1. Jméni xi kisʼin je xi nyatítjonle relijión kʼianga kisatio kjoajchán.

A KUI xi mele Niná nga kjoajchán katafi chjotale Cristo kʼoa nga katasíkʼien je chjota xi xin naxinandále. Je xi jngo siento nó tífaʼato, nʼio nkjín xi chjotale Cristo tsole yaole tjíosíkʼien xínkjín nga tjíosatío kjoajchán. Chjota católico tjíosíkʼien xínkjín xi tikuini relijiónle. Kʼoa relijión protestante kʼoati tjíosíkʼien xínkjín. Je chjota xi nyatítjonle chjota católico kao chjota protestante síchikontʼain je ki̱cha̱ kjoajchán kao sondado. Kʼianga kisʼejna Kjoajchántse xi majaoni tokʼoakisʼinʼnde.

2, 3. 1) Jókisʼin je testigole Jeobá kʼianga kisʼejna Kjoajchántse xi majaoni kʼoa kao nga koanskanni. 2) Ánni nga kʼoakisʼinsíni.

² Jméni xi kisʼin je testigole Jeobá kʼianga kisʼejna Kjoajchántse xi majaoni. Aliʼya xi kitʼale. Alikui ya kijin je kjoajchán xi kisatio. Ánni nga tsín ya kijinni. Kuinga kisitjoson jme xi kitsoya Jesús kʼoa mele nga kui choa̱le koaitjenngi, nga kʼoasʼin tsjoake koa̱n je chjota jokisʼin Jesús. Je Jesús kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Je testigole Jeobá kʼoati kui kisichjén je én xi kiskile pastro Pablo je chjotale Cristo xi tsakatio ya Corinto (tʼexkiai 2 Corintios 10:3, 4).

 ³ Je chjotale Cristo kui Biblia síchjén nga be jmeni xi ndatjín kʼoa jmeni xi chʼaotjín, kuinga tsín tsjoáʼndesínile je kjoafaʼaitsjenle nga kjoajchán fijin. Nʼio nkjín mani xi tjíofitjenngike je testigole Jeobá nga kʼoasʼin tjíofikao yaole josʼin tsakakóya je Cristo. Xi xʼin xi yánchjín, xi xti kao chjotajchínga yaa kinikasén ya ʼnde jñani kjoañʼai kinikjaʼá. Kʼoa tjín xi saʼnda kinikʼien. Kʼoakoan nga kisʼejna Kjoajchántse xi majaoni kʼianga tsakatéxoma je chjota nazi ya Alemania. Jokji tse nga kjoañʼai kinikjaʼá je testigole Jeobá tojo kitsoyason je énnda chjotse xi tsʼe Chjotaxále Niná. Tosi tonda kitsoyason ninga ndoyá kinikatíoʼya, ninga ya tjío ya ʼnde jñani kjoañʼai kinikjaʼá kʼoa ninga xin naxinandá kinikasén. * Nga koanskanni, kʼianga nó 1994, nga kinikjeson chjota ya Ruanda alikui ya kitsjonjin yaole je testigole Jeobá. Kʼoati likui ya kitsjonjin yaole kʼianga kisʼejna kjoajchán ya Yugoslavia.

4. Jótso je chjota kʼianga tsín kjoajchán fijin je testigole Jeobá.

⁴ Nga tsín kjoajchán tsjonjin yaole je testigole Jeobá nʼio nkjín chjota xi tjío jngo tjíjtsa Sonʼnde xi kʼoatso nga je testigole Jeobá ñaki tsjoake kjoaixi Niná kao chjota. Kʼoa kʼoatso nga ñaki chjotale Cristo ma. Ánsani nga kʼoatsosíni chjota nga ñaki chjotale Cristo ma je testigole Jeobá.

