1. Jósatío kon je chjota tʼatsʼe jmeni xi tjínle.

JE CHJOTA tokʼiaa faʼaitsjenle jmeni xi kasʼele nga jekasícha. Tsakui nichxin jekui kjoa kitjatojin. Tobʼelañá, jngo chjota xi nyiná xijchále nga kamajchínga tochale tsín kuenta sʼín jme xi tjínle. Nga tsínle kjoafaʼaitsjen, jngo xi sʼa xti, tochale tsín majinle jmeni xi ngisa nʼio chjíle.

2, 3. 1) Jmé kjoafaʼaitsjen xi tsín ndatjín nga kui koaitjenngi je xti. 2) Jméni xi koasenkaoná nga chjí jchatokoán jmeni xi tjínná.

² Kʼiatsa sʼa xti, jméni xi ngisa chjí ʼyatokuin. Nichxin xi tiyoaa ndʼaibi, nʼio nkjín xti xi kʼoasʼin síkjaʼaitsjen nga ngisa chjíle nga tsojmi katasʼele tikʼoajinni nga katasʼele miyo. Tsakui nichxin kui xi mele nga jngo xá xi ñaki nda katasʼele, jngo niʼya xi nda kji, kʼoa tsojmi chjotse xi sʼa tjíobʼatsen. Kʼiatsa ñaki tokui tjíofini, nʼio tse jmeni xi tjíosícha. Kui tjíosícha nga tsín nda tjío ngixko̱n Niná. Kʼiatsa tokʼoa jekotʼaya xijcháli nga koanjchíngai, jngo kjoatjao xi naskánatjín tjínli xi tʼatsʼe Niná tínroani (Mat. 5:3, TNM). Kʼiatsa tsín chjí jchatokuin kjoatjao jebi tochale likui ndasʼin kuijnai nichxin xi nroaján.

³ Alikui mená nga kʼoakoai̱n. Kataʼyala kʼaa choa̱ xi faʼaitʼa Biblia je xi koasenkaoli nga chjí jchatokuin je kjoatjao xi  tjínli. Je choa̱ jebi koasenkao je xti kao xi jejchínga nga skoe̱chjí jmeni xi títsjoále je Jeobá.

4. Jmé xi tsoya 1 Samuel 8:1 saʼnda 5 tʼatsʼe xtile Samuel.

⁴ Ya Biblia síkʼaxki kʼa chjota xi tsín tsabechjí je kjoatjao xi tsakʼaile. Je profeta Samuel sʼa ʼndíkji nga kisixále je Jeobá kʼoa kixi koan ngantsjai (1 Sam. 12:1-5). Je Samuel jngo choa̱ xi nʼio nda tsakʼéjna, tonga je Joel kao Abías, xi xtile koan Samuel, alikui kui choa̱ kitjenngi. ʼNdele nga ndasʼin tosa totsakʼanacha kʼoa chʼao kisʼin (tʼexkiai 1 Samuel 8:1-5). *

5, 6. Jméni xi koantʼain je xtile Josías kao tindaile.

⁵ Kʼoakjoánti kisʼin je xtile Josías. Je Josías ñaki kixi koan kʼianga rey tsakʼejna kʼoa tsjoake koan je Jeobá kʼoa jé kisixále. Kʼianga koansjai jngo libro jña faʼaitʼa je Kjoatéxomale Niná kisʼexkiale je Josías kʼoa ñaki kisitjoson jmeni xi tso libro jebi. Tsakjaʼáxin kjoaxkóson kao kjoabʼenda kʼoa kʼoakitsole je naxinandá nga katasítjosonle je Jeobá (2 Rey. 22:8; 23:2, 3, 12-15, 24, 25). Je xtile nʼio naskánatjín kjoatjao xi tsakʼaile xi tʼatsʼe Niná tínroani. Tonga kʼianga rey tsakatio nga jan je xtile kao jngo tindaile, nijngojinla xi tsabechjí je kjoatjao xi tsakʼaile.

