ÁNNI NGA TSÍN MAKJAIN KʼASÍNILE: Tjínkʼa je chjota xi mele nga ninʼio kon, tonga kʼoasʼin síkjaʼaitsjen nga tsín ndatjín nga kʼoakʼuínlee Niná nga katabasenkaoná kʼianga kjoa tjínná. Jngo chjoón xi Raquel ʼmi itso: “Kʼianga sikjaʼaitsjen jokji chjota tjín sonʼnde kʼoa jokji kjoa tjínle, tochoani mana an je kjoa xi tjínna kʼoa kuinga tsín sijésínile nganʼio je Niná”.

JMÉ XI BAKÓYA JE BIBLIA: Je Niná tjín xi kisʼin kʼianga koasenkao je chjota kʼoa nga sinʼio kon. Ngatsʼiñá nga jée kichʼá kʼianga tsiaan. Kuinga tsín kʼoamasíniná nga ñaki kʼoakjoansʼin nitjosoán je kjoatéxomale Niná. Tonga “je Niná [...] koantsjoakená nga ñá. Kisikasén ʼndíle xi jéentjainá koanle” (1 Juan 4:10). Xi totʼatsʼe kjoabʼechjíntjaile Jesús, je Niná síchatʼaa je jéená, ma nda sʼe kjoafaʼaitsjenná kʼoa kʼoati tsjoáná kjoachoya nga koa̱n sʼe̱ná kjoabijnachon xi tsínkʼia fetʼa ya sonʼnde chjotsele, jñani nga to kjoanyʼán sʼe̱. * Tonga, a tongatsʼi chjota nga tsakakóle Niná nga mandosinle kʼianga kʼoasʼín tsakʼéchjíntjai axo nga jngó jngó ñá, jolani tsa ji.

Kataʼyala je choa̱le pastro Pablo. Ñaki kiskajin ni̱ma̱le kʼianga kʼoasʼin tsakʼéchjíntjainá je Jesús kʼoa kitso: “Je ʼndíle Niná, [...] koantsjoakena, [...] kitsjoantjai yaole xi tʼatsʼan” (Gálatas 2:20). Ninga kʼia kʼien je Jesús nga kjesa chjotale Cristo majin je Pablo, kʼoasʼin tsabekon je kjoabʼechjíntjai jebi joni jngo kjoatjao xi Niná kitsjoale.

Je kjoabʼechjíntjaile Jesús kʼoati jngo kjoatjao xi kitsjoali ji je Niná, kʼoasʼin tsakakónili jokji tsjoakeli. Kjoatjao jebi kʼoati tsjoáli “kjoajetakon” xi kʼoéjnantsjai kao kjoachoya. Kʼoa tojo tso je Énle Niná nʼio sikatíono kao “ngayije énno kao xáno xi nda tjío” (2 Tesalonicenses 2:16, 17).

Jeme jao jmi nó tjínle nga kitsjoantjainá kjoabijnachonle Jesús. Jósʼin ʼyañá nga tojo mandosinle Niná xi tʼatsaan ndʼaibi.