1, 2. 1) Ánni nga xkón jetsoʼbasíni je jtín xi kisʼejna ya naxinandá Colosas. 2) Jmé kjoafaʼaitsjen xi tsakinyakao je ndsʼee xi tjío ya Colosas nga miyole koan je Niná.

KʼIANGA siglo 1, je jtínle Cristo xi kisʼejna ya naxinandá Colosas nʼio xkón jetsoʼba. Tjínkʼa ndsʼee xi kʼoatjíotso nga machjén nga sitjoson je Kjoatéxoma xi tsakʼaile Moisés. Kʼoa kʼoati tjíokʼa xi kʼoatjíotso nga chʼaotjín nga bʼetsaojiaan. Je pastro Pablo kʼoakitsole nga xkón tíjna josʼin tjíosíkjaʼaitsjen, kitsole: “Chótsaon nga niʼyajin xi kʼoanachano kao kjoachjine xi tokjoandiso xi tsínjme chjíle, josʼin mangale chjota, josʼin tjíoma síkjitjosonle yaole jo tso kjoale sonʼnde, tonga likui jo tso Cristo” (Col. 2:8).

² Je chjotale Cristo xi tjío nga kʼia xi ya koai ngʼajmi, kʼiatsa kui koaitjenngi kjoafaʼaitsjenle chjotasonʼnde tochale sichajin je kjoanda xi tjínle kʼianga xtile Niná koa̱n (Col. 2:20-23). Je Pablo kʼoakitsole nga tsín katasícha je kjoamiyo xi tjínle kao Niná, kitsole: “Tikjaʼaitsjaon tʼatsʼe [jme] xi tjín ngʼá, ali tʼatsʼejin [jme] xi tjín i̱ sonʼnde” (Col. 3:2). Je chjotale Cristo tjínnele kisikjaʼaitsjenjin je kjoachoya xi tjínle nga ya koatio ngantsjai nichxin ya ngʼajmi (Col. 1:4, 5).

3. 1) Jméni xi koyale je chjotale Cristo xi ya koai ngʼajmi. 2) Jméni xi chótʼayá i̱ kjoaʼmiya jebi.

 ³ Je chjotale Cristo xi tjío ndʼaibi xi ya koai ngʼajmi, kʼoati kui bʼéya kjoafaʼaitsjenle je Chjotaxále Niná kʼoa nga sʼe̱le “kjoatjao kao Cristo” ya ngʼajmi nga ya koatexomakao (Rom. 8:14-17). Tonga jmé kjoachoya tjínle je xi i̱ koatio i̱ Sonʼnde. A kʼoati bakinle je én xi kinchja̱ je pastro Pablo. Jméni xi sʼin nga kʼoati kui kʼoeya kjoafaʼaitsjenle jme “xi tjín ngʼá” (Juan 10:16). Je Abrahán kao Moisés ñaki kui tsakʼéya kjoafaʼaitsjenle jme xi tjín ngʼá ninga kjoa jaʼatojin. Jósʼin koa̱n chjénngilee.

4. Jméni xi sʼin ngatsʼi je chjotale Cristo xi i̱ koatio i̱ Sonʼnde nga kui kʼoeya kjoafaʼaitsjenle jme xi tjín ngʼá.

⁴ Je xi i̱ koatio i̱ Sonʼnde machjénní nga kui kʼoeya kjoafaʼaitsjenle jme xi tjín ngʼá. Tonga jósʼin. Kʼianí nga kui sikʼéjnatítjon xi tʼatsʼe Jeobá kao tʼatsʼe Chjotaxále (Lucas 10:25-27). Je Cristo kʼoakisʼin, kʼoa kʼoati kui xi machjén nga sʼiaan tsanda ñá (1 Ped. 2:21). Kʼianga siglo 1, nga tsakatio je chjotale Cristo, ñaki tokui kisʼe xi to kjoandiso tjenkao, kjoachjine sonʼnde kʼoa to tsojmi kitjenngi je chjota. Kʼoakjoánti chon je sonʼnde xi tiyoaa ndʼaibi, nga̱ je Na̱i kjinentsja (tʼexkiai 2 Corintios 10:5). Machjénní nga choa̱le Jesús kjuintjenngiaa kʼoa si̱kuindaa yaoná nga tsín jme xi koatechjoaná nga tosi tonda miyoná koa̱n je Jeobá.