⁶ Kʼianga rey koan Jehoacaz, xi tile koanni Josías, kui kʼoakisʼin xi chʼaotjín “ngixko̱n Jeobá”. Kʼianga jejanle sá nga rey sʼin tíjna, jngo xi Faraón sʼin tíjna ya Egipto, ndoyá kiskani. Alikui ya kʼien ya niʼyale, yaa kʼien jñani kinikʼéjnanʼio (2 Rey. 23:31-34). Xijekoan, je Jehoiaquim xi ndsʼe̱ koanni jé rey tsakʼejna. Tejngo nó nga rey koan. Kʼoati tsín tsabechjí je kjoatjao xi kitsjoale je nʼaile. Chjota jebi síxkón kji tsʼen koan, kʼoa je Jeremías saʼnda i kitso xi tʼatsʼe chjota jebi: “Tojosʼin sʼeñe jngo búrró kʼoasʼin sʼe̱ñe” (Jer. 22:17-19). Je tile Josías xi Sedequías tsakʼin kʼoa kao tindaile xi Jehoiaquim tsakʼin kʼoati nʼio chʼao kisʼin, alikui choa̱le Josías kitjenngi (2 Rey. 24:8, 9, 18, 19).

7, 8. 1) Jósʼin kisicha Salomón je kjoatjao xi tsakʼaile. 2) Jméni xi bakóyaná je choa̱ xi faʼaitʼa ya Biblia tʼatsʼe chjota xi tsakʼasjengi je kjoatjao xi tsakʼaile.

⁷ Je rey David kʼoati nda choa̱ tsakʼéjnale je rey Salomón josʼin nga sixále Jeobá. Tonga nga koanskanni, je Salomón alikui titsabechjíni je kjoatjao xi tsakʼaile. Je Biblia itso: “Kʼianga jekoanjchínga Salomón, je yánchjínle kiskenʼndóbʼakjá ni̱ma̱le kʼianga kjaʼaí niná kitjenngile, kʼoa je ni̱ma̱le alikui kjijngo kisʼe kao Jeobá Ninále joni tsa je ni̱ma̱le David, je nʼaile” (1 Rey. 11:4). Xi totʼatsʼe jebi, je Salomón kisicha je kjoandale Jeobá.

⁸ Ngatsʼi je chjota xi jesí kanikʼaxkiaa koan tsabexkon je Jeobá kʼoa koan kʼoakisʼin jmeni xi kixi tíjna, tonga alikui kʼoakisʼin. Tonga ali tsa tongatsʼijin xti nga tsakʼasjengi je kjoatjao xi tsakʼaile. Kataʼyala kʼaa choa̱le xti xi koa̱n chjénngilai.

9. Ánni nga nʼio nda choa̱ tsakatíosíni je xtile Noé. (Chótsenlai sén xi faʼaitʼa ya jña fitsʼiani kjoaʼmiya jebi.)

⁹ Je xtile Noé jngo choa̱ xi nʼio nda tsakatío. Je kjoanda xi kisʼele kuinga tsakinyakao je Noé nga tsakʼénda je arca jñani kuitjontjaile yaole je chjota. Bení nga tjínnele sitjosonle je Jeobá kʼoa jaʼasʼen ya arca kʼianga kjesa faʼaijin je Jtsínʼio (Gén. 7:1, 7). Jósʼin kichomani. Ya Génesis 7:3 kʼoatso nga kisikʼasʼen cho̱ je arca kʼianga “likui jcha ntje̱le i̱ tʼanangi”. Je chjota kʼoati kitjontjaile yaole. Kʼianga tsabechjí je kjoatjao xi tsakʼaile, je xtile Noé jngo kjoanda kisʼele nga kitsjoanganʼio nga kitjontjai je chjota kʼoa nga ijngokʼa nda tsaʼyaxkónni je Niná (Gén. 8:20; 9:18, 19).

