Miyón mani chjota xi tjín jngo tjíjtsa Sonʼnde xi kui koyale nga je Chjotaxále Niná kʼoendajin kjoa xi tjínle. Kuinga kʼoasʼínni jokitsole Jesús je chjotale kʼianga kʼoetsʼoa, kitso: “Katjinroa kjoatéxomali. Kʼoakatasʼín josʼin nga meli [...] i̱ sonʼnde” (Mateo 6:10).

Ninga nʼio nkjín chjota xi mandosinle tʼatsʼe Kjoatéxomale Niná, xi tsonile, Chjotaxále Niná, me ngatsʼi relijión nga tsín kuenta sʼín. Je chjota xi kui bʼéyanajmí jmeni xi koan ngasʼa, xi H. G. Wells ʼmi kʼoatso nga je Jesús nʼio koanndosinle nga tsakakóyason tʼatsʼe Chjotaxále Niná. Tonga kʼoatso nga je yo̱ngo̱ alikui mandosinle nga kui koakoya.

Ninga kʼoasʼín je yo̱ngo̱, jin xi testigole Jeobá maijin nʼio nokjoanijin tʼatsʼe Chjotaxále Niná. Tobʼelañá, je rebista xi nʼio nichjainjin, xi tibʼexkiai ndʼaibi, jao siento kao kan én bitjo. Nga ñandia ñandia bitjo rebista jebi, me ñachanjaon miyón bitjo. Kui xi ngisasa nʼio nkjín bitjo tikʼoajinni xi kjaʼaí rebista. Jméni xi ngisa tínchja̱ni rebista jebi. I ʼmi ngakjijngo jaʼaínle: Xo̱n xi Bájinkonná tʼatsʼe Chjotaxále Jeobá.  *

Ánni nga kʼoasikji bʼenesínilaijin yaonajin nga ʼmiyasuinjin tʼatsʼe Chjotaxále Niná. Kuinga kʼoasʼin makjainnajin nga kui nchja̱ni ngayeje Biblia, libro xi ngisasa nʼio chjíle. Xi ijngosani, ñaki kʼoatjío tokuinjin nga toje Chjotaxále Niná xi koa̱nle kʼoendajin kjoa xi tjínle chjotasonʼnde.

Tibʼenelaijin yaonajin nga timangíntjenngijin choa̱le Jesús. Kʼianga tsakʼejna i̱ Sonʼnde je Jesús, kui Chjotaxále Niná xi ngisasa tse kjoandosin kitsjoale kʼianga kitsoyason (Lucas 4:43). Ánni nga kʼoasikji koanndosinsínile. Jmé kjoanda xi tsjoáli je Chjotaxále Niná. Chótʼayala jotso je Biblia xi tʼatsʼe jebi ya kjoaʼmiya xi ngikʼa.