Tojosʼin kaʼyaa ya kjoaʼmiya xi kafaʼato, je xi ngisa nʼio koanndosinle Jesús kuinga “kitsoya je énnda xi tʼatsʼe kjoatéxomale Niná” (Lucas 8:1). Nʼio tsakʼénele yaole nga kitsoyason, siento kilómetro tsakʼamjeni ndso̱ko̱ ya naxinandá Israel nga kitsoyale chjota tʼatsʼe Chjotaxále Niná. Jmeni xi kisʼin je Jesús yaa kisʼetʼa nga ño Evangelio. Nga ño libro jebi jngo siento kʼa síkʼaxki̱ je kjoatéxomale Niná, xi tsonile, Chjotaxále Niná. Én jebi me toya faʼaijinyeje jñani nga je Jesús kinchja̱, kʼoa alikuilasa kisʼetʼayeje jmeni xi kitso je Jesús xi tʼatsʼe Chjotaxále Niná (Juan 21:25).

Ánni nga kʼoasikji koanndosinsínile Jesús xi tʼatsʼe Chjotaxále Niná kʼianga tsakʼejna i̱ Sonʼnde. Kuinga be nga je kiskoejin Niná nga koatexoma (Isaías 9:6; Lucas 22:28-30). Je Jesús alikui to yaole kini, alikui kui tsakásjai nga je kuitjongʼa kʼoa nga sʼe̱le nganʼio (Mateo 11:29; Marcos 10:17, 18). Kuinga kitsoyasonni tʼatsʼe Chjotaxále Niná, nga̱ bení nga kui xi koasenkao je Nʼaile kao chjotale, nga̱ jéní xi ngisa tsjoake. *

Je Jesús nʼio tsjoake nʼaile (Proverbios 8:30; Juan 14:31). Nʼio tsjoake jokjoan je Nʼaile, jolani nga tjínle kjoatsjoacha, kjoamatokon kʼoa nga ñaki kui kʼoasʼín xi kixi tíjna (Deuteronomio 32:4; Isaías 49:15; 1 Juan 4:8). Je Jesús nʼiojin jtike je énndiso xi tjín xi tʼatsʼe Nʼaile, jolani je xi tso nga tsín mandosinle Niná nga kjoañʼai faʼá je chjota kao je xi tso nga je Niná xi kjoañʼai tsjoáná. Kuinga nʼio koanmesínile Jesús nga kinchja̱ni “énnda xi tʼatsʼe kjoatéxomale ngʼajmi” nga̱ jéní xi sitsje je jaʼaínle Nʼaile (Mateo 4:23; 6:9, 10). Jósʼinnile.

Je Jeobá kui sichjén je Chjotaxále kʼianga koasenkao je chjotasonʼnde. Je “Niná kʼoejon ngayije ndáxko̱n” chjota. Kjoaʼaxin jmeni xi síkjiʼndáná. “Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male.” (Apocalipsis 21:3, 4.) Je Niná kui sichjén je Chjotaxále kʼianga kjoaʼaxin ngayeje xi kjoañʼai síkjaʼáná. *

Kuinga nʼio koanmenile Jesús nga tsakakóyason xi tʼatsʼe Chjotaxále Niná. Bení nga tokui xi  koako jokji nganʼio kʼoa jokji kjoamatokon tjínle Nʼaile (Santiago 5:11). Kʼoati beje̱ nga tokui xi koasenkao je chjota xi kixi tjíofitʼale.

Kʼianga kjesa faʼaijin i̱ Sonʼnde je Jesús, yaa tíjnakao je Nʼaile ya ngʼajmi. Je Niná jé Jesús kisichjén kʼianga kisinda ngayeje tsojmi xi tjín, jolani ngʼajmi xi kʼoasikji niño kao galaxia tjínle, kʼoa kao je Sonʼnde kao ngayeje jmeni xi tjín (Colosenses 1:15, 16). Tonga je xi ngisa nʼio tsjoake koan Jesús jé chjotasonʼnde (Proverbios 8:31).

Kʼianga kitsoyason je Jesús tsakakó nga tsjoake je chjota. Saʼnda nga tsakʼétsʼiakao xále kʼoakitso nga kui xá jaʼaini i̱ Sonʼnde nga kuitsoyasonle je énnda chjotse ʼyani xi machjénle (Lucas 4:18). Tonga ali tsa toʼénjin xi kitso je Jesús nga koasenkao je chjota. Nʼio nkjín kʼa tsakakó nga tsjoake je chjota. Tobʼelañá, kʼianga nʼio nkjín chjota koanxkó xi kinrʼoéle “koanmake nga je, kʼoa kisinda xi tjíomʼen” (Mateo 14:14). Kʼianga jngo chjota xi tímʼe kʼoakitsole Jesús nga katasíndaya tsa je xi mele, je Jesús kʼoakisʼin. Kisindaya je chjota kʼoa kitsole: “Mena katamatsjai” (Lucas 5:12, 13). Kʼoa kʼianga tsabe nga tíkjiʼndá je María nga kʼoasʼin kʼien je ndsʼe̱ xi Lázaro tsakʼin, je Jesús “aon koanle”, “koanfáole” kʼoa “kiskiʼndá” (Juan 11:32-36). Kʼoa xijekoan, tomaxkónná jmeni xi kisʼin. Je Jesús kisikjaʼáyale Lázaro ninga jeño nichxin tjínle nga kʼien (Juan 11:38-44).

