1, 2. Jósʼin mele Niná nga katabexkón je choʼndale ninga sʼa xti kʼoa ninga je xi jejchínga.

A SʼA xti. Kʼiatsa jaon, je naxinandále Jeobá xi tíjnale i̱ Sonʼnde nʼio bechjíli. Nʼio nkjín naxinandá jñani nga nʼio nkjín xti tjíofisʼenngindá. Nʼio tsjoa sʼená kʼianga kʼoasikji mani xti xi mele sixále Jeobá.

² Kʼianga sʼa xti, a tsjoa mali nga bʼetsaojin kao je xti xi ngóson tjín nóli. Tochale jaon. Nda sʼená nga ya biyokoaa je miyoná je xi ngóson tjín nóná. Ninga kʼoalani, je Jeobá kui xi mele nga kʼoétsʼoajtínlee kao ngatsʼi je ndsʼee. Kui xi mele nga jtín sʼin katabatio naxinandále tojo tjín nóle kʼoa tojñani kitjenni. Je pastro Pablo kʼoakitso nga kui xi mele Niná nga “ngatsʼi chjota kuitjontjai, kʼoa nga kuichonrʼoe xi kjoakixi” (1 Tim. 2:3, 4). Ya Apocalipsis 7:9 kʼoatso nga je xi tjíobexkón Niná tjíofaʼaini ngakjijnda “ʼnde, kao ntje̱, kao naxinandá, kao én”.

3, 4. 1) Jókjoan ndʼaibi je xti. 2) Jméni xi kisingósonkao Pablo je jtín tojosʼin faʼaitʼa ya Efesios 4:25.

³ Je xti xi Jeobá tjíosíxále alikui mangóson kao je xti xi tsín je tjíosíxále. Je xi tsín Jeobá tjíosíxále to yaole tjíofini kʼoa tokui básjai jmeni xi mele. Tjínkʼa chjotachjine xi kui kotʼayason xi tʼatsʼe xti xi kʼoatso nga je xti xi tjín ndʼaibi ngisa nʼio ngʼakon.  Tobʼelañá, josʼin nchja̱ kʼoa jokjoan najño xi bʼakjá, kui bakó nga tsín bexkón xi kjaʼaí, kʼoa ngisa tosíkao je chjota xi jetjínle nó.

⁴ Kʼoachon ngakjijnda, nganʼio machjénle je xi sʼa xti nga tsínkui kʼoasʼin jmeni xi tsín sasénle Jeobá. Kʼianga siglo 1, je Pablo kʼoati kitsole je chjotale Cristo xi kʼia tsakatio nga tsínkui kʼoasʼin jmeni xi tjíosʼín “chjota xi xíjin” kjima (tʼexkiai Efesios 2:1-3). Nʼio tsjoa maná nga tsín kʼoakjoan je xti xi tjío ya jinjtín. Xti jebi kui xi mele nga Jeobá sixále jotjíosʼín je ndsʼe̱. Bení nga je jtín kui mangóson je yaoná nga nkjín koya tjínle kʼoa nga machjénle xínkjín nga jngó jngó. Je Pablo kʼoakitso “nga tojngo tjíkjao yaoná ngatsʼiaa” (Efes. 4:25). Kʼoa ngisa nʼio machjén nga jtín sʼin kuiyoaa kao je ndsʼee kʼianga sa chrian sa chrian tíjna nga kjoetʼa jmeni xi chonle sonʼnde je Na̱i. Je choa̱ xi faʼaitʼa Biblia xi kʼoasʼin chótʼayá ndʼaibi kui koakoyaná ánni nga machjénsíni nga jtín sʼin kuiyoaa.

5, 6. Jméni xi bakóyaná je choa̱le Lot kao familiale.