10. Jósʼin tsabechjí je kjoatjao xi tsakʼaile ño xti hebreo kʼianga tjío ya Babilonia.

¹⁰ Kʼianga jenkjín siento nó jaʼato, ño mani xti hebreo xi tsín kʼoasʼin kikao yaole josʼín je chjota babilonio. Je Hananías, Misael, Azarías kao Daniel kindoaa kʼoa yaa kichani ya Babilonia nga nó 607 nga kjesa chʼajin nó 1, nga ya kinikatíonʼio. Xti jebi naskákoankjoan kʼoa chjine koan kʼoa koanjin nga nʼio nda tsakatio ya Babilonia tsa je xi koanmele. Tonga alikui kisichajin jñani jaʼaini kʼoa jmeni xi tsakʼinyale. Nga kʼoakisʼin, je Jeobá kisichikontʼain (tʼexkiai Daniel 1:8, 11-15, 20). *

11. Jósʼin tsakinyakao je xi kjaʼaí je kjoatjao xi tsakʼaile je Jesús.

 ¹¹ Je Jesús jésa xi ngisa nda choa̱ tsakʼéjna nga tsabechjí je kjoatjao xi tsakʼaile. Je Jesús ñaki tsjoake koan jmeni xi tsakakóyale je Nʼaile. Kʼoa kui kʼoabixónñá nga̱ i kitso: “Josʼin kitsoyana Nʼainá, kʼoasʼin nchja” (Juan 8:28). Je Jesús ñaki tsjoa kisʼele nga tsakakóyale chjota jmeni xi kitsoyale Nʼaile, kitso: “Kʼoati xi xinsa naxinandá machjén nga kuinchjaya je énnda xi tʼatsʼe kjoatéxomale Niná nga̱ kui xá jinroania” (Luc. 4:18, 43). Je chjotasonʼnde alikui bechjí jokjoantjínni xi tʼatsʼe Niná, kʼoa kuinga kʼoakitsosínile chjotale Jesús nga tsín i̱ katatsjonjin yaole xi chon i̱ Sonʼnde (Juan 15:19).

12. 1) Jósʼin bakinle je xti xi tjío ndʼaibi jmeni xi tso 2 Timoteo 3:14-17. 2) Jméni xi machjén nga skónangile yaole je xi sʼa xti.

¹² Kʼiatsa tsjoake Jeobá je xijcháli, jngo kjoatjao tísíkʼéjnali. Jmeni xi tso je Biblia xi tʼatsʼe Timoteo kʼoati bakinli tsanda ji (tʼexkiai 2 Timoteo 3:14-17). Je xijcháli jekitsoyali xi tʼatsʼe Jeobá kʼoa nga kui kʼoasʼiain jmeni xi sasénle Jeobá. Tsakui nichxin kʼia saʼnda kitsoyanili kʼianga sʼa ʼndílai. Kʼoa jebi nʼiojin nda tísíchjineli “josʼin kuitjontjai xi totʼatsʼe nga makjainli tʼatsʼe Cristo Jesús”. Kʼoa tjínyejeli xi machjénli nga si̱xálai Niná. Tonga a ñaki ʼyachjíní jmeni xi tjínli. Chjónangilai yaoli: “Jósʼin sikjaʼaitsjen tʼatsʼe testigo xi kixi koan xi tsakatio kjoatse. A ñaki tsjoa tjínna nga testigole Jeobá ma. Nga tochoa mani xi miyo tsole Jeobá, jósʼe tokoan nga kʼoati miyo tsona tsanda an. A machoyana nga nʼio naskánatjín je kjoanda xi tjínna”.

13, 14. 1) Jméni xi sakʼoa mele sʼin je xti xi Énle Niná koanjchíngakao. 2) Ánni nga tsín ndatjínsíni tsa kʼoasʼin. Jngola choa̱ tʼejnai.

