XI NGISA TÍNCHJA̱NI REBISTA JEBI | A MANDOSINLE NINÁ XI TʼATSI
Je Niná majinle jotjín tokuin
“Ji Jeobá, ji tichotʼajin ngakjijngo yaona, kʼoa ʼyanái.” (SALMO 139:1)
“Tsaʼyanái saʼnda nga sʼa kjimajcháya yatsʼoa̱ na̱na.” (SALMO 139:16)
ÁNNI NGA TSÍN MAKJAIN KʼASÍNILE: Nʼio nkjín chjota xi kʼoasʼin makjainle nga to chjotajée sʼin bekonná Niná kʼoa nga tsín bakinná nga koa̱nndosinle xi tʼatsaan. Kendra, xi depresión kisʼele, chʼao kisʼe kon nga tsín kʼoamale nga ñaki kʼoakjoansʼin fitje̱nngi je kjoatéxomale Niná. Je Kendra itso: “Kuinga tsín titsakʼetsʼoasíña”.
JMÉ XI BAKÓYA JE BIBLIA: Je Jeobá ali tsa tokuijin kotsenle je jée xi bijnyaa, kʼoati be jotjío je tokoán. Je Biblia itso: “Nʼio nda be josʼin koanndaa, kʼoa faʼaitsjenle nga to chaoñá”. Kuinga tsín kʼoasíkaosíniná josʼin bakinná nga kʼoasʼin bijnyijée, tosa mamakená kʼoa síchatʼaná tsa kʼoamaniná je jéená (Salmo 103:10, 14).
Tobʼelañá je rey David, xi kanikʼaxkiaa ya kjoaʼmiya xi kabitjatoá, i kitsole Niná: “Tsaʼyanái saʼnda nga sʼa kjimajcháya yatsʼoa̱ na̱na, kʼoa yaa libroli tjítʼaxo̱n ngayeje. Chótʼajinnái, ji Niná, kʼoa kataʼyai jotjín ni̱ma̱na” (Salmo 139:16, 23). Ningalani tsakajngijée je David kʼoa kui kʼoakisʼin je jée xi nʼio ai tíjna, bení nga je Jeobá skoe̱ ni̱ma̱le nga ñaki kʼoakoannile jme xi kisʼin.
Kʼoakʼoé tokoán nga je Jeobá nʼio nda majinle jokjoaan. Je Biblia itso: “Je chjota tokui kotsenle jmeni xi faʼaya xko̱n; tonga je Jeobá kui kotsenle jotjín je ni̱ma̱le chjota” (1 Samuel 16:7). Je Jeobá bení anni nga kʼoakjoanñá jokjoaan. Bení josʼin bʼetʼaná je ntje̱ jña kinroañá, josʼin koanjchíngaa, josʼín je chjota xi tiyojinlee kʼoa jokjoaan. Kʼoati be kʼoa bechjí jokji bʼenelee yaoná nga nda nʼia ninga saténgiaa.
Tonga jósʼin síchjén Niná jmeni xi be tʼatsi kʼianga sínʼio tokuin.