5. Jméni xi ñʼai koanle je chjotale Cristo xi títjon tsakatio.

⁵ Je Jesús kʼoakitso nga je xá xi ngisasa chjíle kuinga kʼuínyason je énnda chjotse xi tʼatsʼe Chjotaxále Niná. Nga tosʼa tsakʼétsʼiakao Jesús nga kitsoyason tejao pastro kiskoejin kʼoa kʼiaa tsakʼétsʼiakao jngo xá xi koa̱n jngo tjíjtsa Sonʼnde. Xijekoanni, je Jesús ngi jankan kao te chjotale kisikatíonda nga kʼoasʼin xá jebi (Luc. 6:13; 10:1). Je Jesús kitsoyale je chjotale nga kʼoati katatsoya tsanda je. Títjon kʼoakitsole josʼin kuitsoyale je chjota judío. Tonga xijekoanni, kʼoakitsole nga je chjota xi xin naxinandále katatsoyasonle. Nʼiojin ñʼai koanle je chjotale Cristo nga kʼoatsakʼinle nga je katatsoyale je chjota xi tsín judío (Hech. 1:8).

6. Jmé xi tsakasenkao je Pedro nga koa̱njinle kʼianga tsín ʼya xi faʼájin je Jeobá.

⁶ Je chjota xi tsín judío xi títjon chjotale Cristo koan, jé Cornelio. Je Jeobá jé pastro Pedro kisikasén nga kitsoyale je Cornelio kao familiale. Je Pedro koanjinle nga tongóson sʼin bekon chjota je Jeobá, nga nijngojin xi ngisa ngʼa tíjna ngixko̱n. Kui xi mele Jeobá nga katanrʼoé je Énle kʼoa nga katamakjainle. Kuinga Pedro kʼoakitsosínile je Cornelio kao familiale nga katafisʼenngindá (Hech. 10:9-36). Saʼnda nga kui nichxin, je Pedro kao chjotale Cristo xi ngikʼa kitsoyasonle ngatsʼi naxinandá.

7, 8. Jósʼin tjíobinyakao testigole Jeobá je chjota nga katabichótsaojin ni̱ma̱le je énnda chjotse. (Chótsenlai sén xi faʼaitʼa ya jña fitsʼiani kjoaʼmiya jebi.)

⁷ Nichxin xi tiyoaa ndʼaibi, je xi nyatítjonle je testigole Jeobá, tjíobʼéndajin josʼin tíʼmiyason kʼoa josʼin tíʼmiyale Biblia je chjota ngakjijnda Sonʼnde. Ndʼaibi jeme jin miyón mani testigole Jeobá ngakjijnda Sonʼnde. Tsʼato jaon siento én tjíotsoyason kʼoa sa nkjín sa nkjín én tsoyason. Tsoyason xki̱ niʼya kʼoa kao ya yandiaa. Kʼianga tsoyason sakʼoa síchjén yámixa̱ kao xi ma xinyáya xo̱n kʼoa nkjín koya én faʼaitʼa xo̱n xi síchjén. Je chjota be nga toje testigole Jeobá xi kʼoasʼin tsoyason.

 ⁸ Je naxinandále Jeobá tsʼato jao jmi kao ñajan siento ndsʼee kao tichjaa tísíchjine nga katasíkʼatoya je Biblia kao xo̱n xi Biblia yʼangini. Xo̱n jebi nikʼatoya ninga tsín nanda ʼyale én xi male chjota. Tobʼelañá, je testigole Jeobá xi tjín ya España kui síkʼatoya én xi Catalán ʼmi. Nʼio nkjín chjota xi Catalán nchja̱ ya naxinandá Valencia, Alicante, Islas Baleares kao ya Andorra. Ndʼaibi miyón mani chjota xi Catalán nchja̱. Kʼianga kʼoasʼin tjíosíkʼatoya én jebi je testigole Jeobá, je chjota xi Catalán nchja̱ tjínle xo̱n xi énle nroatʼa kʼoa kʼoati satíole kjoajtín xi kao énle, kʼoa jebi ñaki fichókajin ni̱ma̱le.

9, 10. Jósʼin bakó je jtín xi tsʼe Jeobá nga mandosinle kʼianga katabe ngatsʼi chjota xi tʼatsʼe Niná.

