1. Ánni nga tsín tokʼoamasínile choʼndale Niná nga tse kjoañʼai faʼatojin.

A TOKʼOAMANÁ nga “tse kjoañʼai” bitjatojiaan kʼianga kjesa bʼaijinná je kjoabijnachon xi tsínkʼia fetʼa. Mai. Ninga jekjoatse tsaʼyaa je Énle Niná kʼoa ninga tosʼa choatsená toxá bitjatojinñá kjoañʼai. Kuinga kʼoamani nga je Na̱i kjinentsja je Sonʼnde (Apoc. 12:12).

2. 1) Jmésani kjoa xi faʼatojin je chjotale Cristo. (Chótsenlai sén xi faʼaitʼa ibi.) 2) ʼYáni xotísʼín nga kʼoakjimatʼainni je choʼndale Niná, kʼoa jósʼin ʼyañá.

² Ngatsʼiñá xi chjotaa nga sʼená kjoa. Tonga je chjotale Cristo tjíofaʼatojin xi kjaʼaísa kjoa (1 Cor. 10:13). Jngo koya je kjoa xi tjíofaʼatojin nga kʼoasʼin kixi tjíofitʼale Niná kuinga nʼio tjíofitjenngike chjota. Je Jesús i kitsole chjotale: “Je xi choʼnda ma, ali jejin títjonle naile. Tsa an chʼao kisikaona, kʼoati jon chʼao sikaono” (Juan 15:20). ʼYáni xotísʼín nga kʼoakjimatʼainni je choʼndale Niná. Jé Na̱i. Je Biblia kʼoatso nga je Na̱i yaa mangóson “joni tsa xa xi tíbaté” nga “tíbásjai ʼya xi ski̱ne” ya naxinandále Niná (1 Ped. 5:8). Je Na̱i sichjén tojmeni tojoni nga tsín tikixi koanngíntʼanilee je Jeobá. Kataʼyala jmeni xi koanle je pastro Pablo.

3-5. 1) Jmé kjoa xi jaʼatojin je Pablo ya Listra. 2) Jósʼin kitsjoanganʼionile Pablo je chjotale Cristo kʼianga kʼoakitsole nga tse kjoañʼai kjoaʼatojin.

³ Nʼio nkjín kʼa nga kʼoasʼin kitjenngike chjota je Pablo nga kʼoasʼin kixi kitʼale Niná (2 Cor. 11:23-27). Ya Listra ñandiaa nga jngo chjota xi tsín ma fi kisindaya je Pablo. Nga kʼoakisʼin, je chjota kʼoasʼin kisikjaʼaitsjen nga niná je Pablo kao Bernabé kʼoa koanmele tsakʼétsʼoale. Nga jao kʼoakitsole chjota nga tsín koa̱n je kʼoetsʼoale. Tonga xijekoanni kicho kʼa chjota judío kʼoa énndiso tsakáne je Pablo kao Bernabé. Je chjota koankjainle jmeni xi kitso chjota judío kʼoa la̱jao tsakasénle je Pablo kʼoa kʼiaa saʼnda kitsjiontʼa nga kʼoasʼin kisikjaʼaitsjen nga jekisikʼien (Hech. 14:8-19).

⁴ Kʼianga jekicho ya naxinandá Derbe, je Pablo kao Bernabé ki ijngokʼani ya Listra, ya Iconio kʼoa ya Antioquía, kʼoa kisinʼiojin je chjotale Cristo, kʼoakitsole nga tosi tonda katasʼele kjoamakjain kʼoa i kitsole: “Kjaínga machjén nga tse kjoañʼai chja̱ʼá nga kuitjásʼeen ya kjoatéxomale Niná” (Hech. 14:21, 22). Kʼiatsa kʼoakʼuínná nga kjoañʼai chja̱ʼá alikuijin tsjoánganʼioná. Tonga jósʼin kitsjoanganʼionile Pablo kao Bernabé je chjotale Cristo kʼianga kʼoakitsole nga tse kjoañʼai kjoaʼatojin.

