Ñaki katamakjainli jmeni xi sʼin je Chjotaxále Niná
“Kui xi makjainná, kui xi nda nʼiotʼatakoán, nga kjoakixi nga tjío je kjoa xi choyalee.” (HEB. 11:1)
1, 2. 1) Ánni nga tsín jao tjínsíniná nga sitjoson je Chjotaxále Niná jmeni xi tsakʼéndajin Jeobá xi kao chjotasonʼnde. 2) Tojo tso ya Efesios 2:12, ánni nga ñaki sínʼiosíni tokoán je kjoa xi kisʼendajin xi tʼatsʼe Chjotaxále Niná. (Chótsenlai sén xi faʼaitʼa ibi.)
ÑÁ XI testigole Jeobá maa, bʼenelee yaoná nga ʼmiyasoán nga toje Chjotaxále Niná xi koa̱nle kʼoendajin je kjoa xi tiyojiaan. A ñaki kʼoatjío tokoán kʼianga ñaki tíjna je Chjotaxále Niná kʼoa nga sitjoson jmeni xi tjínndajinle Niná. Ánni nga ñaki taja katasʼejnasíni kjoamakjainná xi tʼatsʼe Chjotaxále Niná (Heb. 11:1).
2 Kʼianga kuitjoson jmeni xi tjínndajinle je Jeobá, jé Chjotaxále sichjén. Kuinga toje Jeobá xi tiʼndele koatexoma kʼoa jebi alikʼia kʼoantjaiya. Tonga ʼyáni xi Rey sʼin sikʼéjna. ʼYásani xi koatexomakao Rey jebi. Kʼoa ʼyáni xi koatexomasonle. Je Jeobá nkjín koya kjoa tsakʼéndajin nga kataʼyale xi tʼatsʼe jebi. Je kjoa xi kisʼendajin ñaki jngoyale jngo xo̱n xi ngixko̱n chjotaxá kasʼenda, tjín xi je Jeobá tsakʼéndajin kʼoa tjín xi je Jesucristo tsakʼéndajin. Kʼianga chótʼayá je kjoa xi kisʼendajin, ngisa nda koa̱njinná josʼin kuitjoson jmeni xi tjínndajinle je Jeobá, kʼoa sʼe̱jngo tokoán nga kʼoéjna Chjotaxále tokʼia saʼndani (tʼexkiai Efesios 2:12).
3. Jméni xi chótʼayá i̱ kjoaʼmiya jebi kʼoa kao kjoaʼmiya xi ngijngo.
3 Ya Biblia, jaon koya kjoa xi kisʼendajin síkʼaxki̱ xi nchja̱ni tʼatsʼe Chjotaxále Niná. Kʼoa kuiní jebi: 1) je kjoa xi kisʼendajin kao Abrahán, 2) je kjoa xi kisʼendajin kao Kjoatéxoma, 3) je kjoa xi kisʼendajin kao David, 4) je kjoa xi kisʼendajin nga naʼmi koa̱n joni tsa Melquisedec, 5) je kjoa xi kisʼendajin chjotse kʼoa kao 6) je kjoa xi kisʼendajin xi tʼatsʼe Chjotaxále Niná. Kʼoalasʼin chótʼayá nga jngó jngó koya jebi josʼin kitsoale xínkjín kao Chjotaxále Niná kʼoa josʼin kuitjoson jmeni xi tjínndajinle Niná xi kao Sonʼnde kʼoa kao chjota (chótsenlai rekuadro xi tso: “ Josʼin sitjoson Niná jmeni xi tjínndajinle”).
