1. Jósʼin koasenkaoná je libro xi tsʼe Levítico.

JE Jeobá kui xi mele nga ñaki tsje katama ngatsʼi je choʼndale. Ningalani bʼaxki̱ ngakjijngo ya Biblia je én xi tsje tso, yaa libro xi tsʼe Levítico jña ngisa nʼio bʼaxki̱. Kʼianga koa̱njinná kʼoa nga chjí jchatokoán libro jebi kui xi koasenkaoná nga ñaki tsje koaan.

2. Jméni xi bakóyaná je libro xi tsʼe Levítico.

² Je libro xi tsʼe Levítico jé Moisés kiski kʼoa yaa majngokao “ngayije xo̱n Escritura” je xi “nda machjén nga bakóyaná” (2 Tim. 3:16). Kʼianga xki̱ kapítulo je libro xi tsʼe Levítico tela kʼa faʼaitʼa je jaʼaínle Jeobá. Kʼianga koa̱njinná jotso libro jebi kui koasenkaoná nga tsínkui kʼoasʼiaan jmeni xi chʼaosʼin sikʼéjna je jaʼaínle Niná (Lev. 22:32). Ya Levítico nʼio nkjín kʼa jñani “anña je Jeobá” tso kʼoa kui xi síkjaʼaitsjenná nga tjínnele si̱tjosonlee je Niná. Kjoaʼmiya jebi kʼoa kao xi ijngo, kui libro xi tsʼe Levítico chótʼayá kʼoa kui koasenkaoná nga ñaki tsje sʼin jchaxkoán je Niná.

3, 4. 1) Jméni xi tsoyanile nga kinitsje je Aarón. 2) Jméni xi tsoyanile nga kinitsje je xtile Aarón. (Chótsenlai sén xi faʼaitʼa ya jña fitsʼiani kjoaʼmiya jebi.)

³ (Tʼexkiai Levítico 8:5, 6.) * Je Jeobá jé Aarón kiskoejin kʼianga naʼmitítjon sʼin tsakʼejnale naxinandá Israel, kʼoa kʼoati je kiskoejin xtile Aarón nga naʼmi sʼin tsakatiole je naxinandá. Je Aarón jé tsoyanile je Jesús kʼoa je xtile Aarón jé tsoyanile chjotale Cristo xi ya koai ngʼajmi. Jósʼin tsoyanile nga kʼoasʼin kinitsje je Aarón. A kui xi tsoyanile nga kʼoati koantsje je Jesús. Majain. Nga̱ je Jesús ali chjotajéejin koan, ñaki tsjení (Heb. 7:26; 9:14). Kʼianga jekinitsje je Aarón, kʼiaa nga je Jesús kitsoyanile nga̱ ñaki tsje sʼin tíjna kʼoa ñaki chjotakixi ma. Tonga jmé xi tsoyanile nga kʼoasʼin kinitsje je xtile Aarón.

⁴ Kʼianga kʼoasʼin kinitsje je xtile Aarón kui tsoyanile nga nitsje je chjota xi naʼmi koa̱n ya ngʼajmi. A kʼiaa matsje kʼianga kanisʼenngindá yaole. Majain, nga̱ tsín tsakui matsjeni je jée nga chanisʼenngindá yaoná. Kʼianga ʼya xi fisʼenngindá kui bakó nga jekatsjoátʼale yaole je Niná. Je xi ya koai ngʼajmi kao “énle” Niná matsjeni, xi tsonile, nga kʼoasʼin fikao yaole josʼin kitsoya je Cristo (Efes. 5:25-27). Kʼoa kʼoasʼin nga tsje sʼin ʼyatokon. Kʼoa je “xi kjaʼaí barré” jósʼin nitsje (Juan 10:16).

5. Ánni nga kʼoabixónsíñá nga kao Énle Niná matsjeni je xi kjaʼaí barré.