⁵ Kataʼyala josʼin tsoyanile jmeni xi kitso je Pablo. Kitso: “Kjaínga machjén nga tse kjoañʼai chja̱ʼá nga kuitjásʼeen ya kjoatéxomale Niná”. Ali tsa tokitsojin: Kjaínga machjén nga ska̱ná kjoañʼai xi chja̱ʼá. Je Pablo kui kisikʼaxki̱ je kjoanda xi kʼoaile ʼyani xi kixi koaitʼale Niná. Kʼoa ali tsa to énjin. Je Jesús kitso: “Je xi jchókjoale jo saʼnda nga kjoetʼani, jebi kuitjontjainí” (Mat. 10:22).

6. Jmé kjoanda xi sʼe̱le ʼyani xi ska̱le kjoa xi kjoaʼatojin.

⁶ Tsa ska̱ná je kjoañʼai xi kuitjátojiaan jngo kjoanda kʼoainá. Je kjoanda xi kʼoaile je chjotale Cristo xi koai ya ngʼajmi kuiní nga ya koatexomakao je Jesús kʼoa nga tsín tikʼia kuiyáni. Kʼoa je kjoanda xi kʼoaile je xi “kjaʼaí barré” kuiní je kjoabijnachon xi tsínkʼia fetʼa i̱ Sonʼnde nga jesʼe̱ kjoanyʼán (Juan 10:16; 2 Ped. 3:13). Xi to ndʼaila ndʼai, nʼio “tse kjoañʼai chja̱ʼá”. Jaola koya kataʼyaa je kjoañʼai xi bitjatojiaan.

7. Jmé kjoani xi bʼetʼaná.

⁷ Je Jesús tongini i̱ kitso: “Ska̱nitʼano chjotaxá, ya ndʼia sinagoga koaano yájti. Jangixko̱n gobernador kao chjotatítjon” (Mar. 13:9). Je Jesús kʼoakitso nga chjota koaitjenngike je chjotale. Je xi sakʼoa fitjenngikená jéní chjotaxá kao chjotatítjonle relijión (Hech. 5:27, 28). Si̱kjaʼaitsjenla ijngokʼa jmeni xi koantʼain je Pablo. A kitsokjonní nga kʼoasʼin chjota kitjenngike. Mai (tʼexkiai Hechos 20:22, 23).

8, 9. 1) Jósʼin tsakakó je pastro Pablo nga ñaki kʼoatjín kon nga ska̱le je kjoa xi kjoaʼatojin. 2) Jósʼin tjíokale je ndsʼee jme xi kjimatʼain nichxin xi tiyoaa ndʼaibi.

⁸ Je Pablo tajajin koan ninga nʼio tsakʼetʼale je Na̱i. Kitso: “Alikui ni̱ma̱na skonle xi totʼatsʼan. Tokui xi mena nga nda sikjetʼa ndiaana kao kjoatsjoa, kʼoa nga nda sikjetʼa je xá xi kitsjoana je Nainá Jesús, nga tsjoa [ngayeje] je énnda xi tʼatsʼe kjoandale Niná” (Hech. 20:24). Alikui kitsokjon je Pablo ninga kʼoasʼin kitjenngike chjota. Tosa kiskale je kjoa xi jaʼatojin. Je xi koanmele kuinga tsjoá ngayeje énnda xi tʼatsʼe  kjoandale Niná ningalani nʼio tse kjoa kjoaʼatojin.

⁹ Nichxin xi tiyoaa ndʼaibi, nʼio nkjín ndsʼee kao tichjaa xi kʼoati kixi tjíofitʼale Niná. Tobʼelañá, jngo naxinandá jñani ndoyá tjíoʼya kʼa je testigole Jeobá kʼoa saʼnda tsín kinijtsoʼa. Jeme kan nó nga kʼoasʼin ndoyá tjíoʼya. Ánni. Kuinga tsín ya tjíotsjonjin yaole je kjoa polítika. Alikui títjoʼndele nga xínkjín bichókotsenle kʼoa tjínkʼa xi satéle kʼoa tse kjoañʼai nikjaʼá.

10. Ánni nga tsín kuinókjonsínilee je kjoa xi toxijña faʼainená.