TONGINI KISʼEJNA ÉN NGA ÑAKI KUITJOSON JMENI XI TJÍNNDAJINLE NINÁ
4. Tojo tso ya Génesis, jñánile nga jan koya xi tsakʼéndajin Jeobá xi tʼatsʼe chjota.
4 Je Jeobá kui xá kisindani je Sonʼnde nga chjota koatioson. Kʼoa je Jeobá jan koya tjínni xi tsakʼéndajin xi tʼatsʼe chjota. Xi títjon, sénle kisikʼa. Xi majaoni, nga ʼndenaxó sikao kʼoa nga katasítse Sonʼnde nga ñaki tsje koa̱n je xti xi sʼe̱le. Kʼoa xi majanni, nga tsínkui ski̱ne je tole je yá xi tjínle kjoankjíntokon xi ndatjín kao xi chʼaotjín (Gén. 1:26, 28; 2:16, 17). Tokui nga jan koya jebi xi machjén tsakai nga kuitjoson jmeni xi tjínndajinle Niná xi tʼatsʼe chjota kʼoa kao Sonʼnde. Tonga ánni nga kui koanchjénsíni kjoa xi kisʼendajin.
5, 6. 1) Jméni xi kisʼin je Na̱i nga mele tsakʼejnachjoa nga tsín kuitjoson jmeni xi tjínndajinle Niná. 2) Jmé xi tsakʼéndajin Jeobá nga sikao je xi yátsʼi̱n tsakinyále ya Edén.
5 Je Na̱i yátsʼin tsakasénle Niná kʼoa kao jmeni xi tjínndajinle. Tsakásjaile josʼin nga tsín ti Niná sitjosonnile je chjota kʼoa tsakʼanachale je Eva nga kui katakjine je tole yá xi tjínle kjoankjíntokon xi ndatjín kao xi chʼaotjín (Gén. 3:1-5; Apoc. 12:9). Kʼianga kʼoakisʼin je Na̱i, kui xi koanmele nga kʼoasʼin katamakjainle xi ngikʼa nga tsín nda batéxoma je Niná. Xijekoan, kʼoati kitso nga totjín xi sʼínnile je chjota nga Niná síxále (Job 1:9-11; 2:4, 5).
6 Jósʼin tsakʼéndajin Jeobá kjoa jebi. Koanjin sasa tsakjaʼáxinni je xi yátsʼi̱n tsakinyále. Tonga tsa kʼoalani kisʼin, alikuijin kitjoson jmeni xi tjínndajinle nga xtile Adán kao Eva sitse i̱ Sonʼnde. Je Jeobá alikui tsakjaʼáxin je xi yátsʼi̱n tsakinyále. Tosa jngo én tsakájna: kui jmeni xi tongini kitso ya Edén. Je Niná kʼoakitso josʼin kuitjoson jmeni xi tjínndajinle xi kao sonʼnde kʼoa kao chjota (tʼexkiai Génesis 3:15). *
7. Jméni xi bʼéjnatsen je én xi tongini kinokjoa ya Edén xi tʼatsʼe je ye̱ kao ntje̱le.
7 Jmeni xi tongini kitso je Niná ya Edén, kʼoakitso nga si̱kʼien je ye̱ kʼoa kao ntje̱le, xi tsonile, je Na̱i kʼoa kao je xi tjíofitʼale xi kontra tjíobatiole josʼin tíbatéxoma Niná. Je Niná kʼoasʼin tsakʼéndajin nga je ntje̱le chjoón sikjeson je xi yátsʼi̱n tsakinyále. Jmeni xi tongini kitso Niná ya Edén kuinga kjoaʼaxin je Na̱i kʼoa kao kjoa xi kisʼe nga kʼoasʼin yátsʼi̱n tsakasénle. Kʼoati kitso josʼin kuitjoson én jebi.
8. Jméni xi ʼyaa tʼatsʼe je chjoón kʼoa kao ntje̱le.
8 Tonga ʼyáni ntje̱le je chjoón. Je ntje̱ jebi tjínnele nga kʼoati espíritu nga̱ espíritu je Na̱i kʼoa je kjoaʼaxin (Heb. 2:14). Kʼoa je chjoón xi sʼe̱le ntje̱ jebi tjínnele nga kʼoati espíritu. Je ntje̱le je ye̱ koannkjínya kʼoa ñola jmi nó nga tsín tsaʼyale ʼyani je chjoón xi kinokjoani ya Edén kʼoa kao je ntje̱le. Je nó xotjín, nkjín koya kjoa tsakʼéndajin je Jeobá je xi jchanile ntje̱le je chjoón kʼoa josʼin kʼoendajin je Niná jmeni xi kisʼin je Na̱i nga kʼoasʼin yátsʼi̱n tsakasénle.
