1, 2. 1) Jméni xi koanmele nga skoe̱ je chjotatítjonle relijión. 2) Jókitsole je Pedro. (Chótsenlai sén xi faʼaitʼa ibi.) 3) Ánni nga kʼoasikji nʼiojin koansíni je Pedro.

KʼIANGA jejaʼato jngo jao xomana nga kinikʼien Jesús, je pastro Pedro tsakʼetʼale je naʼmitítjonle chjota judío. Chjota jebi tijeni xi kʼoasʼin tsakʼéndajin nga kinikʼien Jesús. Nʼio koanjtile nga jngo chjota xi tsín ma fi kisindaya je Pedro. Kʼoa je Pedro i tsakʼinle: “Jñále nganʼio, ʼyá xi katsjoáʼnde nga kʼoakanʼiao jebi”. Kʼoa je Pedro kiskoé kjoanʼiojin kʼoa i kitsole: “Je chjotabi tíjna ngixkon, kʼoa jekoanndani xi totʼatsʼe je xi Jesucristo ʼmi, xi Nazaret tsʼe, je xi tsakjatʼao [yá], kʼoa je xi Niná kisikjaʼáyajinnile kʼen” (Hech. 4:5-10).

² Nga títjon, je Pedro nʼio kitsokjon kʼoa jan kʼa tsakʼéʼmatʼain je Jesús (Mar. 14:66-72). Tonga nga tsakjákao chjotatítjonle relijión ʼndele nga tso̱kjon, je Pedro kiskoé kjoanʼiojin. Ánni. Kuinga kitsjoale nganʼiotsjele Niná kʼoa nga tsín jao kisʼele Pedro nga tíjnakon Jesús. Ánni nga tsín jao kisʼesínile. Kʼoa ánni nga kʼoati tsín jao katasʼesíniná tsanda ñá kʼianga jaʼáyale Jesús.

3, 4. 1) ʼYáni xi kinikjaʼáyale kʼianga kjesa batiojin je pastrole Jesús. 2) ʼYáni xi kisikjaʼáyale Jesús.

³ Je pastro ñaki tsabe nga kjoaʼáyanile je kʼien. Kʼianga  kjesa batiojin je pastro, je Niná kitsjoale nganʼio je Elías kao Eliseo nga koanle kisikjaʼáyale kʼien (1 Rey. 17:17-24; 2 Rey. 4:32-37). Jngo chjota xi saʼnda jaʼáyale kʼianga kinikʼatjenya tsjó nga tsʼakaole nindale Eliseo (2 Rey. 13:20, 21). Je chjotale Cristo xi títjon tsakatio koankjainle nga kʼoakoan, kʼoa ñá kʼoatisʼin makjainná nga ñaki kʼoatjín jmeni xi tso je Énle Niná.

⁴ Tsakui nichxin ñaki nʼio tsjoa koanli kʼianga tsakʼexkiai josʼin kisikjaʼáyale chjota je Jesús. Tobʼelañá, tochaniyalai jkui jokji tsjoa koanle jngo ʼndíchjoónkʼan kʼianga kisikjaʼáyale Jesús je ʼndíle ʼndíchjoón jebi (Luc. 7:11-15). Kʼoa tikjaʼaitsjenlai kʼianga jngo tsotiʼndí kisikjaʼáyale Jesús. Ñaki nʼiojin tsjoa koanle je xijchále kʼianga jaʼáyale je tsotiʼndíle (Luc. 8:49-56). Kʼoa ñaki tokoanxkónjinle je chjota kʼianga tsabe je Lázaro nga kitjo tsjó kʼianga jejaʼáyanile (Juan 11:38-44).

5. Ánni nga tsín koanngósonsíni je kjoafaʼáyale Jesús kao kjoafaʼáya xi ngikʼa.

