XI NGISA TÍNCHJA̱NI REBISTA JEBI
A ñaki tíjna je Na̱i
Estatua xi séjna ya Madrid, España, kʼianga tíkajenngi je Na̱i
Je Rogelio, xi ya El Salvador koanjchínga, itso: “Kʼianga sʼa ʼndí kjiʼe̱ makjainna xi tʼatsʼe Niná tonga likui makjainna xi tʼatsʼe Na̱i. Kʼianga jme xi sʼian, je mana itsona: Tsa Na̱i koaikaoli. Kʼoa an i xinle: Katafikaona, lijme xi koa̱nle”.
Kʼoa ji jósʼin nikjaʼaitsjain xi tʼatsʼe Na̱i. Jñánile nga jan koya xi faʼaitʼa ibi xi makjainli.
-
Tsín je Na̱i, je én xotso tokui tsoyanile je xi chʼaotjín.
-
Je Na̱i tíjnaní, tonga alikui josíkaoná.
-
Je Na̱i espírituní, nʼio tjínle nganʼio kʼoa jé xosíkao chjota nga chʼao katasʼín.
Kjaʼaí kjaʼaísʼin síkjaʼaitsjen chjota nga jngó jngó. ʼYáni xi ñaki kʼoatjín jotso. A machjén nga jchaa. Kʼiatsa tsín je Na̱i, to yaolejin tjíobʼanachale je chjota xi kʼoasʼin makjainle nga tíjna. Kʼiatsa tíjna je Na̱i kʼoa tsín josíkaoná, tokjoatjaojinni nga tsokjónle chjota. Tonga tsa tíjna je Na̱i kʼoa je xosíkao chjota nga chʼao katasʼín nʼiojinni xkón tiyoaa.
A ñaki tíjna je Na̱i axo tokui xoʼmi je xi chʼaotjín. Kʼiatsa ñaki tíjna kjoaixi, a xkón tijnai. Kʼoa tsa jaon, jméni xi sʼiain nga si̱kuindai yaoli. Kataʼyala jotso je Biblia.
