Ngayeje kjoaʼmiya xi jekaʼyaa kuijin kabakóli anni nga nʼio mandosinnile je testigole Jeobá xi tʼatsʼe Chjotaxále Niná. Kʼoa tsakui nichxin kanikjaʼaitsjenjin kʼai je kjoanichikontʼain xi kaʼyaa xi kjoaʼaíkao Chjotaxále Niná. Kʼoa tsakui nichxin chjonangilai yaoli tsa kʼoakoa̱n kjoaixi.

Kʼoa nda nʼiai nga tsín tokjoan makjainli jmeni xi ʼmili (Proverbios 14:15). Yaa mangósuin jokisʼin nichxin kjoatse je chjota xi Berea tsʼe. * Kʼianga sʼa kinrʼoé títjon je énnda chjotse xi tʼatsʼe Chjotaxále Niná kisasenle jmeni xi kinrʼoé, tonga ali tsa tokuijin nga koankjainnile nga mele kuitjoson jme xi tsakʼinle. Kui xi kisʼin nga “kiskotʼa je xo̱n Escritura, tsa kjoakixi nga kʼoatjín je kjoabi” (Hechos 17:11). Xi tsonile, je chjota xi Berea tsʼe yaa Énle Niná kisingósonkao je énnda chjotse xi tsakʼinyale. Xijekoan, ñaki tsabe nga ya Énle Niná yʼangini je énnda chjotse.

Jin xi testigole Jeobá maijin kʼoaʼmilaijin nga kʼoati tʼiain jokisʼin chjota jebi xi tsakatio kʼianga siglo 1. Koaan kʼuínyakjoatjaolaijin jotso je Biblia ánni nga ya si̱ngósonkaosíni jmeni xi makjainnajin xi tʼatsʼe Chjotaxále Niná kao jmeni xi bakóya Biblia.

Kʼoa ali tsa tokuijin koa̱nli jotso Biblia xi tʼatsʼe Chjotaxále Niná. Kʼoati jchai jotso Biblia tʼatsʼe jme xi chjonangilee yaoná, jolani:

•   Jñá jaʼaiñá

• Jmé xá tiyoñá

• Ánni nga tsjoáʼndesíni Niná nga kjoañʼai chjaʼá

• Jméni xi maná kʼianga jebiyaa

• A kjoe je Sonʼnde

• Jmé xi machjén nga ndasʼin kuiyoaa ya yaniʼyaná

Kʼoa je xi ngisasa chjíle kuinga koa̱nchriantʼalai Niná kʼiatsa chótʼayai je Biblia (Santiago 4:8). Kʼoa nga koa̱nchriantʼalai Niná, jchaní jokji kjoanichikontʼain tsjoáli je Chjotaxále nichxin xi tiyoaa ndʼaibi kao nichxin xi nroaján. Je Jesús i kitsole je Nʼaile kʼianga tsakʼétsʼoale: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3).