Nʼio nkjín chjota xi kʼoasʼin síkjaʼaitsjen nga je xi chʼaotjín kui je xi Na̱i kʼoa Satanás tsole ya Biblia. Tonga tsa kʼoalani tjín, ánni nga kʼoatsosíni Biblia nga tsakjákao Jesús kao je Niná. Kataʼyala.

Tiʼakʼiani nga jekisʼenngindá je Jesús, jan kʼa kiskotʼayakao je Na̱i. Xi títjon kisʼin, kuinga kʼoakitsole Jesús nga nioxtila katasíkʼóya je la̱jao̱ ánni nga koa̱nskini, kui xi kitsole nga katasíñakon yaole. Xijekoan, kʼoakitsole nga xkón katasíkʼéjna yaole tojoni nga nʼio ngʼa kʼoasje chjota. Kʼoa xi koanjanni kʼa, kʼoakitsole nga tsjoále ngayeje kjoatéxomale sonʼnde kʼiatsa koasenxkónyʼintʼale kʼoa skoe̱xkón. Je Jesús alikui kisitjoson kʼoa nga jan kʼa nga tsakjákao je Na̱i kui kisichjén jmeni xi tso je Énle Niná (Mateo 4:1-11; Lucas 4:1-13).

ʼYáni xi tsakjákao Jesús. A kui je xi chʼaotjín. Mai. Je Biblia kʼoatso nga Jesús likʼia tsakajngijée ninga kʼoati kui kjoa jaʼatojin jme kjoa xi bitjatojiaan ñá (Hebreos 4:15). Je “Cristo likui tsajngi jée, ni kinchja̱jin  énchʼanacha” (1 Pedro 2:22). Alikui koan nga je tsakjákao je xi chʼaotjín nga̱ tsín jme xi chʼaotjín kisʼele, ñaki chjotatsje koan kʼoa ñaki kixi kitʼale Niná. Je xi tsakjákao ñaki tíjnaní.

Tonga ali tsa tokuijin nga kʼoasʼin tsakjákao Jesús xi bakó nga ñaki tíjna je Na̱i.

• Je Na̱i kʼoakitsole Jesús nga tsjoále ngayeje kjoatéxomale sonʼnde kʼiatsa koasenxkónyʼintʼale kʼoa skoe̱xkón (Mateo 4:8, 9). Alikuijin koan nga tjín xi kitsjoatʼa kʼiatsa tsínlani ñaki tíjna. Kʼoa je Jesús alikui kʼoakitso tsa tsínle nganʼio je Na̱i.

• Kʼianga jetsakjákao Jesús, je Na̱i ki kʼoa kiskoya nga kjaʼaí nichxin tiskótʼayakaongáni (Lucas 4:13, TNM). Tsa tokuilani xi Na̱i ʼmi je xi chʼaotjín alikuijin koa̱n kʼoasʼin. Tokʼiajin tsa ñaki tíjna nga koa̱n kʼoasʼin.

• Ya Mateo 4:11 kʼoatso nga kʼianga jeki Na̱i jaʼai je ánkje xi kitsjoanganʼiole Jesús kʼoa tsakasenkao. Ñaki tjíoní je ánkje xi kichonrʼoe Jesús. Kuinga kʼoabixónsíñá nga kʼoati ñaki tíjna je Na̱i.

Kuila kataʼyaa ndʼaibi jotso Biblia tʼatsʼe Job, jngo chjota xi choʼndale Niná koan. Jao kʼa síkʼaxki̱ nga tsakjáo je Niná kao je Na̱i. Nga jao kʼa, je Niná kui kʼoakitso nga nʼio kixi tífitʼale je Job. Kʼoa je Na̱i joxi nʼio nda be je Job kitso. Kʼoakitso nga to tjín xi tísʼínnile Job nga Niná tísíxále. Kʼoa kʼoakitsole Niná nga tokui nga tísíchikontʼain nga kixi tífitʼanile. Je Jeobá kitsjoaʼnde nga je Na̱i tsakjáʼale Job ngayeje jmeni xi tjínle. * Tsakjáʼale kjoanyinále, xtile, kʼoa jngo chʼin kisikasénne. Xijekoanni, tsaʼyale nga to chjotandiso je Na̱i. Kʼoa je Niná kisichikontʼain je Job nga kʼoasʼin kiskale kjoa xi jaʼatojin (Job 1:6-12; 2:1-7).

