XI NGISA TÍNCHJA̱NI REBISTA JEBI | A MANDOSINLE NINÁ XI TʼATSI
A mandosinle Niná xi tʼatsi
“Tonga an tsínna xi basenkaona kʼoa ma̱a tijna; je Jeobá kuenta tísʼínna.” * (DAVID, XI REY KOAN YA NAXINANDÁ ISRAEL, KʼIANGA SIGLO XI, NGA KJESA CHʼAJIN NÓ 1)
“Ngatsʼi naxinandá kʼoasʼin mangóson joni tsa jngo tin nandá xi yaya xjoa̱.” (ISAÍAS 40:15)
A be David anni nga kʼoasʼin kisikjaʼaitsjenni nga kuenta tísʼín je Niná, nga mandosinle xi tʼatsʼe. A mandosinle Niná xi tʼatsi. Nʼio nkjín chjota xi tsín makjainle nga mandosinle Niná xi tʼatsʼe. Ánni.
Jngo koya anni kʼoatsoni kuinga nʼio ngʼa tíjna je Niná. Xi kao Niná “ngatsʼi naxinandá kʼoasʼin mangóson joni tsa jngo tin nandá xi yaya xjoa̱; kʼoasʼin tíʼyakon joni tsa chao xi yajon libra” (Isaías 40:15). Saʼnda jngo chjota xi xo̱n kji, xi tsín makjainle tʼatsʼe Niná, kitso: “Síxkónla koa̱nná tsa kʼoasʼin koa̱nkjainná nga mandosinle Niná xi tʼatsaan”.
Tjínkʼa chjota xi kʼoasʼin síkjaʼaitsjen nga tsín bakinle nga Niná kuinyakao nga nʼio chʼao tjíosʼín. Tobʼelañá, jngo chjota xi Jim ʼmi itso: “Kʼoakixinntsjaile Niná nga katabasenkaona nga skennʼioʼa yaona, tonga kjoanʼio je kjoajti síkinjena. Kʼoa kʼoasʼin kisikjaʼaitsjen nga nʼio chʼao kjoan kʼoa nga saʼnda tsín koa̱nle koasenkaona je Niná”.
A nʼio kjin tíjna Niná kʼoa a tsín be nga i̱ tiyoaa. Jósʼin bekon Niná je chjota. Jé Niná koasenkaoná nga jchaa xi tʼatsʼe jebi. Ya Biblia, je Niná kʼoatsoná nga tsín kjin tíjna kʼoa nga mandosinle xi tʼatsaan. Hechos 17:27 itso: “Tsín tsa kjin tíjnaná [Niná] nga jngójngoá”. Je kjoaʼmiya xi ngi ño, kui jchaa jmeni xi tso je Biblia nga mandosinle xi tʼatsaan je Niná kʼoa josʼin tíbakó nga mandosinle je chjota, jolani tsa ji.
^ párr. 3 Salmo 40:17; ya Biblia kʼoatso nga Jeobá ʼmi jaʼaínle Niná.