JNGO KJOA XI KISʼENDAJIN XI BʼÉJNATSEN ʼYANI NTJE̱LE JE CHJOÓN
9. 1) Jméni je kjoa xi kisʼendajin kao Abrahán. 2) Kʼoa kʼiáni nga koanchjén.
9 Jao jmila nó jaʼato jmeni xi kitso Niná ya Edén kʼianga kʼoakitsole je Abrahán nga katasíkʼéjna naxinandá Ur, ya jñani tsʼe, kʼoa nga ya katafi ya ʼnde Canaán (Hech. 7:2, 3). Je Niná kitsole: “Titjui naxinandáli kʼoa tikatúi je xíngi kʼoa kao niʼyale nʼaili kʼoa tʼin ya naxinandá jñani koakole. Kʼoa naxinandáje sikaole kʼoa sichikontʼainle kʼoa nʼio ngʼa sikʼéjna jaʼaínli; kʼoa tʼatsi koa̱nchikontʼainni chjota. Kʼoa sichikontʼainña je xi sichikontʼainli, kʼoa je xi kuinchja̱ʼaonli kʼoati kuinchjaʼaonle, kʼoa tʼatsi kjuinroani nga koa̱nchikontʼain ngatsʼi familia xi tjín sonʼnde” (Gén. 12:1-3). Je Niná kao kui én jebi tsakʼéndajinni kjoa kao Abrahán. Alikuikjoan ʼyaa kʼiani tsakʼéndajin títjon kjoa jebi je Jeobá kao Abrahán. Tonga ʼyañá nga kʼia koanchjén nga nó 1943 nga kjesa chʼajin nó 1, kʼianga Abrahán xi jejankan kao xjaʼaon nóle kitjo ya Harán kʼoa jaʼato ya xo̱ngá Éufrates.
10. 1) Jósʼin tsakakó je Abrahán nga ñaki koankjainle jmeni xi kitso Niná. 2) Jméni xi sa kitsoya sa kitsoyasa Jeobá xi tʼatsʼe je ntje̱le chjoón.
10 Nkjín kʼa kʼoakitsole Jeobá je Abrahán tʼatsʼe kjoa xi tsakʼéndajin kʼoa sa kitsoya sa kitsoyale josʼin tínchja̱ni (Gén. 13:15-17; 17:1-8, 16). Je Abrahán nʼio koankjainle tʼatsʼe je én xi kinchja̱ je Jeobá kʼoa saʼnda tíjnandaa tsakai nga sikʼienle je ʼndíle ninga tojngo mani. Nga kʼoakisʼin je Abrahán, je Jeobá kʼoakitso nga ñaki sitjoson jmeni xi kitsole (tʼexkiai Génesis 22:15-18 * kao Hebreos 11:17, 18). Kʼianga koanchjén je kjoa xi kisʼendajin kao Abrahán, je Jeobá tosi tonda kisikʼéjnatsensa ʼyani ntje̱le je chjoón. Je ntje̱ jebi yaa kjoaʼaíni ya familiale Abrahán. Nʼio nkjín koa̱n kʼoa rey sʼin koatio. Kʼoa je sikjeson ngatsʼi xi kontra tjíole je Niná kʼoa nʼio nkjín chjotasonʼnde koa̱nchikontʼain.
Je Abrahán ñaki koankjainle jmeni xi kitso Niná (Chótsenlai párrafo 10)
11, 12. 1) Jósʼin bakóya ya Énle Niná nga ñaki kuitjoson ijngokʼa je kjoa xi kisʼendajin kao Abrahán. 2) Kʼoa jósʼin basenkaoná ñá.