⁵ Je pastro kʼoati tsabe nga tsín koanngóson je kjoafaʼáyale Jesús kao kjoafaʼáya xi ngikʼa. Je chjota xi jaʼáyale kʼien ijngokʼani nga jekoanni. Tonga je Jesús nga jaʼáyale espíritu koan kʼoa alijme xi tikoa̱nnile (tʼexkiai Hechos 13:34). Je Pedro kʼoakitso nga “ñaki kʼen jo kjoan yaole, tonga kinikʼéjnakon” nga espíritu koan. Kʼoa “kimi ngʼajmi Cristo. Tíjnatʼa ngakixile Niná. Ánkje kao ngayije kjoatéxoma kao ngayije nganʼio tjíongile nga je” (1 Ped. 3:18-22). Je kjoaxkón xi kisatio nga kinikjaʼáyale chjota ñaki tokʼoamaná, tonga je kjoaxkón xi ngisa tokʼoamaná kuiní je kjoafaʼáyale Jesús.

6. Jósʼin tsakinyakao je chjotale Jesús nga kʼoasʼin jaʼáyanile.

⁶ Kʼianga kʼoasʼin jaʼáyale Jesús nʼio tsakinyakao je chjotale. Alikui tondiaa kʼien josʼin koanmele tsakai je chjotakontrale. Je Jesús nʼio tse nganʼio kisʼele nga espíritu koan kʼoa nijngojinla chjotasonʼnde xi koa̱n josikao. Kʼianga kʼoasʼin jaʼáyale kui tsakakó nga ʼNdíle Niná ma. Je chjotale tsabe nga tíjnakon ijngokʼani Jesús kʼoa alikui tiba kisationile kʼoa likui tikitsokjonni. Tosa nʼio tsjoa kisatiole. Kʼiatsa tsínlani jaʼáyale Jesús, alikuijin kitjoson jmeni xi tjínndajinle je Niná kʼoa toxitsjoajinni nga kʼoasʼin kitsoyason je énnda chjotse.

7. 1) Jméni xi tísʼín ndʼaibi je Jesús. 2) Jméni xi chjónangilee yaoná.

⁷ ʼYañá nga tsín tsa toxkia chjota koan je Jesús. Je Jesús tíjnakonní kʼoa jé séntítjonle je xá xi kjima nga kʼoasʼin tíʼmiyason jngo tjíjtsa Sonʼnde. Jé xi Rey sʼin tíjna ya ngʼajmi kʼoa jeme kjoaʼaxin ngayeje kjoatsʼen xi tjín i̱ Sonʼnde kʼoa ʼndenaxó sikao nga chjota koatio tokʼia saʼndani (Luc. 23:43, TNM). Alikuijin kʼoakoan ngayeje jebi kʼiatsa tsínlani jaʼáyale je Jesús. Kʼoa ánni nga ñaki tsín jao tjínsíniná nga ñaki jaʼáyale je Jesús. Kʼoa jósʼin basenkaoná je kjoafaʼáyale.

8, 9. 1) Ánni nga kʼoakitsosíni je chjotatítjonle relijión nga katamakuinda jñani kisʼeñe je Jesús. 2) Jméni xi koan kʼianga kichokotsen je yánchjín ya tsjó jñani kisʼeñe je Jesús.

⁸ Kʼianga jekinikʼien je Jesús, je chjotatítjonle relijión kinrʼoe je Pilato kʼoa kitsole: “Señor, faʼaitsjennajin nga je chjotachʼanachabe kitso nga tíjnakonsa: Xi koa̱n jan nichxin kjoaʼáyana. Tatexomai  tsokʼoa nga katasʼechjoanda je tsjókʼen saʼnda koa̱n jan nichxin, jméni nga tsín kjoaʼaísíni chjotale nga njio, kʼoa siché, kʼoakuitsole naxinandá: Kafaʼáyajinnile kʼen. Kʼoa je kjoachʼanacha xi koa̱nskanni ngisa chʼao koa̱n joni xi títjon. Pilato kʼoakitsole: Chjóao sondado xi sikuinda, tangíon kʼechjoandao tsjóbe, josʼin koa̱nno”. Kʼoa kuikjoán xi kisʼin chjota xokjoan (Mat. 27:62-66).