¹⁰ Ya jña xin ʼnde kʼoati tse kjoañʼai xi toxijña tjíobichóne je ndsʼee kʼoa tjíokale. Ali bijkonjin tsa kʼoakoa̱ntʼain. Tikjaʼaitsjain je José. Ninga toxijña jo choʼnda sʼin kisatena, je Jeobá “tsʼasjentjai José ngayije kjoañʼai” xi kisʼele (Hech. 7:9, 10). Je Jeobá kʼoati sikaoná tsanda ñá. Alikʼia si̱chajiaan nga je Jeobá “male bʼasjentjai chjota xi bexkón nga je” kʼianga kjoañʼai faʼatojin (2 Ped. 2:9). Tosi tonda tinʼiotʼai yaoli je Jeobá kʼoa katakali kʼianga ʼya xi koaitjenngikeli. Je Jeobá koaanle nga kʼoasjentjaili jmeni xi koa̱ntʼain i̱ Sonʼnde tsʼen jebi kʼoa tsjoáli kjoabijnachon xi tsínkʼia fetʼa (1 Ped. 5:8, 9).

11. Jméni xi tsín mangóson kjoa xi tsín ñaki matsen kao nga chjota fitjenngikená.

¹¹ Tsakui nichxin machjén nga ska̱ná je kjoa xi tsínkjoan ñaki matsen. Jméni xi tsín mangóson kjoa jebi kao nga chjota fitjenngikená. Je kjoa xi bʼétʼa kixiná yaa mangóson jngo xkín xi toxijña faʼa kʼoa ngotjo síkixoyani niʼya. Tonga je kjoa xi tsín ñaki matsen yaa mangóson cho̱kixo nga tobijbi síkje niʼya. Kʼianga ʼyaa toje kakjine je yále niʼya kʼoa jelikui tijme xi ma nʼiañá.

12. 1) Jméni xi síchjén je Na̱i kʼianga bʼetʼaná. 2) Ánni nga kui xi ngisa nʼio síchjénsíni. 3) Ánni nga kinroajensíni kon je Pablo.

¹² Je Na̱i kui xi mele nga tsín timiyoná katamani je Jeobá. Sakʼoa bʼetʼa kixiná kʼoa sakʼoa kui síchjén xi kjaʼaí kjoa, jolani kʼianga nroajen tokoán. Kui xi ngisasa nda síchjén. Ánni nga kui síchjénni. Kuinga kui xi tobijbi síkjinná je Niná. Je pastro Pablo sakʼoaa kinroajen kon, ñandia i̱ kitso: “Ma̱xónia anbi” (tʼexkiai Romanos 7:21-24). Ánni nga kinroajensíni kon je Pablo nga̱ ndasʼin tíjna ngixko̱n Jeobá kʼoa yaa tíjnajinle je cuerpo gobernante. Ninga kʼoalani kui jée xokisikao nga kinroajenni kon. Kui mele kʼoasʼin je xi ndatjín tonga alikui choa ñʼai koanle. Tsa sakʼoa kʼoasʼe tokuin, tsakui nichxin koasenkaoli nga jchai nga kʼoati koanle Pablo.

13, 14. 1) Jméni xosíkao je choʼndale Niná nga nroajenni kon. 2) ʼYáni xi mele nga katanroajen kjoamakjainná, kʼoa ánni.

¹³ Nʼio nkjín ndsʼee kao tichjaa xi síkinroajen kon, xi ba sʼe kon kʼoa xi saʼnda kʼoasʼin síkjaʼaitsjen nga tsín jme chjíle. Tobʼelañá, jngo tichjaa xi precursora sʼin tísíxá itso: “Tikui tikui sikjaʼaitsjenña je jée xi tsakajngia kʼoa sa chʼao sa chʼao sʼe tokoan. Nga kui sikjaʼaitsjen jmeni xi chʼao kisʼian kʼoasʼin sikjaʼaitsjen nga tsín ʼya xi koa̱ntsjoakena. Saʼnda nijejin Jeobá”.