5. Jméni xi koa̱n chjónangilee yaoná josʼin nikjaʼaitsjeen xi tʼatsʼe tao̱n kao jmeni tsojmi xi tjín sonʼnde.

⁵ Kʼianga to tao̱n kʼoa to tsojmi tjíofitjenngi je chjotasonʼnde, a tíbʼetʼaná tsanda ñá. Josʼin nikjaʼaitsjeen kʼoa jonʼia kui bakó jmeni xi tsjoachaa. Je Jesús i kitso: “Jña nga tíjna kjoanyináli, kʼoati ya kʼoéjna ni̱ma̱li” (Mat. 6:21). Machjénní nga chjónangilee yaoná jméni xi ngisa nʼio mandosinná. A kui ngisa nʼio nikjaʼaitsjeen xi tʼatsʼe tao̱n, nga nʼio nda xá katasʼená, kʼoa nga ngisa nda kuijnaa. Axo tosa bʼenelee yaoná nga tomaniná josʼin tijnaa kʼoa kui ngisa nikjaʼaitsjeen josʼin tijnaa ngixko̱n Jeobá (Mat. 6:22). Je Jesús kʼoakitso nga tsín tinda kuiyoñá ngixko̱n Jeobá kʼiatsa kui kʼoéyaa kjoafaʼaitsjenná je kjoanyiná xi tjín sonʼnde (Mat. 6:19, 20, 24).

6. Jméni xi sʼiaan nga tsínkui sikinjená je jée xi kichʼá.

⁶ Kʼianga chjotajée maa, sasa tsaojinñá xi chʼaotjín (tʼexkiai Romanos 7:21-25). Kʼiatsa tsínná je nganʼiotsjele Niná kuijin kuinójiaan yaoná je kjoajndí, je “kjoachi̱nga̱ kao kjoachʼi̱”, kʼoa likuijin jchaxkoán je kjoatéxomale Niná (Rom. 13:12, 13). Kui tibixkantʼakoaa nga nyaon nyaon je jée xi kichʼá. Tokʼiaa nga koa̱n si̱kinjelee tsa ñaki kui kʼoéyaa kjoafaʼaitsjenná jme xi tjín ngʼá. Machjénní nga chʼa̱sjee nganʼio, je Pablo kitso: “Tosa sikiʼoan yaona, kʼoasʼin bʼenele yaona, joni tsa jngo choʼnda” (1 Cor. 9:27). Alikui koa̱n tokʼoaiʼndelee yaoná. Kataʼyala jmeni xi kisʼin jao chjota xi nʼio tsakʼénele yaole nga kixi kitʼale Niná (Heb. 11:6).

7, 8. 1) Jmé kjoa xi jaʼatojin je Abrahán kao Sara. 2) Jméni xi kjitʼa kisikjaʼaitsjen je Abrahán.

⁷ Kʼianga kʼoakitsole Jeobá je Abrahán nga ya katafikao familiale ya ʼnde  Canaán, ñaki kao kjoatsjoa kisitjoson je Abrahán. Kʼianga kʼoasʼin kisitjoson kʼoa koankjainle, je Jeobá kitsjoale kjoanichikontʼain kʼoa jngo kjoa tsakʼéndajinkao. Kitsole: “Naxinandáje sikaole kʼoa sichikontʼainle” (Gén. 12:2). Nkjín nó jaʼato, kʼoa je Abrahán kao Sara kje ʼya ʼndí sʼejinle. Je Abrahán a kʼoasʼin kisikjaʼaitsjen nga kisichajin Jeobá jmeni xi kitsole. Nga kui nichxin nʼio ñʼai sʼin tjíotsoma. Nʼio ndasʼin tjío ya naxinandá Ur tsakai nga̱ nʼio tjín tao̱n. Tonga 1,600 kilómetro tsakʼetsoma kʼianga ki ya Canaán. Je Abrahán kao familiale to ndʼianajño tsakatioʼya, alikui tongantsjai nga nkjín tsojmi kisʼele xi kiskine kʼoa saʼnda tjín chjotaché jñani tsakʼetsoma (Gén. 12:5, 10; 13:18; 14:10-16). Je Abrahán kao familia alikui kʼoasʼin kisikjaʼaitsjen tsa koai ijngokʼani ya Ur ninga nʼio nda chon (tʼexkiai Hebreos 11:8-12, 15).

