XI NGISA TÍNCHJA̱NI REBISTA JEBI: KOAAN MIYOLE NINÁ KOAI̱N
A chjakaonajmíni je Niná
Je xi miyo fáo kjitʼa fákao xínkjín. Kui síchjén tsa teléfono, tsa correo electrónico kʼoa tsa video. Kʼoati síkasénle karta xínkjín kʼoa fikonle xínkjín. Kʼoakjoánti tjínni xi kao Niná, tsa mená nga si̱chriantʼalee, machjénní nga kjitʼa chja̱koaa. Tonga jósʼin chja̱kaoñá.
Kʼianga chjakoaa je Jeobá kʼianí nga bʼetsʼoalee. Tonga nga bʼetsʼoalee je Niná alikui mangóson josʼin chjakoaa jngo xíngiaa xi tokakajiaan. Kʼianga kʼoétsʼoaa, si̱kjaʼaitsjeen nga je tichjakoaa je xi Kisindaná, je xi ngisa ngʼa tíjnale ngʼajmi kao sonʼnde. Kʼianga kʼoasʼin tíjna je Niná machjénní nga ñaki kao kjoaxkóntokon kʼoétsʼoanilee. Kʼianga kjuinrʼoéle Niná je kjoabʼetsʼoaná machjénní nga kʼoasʼin kʼoétsʼoalee josʼin nga mele. Janla koya kataʼyaa.
Xi títjon, kʼianga kʼoétsʼoaa, jé Jeobá kʼoétsʼoalee. Ali jejin Jesús kʼoa ali tsa jejin xi santo tsole chjota kʼoa tsa jngo xkóson kʼoétsʼoalee (Éxodo 20:4, 5). Je Biblia itso: “Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo” (Filipenses 4:6). Xi majaoni, kʼianga kʼoétsʼoalee Niná kao jaʼaínle Jesucristo, je ʼNdíle, si̱jénilee jme xi kaʼmilee. Je Jesús i kitso: “Nitoʼyajin xi faʼaikonle Nʼainá, tsa tsian nga an” (Juan 14:6). Xi majanni, kʼianga kʼoétsʼoalee Niná kui si̱jélee jme xi sasénle. Je Biblia itso: “Tsa nijé tojmeni kjoa josʼin mele nga je, je nrʼoéná” (1 Juan 5:14). *
Je xi miyo fáo kjitʼa fákao xínkjín
Kʼiatsa tojngo xi kuinchja̱ alikui tse nga miyo koa̱nle xínkjín je chjota. Tojo sʼín xi miyo fáo nga fákaongañá xínkjín, kʼoati machjén nga kʼoaiʼndelee Niná nga katafákaoná kʼoa kuinóʼyalee kʼianga kuinchja̱. A ʼyaní josʼin fákaoná je Niná.
Nichxin xi tiyoaa ndʼaibi, je Jeobá kui Biblia síchjén nga fákaoná (2 Timoteo 3:16, 17). Jósʼin síchjén. Tobʼelañá, tsa jngola kartale miyoli kafaʼaili, kʼianga jekʼoéxkiai i̱jin kʼuínlai xi ngikʼa: “Itso je miyona”. Kʼoajinsí ninga tsín ñaki kafákaoli, ninga to xo̱nle kabʼexkiai. Tikʼoasʼinni xi kao Biblia, kʼianga bʼexkiaa tibʼaiʼndeñá nga tífákaoná je Jeobá. Je Gina, xi kanikʼaxki̱ná ya kjoaʼmiya xi fitsʼiani itso: “Tsa mena nga miyo kuitsona Niná, tjínnele nga kʼoexkia je Biblia, je xo̱n xi kisikájnaná. Kʼianga nyaon nyaon bʼexkia je Biblia kjimachriantʼale Niná”. A bʼaiʼndení kʼianga fákaoli je Jeobá nga nyaon nyaon, xi tsonile, a bʼexkianí je Biblia nga nyaon nyaon. Tsa kʼoasʼiain, koa̱nchriantʼalai Niná.
^ párr. 5 Tsa mesali jchai josʼin koa̱n si̱chriantʼalee je Niná nga kʼoétsʼoalee, chótʼajin ya kjoaʼmiya xjaʼaonjao xi tsʼe libro xi Jmé kjoanni xi bakóya je Biblia ʼmi. Libro jebi jé testigole Jeobá bʼasje.
Tsa kʼoati meli jchai xi tʼatsʼe jebi
XO̱N XI BÁJINKONNÁ
A kʼoanʼiai jmeni xi tso je Niná
Ningalani machjén nga si̱tjosonlee je Niná, tonga ali tsa tokuijin xi machjén nga miyole koaan.