⁵ Je xtile Aarón alikui je kitsoyanile chjotankjín xi kjaʼaí barré kitsole Jesús (Apoc. 7:9). Je xi kjaʼaí barré, xi tsonile, je chjota xi i̱ koatio i̱ Sonʼnde kʼoati kao Énle Niná matsjeni. Kʼianga makjainle jmeni xi tso je Biblia xi tʼatsʼe kjoabʼechjíntjai xi kitsjoa je Cristo, nichxin kao nitjeen síxále je Jeobá (Apoc. 7:13-15). Kjitʼa kjimatsje je xi ya koai ya ngʼajmi kʼoa kao je xi kjaʼaí barré. Kʼoa nga kʼoakjima, tsje sʼin tjíontsjai ngixko̱n Niná (1 Ped. 2:12). Je Jeobá ñaki nʼio tsjoa sʼele kʼianga kotsenle nga ñaki tsje sʼin tjío je choʼndale kʼoa nga ñaki jtín sʼin tjío nga tjíosítjosonle kʼoa nga tjíofitjenngile je Jesús, je Naile.

6. Ánni nga machjénsíni nga kjitʼa chótʼajiaan yaoná.

⁶ Jmé xi tsoyanile xi kao ñá ndʼaibi kʼianga kʼoasʼin kisitsje yaole je xi naʼmi koan ya Israel. Nʼio nkjín chjota xi ʼmiyalee je Biblia xi be nga tsje soyoaa kʼoa nga nda soyoaa kʼoa nga tsje chon jñani chotʼayá. Xi ijngosani, je xi mele nga je Jeobá skoe̱xkón tjínnele nga tsje katabatío “ni̱ma̱le” (tʼexkiai Salmo 24:3, 4; * Is. 2:2, 3). Tjínnele nga ñaki tsje sʼe̱ kjoafaʼaitsjenná kao ni̱ma̱ná kʼoa kao yaoná nga si̱xálee je Jeobá. Machjénní nga kjitʼa chótʼajiaan yaoná. Tsa kʼoasʼiaan, jchañá jñani tjínnele si̱ndayaa yaoná kʼianga tsje katamaa (2 Cor. 13:5). Tobʼelañá, tsa jngo xi jekiskanisʼenngindá yaole xi pornografía kotsenle machjénní nga i̱ kuitsole yaole: “A tsje tifikoa yaona nga kʼoatisʼian”. Kʼiatsa jngo xi kui tíkotsenle tjínnele nga kjoan sijé nganʼio kʼoa nga tsín tikui xájndí jebi katakotsennile (Sant. 5:14).

7. Jmé choa̱ xi tsakʼéjna je Jesús je xi mangóson jmeni xi kisʼin je naʼmi xi bʼaxki̱ ya Levítico 8:22-24.

⁷ Kʼianga jetsakʼaile xá naʼmi je Aarón kao xtile ya Israel, je njínle barréxʼin yaa  kinikajon ya xo̱ño ngakixi, ya najmántsja xi je kji kʼoa kao najmándso̱ko̱ xi je kji (tʼexkiai Levítico 8:22-24). * Kʼianga kʼoasʼin njín kinikajon je xi naʼmi tsakatio kui kitsoyanile nga ñaki sitjoson je xále. Kʼoakjoánti kisʼin je Jesús, je xi naʼmi ngʼajko̱ ma, jngo choa̱ xi nʼio nda tsakʼéjnale je xi ya koai ngʼajmi kao je xi kjaʼaí barré. Kʼoasʼin kitjenngi josʼin tsakándiaale Niná, kʼoakisʼin josʼin nga mele Jeobá, kʼoa ñaki tsje sʼin kikao je yaole (Juan 4:31-34).

8. Jméni xi machjénná nga sʼiaan ngatsʼiaa.

⁸ Kʼianga Jeobá tiʼyaxkoán, machjénní nga koanngíntjenngiaa je choa̱le Jesús nga ñaki kixi kitʼale je Niná. Kʼoasʼin si̱tjosoán josʼin bándiaa je Niná ya Biblia kʼoa kʼoasʼin nga tsín si̱balee “je Espíritu Santo xi tsʼe Niná” (Efes. 4:30). Kʼoa machjén nga ya kuinyayaa ndso̱koaa je “ndiaa xi kixi” (Heb. 12:13).