⁵ Nichxin kjoatse, je naxinandále Jeobá jaʼatojin je kjoa xi ñʼai tjín. Je Jeobá kisikuindaa kʼianga jtín sʼin tsakatio kʼoa nga tsakinyakaongañá xínkjín. Ngatsʼiaa, ni xi sʼa xti kʼoa ni je xi jejchínga, nʼio tse xi bakóyaná je choa̱ xi faʼaitʼa Biblia. Kataʼyala jmeni xi koantʼain je Lot.

⁶ Je Lot kao familiale jexkón tjío nga̱ je Jeobá toje sikjeson naxinandá Sodoma ya jñani tjío. Je Jeobá ánkje kisikasén nga kikájinkon je Lot nga katabitjo naxinandá jebi kʼoa nga ya nindo katafitoka. Je ánkje i kitsole: “¡Chʼa̱sjentjai yaoli!” (Gén. 19:12-22). Je Lot kʼoa kao nga jao xtiyánchjínle kisitjoson jme xi tsakʼinle. Tonga kʼoati tjío familiale Lot xi tsín kisitjoson. Kʼianga kʼoakitsole Lot je chjota xi kuixankao je xtiyánchjínle nga katabitjo ya naxinandá, tokjoaská koanle tokʼoasʼin kisikjaʼaitsjen nga kui kʼoatsoʼbatsoni nga jejchínga kʼoa “to énská” xi tínchja̱ koanle. Alikui koankjainle, kʼoa yaa kʼien nga kinikjeson je naxinandá (Gén. 19:14). Toje Lot kʼoa kao nga jao xtiyánchjínle xi kinjengile yaole kʼianga jtín tsakatio kʼoa nga kisitjoson.

7. Jósʼin tsakasenkao Jeobá je naxinandále kʼianga ñaki tjíojtín nga kitjo ya Egipto.

⁷ Kʼoati bakóyaná je choa̱le chjota israelita kʼianga kitjo ya Egipto. Alikui nkjínya kisʼin yaole kʼoa tsa toje tsakjaʼájin xínkjín xi ñatjen ki kʼianga jaʼasʼen ya ʼNde jña tsakʼinle nga kʼoaile. Tosa ñaki kijtín kʼoa tojngo kisʼin yaole. Kʼianga jekisijaoya Jeobá je Ndáchikon Ní, je Moisés alikui tsa toje ki kʼoa tsa tojngo jao chjota israelita kikao. Kikao ngatsʼi naxinandá kʼoa jé Jeobá kisikuinda (Éx. 14:21, 22, 29, 30). Kʼoa nkjín mani xi tsín chjota israelita ma kitjo ya naxinandá Egipto kʼoa yaa kikao je chjota israelita kʼoa jé Jeobá tsakʼétsʼoale. Ngatsʼi ñaki jtín sʼin tsakatio (Éx. 12:38). Alikuijin nda kisʼin kʼiatsa toje tsakʼéjtín yaole, tobʼelañá je xti, kʼoa kʼoakitso nga ngisa nda tsa kjaʼaísʼin ndiaa koai. Kʼiatsa ʼya xi to yaole tsakʼa alikuijin kisikuinda je Jeobá (1 Cor. 10:1).