11 Je kjoa xi kisʼendajin kao Abrahán kʼiaa kitjoson títjon kʼianga je ntje̱le Abrahán kitjoéle ya ʼNde jña tsakʼinle nga kʼoaile. Tonga ya Biblia kʼoatsosa nga tse kjoanichikontʼain kjoaʼaíkao nichxin xi nroaján kjoa xi kisʼendajin kao Abrahán (Gál. 4:22-25). Je pastro Pablo kʼoakitso nga je ntje̱le Abrahán xi tíjnatítjon jéní Jesucristo. Kʼoa je xi majaoni, jéní je xi jngo siento kao ñachanño jmi mani je chjotale Cristo xi ya koai ngʼajmi (Gál. 3:16, 29; Apoc. 5:9, 10; 14:1, 4). Je chjoón xi kinokjoani ya Edén jéní je jtínle Niná xi tíjna ya ngʼajmi. Kʼoa chjoón jebi “Jerusalén xi tsʼe ngʼá” tsole kʼoa je xi ya tjíojin ánkjení (Gál. 4:26, 31). Tojo tso je kjoa xi kisʼendajin kao Abrahán, je ntje̱le je chjoón kjoanichikontʼain kjoaʼaíkaole je chjotasonʼnde.
12 Je kjoa xi tsakʼéndajin Jeobá kao Abrahán kʼoatso nga jngo Rey koatexoma ya ngʼajmi. Kao kui tjoénile xá, Rey jebi kʼoa kao xi koatexomakao (Heb. 6:13-18). Jótjín tse sʼe̱jna je kjoa xi tsakʼéndajin Jeobá kao Abrahán. Ya Génesis 17:7 kʼoatso nga sʼe̱jna tokʼia saʼndani. Kʼiaa saʼnda sʼe̱jna nga je xi Rey koa̱n sikjeson je kontrale Niná kʼoa nga sichikontʼain ngatsʼi je xi koatio Sonʼnde (1 Cor. 15:23-26). Tonga je kjoanda xi tsjoá je kjoa xi kisʼendajin sʼe̱jna tokʼia saʼndani. Je kjoa xi kisʼendajin kao Abrahán kui bakó nga ñaki sitjoson jmeni xi tjínndajinle Jeobá kʼoa nga ñaki chjotakixi sitse i̱ Sonʼnde (Gén. 1:28).
JNGO KJOA XI KISʼENDAJIN XI BAKÓ NGA KʼOÉJNANTSJAI JE CHJOTAXÁLE NINÁ
13, 14. Jméni xi bakó je kjoa xi kisʼendajin kao David xi tʼatsʼe Mesías.
13 Je én xi kinokjoa ya Edén kʼoa kao je kjoa xi kisʼendajin kao Abrahán kui bakóyaná nga ñaki kjoatéxomakixi síchjén je Jeobá kʼianga batéxoma. Je Chjotaxále Niná kʼoati ñaki kjoatéxomakixi sichjén nga koatexoma (Sal. 89:14). A kuicho nichxin nga chʼaosʼin koatexoma Chjotaxá jebi kʼoa nga koa̱nchjén nga kʼoati tjóʼaxin. Mai. Ijngosa kjoa xi kisʼendajin kui bakó nga tsínkʼia kʼoakoa̱n.
14 Kui kjoa xi kisʼendajin kao David (tʼexkiai 2 Samuel 7:12, 16). * Je Jeobá kʼoakitso nga je Mesías yaa kjuinroani ntje̱le David (Luc. 1:30-33). Nga kʼoakisʼin je Jeobá tsakakó jña kjoaʼaíni je Mesías. Kʼoakitso nga je ntje̱le David “xi tjínle ʼnde” nga rey koa̱n (Ezeq. 21:25-27). Je ntje̱le David, xi tsonile, je Jesús “kʼoéjnaa ngantsjai, kʼoa je yáxilele kʼoasʼin kʼoéjna ngantsjai joni tsa tsʼuí” nga tíjnantsjai (Sal. 89:34-37). Nikʼiajin nga chʼaosʼin koatexoma Jesús kʼoa je kjoanda xi kjoaʼaíkao sʼe̱jna tokʼia saʼndani.
