1, 2. Jmé xá xi kitsjoale Jeobá je Moisés, kʼoa jmé xi kitsole.

JÓSʼE̱ tokuin tsa yalani kʼuínkisenjnai ngixko̱n jngo chjotaxá xi ngisasa tse nganʼio tjínle kʼoa si̱toánntjai je naxinandále Jeobá. Tochale kuinókjuin kʼoa saʼnda tsín jchai jmeni xi sí. Jméni xi sʼiain nga tje̱n kuijnandai jmeni xi sí. Jméni xi sʼiain nga sʼe̱le nganʼio je énli, nga kataʼyale nga ñaki tsʼe Niná je én xi tinokjoai.

² Je Moisés kʼoakoan. Je Jeobá kʼoakitsole nga ya sikasén jñani tíjna faraón kʼianga kʼoasjentjai je naxinandále Niná nga choʼnda kjima kʼoa nga kjoañʼai tjíofaʼá ya Egipto. “Kʼoa je Moisés jé xi ngisasa nʼio ndʼé tikʼoajinni je chjota xi tsakatio sonʼnde.” (Núm. 12:3.) Kʼoa je faraón nʼio tsʼen kʼoa nʼio ngʼakon koan. Ninga kʼoalani, je Jeobá kʼoakitsole Moisés nga kʼoakatatsole faraón nga katasíkatíondaí je naxinandále Niná xi nkjín miyón mani (Éx. 5:1, 2). Kʼoa kuijin nga i̱ kitsoni je Moisés: “ʼYáni an nga ya kjuínrʼoesíña je Faraón kʼoa nga an kʼoasjesíña je chjota israelita ya Egipto”. Je Moisés kʼoajinsʼin kisikjaʼaitsjen nga tsín kuitjosonle xá jebi. Tonga je Niná kʼoakitsole nga tsín toje tíjna, kitsole: “Yaa tje̱n tijnakaole” (Éx. 3:9-12).

3, 4. 1) Jméni xi kitsokjonle Moisés. 2) A sakʼoaa kʼoamaná tsanda ñá jokoanle je Moisés.

³ Ánni nga kitsokjonsíni je Moisés. Kuinga kitsokjonni nga̱  kʼoasʼin kisikjaʼaitsjen nga tsín koa̱nkjainle faraón nga Jeobá kisikasén. Kʼoati kui xi kitsokjonle tsa tsín koa̱nkjainle je chjota israelita nga je Jeobá kiskoejin nga kʼoasje naxinandá Israel ya Egipto. Kʼoa i kitsole Jeobá: “Tonga tobʼelañá tsa tsín koa̱nkjainle kʼoa likui kjuinrʼoé je én xi kuichokaole, kʼoa i̱ kuitso: Alikui tsakakóli yaole je Jeobá” (Éx. 3:15-18; 4:1).

⁴ Tsakui nichxin tsínkʼia ya kʼuínkisenjnai ngixko̱n jngo chjotaxá. Tonga a sakʼoaa ñʼai mali nga chjakaoni tʼatsʼe Niná ninga toxkia chjota. Jmeni xi kitsole Jeobá je Moisés kʼoa jmeni xi koan nga koanskanni nʼio tse jmeni xi bakóyaná.

5. 1) Jméni xi kitsjoale Jeobá je Moisés nga katasíchjén. (Chótsenlai sén xi faʼaitʼa ya jña fitsʼiani kjoaʼmiya jebi.) 2) Jósʼin tsakasenkao Jeobá je Moisés.

⁵ Kʼianga kʼoakitso Moisés nga tsín ʼya xi koa̱nkjainle jmeni xi kuitso, je Niná tsakasenkao nga kitjosonle je xá xi kitsjoale. Je Biblia itso: “Kʼoa je Jeobá kitsole: Jméni xi kichʼatontsjai. Je i kitso: Jngoo yá. Je [Niná] i kitso: Tikʼatjenjinʼndai. Kʼoa je kisikʼatjenjinʼnde, kʼoa yá jebi jngo ye̱ tsakʼónya; kʼoa je Moisés kisikjinle. Kʼoa je Jeobá i kitsole je Moisés: Chjoai kʼoa ya nditsʼin tindoai. Xijekoan, kiskoé kʼoa jngo yá tsakʼónya nga jekjiantsja. Kʼoa je Niná i kitsole: Kʼoa jebi kuinga katamakjainle xi tʼatsʼe Jeobá je Ninále chjotajchíngale, je Ninále Abrahán, je Ninále Isaac, kʼoa je Ninále Jacob, nga kʼoasʼin kabakóli je yaole” (Éx. 4:2-5). Kao nganʼiole Niná, je yá xi yʼa Moisés ye̱ tsakʼónya. Kao kui choa̱ jebi koakoni Moisés nga Jeobá kisikasén kʼoa nga je koasenkao. Je Jeobá kitsole: “Kʼoa kui yá jebi chʼai kʼianga koakolai je choa̱” (Éx. 4:17). Kʼianga jetíjnale yá jebi je Moisés kʼoakisʼin jmeni xi tsakʼinle kʼoa be nga je Niná koasenkao ngixko̱n naxinandá kʼoa ngixko̱n faraón (Éx. 4:29-31; 7:8-13).