9. 1) Jméni xi kitso jan ndsʼee xi ñaki ya kisixákao je Cuerpo Gobernante. 2) Jósʼin koasenkaoná jmeni xi kitso nga jngó jngó ndsʼee jebi nga tsje kjuinkoaa yaoná.

⁹ Kataʼyala jmeni xi kitso jan ndsʼee xi nkjín nó ya kisixákao je Cuerpo Gobernante. Jngo xi i kitso: “Ningalani nʼio tse kjoanda tjenkao nga je nixákoaa, tonga kui bakó nga kʼoati chjotajée ndsʼee jebi ningalani ya koai ya ngʼajmi. Tonga jojetjín nó nga tisixá kui xi mena nga sitjosonle je xi kʼoasʼin tjíobinyatítjon”. Je ndsʼee xi majaoni i kitso: “Je testo xi faʼaitʼa Biblia jolani tsa 2 Corintios 10:5 jñani kʼoatso nga si̱tjosonlee je Cristo, kʼoati nʼio tíbasenkaona nga tisitjosoan kʼoa nga titsjoanganʼiole je xi tjíobinyatítjon. Kʼoa ñaki ni̱ma̱na nroajinni nga kʼoasʼin sitjosoan”. Je ndsʼee xi majanni i kitso: “Nga tsjoacha maa jmeni xi tsjoake Jeobá kʼoa jticha maa jmeni xi jtike Jeobá, kʼoa nga ndiaale fasjee ngantsjai kʼoa nga kui kʼoanʼia jmeni xi sasénle kui xi tsonile nga nitjosonlee je naxinandále kao je chjota xi síchjén nga sitjoson jmeni xi tjínndajinle i̱ Sonʼnde”. Ndsʼee jebi kui nʼio síkjaʼaitsjen je choa̱ xi tsakʼéjna je ndsʼee Nathan Knorr je xi Cuerpo Gobernante koan. Je Nathan Knorr kisitjoson jmeni xi kitso je rebista La Atalaya xi kitjo nó 1925 je xi “Nacimiento de la nación” tsakʼin, ninga tjíokʼa xi tsín kisitjoson. Kʼianga kʼoasʼin kisitjoson je ndsʼee Nathan Knorr tokʼoakoanle ndsʼee jebi. Kʼianga nikjaʼaitsjenjiaan jmeni xi kitso nga jan ndsʼee jebi kui xi basenkaoná nga nitjosonlee Niná kʼoa nga tsje mangínkoaa yaoná.

10. Ánni nga nʼio chjísínile nga si̱tjosoán je kjoatéxomale Niná xi tʼatsʼe njín.

¹⁰ (Tʼexkiai Levítico 17:10.) * Je Jeobá kʼoakitsole je chjota israelita nga tsín koa̱n ski̱ne “tojme njínni”. Kʼoati tsakʼinle je chjotale Cristo nga kʼoechjoale yaole xi tʼatsʼe njín, ni tsʼe chjota kʼoa ni tsʼe cho̱ (Hech. 15:28, 29). Nʼio tse kjoaba tjenkao kʼiatsa kui kʼoasʼiaan xi tsín kixi tíjna nga̱ chʼaosʼin skoe̱ná je Niná kʼoa kuichonsjejinná ya naxinandále. Tsjoachañá je Jeobá kʼoa mená nga si̱tjosonlee. Kʼoa ninga  jexkón tíjna je kjoabijnachonná alikui je si̱tjosonlee je chjota xi tsín be Jeobá kʼoa xi kʼoatsoná nga kuitjátone kjoatéxomale. Jeʼyaa kʼianga tjínkʼa xi skoe̱sinná nga tsín njín xinyáná, tonga tosa je Niná si̱tjosonlee (Jud. 17, 18). Jméni xi koasenkaoná nga ñaki kʼoakʼoé tokoán nga tsín njín chi̱nee kʼoa nga tsínkui xinyáná (Deut. 12:23).