⁹ Je xá jebi, nga kʼoasʼin tínikʼatoya je xo̱n xi énle Niná nroatʼa kʼoa nga kao énle chjota tíʼmiyanile kʼoakjima ngakjijnda Sonʼnde. Tobʼelañá, ya México, nʼio nkjín chjota xi kastía male tonga kʼoati nʼio nkjín xi kjaʼaí én koanjchíngakao. Jngo én xi nokjoa kui xi maya ʼmi. Je sucursal yaa kisikasén je xi síkʼatoya én maya ya jñani nokjoa én jebi. Nga kui nrʼoéle kʼoa nga kui nchja̱ nga nyaon nyaon ngisa majinle chjota je xo̱n xi tjíosíkʼatoya. Ijngosa én xi tífaʼatoya kui xi nokjoa ya naxinandá jña Nepal ʼmi. Naxinandá jebi jngo siento kao kanla koya én nokjoa. Ya Nepal tsʼato kanñajan miyón chjota tjín. Je xi kui koanjchíngakao én xi nepalí ʼmi me tsʼato te miyón mani kʼoa kʼoati nʼio nkjín mani chjota xi kʼoati male én jebi. Je ndsʼee én nepalí tjíosíkʼatoya xo̱n xi Biblia yʼangini.

¹⁰ Nga kʼoasʼin tjíofaʼatoya xo̱n xi Biblia yʼangini nga kjaʼaí én kui xi bakó nga je jtín xi tsʼe Jeobá nʼio chjí be nga tsoyason je énnda chjotse jngo tjíjtsa Sonʼnde. Je testigole Jeobá nkjín miyón tratado, foyeto kao rebista tjíosíkʼabíson. Tonga alikui baténa. Je tao̱n xi machjén kuiní xi tsjoá chjota jotjín nroajin ni̱ma̱le. Je testigole Jeobá kui fitjenngi jmeni xi kitso Jesús kʼianga kitso: “Tokjoatjao kitsʼaino, tokjoatjao tʼainio” (Mat. 10:8).

11, 12. Kʼianga kʼoasʼin tjíotsoyason kʼoa tjíotsoyale Biblia chjota je testigole Jeobá, jótso kʼa chjota.

¹¹ Je testigole Jeobá tjíojngo kon nga ñaki relijión xi kixi tjíojin kuinga tjíobʼénenile yaole nga tjíotsoyasonle ngatsʼi chjota, tojñani tsʼe kʼoa tojme kostumbre xi tjínle. Kʼianga tjíobinyakao chjota,  nʼio nkjín testigole Jeobá xi tomanile josʼin tjíobatio, xi kjaʼaí én tjíokotʼaya kʼoa xi tjíosíngale yaole josʼin beni chjota ya jñani tjíotsoyason. Nʼio nkjín chjota xi kʼoatso nga je testigole Jeobá xi ñaki chjotale Cristo ma nga kʼoasʼin tjíotsoyason kʼoa tjíotsoyale Biblia chjota ngakjijnda Sonʼnde.

¹² Kuinga kʼoatjíosʼínni je testigole Jeobá nga̱ bení nga ñaki relijión xi kixi tjíojin. Tonga kataʼyala jmésani xi ñaki bʼéjngo kon je ndsʼee kao tichjaa nga ñaki relijión xi kixi tjíojin (tʼexkiai Romanos 14:17, 18).

13. Jméni xi sʼín je testigole Jeobá nga tsje sʼin katabʼejna je jtínle.

¹³ Nga jngó jngó je ndsʼee kao tichjaa ñaki tjíojngo kon nga relijión xi kixi tjíojin kʼoa kʼoatso anni. Jngo ndsʼee xi jekjoan nkjín nó nga tísíxále Jeobá itso: “Matsen nga je naxinandále Jeobá nʼio bʼénele yaole nga tsje sʼin bʼejna. Kʼoa bichakjáyale ʼyani xi tsín kʼoasʼin fikao yaole”. Jósʼínnile naxinandále Jeobá nga kʼoasʼin tsje bʼejna. Ngatsʼi xi ya tjíojin bʼénele yaole nga sítjoson jmeni xi tso Biblia kʼoa fitjenngi choa̱le Jesús kao tsʼe chjotale. Tochoa mani xi tsín fitjenngi kjoatéxomale Niná kʼoa bichonsjejin. Me ngatsʼi je testigole Jeobá nga tsje sʼin tjío ngixko̱n Niná. Je xi kui kʼoakisʼin ngasʼa xi tsín sasénle Niná kisikʼantjaiya yaole kʼoa ndʼaibi kʼoasʼin tjíofikao yaole jotso je kjoatéxomale Niná (tʼexkiai 1 Corintios 6:9-11).