6. 1) Jméni xi tjínnele kichʼá kʼianga ʼmiyasoán, kʼoa ánni. 2) Ánni nga kʼoakitsosíni je Pablo nga “je énle Niná tíjnakon, kʼoa nʼio síxá”.

⁶ Kʼianga ʼmiyalee chjota je Énle Niná, jméni xi kichʼatontsjaa. Kui je Biblia kʼoa kui nichjén nga ʼmiyalee chjota. Ninga tjín chjota je xi toxkia libro sʼin bekon je Biblia, je Biblia énle Ninání kʼoa kui síchjén Niná nga fákaoná (2 Ped. 1:21). Kʼoa yaa faʼaitʼa jmeni xi sʼin Chjotaxále Niná nichxin xi nroaján. Je pastro Pablo i kitso: “Je énle Niná tíjnakon, kʼoa nʼio síxá” (tʼexkiai Hebreos 4:12). Ánni nga “je énle Niná tíjnakon” kitsosíni je Pablo. Kuinga ñaki bitjoson ngayeje jmeni xi tso je Jeobá (Is. 46:10; 55:11). Kʼianga makjainle chjota nga bitjoson jmeni xi tso je Niná síkʼantjaiyaa yaole.

7. Jméni xi sʼiaan nga nda si̱chjén je Énle Niná.

⁷ Je Jeobá kitsjoaná je Biblia, je énle xi ñaki tíjnakon. Koaan kao Biblia koakoñá nga ñaki kʼoatjín je én xi ʼmiyasoán kʼoa nga tʼatsʼe Niná tínroani. Kʼianga jekiskile je chjota hebreo je pastro Pablo, itso kjoafaʼaitsjen xi kitsjoale je Timoteo: “Nda [tichjain] je én xi kjoakixi” (2 Tim. 2:15). Jméni xi sʼiaan nga koanngíntjenngiaa tsanda ñá kjoafaʼaitsjen jebi. Nda chjoéjiaan je testo xi kʼoéxkialee je chjota xi nrʼoéná ánni nga kuichotsaojinsíni ni̱ma̱le. Kui xá kitjoni je tratado xi kitjo nó 2013 nga kuichotsaojin ni̱ma̱le je chjota.

8. Jókitso jngo superintendente xi tsʼe servicio xi tʼatsʼe je tratado chjotse.

⁸ Je tratado chjotse ngóson sʼin kisʼenda, tsa jngo xi koa̱nná si̱chjén, koa̱nná si̱chjén ngayeje. Jngo superintendente xi tsʼe servicio ya Hawái (Estados Unidos) i kitso: “Alikui ʼyaijin tsa kʼoasikji koasenkaonajin  je tratado chjotse nga mangínjin xki̱ niʼya kʼoa nga ʼmiyaijin jña nʼio tjín chjota”. Ánni nga nʼio nda machjénsíni tratado jebi kʼoa nga nʼio choa ñʼai masíniná nga nichjén. Je ndsʼee jebi kʼoatso nga kui josʼin tjíonda tratado jebi xi binyakao chjota nga kʼoatso josʼin síkjaʼaitsjen kʼoa kʼoasʼin nda fákaonajmíni. Kʼoatso nga kui basenkao je kjoachjonangi xi tjíotʼa jña fitsʼiani kʼoa nga tiya tjíotʼani jokoa̱n kuitso je chjota, nga tsínla kʼia sikjaʼaitsjen jmeni xi kuitso.

9, 10. 1) Jósʼin basenkaoná je tratado nga nichjén je Biblia. 2) Jñánile tratado xi nʼio nda jekinichjain, kʼoa ánni.