¹⁴ Ánni nga kʼoasatíosíni kon je choʼndale Jeobá xi kixi tjíofitʼale joni tsa je tichjaa xi kanikʼaxkiaa. Nkjín koya tjínni. Tsakui nichxin likui nda síkjaʼaitsjen xi tʼatsʼe kʼoa jme kjoa xi tjíofaʼatojin (Prov. 15:15). Kʼoa tsakui nichxin chʼin tjínle kʼoa kuinga nroajenni kon. Tojmeni xi chʼao kʼoe tokoán si̱kjaʼaitsjeen ʼyani xotísíkaoná. ʼYáni xi mele  sikinroajen tokoán nga tsí ti Niná si̱xánilee. Jé Na̱i. Je Na̱i ni̱kʼienní kʼoa kuinga mesínile nga kʼoatisʼin si̱kjaʼaitsjain nga tsínli kjoachoya tsanda ji (Apoc. 20:10). Je Na̱i kui xi mele nga si̱kjaojiaan kʼoa nga tsín tikatamameniná nga Jeobá si̱xálee. Ninga kʼoetʼa kixiná kʼoa ninga kjaʼaí kjoa sichjén, je xi mele Na̱i kuinga tsín tisi̱xánilee Niná. Ali nichajinjin nga kao je Na̱i tíkjantʼa je naxinandále Niná, tíbʼasje nganʼio nga kixi koaitʼale Jeobá.

15. Jméni xi ñaki kʼoakʼoé tokoán nga sʼiaan kʼianga tsín kjuinroajen tokoán.

¹⁵ Ali nikinroajenjin tokuin. Kui chóyalai je kjoanda xi kʼoaili. Je Pablo i kitsole je chjotale Cristo xi ya tsʼe Corinto: “Likui maʼindanijin. Tonga nda tsa je yaochjotanajin kʼoasʼin tífengi, je jo kjoanyanajin kjimachjotseya nichxin nga nyaon. Kʼoa je kjoañʼainajin xi tojngo tjo ndʼaibi, xi xa̱n tjín, tíbʼéndanajin xi ngisa tse kjoajeya xi ngantsjai xi likui ma maningóson” (2 Cor. 4:16, 17).

16. Ánni nga nʼio machjénsíni nga tjen kuiyondalee ndʼaibi je kjoañʼai xi nʼio tse.

¹⁶ Je Na̱i nʼio nkjín koya che̱n síchjén (Efes. 6:11). Kuinga machjénsíni nga koanngíntjenngiaa je kjoafaʼaitsjen xi tjítʼa ya 1 Pedro 5:9 jñani tso: “Nʼio tiyotajalao je na̱i. Nʼio tiyolao xi makjainno”. Kʼianga taja kuiyolee je Na̱i machjén nga tjen si̱katíondaa ni̱ma̱ná kao kjoafaʼaitsjenná ndʼaibi. Tsa kʼoasʼiaan, tiyondañá nga kui kʼoasʼiaan xi ndatjín. Tobʼelañá, je sondado títjon kjoanla bationda kʼianga fi kjoajchán. Kʼoatisʼinni xi kao ñá, alikui ʼyaa jmé kjoa xi kuitjátojiaan nichxin xi nroaján. Kuinga tjínnesínile nga tjen kuiyondaa ndʼaibi nga sʼasa nyʼán chon. Je  pastro Pablo i kitsole je chjotale Cristo: “Chótʼao yaono nga tijonnio, tsa nda tiyokao xi makjainno. Nda chótʼao yaono tsa nda kjoaon” (2 Cor. 13:5).

17-19. 1) Jméni xi chjónangilee yaoná. 2) Jósʼin koationda je xi sʼa xti nga sitoánntjai kjoamakjainle ya ndʼiaskuela.

¹⁷ Jngo koya josʼin koa̱n chótʼaa yaoná kʼianí nga si̱kjaʼaitsjenjiaan jebi: “A bʼetsʼoantsjaiña. Kʼianga kʼoatsona xi ngikʼa nga kui xi chʼaotjín kʼoasʼian, a jé sitjosonle axo je Niná sitjosonle. A fintsjaiña kjoajtínná. A kao kjoanʼiojin xinya jme xi makjainna. A kʼoasʼin ngotjo sichatʼanile xíngia josʼin ngotjo menina nga sichatʼana. A sitjosonle je xi chjotajchínga sʼin tjío ya jinjtín kao je xi síkuinda jtín ngakjijnda Sonʼnde”.