8. Jósʼin tsakatiojtín je naxinandále Niná kʼianga tsakʼejna je rey Jehosafat.

⁸ Kʼianga tsakʼejna je rey Jehosafat, tosíxkónkji nkjín mani chjotakjoajchán xi tse nganʼio tjínle kichokʼétʼale naxinandále Niná (2 Cron. 20:1, 2). Jméni xi kisʼin je chjota israelita kʼianga jetjíondaile je chjotakontrale. Jé Jeobá kisinʼiotʼa kʼoa tsakʼétsʼoale nga je katabándiaale (tʼexkiai 2 Crónicas 20:3, 4). Alikui to jngó jngó tsakʼa yaole josʼin kʼoendajin kjoa jebi, ñaki tsakatiojtín ngatsʼi. Je Biblia itso: “Kʼoa ngatsʼi je xi ya tsʼe Judá yaa tsakatio ya ngixko̱n Jeobá, kao je  xtiʼndíle, kao yánchjínle kʼoa kao xtile” (2 Crón. 20:13). Ngakjijngo je naxinandá, je xti kao xi jejchínga, jé Jeobá kisinʼiotʼa kʼoa kʼoakisʼin jmeni xi tsakʼinle. Jtín sʼin tsakatio, kʼoa jé Jeobá kisikuinda xi tʼatsʼe chjotakontrale (2 Crón. 20:20-27). Je choa̱ jebi kui bakóyaná josʼin síkuinda Niná je naxinandále kʼianga batiojtín nga chjota fitjenngike.

9. Jméni xi bakóyaná jokisʼin je chjotale Cristo xi tsakatio nga siglo 1.

⁹ Kʼianga siglo 1, je chjotale Cristo ñaki jtín tjío kʼoa ñaki nyʼán tjío nga tsakʼétsʼoale Jeobá. Tobʼelañá, kʼianga jenʼio nkjín chjota judío kao xi tsín judío xi chjotale Cristo koan, kui kitjenngi jmeni xi kitsoya je pastro. Tjíojtínle yaole jmeni xi kisʼin, tsakjenjtínní kʼoa tsakʼétsʼoajtínní (Hech. 2:42). Kʼianga chjota kitjenngike ñaki jtín sʼin tsakatio. Kʼoa kʼiaa nga nʼio koanchjénle xínkjín nga jngó jngó (Hech. 4:23, 24). Kʼiatsa ʼya xi koaitjenngikená, kʼoati machjén nga jtín sʼin kuiyoaa kʼoa nga kʼoainganʼiongañálee xíngiaa.

10. Kʼiáni nga ngisa tinʼio koa̱nchjénngániná nga jtín sʼin kuiyoaa.

¹⁰ Jemachrianle nga nʼio ñʼai kjoa xi kuitjátojiaan. Je profeta Joel kʼoakitso nga nichxin jebi kui mangóson “jngo nichxin xi njio chon kʼoa xi kijna nitje̱n nitje̱n” (Joel 2:1, 2; Sof. 1:14). Nga kui nichxin, je naxinandále Niná ngisa tinʼio koa̱nchjénngánile nga jtín sʼin koatio. Tikjaʼaitsjain je én xi kinchja̱ je Jesús kʼianga kitso: “Ngayije kjoatéxoma xi ma jao ya, xi kontra tjíole xínkjín, fitsonya” (Mat. 12:25).

11. Jméni xi bakóyaná Salmo 122:3, 4 tʼatsʼe nga jtín kuiyoaa. (Chótsenlai sén xi faʼaitʼa ya jña fitsʼiani kjoaʼmiya jebi.)

¹¹ Kʼoa jósʼin nga jtín sʼin kuiyoaa. Xi tʼatsʼe jebi, koaan kui si̱kjaʼaitsjenjiaan josʼin kisʼenda niʼya ya naxinandá Jerusalén nichxin kjoatse. Ñaki kisatiotʼanʼiole xínkjín nga kisʼenda kʼoa je salmista saʼnda kʼoakitso nga kinchja̱ni xi tʼatsʼe naxinandá Jerusalén nga “tojngo mani nga tjíojtín”. Alikui kitsokjon je chjota nga̱ chrian tsakatiole xínkjín kʼoa koan sasa tsakinyakaoni xínkjín kʼoa kisikuindangañá xínkjín. Kʼianga kʼoasʼin chrian tjíole xínkjín je niʼya kʼoajin tikui kisikjaʼaitsjenle je salmista kʼianga tsakatiojtín je ntje̱le Israel nga tojngo kisʼin yaole nga tsakʼétsʼoale Jeobá (tʼexkiai Salmo 122:3, 4). * Ndʼaibi kʼoa kao nichxin xi nroaján, nʼio chjíle nga tojngo katasʼín yaole je naxinandále Jeobá.