11. Jméni xi bakóyaná jmeni xi kisʼin je naʼmi kʼianga koantsje je jéele chjota israelita.

¹¹ Jmeni xi kisʼin je naʼmi ya Israel nga ñandia kʼianga jngo nó kʼianga koantsje je jéele chjota israelita kui síjinná josʼin bekon Niná je njín. Je njín ñaki tojngo koya tíjna josʼin nga koanchjén. Kui xá koanchjénni nga jchatʼa je jéele chjota israelita ánni nga nda koatiosíni ngixko̱n Niná. Je njínle je nra̱ja̱ kao je tindso yaa kitjojndijon ya sonngʼale kaxa̱ jña kixinya je kjoa xi kisʼendajin (Lev. 16:14, 15, 19). Kao kui njín jebi kisichatʼanile Niná je jéele chjota israelita. Je Jeobá kʼoati kitso kʼianga jngo chjota xi jngo cho̱ sikʼien kʼoa ski̱ne je yaole, je njínle yaa sʼe̱jten tʼanangi kʼoa niʼnde sʼe̱jtsane “nga̱ je xi tjíokonni ngatsʼi kuiní je njínle” (Lev. 17:11-14). Kjoatéxoma jebi ali tsa tokjoatjaojin nga kui kitsjoa je Niná. Siento nó tongini nga jesa kʼoakitsole Niná je Noé kʼoa kao ntje̱le nga tsín koa̱n njín ski̱ne (Gén. 9:3-6). Jméni xi bakóyaná jebi xi chjotale Cristo maa.

12. Jméni xi kitso Pablo xi tʼatsʼe njín kao xi tʼatsʼe jée.

¹² Je pastro Pablo kʼoakitso kʼianga tjínle nganʼio je njín kʼianga koa̱n sitsje jéele chjota, kitso: “Me ngayije kʼoasʼin matsjeya kao njín, josʼin bʼéne je kjoatéxoma tsa tsín xíjten njín, likui koa̱n sʼe̱ kjoanichatʼa” (Heb. 9:22). Tonga tojaʼatoní nga kʼoasʼin cho̱ tsakʼaitʼale je Niná. Je Pablo kʼoakitso nga kʼoasʼin cho̱ kitsjoatʼale Niná je chjota israelita kui kisikjaʼaitsjenle nga chjotajée ma kʼoa nga jngo kjoabʼechjíntjai machjénle xi tondiaa kjoaʼaxin je jéele. Je kjoatéxoma tongʼiánlee “je kjoanda xi kjoaʼaí, alikui tije soani je kjoabe” (Heb. 10:1-4). Tonga jókoa̱nni nga koa̱n jchatʼa je jéená.

13. Jósʼin basenkaoná nga kʼoasʼin kitsjoatʼale Jeobá je njín xi tsakʼéjten je Jesús.

 ¹³ (Tʼexkiai Efesios 1:7.) Je Jesús ñaki kʼienntjai ngatsʼi je chjotasonʼnde, kʼoa je chjota xi tsjoake je Jesús kao je Nʼaile nʼio bechjí kjoabʼechjíntjai jebi (Gál. 2:20). Jmeni xi kisʼin je Jesús kʼianga jejaʼáyale kao kui kichatʼaniná je jéená kʼoa jebi kui mangóson jmeni xi kisʼin chjota israelita kʼianga koantsje je jéele. Kʼianga jaʼasʼen je naʼmi ngʼajko̱ ya jñani nʼio tsje tíjna, jngoyale yaa jaʼasʼen jñani tíjna Niná. Kʼianga jeya tíjna, yaa kitsjoatʼale Niná je njínle je cho̱ (Lev. 16:11-15). Kʼianga jejaʼáyale Jesús, yaa jaʼasʼen ya ngʼajmi kʼoa jé Niná kitsjoatʼale jokji chjíle je njínle (Heb. 9:6, 7, 11-14, 24-28). Bʼaiñá kjoanda nga koa̱n jchatʼa je jéená kʼoa nga koa̱n tsje sʼe̱ kjoafaʼaitsjenná nga tjínná kjoamakjain tʼatsʼe kjoabʼechjíntjai xi kitsjoa Jesús nga tsakʼéjten je njínle.

14, 15. Ánni nga nʼio chjísínile nga katamajinná kʼoa nga si̱tjosoán je kjoatéxomale Jeobá xi tʼatsʼe je njín.

