1, 2. 1) Jósʼin tjío je Adán kao Eva nga títjon. 2) Jméni xi chótʼayá i̱ kjoaʼmiya jebi.

KʼIANGA sʼa koannda, je Adán kao Eva aliʼya kontra tjínle. Ñaki chjotatsjení kʼoa yaa tjío ya ʼndenaxó. Nʼio nda tjío ngixko̱n Niná. Xtile Niná koan nga jao (Gén. 2:7-9; Luc. 3:38). Jngo xá kitsjoale je Niná (tʼexkiai Génesis 1:28). * Jókji tse kuitjosonnile xá xi tsakʼaile. Alikuijin ngantsjai nga tokui xá sʼin nga sitse Sonʼnde. Tonga machjénní nga koatio ngantsjai nichxin nga sikuinda “ngatsʼi cho̱ xi tjío i̱ tʼanangi”. Kʼoa koan kui xá kisʼin tsakai ngantsjai nichxin.

² Ánni nga tsín kʼoasʼin tiyosíñá ndʼaibi. Ánni nga nkjín  koya kjoa tjínsíni xi bʼéchjoaná nga tsjoa sʼe tokoán, jolani tsa kjoabiya, je kontra xi ngisasa nʼio bʼetʼaná. Jósʼin kʼoasjexin Niná kontra jebi. Yaa Biblia kʼoatso jme xi sʼin je Niná. Kataʼyala.

3, 4. 1) Jméni xi kitsole Jeobá je Adán kao Eva. 2) Ánni nga nʼio chjísínile nga sitjoson tsakai.

³ Ningalani koa̱n koatio ngantsjai nichxin, alikui xi tsonile tsa tsín jme xi koa̱nle. Kʼianga koatiokon tjínnele nga skénjta, koakjen, skʼuí nandá kʼoa kjoáyofe. Tonga je xi sikatíokon kuiní nga nda koatio ngixko̱n Jeobá, je xi títsjoále kjoabijnachon (Deut. 8:3). Tokʼianí nga koatiokon tsa tsjoáʼnde nga je Jeobá koandiaale. Kʼianga kjesa síndajin je Eva, je Jeobá i kitsole Adán: “Koaan chi̱nai tole ngayeje yá xi tjín i̱ ʼndenaxó saʼnda nga koa̱nski. Tonga je tole yá xi tsʼe kjoankjíntokon xi ndatjín kao xi chʼaotjín, alikui koa̱n chi̱nai, nga̱ nichxin nga kui chi̱nai, kuiyání” (Gén. 2:16, 17).

⁴ Je “yá xi tsʼe kjoankjíntokon xi ndatjín kao xi chʼaotjín” kui kitsoyanile nga toje Niná xi tjínle ʼnde nga kʼoakuitso jmeni xi ndatjín kʼoa jmeni xi chʼaotjín. Je Adán bení jmeni xi ndatjín kʼoa jmeni xi chʼaotjín nga̱ kʼoasʼin koannda jokjoan je Niná kʼoa koanle kisikjaʼaitsjen. Je yá kui kisikjaʼaitsjenle nga koa̱nchjénntsjaile kʼianga Jeobá koandiaale. Tsa tole yá ski̱ne joxi i̱ kjoanni kuitsole Niná: “Alikui machjénnajin kjoatéxomali”. Tsa kʼoasʼin nʼio chʼaosʼin kuichotsjoá, je kʼoa kao xtile kuiyání, tojokjoan kitsole Niná.

5. Ánni nga tsín kisitjosonsínile Jeobá je Adán kao Eva.

⁵ Adán kitsoyale Eva je kjoatéxoma xi kitsjoale Niná. Je Eva nʼio nda be kjoatéxoma jebi nga̱ xi koa̱nskanni me kʼoati tso én kisichjén jotsakʼinle Adán (Gén. 3:1-3). Je Eva kʼoakitsole je Na̱i kʼianga tsakjákao je ye̱ xi kisichjén. Je Na̱i kitsjoaʼndele yaole nga tosi tonda kui kisimekon nga toje kʼoa̱ yaole kʼoa nga mele tse nganʼio sʼe̱le (kʼoati chótsenlai Santiago 1:14, 15). Kʼoakitsole Eva nga to chjotandiso je Niná kʼoa kʼoakitsole nga tsín kuiyá tsa tosa je sitjosonle, nga tosa jo Niná koa̱nkjoan (Gén. 3:4, 5). Je Eva koankjainle, kʼoa tojé tsakʼa yaole kʼoa kiskine je tole yá. Kʼoati kitsole Adán nga kʼoati katakjine tsanda je (Gén. 3:6, 17). To tsakʼanachale je Na̱i (tʼexkiai 1 Timoteo 2:14). Ningalani be Adán nga chʼaotjín jme xi títsole chjoónle kisitjosonle. Tsakui nichxin jo miyo sʼin matsen je ye̱, tonga je xi kisichjén ye̱ jebi jngoni kontra xi tsín jme kjoamatokon tjínle kʼoa nʼio nda be nga nʼio chʼaosʼin kuichotsjoá kjoa jebi.

