Je Chjotaxále Niná yaa ngʼajmi tíjna. Je Jesús kʼoakitsole je chjotale nga katasíjé je Chjotaxále Niná nga̱ jé kjoaʼaíkao kjoanyʼán kʼoa kui kʼoasʼin xi kixi tíjna. Je chjotaxá sonʼnde alikui koa̱nle nga kjoaʼaxin je kjoatsʼen, kjoa xi tsín kixi kʼoa kao je chʼin. Tonga je Chjotaxále Niná koaanle kʼoasʼin. Je Niná jé ʼNdíle kiskoejin nga Rey koa̱n. Je Jeobá kʼoati kiskoejin kʼa je chjotale Jesús nga ya koatexomakao. (Tʼexkiai Lucas 11:2 kao 22:28-30.)

Je Chjotaxále Niná jeme kjoaʼaxin ngatsʼi je xi batiochjoale nga je Niná koatexoma. Kʼianga kʼoabixoán nga katanroa je Chjotaxále Niná kui tinijé nga je katabʼejnayangajaole ngatsʼi je chjotaxá sonʼnde. (Tʼexkiai Daniel 7:13, 14 kao Apocalipsis 11:15, 18.)

Je Jesús nʼio nda koatexoma kʼianga Rey koa̱n nga̱ tjínle kjoamatokon. Nga ʼNdíle Niná ma, je Jesús tjínle nganʼio nga kuinyakao ngatsʼi je chjota xi nganʼio síjéle Niná. (Tʼexkiai Salmo 72:8, 12-14.)

Je Chjotaxále Niná sichikontʼain je xi ñaki kʼoatjío kon nga kui síjé nga katafaʼai je Chjotaxále Niná kʼoa kao je xi kʼoasʼin fikao yaole josʼin mele Niná. Chótʼayai jmeni xi tso Biblia xi tʼatsʼe Chjotaxá jebi. Tsjoa sʼe̱li tokʼia saʼndani tsa kʼoasʼiain. (Tʼexkiai Lucas 18:16, 17 kao Juan 4:23.)