Nga kui nichxin, je Jesús bení nga tochoa tse nga nda koatio je chjota xi tsakasenkao. Bení nga tjóchʼin ijngokʼale je chjota xi kisindaya kʼoa nga kuiyá ijngokʼani je xi kisikjaʼáyale. Tonga kʼoati be nga je Chjotaxále Niná ñaki tondiaa kjoaʼaxin kjoa jebi. Kʼoa kuinga tsín tsa to chjota kisindayani, kuinga nʼio kitsoyasonni “je énnda xi tʼatsʼe kjoatéxomale ngʼajmi” (Mateo 9:35). Jmeni xi kisʼin kui tsakakó choa jmeni xi sʼin je Chjotaxále Niná jngo tjíjtsa Sonʼnde. Jméni xi sʼin. Kataʼyala jmeni xi tso Biblia.

•  Alikui tisʼe̱ni chʼin.

  “Je xko̱n xi xka̱ tjóxʼánginí. Kʼoa je xoño xi jtaya tjóxʼájchxo. Je xi chjiʼngé ñaki skíngʼa josʼín tsa jngo naxínchxoa̱, kʼoa je ni̱je̱n xi yo̱ma̱ kao kjoatsjoa kuinchja̱.” Kʼoa “nijngojin xi ya kʼoéjna kʼoakuitso: Timʼeña” (Isaías 33:24; 35:5, 6).

• Alikui tisʼe̱ni kjoabiya.

  “Je xi kixi tsʼee koa̱n sonʼnde, kʼoa i koatioson ngantsjai nichxin.” (Salmo 37:29.)

  “Ñaki tondiaa kjoaʼaxin je kjoabiya, kʼoa je Jeobá xi batéxomale ngayeje xi tjín kʼoejon ndáxko̱n ngatsʼi chjota.” (Isaías 25:8.)

• Kjoaʼáyanile xi jekʼien.

  “Ngatsʼi xi tjío ya nyʼoákʼen kjuinrʼoéle jta̱le. Kʼoa kuitjoni ngatsʼi.” (Juan 5:28, 29.)

  “Kjoaʼáyale xi kʼen.” (Hechos 24:15.)

• Sʼee xá kʼoa sʼee niʼya.

  “Kʼoenda niʼya kʼoa yaa koatioʼya; kʼoa kʼoentje xka̱totsee kʼoa je ski̱ne tole. Alikui tsa kʼoenda kʼoa kjaʼaí xi sichjén; alikui tsa kʼoentje kʼoa kjaʼaí xi ski̱ne [...]; kʼoa je xá xi sʼin je xi an kiskoejian ñaki tsjoa koaya kon.” (Isaías 65:21, 22.)

•  Alikui tisʼe̱ni kjoajchán.

  “Kjoaʼaxin kjoajchán ngakjijnda sonʼnde.” (Salmo 46:9.)

  “Alikui tiskaanni je naxinandáyʼai kao xi kjaʼaí naxinandáyʼai kʼoa ni tʼatsʼe kjoajchánjinla tiskótʼayani.” (Isaías 2:4.)

• Sʼee tsojmi xi ma chine.

  “I̱ sonʼnde koa̱njchá tsojmi; je Niná, Nináná, sichikontʼainná.” (Salmo 67:6.)

  “Nʼio sʼe̱ tsojmintje i̱ sonʼnde; toxkia sʼee ya jko̱nindo.” (Salmo 72:16.)

• Aliʼya xi tima̱ sijcháni yaole.

  “Alikui tojchajinntsjai je xi ma̱ tíjna.” (Salmo 9:18.)

  “Kʼoasjentjainí je xi ma̱ tísíjchá yaole xi sijéle nganʼio kʼoa kao xi nangi tíjna kʼoa toʼyani xi tsínle xi basenkao. Skoe̱ma̱ní je xi nangi tíjna kʼoa je xi ma̱ tísíjcha yaole, kʼoa kʼoasjentjai je xi ma̱ tjío.” (Salmo 72:12, 13.)

Nga tiʼyai én jebi xi tʼatsʼe Chjotaxále Niná, a majinli anni nga kʼoasikji koanndosinnile Jesús. Kʼianga tsakʼejna i̱ Sonʼnde, ñaki kao kjoatsjoa tsakjákaoni tʼatsʼe Chjotaxále Niná toʼya chjotani xi kinrʼoéle. Je Jesús bení nga je Chjotaxále Niná xi kjoaʼaxin ngayeje kjoa xi tjín nichxin xi tiyoaa ndʼaibi.

A sasénli jmeni xi tso Biblia nga sʼin je Chjotaxále Niná. Tsa jaon, jméni xi sʼiain nga kataʼyasai xi tʼatsʼe Chjotaxále Niná. Jósʼin jchani nga kʼoaili kjoanichikontʼain xi kjoaʼaíkao Chjotaxále Niná. Jebi yaa kuitsoyali ya kjoaʼmiya xi ijngo.