6, 7. Jósʼin tsakʼéndajin Jeobá jmeni xi kisʼin je Adán kao Eva.

⁶ Je Adán kao Eva yátsʼin tsakinyále Jeobá, je xi kitsjoale kjoabijnachon kao ngayeje jmeni xi ndatjín kisʼele. Je Jeobá nʼio nda be jmeni xi kisʼin (1 Crón. 28:9; tʼexkiai Proverbios 15:3). * Tonga kitsjoaʼndele je Adán, Eva kʼoa kao Na̱i nga katabakó jokjoan tjío kon xi kao je. Kʼoa tojo male jngo nʼai, nʼiojin aon koanle Niná jmeni xi kisʼin Adán, Eva  kʼoa kao Na̱i (kʼoati chótsenlai Génesis 6:6). Tonga nga kʼoati Jues mani je Niná kitsjoale kjoañʼai je xi kʼoasʼin tsakajngijée.

⁷ Je Adán bení je “yá xi tsʼe kjoankjíntokon xi ndatjín kao xi chʼaotjín”, nga̱ i kitsole je Niná: “Nichxin nga kui chi̱nai [tole yá xi tsʼe kjoankjíntokon xi ndatjín kao xi chʼaotjín], kuiyání”. Tsakui nichxin kʼoasʼin kisikjaʼaitsjen Adán nga tikuini nichxin kuiyá kʼianga kjesa kantjaijin je tsʼuí. Tonga xijekoan, nga tikuini nichxin, je Jeobá tsakjákao ijngokʼa je Adán kao Eva (Gén. 3:8). Nga ñaki kixi jmeni xi sʼín je Jeobá títjon kjoanla kinrʼoé jmeni xi kitso je Adán kao Eva (Gén. 3:9-13). Kʼoa kʼiaa kʼoakitsole nga kuiyá (Gén. 3:14-19). Tsa kʼialani kisikʼien nga kuikjoan nichxin alikuijinni kitjoson jmeni xi tjínndajinle kao chjotasonʼnde (Is. 55:11). Ningalani tokjoan koantsen jmeni xi tjenkao jée, je Jeobá kitsjoaʼndele Adán kao Eva nga tsakatiokon jokji tse kʼoa nga kisʼele xti xi tsakʼaile kjoachoya. Saʼnda nga tsakajngijée, je Adán kao Eva jngoyale kʼienní ngixko̱n Jeobá. Xi ijngosani, je Jeobá tojngo nichxin tsole nga jngo jmi nó. Kui xi tsonile jebi, nga ngixko̱n Jeobá tikuikjoánni nichxin kʼien nga tsakajngijée (2 Ped. 3:8).

8, 9. Jósʼin tsakʼetʼale je xtile Adán je jée xi tsakajngi. (Chótsenlai sén xi faʼaitʼa ya jña fitsʼiani kjoaʼmiya jebi.)

⁸ A kʼoati tsʼakaotʼale je xtile Adán kao Eva jmeni xi kisʼin. Jaon. Romanos 5:12 itso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi”. Je pastro Pablo i kitsosa: “Kjaínga nkjín xi chjotajée koan xi totʼatsʼe nga jngo chjota xi tsín kisitjoson” (Rom. 5:19). Je xi títjon kʼien jéní Abel (Gén. 4:8). Kʼoa xi ngikʼa xtile Adán kao xtindaile kʼoati koanjchínga kʼoa kʼien. Ngatsʼi je chjota kʼoati tsakinle je jée kao kjoabiya, aliʼya xi tjoʼale yaole. Ninga tsínkjoan ʼyaa jokoanni nga kui tsakinle je xtile Adán kao Eva je jée kao kjoabiya, tonga tiʼyañá josʼin tíbichómani.

⁹ Kuinga machoyaniná anni nga kui síngósonkaoni je jée kao kjoabiya jngo “najño xi títsʼójon ngatsʼi naxinandá” (Is. 25:7). Nijngojinla chjota xi tjoʼale yaole xi tʼatsʼe jée kao kjoabiya. Kuinga kʼoatsosíni Biblia nga “xi tʼatsʼe Adán ngatsʼi mʼen” je chjota (1 Cor. 15:22). Je Pablo i kitso: “ʼYá xi sikʼéjnandaínina yaona xi tsʼe kjoabiyabi” (Rom. 7:24). ʼYá xi koa̱nle kʼoasjentjai je Pablo. *

10. 1) Jmé testo xi kʼoatso kʼianga kjoaʼaxin Jeobá je kjoabiya. 2) Jméni xi bakóyaná testo jebi xi tʼatsʼe Jeobá kao Jesús.