⁸ Je Abrahán “koankjainle tʼatsʼe Jeobá” kʼoa alikui kui tsakʼéya kjoafaʼaitsjenle jmeni “xi tjín i̱ sonʼnde” (Gén. 15:6). Kui kisikjaʼaitsjen ngantsjai kjoanda xi kjoaʼaíkao Niná. Je Jeobá tsabe nga koankjainle je Abrahán kʼoa kitsole: “Tʼiain kjoanda, chótsain ya ngʼá kʼoa tʼexki̱ je niño tsa koa̱nxki̱li. Kʼoa kitsole: Kʼoakoa̱nchon je ntje̱li” (Gén. 15:5). Kʼianga jekinrʼoé én jebi je Abrahán, koanjinle nga tsín kisichajin je Jeobá xi tʼatsʼe. Kʼianga ñandia ñandia kiskotsenle je niño kui kisikjaʼaitsjen nga kʼoakitsole Jeobá nga nʼio nkjín koa̱nni je ntje̱le. Kʼoa nga kichoka nichxin, je Abrahán jngo ʼndí kisʼele tojokjoan kitsole je Jeobá (Gén. 21:1, 2).

9. Jósʼin koa̱n chjénngilee je Abrahán.

⁹ Tojo kisʼin je Abrahán, kʼoati kui tichoyalee nga sitjoson Jeobá jmeni xi tso (2 Ped. 3:13). Kʼiatsa tsínkui kʼoéyaa kjoafaʼaitsjenná jme xi tjín ngʼá kʼoajinsʼin ni̱kjaʼaitsjeen nga tsín ndi̱to̱n bitjoson jmeni xi tso je Jeobá kʼoa tsínjin tikʼoasikji kao kjoatsjoa si̱xánilee jonʼia tsakai. Nichxin kjoatse, tsakui nichxin kinikʼéjnai tsa jmeni tojoni nga precursor sʼin kinixálai Jeobá kʼoa tsa jmesani xá xi kinʼiai xi tsʼe. Tonga jmé xi tinʼiai ndʼaibi. A kʼoatinʼiai jokisʼin je Abrahán, nga kisikʼéjna ngayeje kʼianga Jeobá kisixále. Kʼoa a kui tibʼeyai kjoafaʼaitsjenli je kjoanichikontʼain xi sʼa nroa (Heb. 11:10). Je Abrahán “koankjainle tʼatsʼe Niná. Kʼoasʼin Niná chjotakjoakixi kitsole” (Rom. 4:3).

10. Jósʼin koanjchínga je Moisés.

¹⁰ Ijngo chjota xi kʼoati kui tsakʼéya kjoafaʼaitsjenle jme xi tjín ngʼá jé Moisés. Je Moisés yaa koanjchínga ya niʼyale rey xi tsakatéxoma ya Egipto. Kʼoa nga kʼia, kui naxinandá Egipto xi nʼio tse nganʼio tjínle. Je Biblia kʼoatso nga tsakʼinyale je “Moisés ngayije kjoachjine xi tsʼe chjota egipcios”. Kʼoa kjoachjine jebi kui xi nʼio ngʼa kisikʼéjna Moisés “kao ngayije xi kitso, kao ngayije xi kisʼin” (Hech. 7:22). Je Moisés koan nʼio ngʼa tsakʼejna ya Egipto. Tonga tosa kui kitjenngi jngo kjoachjine xi ngisa nʼio ngʼa tíjna.

11, 12. 1) Jmé kjoachjineni xi ngisa nʼio kitjenngi je Moisés. 2) Jósʼin tsakakó nga ngisa chjíle kjoachjine jebi.