12. Jméni xi koasenkaoná nga kʼoangilee yaoná kʼianga kʼoetʼale Gog je naxinandále Jeobá.

¹² Ánni nga nʼio machjénsíni nichxin xi nroaján nga jtín sʼin kuiyoaa. Ya Ezequiel kapítulo 38 kʼoatso nga “je Gog xi ya Magog tsʼe” kʼoetʼale je naxinandále Niná. Nga kʼia, nʼio machjén nga tsín kʼoaiʼndee nga jme xi sixkoa̱yaná. Nʼiojin chʼao sʼiaan tsa kʼoasʼin si̱kjaʼaitsjeen nga sikuindaná je sonʼndele Na̱i. Xi nʼio machjén kuinga chrian kuiyolee je ndsʼee. Tonga ali tsakuijin nga jngo jtín tiyojinlee nga kuitjontjaiñá. Tjínnele nga si̱nʼiotʼaa yaoná nga jngó jngoá je Jeobá kʼoa nga si̱tjosonlee. Kʼoa je Jeobá kao Jesús sikuindaná nga kuitjátojiaan kjoa jebi saʼnda nga kuichokaoná ya sonʼnde chjotse (Joel 2:32; Mat. 28:20). Tonga kʼoati machjén nga jtín sʼin kuiyoaa kao naxinandále Niná. Je Jeobá alikui sikuinda ʼyani xi toje kʼoa̱ yaole (Miq. 2:12).

13. Jméni xi bakóyale xi sʼa xti je choa̱ xi kaʼyaa ndʼaibi.

¹³ Kʼiatsa sʼa xti, nʼio machjén nga chrian kuijnalai je ndsʼee. Ali tsa tojejin nimiyui je xi tongóson tjín nóli kʼoa ali tsa  chʼasjetʼaxinjin yaoli. Ngatsʼiaa, ninga sʼa xtiaa kʼoa ninga jejchíngaa, nʼio koa̱nchjénná xíngiaa. Nʼio timiyui je ndsʼee kao tichjaa, kʼoatisʼin tixálai Jeobá jotjíosʼín je. Nichxin xi nroaján, kʼiatsa ya tijnajinlai naxinandále Jeobá, kuitjontjainí.

14, 15. 1) Ánni nga tongi tísíkatíondasíniná je Jeobá nga jtín sʼin kuiyoaa. 2) Jmé kjoafaʼaitsjen xi tsjoáná je Jeobá nga jtín sʼin kuiyoaa.

¹⁴ Je Jeobá tíbasenkaoná nga tojngo tinixálee ngatsʼiaa (Sof. 3:8, 9). Jetongini tjíosíkatíondaná josʼin kuiyoaa nichxin xi nroaján kʼianga Jeobá “kʼoexkó ngindia totʼatsʼe Cristo ngayije tsojmi” (tʼexkiai Efesios 1:9, 10). Je xi mele Jeobá kuinga jtín sʼin sikatío xi tjíole ngʼajmi kao sonʼnde, nga tojngo familia sikao, kʼianga kʼoetsʼoale. Kʼoa nijmejinla xi jao tjínná kʼianga kʼoasʼin Jeobá. Jon xi sʼa xtio, koaan ya kuiyojinlao familia jebi. A meli nga ya kuijnajinlai tokʼia saʼndani je naxinandále Jeobá.

¹⁵ Je Jeobá jetongini tísíkatíondaná ndʼaibi nga nyʼán sʼin kuiyokoaa xíngiaa ya sonʼnde chjotse xi kjoaʼaí. Je Niná nʼio tsejta josʼin títsoyaná nga tongóson sʼin si̱sinlee xíngiaa, nga katamatsjoachaa xíngiaa, nga si̱jetokoán xíngiaa kʼoa nga si̱nʼiojiaan xíngiaa (1 Cor. 12:25; Rom. 12:10; 1 Tes. 4:18; 5:11). Je Jeobá bení nga chjotajée maa kʼoa nga kuinga ñʼai maniná nga jtín sʼin biyokoaa xíngiaa. Kuinga kʼoatsosíniná nga si̱chatʼalee xíngiaa (Efes. 4:32).