¹⁰ Je xi koa̱nle kʼoasjentjai je Pablo jéní Jeobá. Ya Biblia itso: “Ñaki tondiaa kjoaʼaxin je kjoabiya, kʼoa je Jeobá xi batéxomale ngayeje xi tjín kʼoejon ndáxko̱n ngatsʼi chjota” (Is. 25:8). Tojo sʼín jngo nʼai nga faʼáxinle jmeni xi síkiʼaon je ʼndíle kʼoa nga bʼéjon je ndáxko̱n, je Jeobá nʼio tsjoa sʼe̱le nga  kjoaʼaxin je kjoabiya. Kʼoa jé Jesús koasenkao. Ya 1 Corintios 15:22 itso: “Tʼatsʼe Cristo ngatsʼi si̱kʼéyokonni”. Kʼoa nga kʼoakitso Pablo “ʼyá xi sikʼéjnandainina”, tije i̱ kitsoni: “Tsjoale kjoanda Niná xi totʼatsʼe Jesucristo Nainá” (Rom. 7:25). Je Jeobá tojo koantsjoakení je chjota ninga tsakajngijéelani je Adán kao Eva. Kʼoa je Jesús, xi tsakasenkao je Nʼaile kʼianga kisinda je Adán, kʼoati tojo tsjoake je chjota (Prov. 8:30, 31). Tonga jósʼin kuitjontjaile yaole je chjotasonʼnde xi tʼatsʼe jée kao kjoabiya.

11. Jméni xi kisʼin je Jeobá kʼianga tsakasenkao je chjotasonʼnde.

¹¹ Kʼianga tsakajngijée je Adán, je Jeobá kʼoakitsole nga kuiyá. Kʼoa xi totʼatsʼe jebi, ngatsʼi je chjota kʼoati tsakinle je jée kao kjoabiya (Rom. 5:12, 16). Ya Romanos 5:18 itso: “Totʼatsʼe je kjoatsʼantjaikjoa xi tsʼe jngo chjotabe kjoañʼai kisʼele ngatsʼi chjota”. Jósʼin koasenkao Niná je chjotasonʼnde kʼoa nga tsín kjoaʼatone je kjoatéxoma xi kitsjoa. Je Jesús tsakʼejnatseen josʼin kʼianga kʼoakitso nga “tsjoá ni̱ma̱le [kjoabijnachonle] nga kʼoechjíntjai nkjín chjota” (Mat. 20:28). Kʼianga ñaki chjotatsje koan je Jesús, koan “tsakʼéchjíntjai ngatsʼi” chjota. Jósʼin kitjoson je kjoatéxomale Jeobá kʼianga kʼoasʼin jngo kjoabʼechjíntjai kitsjoa (1 Tim. 2:5, 6).

12. Jósʼin kisitjoson je kjoatéxomale Jeobá tʼatsʼe kjoabʼechjíntjai xi kitsjoa.

¹² Kʼianga chjotatsje koan je Jesús koanjin tsakʼejna ngantsjai i̱ Sonʼnde. Kui xi koanmele Jeobá tsakai xi kao Adán. Kʼoa je Jesús nga tsjoake koan je Nʼaile kʼoa kao ntje̱le je Adán, kuinga kitsjoasíni je kjoabijnachonle xi koanngóson je kjoabijnachon xi kisicha je Adán. Xijekoan, je Jeobá kisikjaʼáyale je Jesús kʼoa espírituní nga ki ya ngʼajmi (1 Ped. 3:18, TNM). Je Jeobá alikui jaʼatone je kjoatéxomale nga̱ mangóson je kjoabijnachon xi koanchjí. Je Jesús kitsjoa kjoabijnachonle nga koa̱n sʼe̱le kjoabijnachon xi tsínkʼia fetʼa je xtile Adán. Kuinga “Adán xi jetʼani” kitsosínile Pablo je Jesús, je xi koa̱nle tsjoá kjoabijnachon (1 Cor. 15:45).

13. Jméni xi sʼin je “Adán xi jetʼani” xi tʼatsʼe chjota xi jekʼien.

¹³ Jeme kuichoka nichxin kʼianga je “Adán xi jetʼani” tsjoále kjoabijnachon xi tsínkʼia fetʼa je ntje̱le Adán. Kʼoa kʼoati kʼoaile kjoanda jebi je chjota xi kʼien nichxin kjoatse. Kjoaʼáyanile kʼoa i̱ kjoaʼaíkatio ijngokʼani i̱ Sonʼnde (Juan 5:28, 29).