⁹ Je Jesús yaa kisʼeñe ya ngijao jñani jngo la̱jao̱je sénjchxo. Je chjotatítjonle relijión kui xi koanmele nga tondiaa sʼe̱jnaya ya tsjó. Tonga je Jeobá alikui kʼoasʼin kisikjaʼaitsjen. Nga koanjanni nichxin, je María Magdalena kʼoa kao xi ijngo María, xi yánchjín tjenngile koanni, kichokotsen ya jña kijna je tsjó. Kʼianga jekicho jetʼaxin tíjna je la̱jao̱ kʼoa jngo ánkje xi ya tíjnason. Je ánkje kʼoakitsole je yánchjín nga katakotsenya je tsjó kʼianga jekjitia, i kitsole: “Ali i̱ tíjna, nga̱ kafaʼáyanile” (Mat. 28:1-6). Je Jesús jaʼáyanile.

10. Jméni xi kitso je Pablo kʼianga ñaki jaʼáyale je Jesús.

¹⁰ Jmeni xi koan je xi ñachan nichxin tsakʼejnasa je Jesús alikui jao tjínná nga jaʼáyale. Je pastro Pablo i kitsole je chjota xi Corinto tsʼe: “Xi ngisa nʼio machjén xi kʼoasʼin kitsʼaina, tikui tsakakoyano: Nga Cristo kʼen xi tʼatsʼe jéená, josʼin tjítʼa xo̱n Escritura, nga kisʼeñai, nga jaʼáyanile nga koanjanni nichxin, josʼin tjítʼa xo̱n Escritura, kʼoa nga tsʼatsenle Cefas, kʼia koanskanni je xi tejaobe. Koanskanni jngo kʼakjoan tsʼatsenle ndsʼee xi tojngo tjío xi tsʼato aon siento mani. Xi ngisasa nkjín tojo tjíokon, tonga tjín kʼa xi jekʼen. Koanskanni tsʼatsenle Jacobo, koanskanni ngatsʼi pastro. Kʼoa je xi fetʼani ngatsʼi, tsʼatsenna nga an, joni jngo ʼndí xi tokinjetaon” (1 Cor. 15:3-8).

11. Jósʼin kitjoson xi “tjítʼa xo̱n Escritura” nga jaʼáyale Jesús.

¹¹ Je kjoafaʼáyale Jesús kʼoakoan josʼin “tjítʼa xo̱n Escritura”. Je Énle Niná tongini kʼoakitso nga kjoaʼáyale Jesús. Tobʼelañá, je David kʼoakitso nga je “xi kixi” tífitʼale Niná tsín ya kʼoéjnaya “ya Tsjó” (tʼexkiai Salmo 16:10). * Kʼianga sʼuí Pentecostés nga nó 33, je Pedro i kitso xi tʼatsʼe Jesús: “Kʼoasʼin David tongini tsabe, kʼoa kinchja xi tʼatsʼe kjoafaʼáyale Cristo, nga tsín tsa ya kisʼejna ni̱ma̱le ngi kjoatéxomale kjoabiya, nijejin yaole jiʼndo” (Hech. 2:23-27, 31).

12. ʼYáni xi tsabe nga jaʼáyanile je Jesús.

¹² Nʼio nkjín chjota xi tsabe nga jaʼáyale Jesús. Je xi ñachan nichxin tsakʼejnasa Jesús kʼianga jejaʼáyanile, tsʼatsenle chjotale ya chrian jñani kisʼeñe kʼoa kao ya ndiaa xi fi ya naxinandá Emaús. Kʼoa kʼoati tsʼatsenle jñani xin ʼnde (Luc. 24:13-15). Je Jesús tsakjákao chjota kʼianga toje tjío kʼoa saʼnda tsakjákao Pedro. Xijekoan, je Jesús tsʼato aon siento chjota tsʼatsenle. Ñaki makjainná nga jaʼáyale je Jesús nga̱ nʼio nkjín chjota tsabe.

13. Jósʼin tsakakó je chjotale Jesús nga ñaki be nga jaʼáyanile je Jesús.

¹³ Je chjotale Jesús ñaki nʼio kitsoyason nga kʼoasʼin jaʼáyanile Jesús. Kitjenngike chjota, kjoañʼai kinikjaʼá kʼoa tjínkʼa xi saʼnda kinikʼien nga kʼoasʼin kitsoyason. Tobʼelañá, kʼiatsa tsínlani jaʼáyale Jesús, a koan kon je Pedro nga xkón kisikʼéjna kjoabijnachonle nga  tʼatsʼe kjoafaʼáyale Jesús tsakjákaoni je chjota xi jtike koan Jesús kʼoa kisikʼien. Je Pedro kʼoa kao je xi ngikʼa chjotale Jesús ñaki tsabení nga tíjnakon ijngokʼani Jesús kʼoa nga je séntítjonle je xá xi tjíosʼín nga tjíotsoyason. Je kjoafaʼáyale Jesús kʼoati kitsjoale kjoachoya je chjotale nga kjoaʼáyanile tsanda je. Tobʼelañá, je Esteban ñaki kʼoatsakʼé kon nga kjoaʼáyanile (Hech. 7:55-60).