14. Jósʼin tjíosíkʼantjaiya yaole je xi bichonsjejin naxinandále Jeobá kʼoa jósʼin tíbichótsjoá jebi.

¹⁴ Je Biblia kʼoatsole je xi chjotale Cristo ma nga katamʼaosjejin ya jinjtín je xi tsín sítjoson kjoatéxomale Niná. Jmi mani xi kʼoamanile jéele kʼianga bichonsjejin kʼoa ijngokʼa ya batiojinni naxinandále Niná (tʼexkiai 2 Corintios 2:6-8). Nga kʼoasʼin fikao yaole je testigole Jeobá jotso je Biblia tsje sʼin tjío je jtín. Jebi kui xi bakó nga tísasénle Niná jtín jebi. Je yo̱ngo̱ totsjoáʼndele chjotale nga kʼoasʼín josʼin mele tonga je testigole Jeobá kʼoasʼin fikao yaole jotso kjoatéxomale Jeobá. Kuinga kʼoatsosíni chjota nga je testigole Jeobá relijión xi kixi.

15. Jméni xi bʼéjngo kon jngo ndsʼee nga ñaki relijión xi kixi tíjnajin.

¹⁵ Ánni nga kʼoasʼin síkjaʼaitsjensíni je testigole Jeobá nga ñaki relijión xi kixi tjíojin. Jngo ndsʼee xi ñachanteño nóle, xi kʼia saʼnda tísíxánile Jeobá saʼnda nga sʼa xti, kʼoatso nga janxó koya tjínni anni nga makjainnile. Xi títjon, nga ñaki tíjna je Niná. Xi majaoni, nga tʼatsʼe Niná jaʼaini je Biblia. Kʼoa xi majanni, nga je testigole Jeobá xi kʼoatjíosʼín josʼin mele Niná. Je ndsʼee itso: “Jokji tífaʼa nó kʼianga kotʼaya tiʼbeña nga ñaki kʼoatjín jmeni xi ʼmiyaná. Sa nkjín sa nkjín koya tiʼbe  nga ñaki kʼoatjín kʼoa kui jebi xi ngisa tísítajasa kjoamakjainna kʼoa ngisa tjínjngo tokoan nga ñaki relijión xi kixi tiyojiaan”.

16. Ánni nga ñaki tjínjngosíni kon jngo tichjaa nga kui relijión xi kixi tíjnajin.

¹⁶ Jngo tichjaa xi jechixan, xi ya síxá ya jña tjen tísʼendiaanile xále Niná jngo tjíjtsa Sonʼnde kʼoakitso jmeni xi tjínjngoni kon nga kui relijión xi kixi tíjnajin. Je tichjaa kʼoatso nga toje naxinandále Jeobá xi kʼoatsole chjota nga Jeobá ʼmi je Niná, jngo jaʼaín xi ñatola jmi kʼa faʼaitʼa ya Biblia. Kʼoati tsjoánganʼiole je én xi faʼaitʼa ya 2 Crónicas 16:9 jñani tso: “Je xko̱n Jeobá tíkotseen jngo tjíjtsa sonʼnde nga koako je nganʼiole xi tʼatsʼe je xi tjíojngo ni̱ma̱le xi kao je”. Itsosa tichjaa: “Je Énle Niná kui tíbakóyana josʼin nga ñaki sʼe̱jngo ni̱ma̱na nga je Jeobá koasenkaona. Je xi ngisasa ʼbechjía kuinga miyona ma je Jeobá. Kʼoati nʼio ʼbechjía nga totʼatsʼe Jesús nga tjínnina je kjoankjíntokonle Niná xi basenkaona”.