¹¹ Kʼianga sʼa ʼndíkji je Moisés, je Jokébed xi na̱le koan, kitsoyale tʼatsʼe Ninále chjota hebreo. Je xi ngisa tsabechjí kui jmeni xi tsakʼinyale tʼatsʼe Niná. Je Moisés alikui kini je kjoanyiná  kao nganʼio xi sʼe̱le tsakai, tosa kui koanmele kʼoakisʼin jmeni xi mele Niná (tʼexkiai Hebreos 11:24-27). Jmeni xi tsakʼinyale nga sʼa ʼndíkji kʼoa kao kjoamakjain xi kisʼele tʼatsʼe Jeobá kui xi tsakasenkao nga kui tsakʼéya kjoafaʼaitsjenle jme xi tjín ngʼá.

¹² Ninga nʼio kisʼele kjoachjine sonʼnde je Moisés, alikui kʼoasʼin kisichjén nga nganʼio sʼe̱le kʼoa tsa kjoanyiná sʼe̱le ya Egipto. Ya Biblia kʼoatso nga “koankaile nga kʼoatsakʼinle tile tsotile Faraón. Tosa tsakjaʼájin nga tsakjaʼá kjoañʼai kao chjotale Niná, nga̱ likui tsakjaʼájin nga koanmekon kjoatsjoale jée xi tofaʼato”. Nga koanskanni, je kjoachjine xi kisʼele tʼatsʼe Jeobá, kui xi tsakasenkao nga tsakándiaale je naxinandá Israel.

13, 14. 1) Jósʼin kisindaya kjoanla yaole Moisés kʼianga kjesa síkatíondaíjin je naxinandále Jeobá. 2) Jméni xi kʼoati machjén nga si̱ndayaa yaoná tsanda ñá.

¹³ Je Moisés tsjoake koan je Jeobá kao naxinandále je xi choʼnda sʼin tsakatio ya Egipto nga kui nichxin. Kʼianga ñachan nóle Moisés, kʼoasʼin kisikjaʼaitsjen nga jetíjnanda nga sikatíondaí je chjota israelita (Hech. 7:23-25). Tonga je Jeobá be nga kje tíjnandajin je Moisés. Tjínnele nga nangitokon koa̱n, nga tsejta koa̱n, nga ndʼé koa̱n kʼoa nga koa̱nle skoéxkó yaole (Prov. 15:33). Je Moisés títjon kjoanla kui kisʼele jebi ánni nga ska̱sínile ngayeje kjoa xi kjoaʼatojin. Ñachan nó nga cho̱ntje kisikuinda kʼoa kui xi tsakasenkao nga koanndaya.

¹⁴ A tsakasenkao xá jebi je Moisés. Ya Biblia kʼoatso nga “jé xi ngisasa nʼio ndʼé [koan] tikʼoajinni je chjota xi tsakatio sonʼnde” (Núm. 12:3). Kisʼele kjoanangitokon, kʼoa kuinga kiskasínile jme kjoa xi jaʼatojin kʼoa tsejta koansíni kao chjota israelita (Éx. 18:26). Kʼoatisʼinni tsanda ñá, kʼoati kui machjénná nga kuitjátojiaan je kjoañʼai xi nʼio tse kʼoa nga kuitjásʼeen ya sonʼnde chjotse (Rev. 7:14, TNM). A nda mangínkoaa tojo kji chjotani, ninga je xi sasa majtinile. Je én xi kiski je pastro Pedro kʼoati koasenkaoná. Kitso: “Jchaxkón ngatsʼi. Katamatsjoachao ndsʼao” (1 Ped. 2:17).

15, 16. 1) Ánni nga nʼio machjénsíni nga kui kʼoéyaa kjoafaʼaitsjenná jme xi tjín ngʼá. 2) Ánni nga nʼio machjénsíni nga nda koaikao yaole je chjotale Cristo.

¹⁵ “Je nichxin xi kjoetʼa kjoaʼaíná kjoañʼai xi tse”, kʼoa jekui nichxin tiyoaa ndʼaibi (2 Tim. 3:1). Kʼoa kuinga machjénsíni nga kui kʼoéyaa kjoafaʼaitsjenná jme xi tjín ngʼá kʼianga chrian kuiyolee je Niná (1 Tes. 5:6-9). Janla koya kataʼyaa jmeni xi koa̱n sʼiaan.