⁹ Nʼio nda kitjoejin je testo xi faʼaitʼa nga jngó jngó tratado. Tobʼelañá, kʼianga kui nichjén je tratado A chan tjóxin je kjoañʼai xi tjín, ninga “jaon”, ninga “mai” kʼoa ninga “tsakui nichxin” kuitso chjota, koaan ya koakolee pájina xi ijngo kʼoa koaan i̱ kʼuínlee: “Je Biblia itso”. Kʼoa xijekoa̱n, kʼoéxkialee Apocalipsis 21:4.

¹⁰ Kʼianga nichjén je tratado Jósʼin ʼyatokuin je Biblia, tojñanile nga jan koya xi kuitso chjota alijme xi koa̱nle, to i tʼinlai: Kuitsoñá je Biblia. Xijekoa̱n chjóxʼái tratado kʼoa tʼexkialai je testo xi faʼaitʼa: “Ngayije xo̱n Escritura [tʼatsʼe] Niná jinroani”. Kʼoa xijekoa̱n, koaan i̱ kʼuínlai: “Nʼio tse xi tsoyanile én jebi”. Kʼoa tʼexkialai Biblia ya 2 Timoteo 3:16, 17.

11, 12. 1) Jósʼin koa̱n si̱chjain je tratado nga ngisa tsjoa sʼe̱ tokuin nga kʼuínyasuin. 2) Jósʼin koa̱n si̱chjain je tratado kʼianga kʼuínchon ijngokʼalai chjota.

¹¹ Jé chjota xi kuitsoni tsa koa̱n nga tsesa kʼoéxkialee kʼoa chótʼayajinsaa je tratado. Ningalani mai, tsjoa sʼe̱ tokoán nga tojela kʼoakaʼmilee jmeni xi tso je tratado kʼoa tojela kabʼexkialee je Énle Niná. Ninga to jao jan bersíkulo kabʼexkialee nga títjon koaan kjaʼaí nichxin kjuinrʼoe ijngokʼá kʼoa chja̱kaonajmiá.

¹² Ya pájina xi fetʼani nga jngó jngó tratado itso: “Tikjaʼaitsjenlai jebi”. Jngo kjoachjonangi faʼaitʼa kʼoa nroatʼa testo xi koa̱n kʼoéxkialee chjota kʼianga kjuinchón ijngokʼalee. Je tratado Jókoa̱nchon nichxin xi nroaján itso je kjoachjonangi xi faʼaitʼa: “Jósʼin sikʼantjaiya Niná jmeni xi chon sonʼnde”, kʼoa je testo xi faʼaitʼa kui Mateo 6:9, 10 kao Daniel 2:44. Kʼoa je tratado A kjoaʼáyanile je kʼien itso kjoachjonangi xi faʼaitʼa: “Ánni nga majchíngasíñá kʼoa biyasíñá”, kʼoa je testo xi  faʼaitʼa kui Génesis 3:17-19 kao Romanos 5:12.

13. Jósʼin koa̱n si̱chjén je tratado kʼianga kʼoétsʼiakoaa estudio.

¹³ Je tratado kui xá kisʼendani nga koasenkaoná nga kʼoétsʼiakoaa estudio. Ya jto̱n yátsʼi̱n je tratado jngo código faʼaitʼa xi QR * ʼmi. Kʼianga nʼia escanear yaa bichókaoná ya Internet ya pájina xi tsʼe testigole Jeobá kʼoa ya jngo video tíjna xi kʼoatsole chjota nga katakotʼaya je Biblia kao testigole Jeobá. Ya tratado kʼoati faʼaitʼa je foyeto Énnda chjotse xi tʼatsʼe Niná tínroani kʼoa kʼoatso nga kʼoéxkia kʼaa kjoaʼmiya xi faʼaitʼa. Tobʼelañá, je tratado ʼYákjoánni xi kjinentsja je sonʼnde kʼoatso nga koa̱n kui kʼoéxkiaa kjoaʼmiya 5. Kʼoa je tratado Jmé xi machjén nga nda kuiyoaa ya yaniʼyaná kʼoatso nga kui kʼoéxkiaa kjoaʼmiya 9. Kʼiatsa nda si̱chjén ngayeje tratado, si̱chjénñá Biblia nga sʼa títjon chja̱kaonajmiá chjota kʼoa nga koanngínchon ijngokʼalee. Kʼoa jebi kui xi koasenkaoná nga nkjín estudio kʼoétsʼiakoaa. Jmésani xi koa̱n sʼiaan nga ngisa nda si̱chjén je Énle Niná kʼianga ʼmiyasoán.

14, 15. Jósʼin chjénngiaa choa̱le Pablo kʼianga ʼmiyasoán.