17. Jméni xokisikao jngo ndsʼee xi tsín makjainle tʼatsʼe Niná tsakai nga koankjainnile.

¹⁷ Jngo ndsʼee xi tsín makjainle tsakai nga tíjna Niná itso: “Jmeni xi kisinda Niná kui bakóna nga kui xi mele nga katabʼétsaojin je chjota kʼoa kuinga ʼbesíña nga tsín totsjoáʼnde ngantsjai nga kjoañʼai sʼe̱. Xi ijngosani, ninga sa kjin sa kjin tjíobatiole Niná je chjota, je naxinandále Jeobá sa kjimatse sa kjimatsee kjoamakjainle, kjoatsjoale kao kjoatsjoachale. Kao nganʼiotsjele Niná nga tíbitjosonni jebi nichxin xi tiyoaa ndʼaibi” (tʼexkiai 1 Pedro 4:1-4).

18. 1) Jméni xi tso nga jao je ndsʼee. 2) A kʼoatisʼin nikjaʼaitsjain jotso je ndsʼee.

¹⁸ Ijngo ndsʼee xi jekjoan nkjín nó nga testigole Jeobá ma kʼoatso anni nga kʼoasʼin makjainnile nga ñaki kui relijión xi kixi tíjnajin. Itso: “Jokji nga tífaʼa nó nga tikotʼaya tiʼbeña nga nʼio tjíobʼénele yaole je testigole Jeobá nga kʼoatjíosʼín jokisʼin je chjotale Cristo xi títjon tsakatio. Nʼio nkjín naxinandá jekia kʼoa ʼbeña nga jtín sʼin tjío je testigole Jeobá ngakjijnda sonʼnde. Jmeni xi tso je Biblia nʼio tsjoa tjínle tokoán”. Kʼoa jngo ndsʼee xi jetsʼato jankan nóle kʼoakitso nga je testigole Jeobá ñaki makjainle xi tʼatsʼe Jesús. Ndsʼee jebi itso: “Chotʼayaníjin jokisʼin Jesús kʼoa josʼin kitsoyason kʼoa ngisa nʼio tiʼyachjíjin je choa̱le. Tinikʼantjaiyaníjin yaonajin nga ngisasa nichriantʼalaijin Niná. ʼYaníjin nga totʼatsʼe kjoabʼechjíntjaile Jesús nga kuitjontjaiñá. Kʼoati ʼyaijin nga jaʼáyajinnile kʼien je Jesús. Tjío chjota xi tsabe nga kʼoakoan” (tʼexkiai 1 Corintios 15:3-8).

19, 20. 1) Jméni xi kitso Pablo nga kiskile je jtín xi kisʼejna ya Roma. 2) Jméni xi tjínnele sʼiaan xi choʼndale Jeobá maa.

¹⁹ Nga chjotale Cristo maa tsjoachañá je chjota, kuinga machjénsíni nga kʼuínyalee jmeni xi kjimajinná. Je Pablo kʼoakitsole je chjotale Cristo xi tsakatio ya Roma nga tjínnele kuitsoyason, kitsole: “Tsa si̱kixiyandalai kao ndsoʼbai nga Naili Jesús, kʼoa tsa koa̱nkjainle ni̱ma̱li nga Niná kisikjaʼáyajinnile kʼen Cristo, kʼia kuitjontjainíʼni. Nga̱ kao ni̱ma̱ná makjainná xi tʼatsʼe nga kjoetʼa jéená, tonga kao ndsoʼbaa nikixiyandanía xi tʼatsʼe nga kuitjo̱ntjé” (Rom. 10:9, 10).

²⁰ Je testigole Jeobá ñaki kʼoatjío kon nga kui relijión xi kixi tjíojin kʼoa bení nga jngo kjoanda tjínle kʼianga tsoyale chjota je énnda chjotse xi tʼatsʼe Chjotaxále Niná. Ali tsa toʼmiyajinlai chjota jotso je Biblia, kʼoasʼin tʼinkoai yaoli jotso je Biblia ánni nga koakosínilai nga ñaki tjínjngo tokuin nga kui relijión xi kixi tijnajin.