A kui tsakjákao Jeobá jmeni xi chʼaotjín. Mai, nga̱ ya Biblia kʼoatso nga ñaki kixi je ndiaale Niná (2 Samuel 22:31). Kʼoa itsosa: “Tsje, tsje, tsje je [Jeobá] Nainá Niná xi batéxoma ngayije” (Apocalipsis 4:8). Je én xi tsje tso kui tsoyanile nga tsín jme jée yʼa Jeobá. Kuinga kʼoabixónsíñá nga tsín jme xi chʼaotjín tjínle. Ñaki tsjení je Jeobá.

Tonga tjínkʼa chjota xi kʼoatso nga tsín tsakʼejna je Job kʼoa nga to kuento nga kʼoatso Biblia nga tsakjáonajmí je Na̱i kao Niná. A kʼoatjín jotso chjota. Mai. Ya libro xi faʼaitʼasa Biblia kʼoatso nga ñaki tsakʼejna je Job. Santiago 5:7 saʼnda 11 kui choa̱le Job síkʼaxki̱ kʼianga kʼoatsole je chjotale Cristo nga kixi katafitʼale Niná kʼianga kjoa faʼatojin kʼoa nga je Jeobá sichikontʼain kʼiatsa ska̱le. Kʼiatsa tsínlani tsakʼejna je Job kʼoa tsín jme xi kisikao je Na̱i, toxitsjoajin jme xi kitso Santiago. Xi ijngosani, ya Ezequiel 14:14 kao 20 jan chjota xi kixi koan síkʼaxki̱. Síkʼaxki Daniel kao Noé, kʼoa chjota jebi ñaki tsakationí. Kʼoa xi majanni síkʼaxki̱ jé Job; kuinga kʼoabixónsíñá nga kʼoati ñaki tsakʼejna. Nga ñaki tsakʼejna je Job kʼoajinti ñaki tsakʼejna je xi kjoañʼai kisikjaʼá.

Jmeni xi tso je Biblia kui bakó nga ñaki tíjna je Na̱i. Kuinga sakʼoa chjonangisínilee yaoná: “A koaanle Na̱i tsa josikaona an kʼoa kao familiana”.

Tobʼelañá, tsa jngo jtín xtiché kuicho ya naxinandáli. Jókoa̱nchon. Xkónjin koatio je chjota kʼoa likuijin tinda sʼinni. Kʼoa kuila tikjaʼaitsjain tsa i̱ tjíojinbasenná je Na̱i kʼoa kao ánkje tsʼenle xi kʼoasʼin yátsʼi̱n tsakinyále Niná kʼoa je Na̱i kitjenngile. Jmé xi koa̱n. Si̱kjaʼaitsjenla jmeni xi tso noticia ngakjijnda Sonʼnde.

• A tsí kjoaixi nga sa tísʼe sa tísʼe kjoatsʼen ninga bʼénele yaole chjota nga faʼáxin.

• A tiʼyaní nga je kjoasʼetsaojin xi tjín ndʼaibi sa tse sa tse kjoabʼenda tjenjin ninga tsín sasénle xijchá nga kʼoakjima.

•   A tiʼyaní jokji je chitson je Sonʼnde ninga nʼio tjíobʼénele yaole chjota nga tjíosíkuinda.

• A tsen mali nga jngo nganʼio xotjíosíkao chjota nga sa chʼao sa chʼao tjíosʼínni.

Je Biblia kʼoatso nga tíjna ʼya tʼatsʼe tínroani ngayeje kjoa xi tjín kʼoa kʼoatsoná ʼyani. Itso: “Kichanitʼaxin je cho̱toánbe, je ye̱ jchínga xi kʼoatsakʼin je na̱i kao Satanás, jñale xi bʼanacha ngatsʼi. Kinikʼatjenngi ya sonʼnde, kʼoa ánkjele kitsaokao. [...] Ma̱xóni xi tjío sonʼnde kao ya ndáchikon, nga je na̱i jekʼoasʼin jitjojenjinno nga jon. Ali tokʼoakji jti male, nga be nga tochoa nichxin tjínle” (Apocalipsis 12:9, 12). Kʼianga be chjota je choa̱ xi tjín, kʼoatso nga je Na̱i kjinentsja je Sonʼnde. Kʼoa je Na̱i nʼio tsʼen.

Toxá meniná nga si̱kuindalee yaoná je Na̱i. Jméni xi sʼiaan nga si̱kuindaa yaoná. Yaa kʼoakuitsoná kjoaʼmiya xi ijngo.