¹⁶ Josʼin mangínkoaa yaoná: Je pastro Pedro kʼoakitso nga nʼio chjíle nga nda koanngínkoaa yaoná, kitso: “Nda tangínkao yaono yajinle chjota xi li judíojin”. Kʼoakitso kʼianga je chjota xi tsín be je Jeobá skoe̱ní jonʼia kʼoa “kʼoasjejeya Niná” (1 Ped. 2:12). Machjénní nga nʼio kʼoénelee yaoná nga nda koanngínkoaa yaoná ánni nga kuitjongʼasíni je Jeobá tojñani nga tiyoaa, a yaa niʼyaná, a yaa tʼaxáná, a yaa ndʼiaskuela, a tibʼetsaojinñá, axo kʼiaa nga tiʼmiyasoán. Kjoaixiní nga chjotajée maa kʼoa nga saténgiaa (Rom. 3:23). Tonga alikui koa̱n nga si̱kinroajeen je tokoán. Kao nganʼiole je Jeobá koaan kuixkantʼaa “je kjoajchán xi nda tʼatsʼe xi makjainná” (1 Tim. 6:12).

17. Jósʼin koa̱n chjénngilee je kjoafaʼaitsjen xi kisʼele je Jesús. (Chótsenlai sén xi faʼaitʼa ya jña fitsʼiani kjoaʼmiya jebi.)

 ¹⁷ Kjoafaʼaitsjenná: Kʼianga nda koanngínkoaa yaoná, kʼoati machjén nga nda si̱kjaʼaitsjeen. Je pastro Pablo i kitso: “Katasʼeno nga jon jñale kjoafaʼaitsjen xi kisʼele Cristo Jesús” (Filip. 2:5). Kʼoa jókoankjoan je Cristo. Nangitokon koan, kʼoa kui xi tsakasenkao nga nʼio kisixále je Jeobá. Tsakakóyaa je énnda chjotse xi tsʼe Chjotaxále Niná kʼoa kui kisʼeya ngantsjai je kjoafaʼaitsjenle (Mar. 1:38; 13:10). Je Jesús, kui Énle Niná xi ngisa tsakándiaale ngantsjai (Juan 7:16; 8:28). Nʼio kiskotʼaya je Énle Niná ánni nga koan kisikʼaxki̱síni jotso, nga koan kisitoánntjaisíni kʼoa koan kitsoyasíni josʼin tínchja̱ni. Kʼiatsa mená nga kjoafaʼaitsjenle Cristo sʼe̱ná, kʼoati machjén nga nangitokon koaan, nga nʼio kʼuínyasoán, kʼoa nga nʼio chótʼayá Énle Niná.

18. Jósʼin kʼoainganʼiolee je xá xi tísʼín je Jeobá.

¹⁸ Josʼin kʼoainganʼioá: Je Niná kui xi mele nga je “xi tjío ngʼajmi, kao xi tjío i̱ sonʼnde” nangi katabatiole je Jesús (Filip. 2:9-11). Ninga nʼio ngʼa sʼin tíjna je Jesús, kʼoati nangi bʼejnale je Nʼaile. Kʼoati tjínnele sʼiaan tsanda ñá (1 Cor. 15:28). Jé Jeobá nixákoaa kʼianga ʼmiyalee ngatsʼi chjota nga chjotale Cristo katama (Mat. 28:19). Kʼoati kui kʼoanʼia xi ndatjín kʼianga nda nikoaa je chjota kʼoa kao ndsʼee (Gál. 6:10).

19. Jméni xi sʼiaan nga jngó jngoá.

¹⁹ Bʼailee kjoanda je Jeobá kʼianga kʼoatsoná nga kui kʼoéyaa kjoafaʼaitsjenná jme xi tjín ngʼá. Machjénní nga tosi tonda kao “kjoatsejta” tókaa (Heb. 12:1). Ñaki kao ngayeje ni̱ma̱ná si̱xálee je Jeobá, nga̱ ʼyañá nga toje xi nʼio tse kjoanichikontʼain tsjoáná (Col. 3:23, 24, TNM).