaiʼa maa. 2) Jósʼin nga ngotjo maxkaiʼañá kʼiatsa tsín ndi̱to̱n kʼoéchjoalee yaoná.

¹² Je kjoaxkaiʼa kʼoati xkón síkatíoná. Jngo chjota xi xkaiʼa kʼoasʼin síkjaʼaitsjen nga tsín je bakinle je kjoafaʼaitsjen xi tsjoá je Jeobá. Saʼnda sakʼoa kjoé tsojmi xi tsín tsa tsʼe. Kʼianga Naamán, sondado títjonle chjota sirio, koanndayani nga kjiʼndojon yaole tjín xi kitsjoa kjoatjaole Eliseo, tonga Eliseo alikui kiskoé. Kʼoa je Guehazí, je xi choʼndale koan je Eliseo, koanxkaiʼale tsojmi jebi kʼoa i kitso: “Tojosʼin nga tíjnakon je Jeobá, kjuítokatje̱nngile kʼoa skoe kʼa je tsojmi xi yʼa”. Alikui tsakájinkon Eliseo, kitokatje̱nngile Naamán kʼoa to énndiso kinchja̱ nga kisijé “jngo talento xi tsʼe tao̱nchxoa [...] kʼoa jaonga najño xi chʼakjá”. Kʼoa xijekoan saje Eliseo tsakʼéndisongále. Jmé xi koanle Guehazí nga kʼoakisʼin. Je tsakʼinle je chʼin xi kisʼele je Naamán (2 Rey. 5:20-27).

¹³ Kʼianga maxkaiʼa je chjota sakʼoa tokui fitsʼiani nga tjín xi mamekon. Tsa tsín ndi̱to̱n kjoaʼaxinle yaole ngotjo sikinjenile. Jmeni xi kisʼin je Acán kui bakóná. Je Acán kitso: “Kʼianga tsaʼbe nga tíjnajin jngo najño xi naskákji xi tsʼe Sinar kʼoa kao jao siento siclo je tao̱nchxoa kʼoa kao tao̱nsine xi ñachante siclo ai koanmena kʼoa kiskoeña”. ʼNdele nga kʼoasjengi jmeni xi chʼao tjín kisimekon, kisiché tsojmi jebi kʼoa yaa tsakatíoʼma ya ndʼianajñole. Kʼianga tsaʼyale jmeni xi kisʼin je Acán, je Josué kʼoakitsole nga kjoañʼai tsjoále Jeobá. Nga kui nichxin je kʼoa kao yaniʼyale la̱jao kinikʼienkaoni (Jos. 7:11, 21, 24, 25). Je kjoaxkaiʼa xkón tíjna kʼoa ngotjo bʼetʼaniná. Kuinga kuinyaxinsínilee “ngayije kjoachi̱nga̱” (Luc. 12:15). Tsakui nichxin sakʼoa chʼaotjín xi nikjaʼaitsjeen kʼoa tsa jme kjoachajngi fiyaje̱ jkoaa, tonga nʼio chjíle nga si̱kinjelee je kjoafaʼaitsjenná kʼoa nga tsín kʼoaiʼndelee yaoná nga kuijnyíjée (tʼexkiai Santiago 1:14, 15).

14. Jméni xi tjínnele sʼiaan kʼiatsa kui tíbʼetʼaná je kjoangʼatokon kʼoa kao kjoaxkaiʼa.

¹⁴ Je kjoangʼakon kʼoa kao kjoaxkaiʼa nʼio chʼaosʼin bichótsjoá. Kʼiatsa si̱kjaʼaitsjenjiaan  joma kui xi koasenkaoná nga tosi tonda kuinóʼyalee je Jeobá (Deut. 32:29). Ya Biblia je Jeobá kʼoatsoná jmeni xi ndatjín kʼoa jme kjoanda xi tje̱nkao nga kui kʼoanʼia. Kʼoa kʼoati tsoná josʼin bichótsjoá kʼianga kui xi chʼaotjín kʼoanʼia. Kʼiatsa kui xi chʼaotjín tíbʼétejinná je ni̱ma̱ná, xi totʼatsʼe kjoangʼakon kao kjoaxkaiʼa, koaan si̱kjaʼaitsjenjiaan josʼin kʼoetʼaná, josʼin kʼoetʼale xíngiaa kʼoa josʼin kuiyoaa ngixko̱n Jeobá.

