XI NGISA TÍNCHJA̱NI REBISTA JEBI | A MANDOSINLE NINÁ XI TʼATSI
Je Niná kui xi mele nga si̱chriantʼalai
“Niʼyajin xi koa̱n nga kjoaʼaíkonna, tsa je Nʼainá xi kisikasénna likui kjoaʼaíkao.” (JUAN 6:44)
ÁNNI NGA TSÍN MAKJAIN KʼASÍNILE: Nʼio nkjín chjota xi makjainle tʼatsʼe Niná, tonga kʼoasʼin síkjaʼaitsjen nga nʼio kjin tíjna je Niná. Christina, jngo chjoón xi ya Irlanda tsʼe, xki̱ xomana fi ya yo̱ngo̱ kʼoa itso: “ʼBeña nga je Niná kisinda ngayeje tsojmi xi tjín, tonga likui ʼbe xi tʼatsʼe. Nisañandiajinla tsen mana tsa machriantʼale”.
JMÉ XI BAKÓYA JE BIBLIA: Tsakui nichxin kjin tiyolee Niná maná, tonga alikʼia nga tsjionkonná. Je Jesús jngo choa̱ tsakʼéjna josʼin síkuindaná je Niná, kitso: “Tsa jngo chjota tjínle jngo siento barré, kʼoa tsa kicha jngo barré, a tsí tsa sikatío je xi ño kan kaoni xjaʼaonño, nga koai yajinjñá nga koai kásjai je xi kacha”. Jósʼin tsoyanile jebi. Je Jesús kitso: “Likui mele Nʼaino xi tíjna ya ngʼajmi nga cha̱ jngo xi je ʼndíxtibi” (Mateo 18:12-14).
Je Niná nʼio bechjí nga jngó jngó chjota. Jósʼin básjai je barré xi cha. Tojo tso testo xi fitsʼiani kjoaʼmiya jebi jé Niná faʼaikao.
ʼYáni xi fákaoni tʼatsʼe Niná je chjota ya niʼyale kʼoa kao ya yandiaa
Je Niná mele nga sichriantʼale je chjota xi ñaki kʼoatjío kon. Kʼianga siglo I, je Niná kisikasén jngo chjotale Cristo xi Felipe tsakʼin nga kikonle je chjota etíope xi jngo karro tíjnaya kʼoa nga kʼoakatatsole josʼin tsoyanile je én xi tongini kinokjoa xi tíbʼéxkia (Hechos 8:26-39). Kʼoa ñandia nga tsakándiaale je pastro Pedro nga ki ya niʼyale jngo chjotatítjonle sondado xi Roma tsʼe, xi Cornelio ʼmi. Chjota jebi tíbʼétsʼoale Niná kʼoa tíbʼénele yaole nga tísíxále Niná (Hechos 10:1-48). Je Niná kʼoati tsakándiaale je pastro Pablo kao chjota xi tje̱nkao nga ki ya jñani tíjna jngo xo̱ngá ya nitsinle naxinandá Filipos. Yaa tsabexkon jngo chjoón xi bexkón Niná, xi Lidia ʼmi, kʼoa je Niná “kiskoʼai ni̱ma̱le” chjoón jebi nga kinrʼoé jmeni xi kitso je Pablo (Hechos 16:9-15).
Je choa̱ xi kaʼyaa bakóná nga jesoa Jeobá kisikasén xi tsakinyakao je chjota xi tjíobásjai ánni nga koan tsabesíni xi tʼatsʼe. Nichxin xi tiyoaa ndʼaibi, ʼyáni xi kʼoasʼin fikonle chjota ya niʼyale nga tsoyale xi tʼatsʼe Niná kʼoa xi fákaoje̱ nga tjíotsoma ya yandiaa. Jéní je testigole Jeobá. Chjónangilai yaoli: “A je testigo tísíchjén tsokʼoa Niná nga tísíchriantʼana”. Kʼoatʼinlai Niná nga katabasenkaoli nga katamachriantʼalai. *
^ párr. 8 Tsa mesali jchai, chótʼai je video xi “Ánni nga machjénsíni nga chótʼayai Biblia” ʼmi, yaa tíjna ya www.pr418.com/mau ya Internet.
Tsa kʼoati meli jchai xi tʼatsʼe jebi
XI TʼATSAINJIN
Ánni nga machjénsíni nga chótʼayá je Biblia
Jngo tjíjtsa Sonʼnde miyón chjota xi jetjíobe jmeni xi nʼio kjonangile yaole kʼianga tjíokotʼaya Biblia. A tsí matsjoali nga kʼoati chótʼayai tsanda ji.