¹⁴ Kʼianga kitsoyason je Pablo, kisinkjínle kon josʼin tjío je chjota (tʼexkiai 1 Corintios 9:19-23). Ánni kʼoakisʼinsíni. Kui xi koanmele nga koasenkao “chjota judíos, [...] je xi tjíongile kjoatéxoma, [...] je xi tsínle kjoatéxoma, [...] je xi choakon”. Koanmele tsakasenkao ngatsʼi chjota ánni nga koa̱n kuitjontjai kʼasíni (Hech. 20:21). Jósʼin chjénngilee je Pablo kʼianga kuiyondaa nga kʼuínyasonlee ngatsʼi chjota (1 Tim. 2:3, 4).

¹⁵ Je xo̱nná Xá xi nʼia tʼatsʼe Niná xki̱ sá faʼaitʼa jokoa̱n kʼuínlee chjota kʼianga ʼmiyasoán. Tichjain jmeni xi ya faʼaitʼa. Tonga tsa tsínkui mandosinle je chjota xi ʼmiyasonlee. Koaan si̱kjaʼaitsjeen jokʼuínlee ánni nga koa̱nndosinsínile. Tobʼelañá, koaan chjónangilee yaoná jebi: “Jmé kjoa xi tjínle je chjota xi kjoakaonajmía. Jméni xi nʼio síkjaojin”. Xijekoa̱n, tikjaʼaitsjain jme testoni xi koasenkao chjota jebi. Jngo superintendente xi tsʼe circuito kʼoatso josʼín je kʼoa kao chjoónle kʼianga síchjén je Biblia, itso: “Me ngatsʼi chjota nga tsjoáʼndenajin nga bʼexkialaijin ninga tojngo bersíkulole Biblia kʼiatsa tongotjo chja̱kaonajmíjin. Kʼianga jenitiʼndaijin toje kichʼandaijin Biblia kʼoa jetobʼexkialaijin”. Kataʼyala kʼaa jmeni xi koa̱n cho̱banajmíñá, jmeni xi koa̱n chjónangilee chjota kʼoa jme testo xi koa̱n koakolee xi nda kuichotsjoá. Koaan kui si̱chjain.

16. Jósʼin koa̱n si̱chjain Isaías 14:7 kʼianga ʼmiyasuin.

¹⁶ Kʼiatsa ya tijnai ya jñani nʼio tjín kjoatsʼen kʼoa ya jñani nʼio tjín chjotaché, koaan i̱sí: “A sakʼoaa nikjaʼaitsjain tsa kjoaʼaí jngo nichxin jñani kʼoakuitso je periódiko nga jetjín kjoanyʼán jngo tjíjtsa Sonʼnde, nga jetsín kjoatsʼen kʼoa nga ñaki tsjoa tjíole ngatsʼi je chjota. Ya Isaías 14:7 kʼoatso nga kʼoakoa̱n. Ya Biblia nkjín kʼa kʼoatso nga jeme sʼe̱ kjoanyʼán”. Xijekoa̱n, koaan kʼoéxkia jngolai testo xi kui tínchja̱ni.

17. Jósʼin koa̱n si̱chjain Mateo 5:3 (TNM) nga chja̱kaonajmí chjota.

¹⁷ A ñʼai tjíosokóʼale yaole chjota ya jñani tijnai. Kʼiatsa jaon, koaan i̱ kʼuínlai: “Jótjín tao̱n machjén nga kuinje̱le chjota nga tsjoa sa̱tíole je familiale”. Kʼianga jekʼoakuitso koaan i̱ kʼuínlai: “Tjínkʼa chjota xi ngisa nʼio tse tao̱n njele, tonga tojo tsínni tsjoa tjíole je familiale. Jméni xi  machjén kʼianga tsjoa sa̱tíoná”. Xijekoa̱n, tʼexkialai Mateo 5:3 (TNM) kʼoa kʼoatʼinlai tsa mele skótʼaya Biblia.

18. Jósʼin koa̱n si̱chjain Jeremías 29:11 nga si̱nʼiui kon je chjota.

¹⁸ A kjoaxkón kafaʼatojin je chjota xi ya tsʼe jñani tsi. Koaan i̱ kʼuínlai: “Jngo én jaʼaikaole xi sinʼio tokuin”. Xijekoa̱n, tʼexkialai Jeremías 29:11 * (tʼexkiai). Xijekoa̱n, koaan i̱ kʼuínlai: “A kaʼyaní jmeni xi jan koya mele Niná nga katasʼená. Kuiní je kjoanyʼán, kjoachoya kʼoa nga nda kuiyoaa nichxin xi sʼa nroa. Nʼio nda sʼe tokoán nga ʼyaa nga kui xi mele Niná nga tsjoa katasʼe tokoán. Tonga a kʼoakoa̱n kjoaixi”. Xijekoa̱n, tijnyísjaijin jngui kjoaʼmiya xi koakinle chjota jebi ya foyeto Énnda chjotse xi tʼatsʼe Niná tínroani.