KJOA XI KISʼENDAJIN NGA JNGO NAʼMI KATASASÉNNDA
15-17. 1) Kʼianga kʼoasʼin jngo kjoa kisʼendajin nga naʼmi koa̱n joni tsa Melquisedec, jmé xá xi sʼe̱le je ntje̱ jebi, kʼoa ánni. 2) Ánni nga kʼoati machjénsíni nga kui xá sʼin.
15 Je kjoa xi kisʼendajin kao Abrahán kʼoa kao David kui xi bakó nga rey koa̱n je ntje̱le chjoón. Tonga nga koa̱nchikontʼain ngatsʼi je chjota ali tsa to reyjin tjínnele koa̱n ntje̱ jebi. Kʼoati tjínnele nga naʼmi koa̱n. Toje xi naʼmi xi koa̱nle nga tsjoátʼa je xi machjén kʼianga tjóxinle je jéele chjota ánni nga tojngo koa̱nsíni je familiale Jeobá, je choʼndale xi tjío tʼanangi kao xi tjío ngʼajmi. Ijngo kjoa kisʼendajin nga naʼmi koa̱n joni tsa Melquisedec je ntje̱ xi kinchja̱ni je Jeobá.
16 Je Niná kʼoakitsole David nga jngo kjoa kʼoendajin kao Jesús kʼoa nga jao koya tjínni kjoa jebi. Xi títjon, kuinga je Jesús ya kʼoéjna ngakixile Niná kʼoa nga tsjoáʼndele nga sikjeson ngatsʼi kontrale. Xi majaoni, kuinga je Jesús naʼmi koa̱n “tokʼia saʼndani joni tsa je Melquisedec” (tʼexkiai Salmo 110:1, 2, 4). * Ánni nga mangósonsíni Jesús je Melquisedec. Kʼianga kjesa tjoéjinle je ntje̱le Abrahán ya ʼNde jña tsakʼinle nga kʼoaile, je Melquisedec rey sʼin tsakʼejna ya naxinandá Salem kʼoa naʼmile koan je “Niná xi ngisa nʼio ngʼa” tíjna (Heb. 7:1-3). Jesoa Jeobá kitsjoale xá nga rey kʼoa nga naʼmi koan. Kʼianga kjesa naʼmijin kʼoa reyjin ma je Jesús, tojéní Melquisedec xi kisʼele nga jao xá jebi. Kʼoa nijñajin kʼoatso je Énle Niná tsa tokʼoa tíjna jngo xi kui xá tjínle nga kjesa bʼejnajin Melquisedec kʼoa tsa tsakʼejna ijngo nga koanskanni xi kui xá kisʼele, kʼoa kuinga kʼoabixónsíñá nga “naʼmi xi tíjnantsjai” koan.
17 Je Jesús xá kitjoejinni nga naʼmi koa̱n kʼianga jngo kjoa tsakʼéndajin Jeobá kao je. Kʼoa jéní “naʼmi xi tíjna ngantsjai” joni tsa Melquisedec (Heb. 5:4-6). Kʼoa jebi kui síkʼéjnatsenná nga Jeobá jé sichjén Rey Mesías nga sitjoson jmeni xi tjínndajinle xi kao Sonʼnde kʼoa kao chjota.
JE CHJOTAXÁLE NINÁ KUI YʼANGINI JMENI KJOA XI TSAKʼÉNDAJIN NINÁ
18, 19. 1) Kʼoalasi je kjoa xi kisʼendajin xi kaʼyaa ndʼaibi, jósʼin kitsoale xínkjín kao Chjotaxále Niná. 2) Jméni xi koakoyaná je kjoaʼmiya xi ijngo.