15. Jméni xi tsoyaná je choa̱le Jesús.

¹⁵ Je Jeobá kui xi mele nga nda kuiyoaa (Sal. 1:1-3). Tsjoántsjainá kjoafaʼaitsjen kʼoa kʼiakjoan tsjoáná nga machjénná (tʼexkiai Hebreos 4:16). Ningalani chjotatsje koan je Jesús bení nga machjénle nga kjoakaonajmí je Jeobá, kuinga ntsjaintsjai tsakʼétsʼoasínile. Je Jeobá kitsjoanganʼiole kʼoa tsakándiaale. Kisikasénle ánkje xi kisikuinda, kitsjoale nganʼiotsjele kʼoa tsakándiaale nga kiskoejin xi tejao pastrole. Kʼoa je Jeobá kinchjani saʼnda ngʼajmi nga kʼoakitso nga tísasénkon je ʼNdíle kʼoa nga je títsjoánganʼiole (Mat. 3:17; 17:5; Mar. 1:12, 13; Luc. 6:12, 13; Juan 12:28). Tojo kisʼin je Jesús machjén nga kʼoétsʼoalee je Jeobá kʼoa kʼoakʼuínlee jotjín ni̱ma̱ná (Sal. 62:7, 8; Heb. 5:7). Kʼiatsa kʼoétsʼoalee je Jeobá koa̱nchriantʼalee kʼoa kʼoasʼin kjuinkoaa yaoná josʼin nga je kuitjongʼa.

16. Jméni xi tjínnele sʼiaan kʼianga koasenkaoná je Jeobá.

¹⁶ Ninga bʼéjnabasenná ngatsʼiaa je kjoatéxomale Jeobá, aliʼya xi kjoanʼio bʼénele nga katafitjenngi je kjoafaʼaitsjenle. Tjínnele nga si̱jélee je nganʼiotsjele tsa mená nga katabándiaaná, tsa si̱jélee tsjoáná (tʼexkiai Lucas 11:10-13). Je Biblia itso: “Tikuindao tsokʼoa josʼin noʼyao” (Luc. 8:18). Tobʼelañá, tsakui si̱jélee Jeobá nga katabasenkaoná nga tsín tikui katakajinñá je kjoachajngi tonga tsa pornografíani chotsenlee kao pelíkula xi kjoachajngi tje̱nkao, to chjotajaonkjaínjinni kjimaa. Kʼianga koasenkaoná je Jeobá machjén nga ya kuiyoaa ya jñani tíjna je nganʼiotsjele. Jolani, ya jña satíoná kjoajtín. Nʼio nkjín je ndsʼee xi tsínkui tjíotsaojin je xi chʼaotjín nga̱ tjíonrʼoéle Jeobá kʼianga satío kjoajtínná. Kʼoa kʼianga tsen male nga kui tjíosímekon xi chʼaotjín kjitʼanangi síndaya yaole kʼoa alikui kjoa tsaojin (Sal. 73:12-17; 143:10).

17. Ánni nga xkón biyosíñá kʼianga to yaoná ninʼiotʼaa.

¹⁷ Si̱kjaʼaitsjenjinla je rey David. Kʼianga sʼa xti kisikinjele Goliat, jngo chjota xi nʼio ngʼa kisʼe. Xijekoan, je David sondado koan kʼoa rey sʼin tsakʼejnale je naxinandá Israel, kisikuinda je naxinandá kʼoa nda kisʼin. Tonga kʼianga to yaole kisinʼiotʼa, je ni̱ma̱le tsakʼanachale kʼoa jngo jée xi nʼio ai tíjna tsakajngi kao Bat-seba kʼoa saʼnda kʼoasʼin tsakʼéne nga katanikʼien Urías, je xʼinle Bat-seba. Tonga nga tsakatekjáyale Jeobá, je David nangitokon koan kʼoa kʼoakitso nga tsakajngijée kʼoa ndasʼin tsakʼejna ijngokʼani ngixko̱n Niná (Sal. 51:4, 6, 10, 11).

18. Jméni xi koasenkaoná nga tosi tonda je Jeobá kuinóʼyalee.

¹⁸ Koanngíntjenngiaa je kjoafaʼaitsjen xi faʼaitʼa ya 1 Corintios 10:12, kʼoa alikui to yaoná si̱nʼiotʼaa. Kʼianga tsín maná nga toñá chjeen je ndiaaná, toʼyajinni xi kuinóʼyalee: tsa je Jeobá kʼoa tsa je Na̱i (Jer. 10:23). Kuinga nʼio machjénsíni nga tosi tonda kʼoétsʼoalee je Jeobá kʼoa koanngíntjenngiaa josʼin koandiaaná je nganʼiotsjele. Tosi tonda je Jeobá kuinóʼyalee.