14. Ánni nga kʼoasʼin makjainsínili nga tíjnakon je Jesús.

¹⁴ Tjínná choa̱ nga Rey sʼin tíjna je Jesús nga tíbatéxoma kʼoa nga je xi ngʼajko̱ tíjnale je jtín xi tsʼe Cristo. Je xi ñaki chjotale Cristo ma tosi tonda kjimankjín. A kʼoakoa̱n kʼiatsa tsínlani jaʼáyale je Jesús. Saʼnda tsínjin kinoʼyá xi tʼatsʼe Jesús kʼiatsa tsínlani jaʼáyale. Tonga tjíoná choa̱ nga tíjnakon je Jesús kʼoa nga je séjnatítjonle je xá xi kjima nga kʼoasʼin tíʼmiyason.

15. Jósʼin sínʼiojinná je kjoafaʼáyale Jesús nga ʼmiyasoán.

¹⁵ Je kjoafaʼáyale Jesús sínʼiojinná kʼianga ʼmiyasoán. Saʼnda nga nichxinle Jesús, je xi kontra tjíobatíole Niná nʼio nkjín koya josʼin tjíobásjaile nga mele tsín tikataʼmiyasonni je énnda chjotse. Tobʼelañá, besinná, sítsʼenkaoná, batiochjoaná, síkiʼaonná, kʼoa tsakui nichxin saʼnda sikʼienná, kʼoati tjío xi yátsʼi̱n tjíobinyale Niná. Tonga ya Biblia itso: “Nijngojin ki̱cha̱ xi kjuinroaneli xi kuinje̱le” (Is. 54:17). Alikui nokjonlee je chjota xi Na̱i síchjén. Jé tíbasenkaoná je Jesús tojo jekitso (Mat. 28:20). Ñaki tjínjngo tokoán kʼoa alikui kui kjuinñá tojmeni xi sʼin je chjotakontraná, alikui je kʼoechjoaná.

16, 17. 1) Jméni xi bakó je kjoafaʼáyale Jesús tʼatsʼe xi tsakakóya. 2) Jméni nganʼio xi kitsjoale Niná je Jesús tojo tso ya Juan 11:25.

¹⁶ Je kjoafaʼáyale Jesús kui bakó nga ñaki kʼoatjín jmeni xi tsakakóya. Jngo chjota xi nʼio be tʼatsʼe Biblia kʼoakitso nga to chjotachini kʼoa nga to kjoandiso makjainle je chjotale Cristo kʼiatsa tsínlani jaʼáyale je Jesús. Je pastro Pablo kʼoakitso nga tsín jme chjíle nga kʼoasʼin ʼmiyasoán kʼoa kao kjoamakjainná kʼiatsa tsín jaʼáyale Jesús. Kʼoa jmeni xi bʼéyanajmí je Evangelio tokuijin tʼatsʼe jngo chjota xi nda chjota koan kʼoa xi chjotakontrale kisikʼien. Tonga je Jesús jaʼáyale, kʼoa kui xi bakó nga ñaki kʼoatjín jmeni xi tsakakóya (tʼexkiai 1 Corintios 15:14, 15, 20).

¹⁷ Je Jesús kitso: “An nía xi sikjaʼáya, kʼoa an nía xi kjoabijnachon. Je xi makjainle tʼatsʼan, nda tsa kʼen, kʼoéjnakonní” (Juan 11:25). Én jebi ñaki kuitjosonní. Je Jeobá jekitsjoale nganʼio je Jesús nga sikjaʼáyale je xi ya koatexomakao ngʼajmi kʼoa kʼoati nkjín jmi miyón mani xi sikjaʼáyale i̱ Sonʼnde. Je kjoabʼechjíntjaile Jesús kʼoa kao kjoafaʼáyale kui bakóyaná nga tsín tisʼe̱ni kjoabiya. Kuinga katakasíniná tojmeni kjoa xi kuitjátojiaan kʼoa ninga saʼnda si̱kʼienná.