¹³ Je xti xi chjotale Cristo ma xijchále tsakui nichxin likui be jokji chjíle je kjoankjíntokon xi tjínle xi tʼatsʼe Niná kʼoa jokji chʼao chon je sonʼndele Na̱i. Tjínkʼa xi mele skoe̱ jochon sonʼndele Na̱i. Tonga tikjaʼaitsjenlai, tsa jngo karro nroa, a koaan tokuin nga ya kuisenchjoalai tojoni nga jchai tsa sikiʼaonli kʼoa tsa sikʼienli. Liʼyajin xi kʼoasʼin. Alikui tjínnele nga ya kuinójiaan yaoná xi chonle sonʼnde je Na̱i kʼianga jchaa jokji kjoaʼaon sikʼéjnajinná (1 Ped. 4:4).

¹⁴ Jngo ti xi Gener ʼmi xi ya Asia tsʼe, xi Énle Niná koanjchíngakao kʼiaa kisʼenngindá nga tejao nóle. Tonga nga koanjchíngasa choa kui kʼoakisʼin jmeni xi sʼín xi ngikʼa, kui xi mele nga ndaí sʼin kʼoéjna. Tsakʼéndisole familiale kʼoa totsakʼéʼmaa jmeni xi sʼín. Kʼianga xjaʼaon nóle kʼoati jekui kʼoatísʼín jmeni xi sʼín miyole, ʼbi kʼoa nchja̱ʼaon. Je Gener, billar fisíská kʼoa videojuego xi kjoatsʼen tjenkao fisíská kao miyole kʼoa jenʼio njio fichó niʼyale. Xijekoanni, tsabe nga tsín tsjoa bʼé kon jmeni xi tsoʼbasʼín. Ijngokʼa kiskotʼaya. Kʼoa ninga sakʼoa mamele nga ya koaijin jmeni xi tjín sonʼnde, xi basenkao nga tsín kʼoasʼín kuinga ngisa chjí bekon je kjoanichikontʼain xi títsjoále je Jeobá.

15. Jméni xi si̱kjaʼaitsjeen ninga Énle Niná koanjchíngakoaa kʼoa ninga mai.

¹⁵ Ninga tsín kotʼaya je xijcháli, tikjaʼaitsjain je kjoanda xi tjínli nga ʼyai je Niná kʼoa nga nixálai. Ninga nkjín miyón mani chjota xi tjín i̱ Sonʼnde, je Niná ji kiskoejinli nga jchai. Nʼio tse kjoanda tjínli (Juan 6:44, 45). Ninga je xijcháná kitsoyaná xi tʼatsʼe Niná kʼoa  ninga mai, koaan nʼio tsjoa kʼoé tokoán nga ʼyaa je Niná (tʼexkiai 1 Corintios 2:12). Je Gener itso: “ʼYáni an nga benina Jeobá, Naile ngayeje xi tjín” (Sal. 8:4). Jngo tichjaa i kitso: “Je xtiskuela nʼio tsjoa male kʼianga nda síkʼaxki̱ maestrole. Tsí ngisa chjíle nga nda sikʼaxki̱ná je Jeobá, xi ngisasa male tsoya”.

16. Jmé xi ndatjín nga skoéjin je xti xi chjotale Cristo ma.

¹⁶ Tikjaʼaitsjain je kjoanda xi tsakʼaili kʼoa kui tʼintjenngi nga Jeobá si̱xálai. Kui tʼintjenngi je choa̱le chjotale Niná xi tsakatio nichxin kjoatse, xi kixi koan. Ali kʼoajin nʼiai jotjíosʼín xti xi tjín ndʼaibi, nga totjíosíkitsón yaole kʼoa nga tsín jme xi koyale nichxin xi nroaján (2 Cor. 4:3, 4).

17-19. Ánni nga nda sʼiansíñá nga tsín kʼoasʼiaan josʼín chjotasonʼnde.

¹⁷ Kjoaixi nga ñʼai maná nga bʼechjoalee yaoná jmeni xi sʼín chjotasonʼnde. Tonga nʼio nda nʼia nga tsín kʼoanʼia. Tikjaʼaitsjenlai josʼín jngo chjota xi ya koai ya Juegos Olímpicos. Nga koa̱n koai, tjínnele nga tsín kʼoasʼin josʼín miyole. Tjínnele nga tsínkui kʼoasʼin jmeni xi to nichxin kjoaʼale. Tíjnandaa nga tsín kʼoasʼin josʼín miyole tojoni nga ndasa skótʼaya kʼoa kuichotjenngi jmeni xi mele.