16, 17. 1) Jmé xá mangínñá ya jñani biyojtián. 2) Jméni xi bakóyale je choa̱ xi tsakʼéjna Jesús je xi sʼa xti.

¹⁶ Je Jeobá kui xá tjínndajinnile nga kjoajtín satío nga jtín sʼin kuiyoaa. Ya Hebreos 10:24, 25 kʼoatsoná nga kui xá koa̱nñañá nga kʼoainganʼiolee xíngiaa nga kui kʼoasʼiaan xi ndatjín. Kʼoa ngisasa nʼio machjénná nga kʼoasʼin koa̱nñaa nga̱ jemachrianle nichxinle Jeobá.

¹⁷ Je Jesús nʼio nda choa̱ tsakʼéjnaná nga̱ nʼio tsjoake koan nga ki kjoajtín xi tsakatío naxinandále Jeobá. Kʼianga sʼa tejao nóle, kikao je xijchále kʼianga jngo kjoajtíntse kisʼejna ya yo̱ngo̱ xi kijna Jerusalén. Kʼoa toʼikoan kicha Jesús, alikui tikoansjainile xijchále. A yaa kikao je xti xi ngóson tjín nóle. Majain. Kʼianga koansjaile xijchále, je Jesús yaa tíjnajinle je chjota xi bakóya kjoatéxomale Niná ya yo̱ngo̱ (Luc. 2:45-47).

18. Jósʼin koasenkaoná je kjoabʼetsʼoa nga jtín kuiyoaa.

 ¹⁸ Kʼoa nga jtín sʼin kuiyoaa kʼoati koa̱n kʼoétsʼoantje je ndsʼee kʼoa kuikjoan si̱kʼaxkiaa jme kjoa xi tjínle kʼianga kʼoakʼuínlee je Jeobá nga katabasenkao. Kʼiatsa kʼoétsʼoantje je ndsʼee koakoñá nga makjaojinná xi tʼatsʼe. Nʼio machjén nga tsjoacha koaan je ndsʼee, nga kʼoainganʼiolee nga mañaa kʼoa nga kʼoétsʼoantje. Jon xi sʼa xtio, a kʼoatinʼiao jebi nga tinimiyo ngatsʼi je xi bichó ya kjoajtín. Kʼianga kuitjo̱ntjailee yaoná nga kjoetʼa xi chon sonʼnde, machjénní nga chrian kuiyolee je ndsʼee kʼoa nga tsín ya koanngínjiaan xi chonle sonʼnde je Na̱i.

19-21. 1) Jméni xosíkaoná nga tojngo nʼiañá yaoná kao xíngiaa. Tatiola kʼai choa̱. 2) Jméni xi bakóyali josʼin binyakao xínkjín je ndsʼee kʼianga kjoaxkón sʼe.

¹⁹ Ñaki ʼyale nga ñá xi choʼndale Jeobá maa, nga binyakaongañá xíngiaa tojo tso ya Romanos 12:5. Kʼianga jngo kjoaxkón faʼaine je ndsʼee kʼoamale ni̱ma̱ná kʼoa mená kuinyakoaa. Tobʼelañá, kʼianga sá diciembre nó 2011, jngo jtsínʼio xi ntjao̱ tjenjin kicho ʼnde xi tíjnajin ndáchikon xi Mindanao ʼmi ya Filipinas. Kʼianga tojngo nitje̱n tsʼato ñachan jmi niʼya kitsendá kʼoa nʼio nkjín xi niʼyale ndsʼee. Je oficina xi tsʼe sucursal kʼoakitso nga je ndsʼee xi xin ʼndele tokʼoa jetjíotsjoánganʼio kʼianga kjesa bichójin je Ndsʼee xi kui xá kjinele nga binyakao xíngiaa jña kjoaxkón kasokó.