18. Jméni kjoanda xi tsjoáná je kjoafaʼáyale je Jesús.

¹⁸ Je kjoafaʼáyale je Jesús kui bakóyaná kʼianga je kjoatéxomale Jeobá koa̱nchjén nga sʼe̱ndajinle chjota. Je Pablo i kitsole je chjota xi tjío ya Atenas: “Kʼia nga kʼoendajin sonʼnde [Niná] kao xi kjoakixi, totʼatsʼe je chjotaxʼin xi tsakasén. Kʼoasʼin Niná kitsjoale kjoakixi ngatsʼi nga kisikjaʼáyajinle kʼen Jesús” (Hech. 17:31). Je Niná jé kitsjoale xá je Jesús nga Juesná koa̱n kʼoa alikui jao  tjínná nga ñaki kao kjoatsjoacha kʼoa kao kjoatéxomakixi kʼoendajinni (tʼexkiai Isaías 11:2-4). *

19. Jósʼin basenkaoná kʼianga makjainná nga jaʼáyale je Cristo.

¹⁹ Mená nga kui kʼoasʼiaan josʼin nga mele je Niná nga̱ makjainná tʼatsʼe kjoafaʼáyale je Jesús. Kʼiatsa tsínlani kitsjoa je kjoabijnachonle je Jesús kʼoa tsa tsínlani jaʼáyale, tojo kuijin jée kao kjoabiya koatexomaná (Rom. 5:12; 6:23). Alikuijin jme kjoachoya sʼe̱ná kʼoa koa̱njin toʼi̱ kuixoán: “Kuichaa, sʼioaa, nga nyaonli kuiyanía” (1 Cor. 15:32). Tonga alikui kui mangíntjenngiaa je kjoatsjoa. Tosa kui nʼio ʼyachjiá je kjoachoya xi tjínná xi tsʼe kjoafaʼáya kʼoa kao kjoatsjoa nitjosonlee ngantsjai je Jeobá.

20. Jósʼin bakó je kjoafaʼáyale je Jesús jokji jeya tíjna je Niná.

²⁰ Je kjoafaʼáyale je Jesús kui bakó jokji jeya tíjna je Jeobá nga̱ jé tsjoále “chjíle je chjota xi nʼio básjai nga je” (Heb. 11:6). Je Jeobá kui nganʼiole kisichjén kʼoa kao kjoachjinele kʼianga kisikjaʼáyale Jesús nga jngo kjoabijnachon xi tsín jme xi koa̱nle kitsjoale ya ngʼajmi, xi tsonile, nga tsínkʼia tikuiyáni. Je Niná kʼoati ñaki sitjoson jmeni xi tjínndajinle. Je Niná kʼoakitso nga jngo ntje̱ kjoaʼaí je xi kʼoendajin je kjoa xi kisoko nga kʼoatsakʼinle Niná nga tsín nda batéxoma. Kʼianga kuitjoson jebi, je ntje̱, xi tsonile Jesús, tjínnele nga kuiyá kʼoa nga kjoaʼáyanile (Gén. 3:15).

21. Jósʼin basenkaoli je kjoachoya xi tsʼe kjoafaʼáya.

²¹ Nʼio bʼailee kjoanda je Jeobá kʼianga kʼoasʼin jngo kjoachoya kitsjoaná xi tʼatsʼe kjoafaʼáya. Je Biblia itso: “Koeni je niʼyale Niná kijnajinle chjota, kʼoa Niná kʼoéjnakao. Chjotanaxinandále koa̱n. Tijéni Niná Ninále koa̱n. Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato”. Je én jebi jé xotsakʼinle je pastro Juan, i tsakʼinsale: “Chjí, nga je énbi ndaní, kʼoa kjoakixiní”. ʼYáni xokitsole je Juan. Jé Jesucristo kʼianga jejaʼáyanile (Apoc. 1:1; 21:3-5).