¹⁸ Yaa tiyojinlee chjota xi mele nga kjaʼaísʼin si̱kjaʼaitsjeen. Nʼio nkjín ndsʼee kao tichjaa xi sʼa xti xi kao kjoanʼiojin nchja̱ni tʼatsʼe Niná ya ndʼiaskuela. Alikui masoale nga kʼoasʼín kʼoa alikui tsokjón. Jméni xi tjíobinyakao nga tjíosʼenile kjoanʼiojin. Kui tjíosíchjén je kjoafaʼaitsjen xi faʼaitʼa ya rebista xi nichjén. Tobʼelañá, je rebista ¡Despertad! xi tsʼe julio de 2009 jngo kjoafaʼaitsjen kitsjoa jokoa̱n kuitsole je xtiskuela xi si síkao xi tʼatsʼe evolución. Tsa i̱ kuitso: “Ánni nga tsín makjainsínili xi tʼatsʼe evolución”. Koaan i̱ kuitsole: “Ánni nga tʼatsʼe evolución koa̱nkjainsínina nga̱ je chjota científico saʼnda tsín mangóson jmeni xi tso kʼoa jelasa xi ngisa nda kotʼayason xi tʼatsʼe jebi”. Jon xi xijchá mao, tʼinyalao ʼndíxtino jokuitso nga sitoánntjai kjoamakjainle ánni nga tsín ñʼai koa̱nsínile ya ndʼiaskuela.

¹⁹ Kjoaixiní nga tsín choa ñʼai tíjna nga nitoánntje kjoamakjainná kʼoa nga kui kʼoanʼia jmeni xi mele Jeobá nga sʼiaan. Tobʼelañá, kʼianga jefaʼaiñá nga nixá tsakui nichxin tobʼenelee yaoná nga mangián kjoajtín. Kʼoa tsa maije̱, tsakui nichxin toʼya tso tokoán nga bisotjeen kʼianga mangínkʼinyasoán. Tonga si̱kjaʼaitsjeen: Tsa kʼoénelee yaoná nga kʼoasʼiaan ndʼaibi, tjen tibiyondañá nga kʼoati sʼiaan kʼianga kjoaʼaí kjoañʼai xi ngisa tse.

20, 21. 1) Kʼianga nroajen tokoán, ánni nga koasenkaosíniná nga si̱kjaʼaitsjenjiaan je kjoabʼechjíntjaile Jesús. 2 ) Jméni xi tosi tonda sʼiaan.

²⁰ Kʼoa jósʼiaan tsa sakʼoa nroajen tokoán. Je xi ngisa koasenkaoná kuinga si̱kjaʼaitsjenjiaan je kjoabʼechjíntjaile Jesús. Kʼoakisʼin je pastro Pablo. Je Pablo sakʼoa nʼio kisikinroajen kon. Tonga bení nga chjotajée xi kʼienntjai je Jesús, nga tsín chjotatsje kʼienntjai. Je Pablo kitso: “Je kjoabijnachon xi ndʼaibi tijnakonnia yaona, tijnakoan nga̱ makjainna tʼatsʼe je ʼndíle Niná, xi koantsjoakena, xi kitsjoantjai yaole xi tʼatsʼan” (Gál. 2:20). Tojo tso én jebi, je Pablo kʼoatsakʼé kon nga je tsakʼéchjíntjai Jesús.

²¹ Kʼoati koasenkaoli tsanda ji nga kʼoasʼin si̱kjaʼaitsjain nga jngo kjoatjao títsjoáli Jeobá kʼianga tsakʼéchjíntjaili je Jesús. Ninga tsínkui xi tsonile jebi tsa ngotjo nda sʼe̱ni tokuin, tonga tsa kʼoasʼiain koasenkaoli. Nichxin xi tiyoaa ndʼaibi toxá sakʼoaa kjuinroajenni tokoán, kʼiaa saʼnda nda kuiyoaa nga kjoaʼaíkao Niná je sonʼnde chjotsele. Tonga tikjaʼaitsjain nga je xi kʼoaile kjoanda jéní xi tosi tonda ska̱le je kjoa xi kjoaʼatojin. Nga jngó jngó nichxin tífaʼato, sa machrian sa machrianle nga koatexoma je Chjotaxále Niná. Kʼianga koatexoma ñaki kjoanyʼán sʼe̱ ngakjijnda sonʼnde kʼoa je chjota ñaki chjotatsje koa̱n. Kʼoénelee yaoná nga kuitjásʼeen sonʼnde chjotse ninga tse kjoañʼai chja̱ʼá.