14. Jósʼin tjóxinnile jée je chjota.

¹⁴ Kʼoa jósʼin tjóxinnile jée je chjota. Je Jeobá jngo chjotaxá jetíjnale ngʼajmi. Je xi koatexoma jéní Jesús kao xi jngo siento kao ñachanño jmi mani chjota xi i̱ kitjoejin sonʼnde (tʼexkiai Apocalipsis 5:9, 10). Je chjota xi jngo siento kao ñachanño jmi mani kʼoati chjotajée koan kʼoa bení jomaná nga chjotajée maa. Je xi jngo jmi nó koatexoma Jesús kao chjota jebi, kuinyakao je chjotasonʼnde kʼianga chjotatsje katama (Apoc. 20:6).

15, 16. 1) Jméni xi kontra “xi fetʼani” tsole Biblia, kʼoa kʼiáni tjóxin. 2) Tojo tso 1 Corintios 15:28, jméni xi sʼin je Jesús.

¹⁵ Nga kjoetʼa xi jngo jmi nó, je chjota xi sitjosonle Niná alikui tijée sʼe̱nile kʼoa alikui tikuiyáni. Je Pablo i kitso: “Xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni. Tonga nga jngójngó josʼin bʼakaole, Cristo je xi tjonle koan, skan je xi tsʼe Cristo, kʼia nga kjoaʼaí nga je. Kʼia je xi kjoetʼa, kʼia  nga tsjoále kjoatéxomale je Niná kʼoa Nʼainá, kʼia nga sikixoya ngatsʼi xi tjío títjon, kʼoa ngatsʼi xi tjínle nganʼio, kʼoa ngatsʼi xi batéxoma. Nga̱ tjínni nga je koatexoma saʼnda nga koationgi ndso̱ko̱ ngatsʼi kontrale. Kʼoa je kontrale xi fetʼani xi kuixo̱ya, kui kjoabiya” (1 Cor. 15:22-26). Xijekoan, je kjoabiya xi kʼoasʼin kisikakinná je Adán tjóxinní. Je “najño xi títsʼójon” ngatsʼi chjotasonʼnde tjóxin tokʼia saʼndani (Is. 25:7, 8).

¹⁶ Je Pablo i kitso: “Kʼia nga ngayije kjoa nangi sa̱tíole, kʼia tijeni ʼndíle nangi kʼoéjnale je xi nangi tsakʼéjnale nga je ngayije kjoa, jméni nga Niná koa̱nyijesíni tʼatsʼe ngatsʼi” (1 Cor. 15:28). Nga kʼia, ñaki jekitjoson jme xá tsakatéxomani je Jesús. Tsjoa tjínle nga tsjoá ijngokʼanile je Nʼaile je kjoatéxoma xi kitsjoale kʼoa kao chjota nga jechjotatsjeni.

17. Jmé xi si̱kao je Na̱i.

¹⁷ Jmé xi si̱kao je Na̱i, je xi totʼatsʼe nga kjoa tjíojinni chjotasonʼnde. Yaa kʼoatsoná ya Apocalipsis 20:7-15. Nga jetífʼetʼa xi jngo jmi nó tjóʼndele nga katabʼanachale je chjotatsje, kui xi tofetʼani nga chótʼayakao. Kʼoa je xi ya koaitjenngile tondiaa nikʼienní. Kʼoa kui jebi “kjoabiya xi majaoni” (Apoc. 21:8). Kjoabiya xi majaoni alikui tjóxin, nga̱ je xi kʼia kuiyá alikui tikʼia kjoaʼáyanile. Kʼiatsa kixi kjuintʼalee je Jeobá, alikui kui si̱kjaojiaan xi tʼatsʼe kjoabiya jebi nga̱ tsín josikaoná.

18. Jósʼin kuitjoson je xá xi tsakánele Adán je Niná.

¹⁸ Ngatsʼi je chjota ñaki chjotatsje koa̱n kʼoa je Jeobá tsjoále kjoabijnachon xi tsínkʼia fetʼa. Aliʼya xi tikontraná koa̱nni. Je xá xi tsakánele Niná je Adán kuitjosonní, tonga alikui tiskoe̱ni Adán. Jé ntje̱le Adán sikuinda je Sonʼnde kʼoa kao cho̱. Nʼio tsjoa tjío tokoán nga kjoaʼaxin Jeobá je kjoabiya, je kontraná xi tofetʼani.