¹⁸ Me ngatsʼi chjota nga tsín síkjaʼaitsjen josʼin kuichotsjoá jmeni xi sʼín. Tonga je choʼndale Jeobá síkjaʼaitsjeen jmeni xi sʼín. Kʼiatsa tsín kʼoasʼiaan josʼín chjotasonʼnde kʼoa kʼoéchjoalee yaoná xi chʼaosʼin sikʼéjnaná ngixko̱n Jeobá, jolani tsa kjoachajngi, tjoéná “kjoabijnachon xi ngantsjai” (1 Tim. 6:19). Je tichjaa xi sa kanikʼaxkiaa itso: “Kʼiatsa si̱toánntje jme xi makjainná, nda sʼe̱ tokoán nga koa̱nxon. Koakoñá nga koa̱n kontra kjuinlee jmeni xi sʼín je sonʼndele Na̱i. Tonga je xi ngisa nda, kuinga joxi tiʼyaa Jeobá nga nʼio tsjoa tjínle xi tʼatsaan kʼoa nga ñaki tíbijnokaoná. Kʼiaa nʼio tsjoa sʼe̱ tokoán nga tsín mangósoán kao chjotasonʼnde”.

¹⁹ Ali tsa tonikitsónjin kjoabijnachonli nga tokui kʼuíntjenngi jmeni xi meli nga sʼe̱li ndʼaibi (Ecl. 9:2, 10). ʼYaní jme xá tijnani kʼoa ʼyaní nga koaan kuijnai tokʼia saʼndani. Kʼianga ʼyai jebi, kui xi koasenkaoli nga kui chjoéjin xi ndatjín kʼoa nga tsín kʼoasʼin kʼuínkoai yaoli jotjíosʼín je chjota. Ali tsa tokjoatjaojin nga tijnai (Efes. 4:17; Mal. 3:18).

20, 21. 1) Jmé kjoanda xi kʼoainá nichxin xi nroaján kʼiatsa kui chjoéjiaan xi ndatjín. 2) Jméni xi síjéná je Jeobá.

²⁰ Kʼiatsa kui chjoéjiaan xi ndatjín, ñaki tsjoa sʼe̱ tokoán ndʼaibi kʼoa koaan kuiyoaa ngantsjai nichxin ya sonʼnde chjotse xi nroakao Niná. Je Jeobá nʼio tse kjoanichikontʼain tsjoáná (Mat. 5:5; 19:29; 25:34). Tonga ali tsa tongatsʼijin chjota nga tsjoále kjoanichikontʼain jebi. Je Jeobá kʼoatsoná nga si̱tjosonlee (tʼexkiai 1 Juan 5:3, 4). Ali tsa tokjoatjaojin nga kʼoasʼin tibʼenelee yaoná nga ñaki kixi kjima nga tinixálee je Jeobá.

²¹ Je Jeobá jenʼio tse kjoanda títsjoáná. Jetjínná kjoankjíntokonle xi faʼaitʼa ya Énle kʼoa majinná jokjoantjínni xi tʼatsʼe kao jmeni xi tjínndajinle. Kʼianga testigole Jeobá maa, nʼio tse kjoanda tjínná nga jaʼaínle kichʼá. Je Niná kʼoatsoná nga ya tíjnakaoná ngantsjai nga koasenkaoná (Sal. 118:7). Ngatsʼiaa, ni sʼa xtiaa kʼoa ni jejchínga, koakoá nga ñaki ʼyachjiá je kjoatjao xi tíbʼainá kʼoa nga mená nga je Jeobá kʼoailee “kjoajeya” ngantsjai nichxin (Rom. 11:33-36; Sal. 33:12).