XI NGISA TÍNCHJA̱NI REBISTA JEBI: A ÑAKI TÍJNA JE NA̱I
A koaan kuijkónlee je Na̱i
Je Na̱i yaa mangóson je xi monóxido de carbono ʼmi, jngo gas xi tsín matsen kʼoa xi nʼio xkón
Je xi monóxido de carbono ʼmi jngo gas xi tsín matsen kʼoa xi tsín nje̱ kʼoa saʼnda tsín be chjota kʼianga síkʼien. Jotjín chjota xi veneno síkʼien, tsʼato basen xi kui gas jebi síkʼien. Tonga alikui koa̱n kuijkónlee. Tjín ki̱cha̱ xi bakó tsakui tíbitjo kʼoa koaan si̱kuindalee yaoná. Nkjín chjota xi kui síkatío ki̱cha̱ jebi ya niʼyale kʼoa tokjoan bitjoo kʼianga fane.
Je Na̱i yaa mangóson gas jebi, alikui matsen, nʼio chʼao kjoan kʼoa alikui ʼyaa kʼianga bʼetʼaná. Tonga kʼoati tsín koa̱n kuijkónlee je Na̱i, nga̱ je Niná nkjín koya josʼin basenkaoná. Kataʼyala kʼaa.
Koaan chjoéjiaan josʼiaan. Santiago 4:7 itso: “Tiyotajalao je na̱i, kʼoasʼin koa̱nga tʼaxinnino”. Ninga nʼio tjínle nganʼio je Na̱i alikui koa̱nle nga kjoanʼio kʼoenená nga kui kʼoasʼiaan jmeni xi tsín mená. Ñá xi kuixónñá josʼiaan. Kʼiatsa tsín si̱kinroajeen kjoamakjainná alijo sikaoná (1 Pedro 5:9). Nga jan kʼa kʼianga kiskotʼayakao Jesús je Na̱i alikui kisitjosonle, kʼoa je Na̱i tokini (Mateo 4:11). Kʼoati koa̱n sʼiaan tsanda ñá.
Si̱miyoaa Niná. Santiago 4:8 itso: “Tichriantʼalao Niná”. Én jebi kʼoatsoná nga si̱miyoaa je Jeobá. Jméni xi sʼiaan nga miyoná katama. Kʼiaa tsa chótʼayá jmeni xi tso Biblia xi tʼatsʼe (Juan 17:3). Kʼianga jchasaa xi tʼatsʼe Niná ngisa tsjoacha koaan. Kʼoa kʼianga ngisa tsjoacha koaan ngisa koa̱nmená nga kʼoasʼiaan josʼin mele (1 Juan 5:3). Jósʼin Niná kʼiatsa kʼoasʼiaan. Santiago 4:8 itsosa: “Kʼoati je sichriantʼano nga jon”.
Jeobá basenkaoná
Sikuindaná Niná. Proverbios 18:10 itso: “Je jaʼaínle Jeobá mangóson jngo xjáo taja. Je chjota xi kixi yaa tokanrʼoe kʼoa makuindaa”. Jebi alikui xi tsonile tsa tosi̱kʼaxkiaa je jaʼaínle Jeobá kʼoa toje lijme xi tikoa̱nniná. Kui xi tsonile nga je xi bexkón Niná koaan sijéle nga katabinyakao kʼianga koa̱nchjénle.
Jngo choa̱ xi koa̱n kjuintjenngiaa. Jmeni xi tso ya Hechos 19:19 nʼio tse xi tsoyaná. Kui nchja̱ni tʼatsʼe chjota xi ya Éfeso tsʼe xi tokʼia chjotale Cristo koan. Itso: “Kʼoati nkjín xi kʼoasʼin koanle je kjoachʼanacha [magia] jaʼaikao librole tjíobaká ngixko̱n ngatsʼi. Tsakʼasje kuenta jo tjín chjíle xo̱n xi tsakaká. Koansjaile nga ñachante jmi chjíle ngayije [je xi tao̱nchxoa]”. * Je chjotale Cristo jebi tsakjaʼáxin ngayeje xi majia tjenkao kʼoa alikui kini jotjín chjíle. Jngo choa̱ xi nʼio nda tsakʼéjnaná. Nichxin xi tiyoaa ndʼaibi nʼio tísʼe je kjoabʼenda. Tjín tsojmi kao jmeni xi nʼia xi tsín matsen tsa kjoabʼenda tjenkao. Tonga kjoa jebi jé ánkjele Na̱i nchja̱ndale. Kuinga nʼio machjénsíni nga si̱katioá kjoa jebi ninga ñʼai koa̱nná (Deuteronomio 18:10-12).
Je Rogelio, xi kanikʼaxki̱ná jña fitsʼiani, kʼiaa nga ñachante nóle tsabe nga ñaki tíjna kjoaixi je Na̱i. Jmé xokisikao nga koankjainnile nga ñaki tíjna je Na̱i. Itso: “Jngo Biblia kisʼena kʼoa jmeni xi tsakʼexkia kui tsakasenkaona nga tsaʼbe nga ñaki tíjna kjoaixi je Na̱i. Nga ʼbe jotso Biblia kui xi basenkaona nga tsín je bʼanachana”.
“Jmeni xi tsakʼexkia [ya Biblia] kui tsakasenkaona nga tsaʼbe nga ñaki tíjna kjoaixi je Na̱i. Nga ʼbe jotso Biblia kui xi basenkaona nga tsín je bʼanachana”
A meli tsa ya kuijnai jngo ʼnde jñani tsín je Na̱i. Je Biblia kʼoatso nga je Na̱i, xi kʼoasʼin tíbʼanachale chjota jeme ya nikʼatjenjin “ya jnrólʼí kao azufre” (Apocalipsis 20:10). Jngo xi espíritu alikuijin sikʼien je jnrólʼí kao azufre. Je jnró jebi to tsoyanile. Kui tsoyanile nga ñaki tondiaa si̱kʼien je Na̱i. Nʼiojin tsjoa koa̱nle je choʼndale Niná nga jekoa̱ntsín je Na̱i.
Tosi tonda chótʼayai xi tʼatsʼe Jeobá kʼoa josʼin síkjaʼaitsjen. * Tsa kʼoasʼiain, jchaní nichxin nga koa̱n i kuixoán: “Jetsín je Na̱i”.
^ párr. 8 Kʼiatsa je tao̱n xi síkʼaxki̱ ibi kui xi denario ʼmi, xi koanchjén ya Roma, nʼiojin tse tjínni. Jngo siento kao kanxjaʼaonjngo nó kinjenile tao̱n xotjín jngo chjota kʼiatsa kisixá nga nyaon nyaon.
^ párr. 11 Tsa mesali jchai tʼatsʼe Na̱i kʼoa josʼin síkjaʼaitsjen Niná xi tʼatsʼe kjoabʼenda, chótʼajin ya kjoaʼmiya te xi tsʼe libro Jmé kjoanni xi bakóya je Biblia. Tijélai je testigole Jeobá.
