Jngo nʼai itsole je tiʼndíle xi ñato nóle: “Jenʼio kjoatse nga kisinda Niná je Sonʼnde kao ngayeje tsojmi xi tjín. Kisinda je Tsʼuí, je Sá kʼoa kao niño”. Síkjaʼaitsjen ngotjo je tiʼndí jebi kʼoa xijema itso: “Pa, kʼoa ʼyáni xi kisinda je Niná”.

Je nʼaile itso: “Liʼya xi kisinda, je Niná tíjna ngantsjai”. Je én jebi bʼéjngo kon je tiʼndí. Tonga nga jekjimajchínga, tojo kui tjía jko̱ ʼyáni xi kisinda je Niná. Ñʼai male nga kʼoasʼin síkjaʼaitsjen nga tíjna jngo xi tsín kitsʼia kjoabijnachonle. Nga̱ saʼnda kitsʼiaa nga koannda je ngʼajmi. Tojo kjonangile yaole: “Jñá jaʼaini je Niná”.

Jótso je Biblia xi tʼatsʼe jebi. Kʼoati tso jokitso je nʼaile tiʼndí xi kanikʼaxkiaa. Je Moisés i kitsole Jeobá: “Kʼianga kjesa tsínjin je nindo kʼoa nga kjesa nindajin je sonʼnde kʼoa kao nangi, saʼnda nichxin xi jaʼato kʼoa saʼnda tokʼiani jiní Niná” (Salmo 90:1, 2). Je profeta Isaías kʼoati me tso én xi kiski, kitso: “A kje ʼyajin axo kje noʼyajin. Je Jeobá, je xi kisinda jña saʼnda nga fetʼa sonʼnde, jéní Niná xi tíjna ngantsjai nichxin” (Isaías 40:28). Kʼoa je xo̱n xi kiski Judas kʼoatso nga tíjna Niná “ngantsjai” (Judas 25).

Bersíkulo jebi kui bakó nga “Chjotatítjon xi batéxomantsjai” je Niná, tojo kitso je pastro Pablo (1 Timoteo 1:17). Xi tsonile, tokʼoa tíjna saʼnda ngasʼa, ninga nʼio kjin koai kjoafaʼaitsjenná. Kʼoa kʼoéjnaa tokʼia saʼndani (Apocalipsis 1:8). Je Niná alikui kitsʼia kjoabijnachonle kʼoa alikui kjoetʼa.

Ánni nga kʼoasikji ñʼai masínile kjoafaʼaitsjenná xi tʼatsʼe jebi. Kuinga nʼio tochoa tse biyoaa. Alikui kʼoasʼin bʼexkiaa nichxin josʼin bʼéxki̱ je Jeobá. Tobʼelañá, kʼianga jngo jmi nó tojngo nichxin tsole je Jeobá, nga̱ je tíjna ngantsjai (2 Pedro 3:8). Jngola choa̱ kʼoéjnaa. Jngo chákji ñachante nichxin male. A koaiya jko̱ jokji tse biyoaa, nga jankan kao te kʼoa ñokan nó maná. Likuijin koa̱njinle. Je Biblia kʼoatso nga ya mangósoán joni tsa chákji. Je kjoafaʼaitsjenná i̱natjín tíjna tsa ya si̱ngósonkoaa jokji tse tíjna je kjoafaʼaitsjenle Niná (Isaías 40:22; 55:8, 9). Kuinga tsín majinyejesíniná xi tʼatsʼe Niná.

Ninga likui ndi̱to̱n majinná nga tíjnantsjai Niná, tonga kʼoatjín. Kʼiatsa tjínlani xi kisinda je Niná, jejin xi Niná kʼuínlee. Tonga je Biblia kʼoatso nga je Jeobá kisinda “ngayije tsojmi” (Apocalipsis 4:11). Xi ijngosani, ʼyañá nga tsín ngʼajmi tsakai (Génesis 1:1, 2). Jókoanni tsʼatsen, tokʼoajejin tíjna xi kisinda. Je xi kisinda kʼoajinti tokʼoa jetíjnale ngatsʼi xi ngikʼa, jolani je ʼNdítjonle kʼoa kao je ánkje (Job 38:4, 7; Colosenses 1:15). Tojé tíjna je Niná kʼianga kjesa jme xi síndajin. Aliʼya xi kisinda je Niná nga̱ tsín ʼya xi tjín xi kjaʼaí.

Kʼianga kʼoasʼin tiyoaa kʼoa nga tíjna je sonʼnde kao ngʼajmi kui xi bakó nga tíjna jngo Niná xi tíjna ngantsjai. Je xi kisinda ngayeje jokji kijna ngʼajmi kʼoa xi kitsjoale kjoatéxoma josʼin síkjan tíjna saʼnda ngasʼa. Kuinga koan kisindasíni ngatsʼi je xi tjíokon (Job 33:4).