¹⁴ Tsakui nichxin jengisa nda majinli ndʼaibi anni nga kʼoatsoniná je Jeobá nga tsín koa̱n chi̱nee “tojme njínni” (Lev. 17:10). A majinli anni nga nʼio tsje tíjnasíni ngixko̱n Niná je njín. Je njín kjoabijnachon tsoyanile (Gén. 9:4). Alikui jao tjínná nga kʼoatisʼin jchatokuin je njín josʼin bekon je Niná kʼoa nga si̱tjosuin je kjoatéxomale nga tsín njín si̱koai. Kʼianga nda kuiyoaa ngixko̱n je Niná tokʼianí nga koa̱nkjainná tʼatsʼe kjoabʼechjíntjai xi kitsjoa je Jesús kʼoa nga koa̱njinná nga nʼio chjí bekon Niná je njín (Col. 1:19, 20).

¹⁵ Nga jngó jngóñá xi kuixónñá tsa xinyáná kʼoa tsa mai je njín, tsakuije̱ xi ya tjoeni je njín kʼoa tsakuije̱ jmeni xi síchjén je chjinexki xi njín tjínle. Machjénní nga kʼoétsʼoalai je Jeobá, nga kjoásjaiyai kʼoa nga tongini kʼoéndajin jme xi sʼiain nga kje jme xi majin. Kʼiatsa kʼoasʼiain koaanli si̱toánntjai yaoli nga tsín njín xinyáli. Alikuijin kuitso tokoán nga si̱balee je Jeobá nga kui kʼoasʼiaan jmeni xi tsín sasénle. Nichxin xi tiyoaa ndʼaibi, nʼio nkjín chjinexki kʼoa kao chjota xi kʼoatso nga kʼoee je njínná nga kataxinyále je chjota ánni nga koatiokonsani. Tonga nga ya tiyojiaan ya naxinandátsjele Niná, ʼyañá nga toje Jeobá xi tjínle ʼnde nga kʼoakuitso josʼin koa̱nchjén je njín. Ngixko̱n Jeobá ñaki tsje tíjna “tojme njínni”. Kuinga tjínnenile si̱tjosoán jmeni xi tso je kjoatéxomale xi tʼatsʼe njín. Kʼoati koa̱n koakolee Niná nga ʼyachjiá je njín xi tsakʼéjten Jesús kʼianga tsje koanngínkoaa yaoná. Tokuikjoán je njínle Jesús xi koa̱n chatʼaniná je jéena kʼoa koa̱n kʼoaininá kjoabijnachon xi tsínkʼia fetʼa (Juan 3:16).

16. Ánni nga tjínnesínile nga tsje koa̱n je choʼndale Jeobá.

¹⁶ Kʼianga jekisikatíondaí Jeobá je chjota israelita ya naxinandá Egipto i kitsole: “Anña je Jeobá xi timʼaonsjeno ya naxinandá Egipto kʼianga Nináno koa̱n; kʼoa jon tjínnele tsje koa̱on, nga̱ tsjeña an” (Lev. 11:45). Je Jeobá kui xi koanmele nga kʼoati tsje koa̱n je chjota israelita josʼin nga tsje je. Kʼoati kui xi mele nga tsje katamaa tsanda ñá. Je libro xi tsʼe Levítico ñaki nda bakóyaná xi tʼatsʼe jebi.

17. Jótjín tokuin ndʼaibi tʼatsʼe jme xi tso libro xi tsʼe Levítico.

¹⁷ Alikuijin jao tjínná nga kabasenkaoli jmeni xi kachotʼayá je libro xi tsʼe Levítico. Tochale ngisa nʼio kaʼyachjí libro jebi kʼoa ngisa nda kamajinli ánni nga tjínnenile nga tsje koaan. Tonga jmésani xi bakóyaná je libro xi tsʼe Levítico. Jósʼin basenkaoná libro jebi nga ñaki tsje sʼin ʼyaxkoán je Niná. Xi tʼatsʼe jebi yaa chótʼayá kjoaʼmiya xi ijngo.