18 Je kjoa xi kisʼendajin xi kaʼyaa ndʼaibi kui kabakóyaná josʼin kitsoale xínkjín kao Chjotaxále Niná. Je kjoa xi kisʼendajin yaa mangóson jngo xo̱n xi sʼenda ngixko̱n chjotaxá. Je én xi kitso Niná ya Edén kui bakóyaná nga je ntje̱le chjoón sichjén je Jeobá nga sitjoson jmeni xi tjínndajinle i̱ Sonʼnde kʼoa kao chjota. Je kjoa xi kisʼendajin kao Abrahán kui bakóya ʼyani ntje̱ jebi kʼoa jmeni xi sʼin.
19 Je kjoa xi kisʼendajin kao David bakóyasaná nga ya ntje̱le kjoaʼaíni je Mesías. Kʼoa kʼoati kui tsoya nga toje Jesús xi tiʼndele nga koatexoma ngantsjai i̱ Sonʼnde. Kʼoa je kjoa xi kisʼendajin nga naʼmi koa̱n joni tsa Melquisedec kui bakó nga naʼmi sʼin kʼoéjna ntje̱ jebi. Tonga ali tsa tojejin je Jesús xi kuinyakao je chjota nga chjotatsje koa̱n. Kʼoati tjíosa chjota xi jekʼoasʼin kitjoejin kʼianga rey kʼoa naʼmi koa̱n. Tonga ʼyá chjotani. Kui koakoyaná ya kjoaʼmiya xi ijngo.
^ párr. 6 Génesis 3:15: “Kontra sʼin sikatíono, ji kʼoa kao je chjoón kʼoa je ntje̱li kao je ntje̱le. Je, yaa jkui koase̱nne kʼoa ji yaa ngisjaindso̱ko̱ chi̱nengi”.
^ párr. 10 Génesis 22:15-18: “Kʼoa je ánkjele Jeobá kinchjaale je Abrahán xi koanjaoni kʼa ya tjen ngʼajmi, kitsole: Tsjoaña énna xi titʼatsʼanña, kui xi tso je Jeobá, kʼianga kʼoakanʼiai kʼoa tsín kabʼechjoanái je ʼndíli ninga tojngo mani, ñaki sichikontʼainle kʼoa an sinkjínya je ntje̱li joni tsa niño xi tjín ngʼá kʼoa joni tsa tsomí xi tjín ndaindáchikon; kʼoa je ntje̱li jé skoé naxinandále je chjotakontrale. Kʼoa kao je ntje̱li koa̱nchikontʼainni ngatsʼi naxinandá xi tjín sonʼnde nga̱ kanitjosonní énna”.
^ párr. 14 2 Samuel 7:12, 16: “Kʼianga jekuichokjetʼa nichxinli, kʼianga kuiyái kʼoa ya sʼe̱ñai kao chjotajchíngali, an skomitjen je ntje̱li nga koa̱nskanni, je ʼndíli, kʼoa nʼio taja sikʼéjna je kjoatéxomale. Je niʼyali kao kjoatéxomali kʼoéjnaa ngantsjai nichxin ya ngixkuin, je yáxileli kʼoéjnaa ngantsjai nichxin”.
^ párr. 16 Salmo 110:1, 2, 4: “Je Jeobá itsole Naina: Tijnai ngakixina saʼnda nga sikatíongia ndso̱kui je kontrali joni tsa yá xi binyanai ndso̱kui. Je Jeobá kjoeen je nganʼiole yániseli ya tjen Sión, kʼoa i kuitso: Tatexomajinlai je kontrali. Je Jeobá jekitsjoa énle kʼoa alikui sikʼantjaiya je kjoafaʼaitsjenle: ¡Naʼminí tokʼia saʼndani joni tsa je Melquisedec!”.