²⁰ Ya Japón, kʼoati tse kjoañʼai jaʼatojin ndsʼee kʼianga jngo cháonnʼio jaʼa kʼoa nga kicho je xi tsunami ʼmi. Ñaki tsín jme xi tikisʼenile. Tobʼelañá, je Yoshiko kisicha je niʼyale. Ñachanla kilómetro kjin tíjnale je Ndʼia jña chotʼayá. Je Yoshiko itso: “Kʼianga koannyaonni nga jejaʼa je cháonnʼio, tokʼoakoannajin nga jaʼaikásjainajin je superintendente xi tsʼe circuito kʼoa kao ijngo ndsʼee”. Je Yoshiko ñaki tsjoa tjínle kʼoa itsosa: “Ñaki nʼio ʼyachjíjin nga kitsjoanajin nganʼio xi tʼatsʼe Niná tínroani je jtín. Xi ijngosani, tsakʼainajin najño, jté, bolsa kʼoa kao najño xi kisoyoyaijin”. Jngo ndsʼee xi kui xá kjinele nga binyakao xíngiaa jña kjoaxkón kasokó itso: “Je ndsʼee xi Japón tsʼe ñaki tojngo kisʼin yaole, tsakinyakaongañá xínkjín. Je ndsʼee xi ya Estados Unidos tsʼe kʼoati jaʼaitsjoánganʼio. Kʼianga kichjonangile ánni nga kʼoasikji kjin jaʼaini, i kitso: Ñaki jtín sʼin tiyuijin kao je ndsʼaijin xi Japón tsʼe kʼoa machjénle nganʼio”. A ñaki tsjoa tjín tokuin nga ya tijnajinlai jngo naxinandá xi ñaki tsjoakengañá xínkjín je chjotale. Cha̱niyalai jkui jokji tsjoa sʼele Jeobá nga kʼoasʼin jtín tjío je naxinandále.

²¹ Kʼiatsa kuenta sʼianngañá je xíngiaa ndʼaibi, koaan kuitjátojiaan ninga ñʼai tjín je kjoa xi sʼe̱ nichxin xi nroaján. Ninga tsín tijchañá xi tʼatsʼe ndsʼee xi xin naxinandále, tojo jtín sʼin kuiyoaa kao je ndsʼee xi tjío ya jñani tiyoaa. Jngo tichjaa xi ya Japón tsʼe xi Fumiko ʼmi xi tsʼangile yaole nga kicho je kjoaxkón xi tifón ʼmi i kitso: “Jetíjnachrian nga kjoetʼa jmeni xi chon. Machjénní nga kuinyakoaa xíngiaa xi tongóson sʼin makjainná jokji nga chóyasalee nga tsín jme tikjoaxkón sʼe̱ni”.

22. Jósʼin koasenkaoná nichxin xi nroaján nga jtín sʼin tiyoaa.

²² Tongini kuiyondalee ndʼaibi je nichxinle Jeobá nga jtín sʼin kuiyoaa kao ndsʼee. Kʼianga nikjeson jmeni xi chonle sonʼnde je Na̱i, je Jeobá kʼoasjentjai je naxinandále tojo kisʼin nichxin kjoatse (Is. 52:9, 10). Ninga sʼa xtiaa kʼoa ninga jejchíngaa, machjénní nga jtín sʼin kuiyoaa kao naxinandále Jeobá kʼianga kuitjo̱ntjailee yaoná. Ya kjoaʼmiya xi ijngo, kui jchaa anni nga kʼoaisíñá kjoanda jmeni xi tíbʼainá.