19. Jósʼin koa̱n si̱chjain Apocalipsis 14:6, 7 kʼianga chja̱kaonajmí je chjota xi nʼio sísin relijiónle.

¹⁹ A nʼio sísin relijiónle je chjota xi ya tsʼe jñani tijnai. Kʼiatsa jaon koaan i̱ kʼuínlai: “Kʼiatsa jngolani ánkje kjoaʼaí kʼoa kjoakaoli, a kuinóʼyalai”. Xijekoa̱n tʼexkialai Apocalipsis 14:6, 7 (tʼexkiai). Xijekoa̱n, i̱ tʼinlai: “Ánkje jebi i títso: Jchaxkón Niná. Je xi kisinda ngʼajmi, kao sonʼnde. A ʼyaní ji joʼmi je xi kisinda ngʼajmi kao Sonʼnde”. Xijekoa̱n, tʼexkialai Salmo 124:8 jñani i̱ tso: “Je xi basenkaoná kuiní je jaʼaínle Jeobá, xi tsakʼénda ngʼajmi kao sonʼnde”. Xijekoa̱n, kʼoatʼinlai nga kʼuínyasalai xi tʼatsʼe Jeobá.

20. 1) Jósʼin koa̱n si̱chjain Proverbios 30:4 kʼianga ʼya xi kʼuínyalai joʼmi je Niná. 2) A tíjna jngo testo xi nʼio nda kichotsjoá nga kinichjain.

²⁰ Koaan i̱sʼin kʼoétsʼiakoai kʼiatsa jngo ti chja̱kaonajmí: “Mena nga kʼoexkiale jotso Biblia, jñani jngo kjoachjonangi xi nʼio chjíle faʼaitʼa”. Xijekoa̱n, tʼexkialai Proverbios 30:4 * (tʼexkiai). Xijekoa̱n, i̱ tʼinlai: “Nijngojinla chjotasonʼnde xi koa̱nle kʼoasʼin jmeni xi tso ibi, a tsí mai. Bersíkulo jebi jé Niná tínchja̱ni. * Jósʼin jchañá joʼmi. Mena nga koakole Biblia jñani tjítʼa jaʼaínle”.

21, 22. 1) Jósʼin binyakao chjota je testo xi nʼio nda chjoejiaan. 2) Jméni xi sʼiain nga kʼuínyasuin.

²¹ Alikui ʼyaa jokji koasenkao je chjota jngo testo xi nʼio nda chjoéjiaan. Tobʼelañá, jao testigole Jeobá xi ya tsʼe Australia kichosíkjanetʼa xo̱ntjoale jngo chjoón xi sʼa xti. Kʼoa kitsole: “A ʼyaní joʼmi je Niná”. Kʼoa tsakʼéxkiale Biblia ya Salmo 83:18. Je chjoón jebi itso: “Alikui tsaʼbe jokixian. Kʼianga jekini, 56 kilómetro kjin kikoa je karrona saʼnda nga kichoa jñani saténa libro kʼoa yaa tsakasjaijian Biblia xi kjaʼaí je jaʼaínle Niná kʼoa kʼoati tsakasjaijian ya diccionario. Kʼianga jetsaʼbe nga Jeobá ʼmi Niná, kui kisikjaʼaitsjen jmésani xi tsín ʼbe”. Tochoatse jaʼato, chjoón jebi kao je xi kuixankao kiskotʼaya Biblia kʼoa xijekoan, kisʼenngindá.

²² Je Énle Niná tjínle nganʼio kʼoa ñaki síkʼantjaiya josʼin tjío je chjota. Kʼianga bʼéxkia je Biblia makjainle jmeni xi tso je Jeobá (tʼexkiai 1 Tesalonicenses 2:13). Je én xi faʼaitʼa ya Biblia ngisa tjínle nganʼio kʼoa ngisa tsaojin ni̱ma̱le chjota tikʼoajinni jmeni xi toñá kʼoakʼuínlee. Je Énle Niná tíjnakon kʼoa nʼio tjínle nganʼio. Si̱chjén ngantsjai.