Tikjaʼaitsjenlai je miyoli, a tjínkʼa xi tsín ʼyai jaʼaínle. ʼYajin joʼmi ngatsʼi, tsí jaon. Jngo chjoón xi ya Bulgaria tsʼe, xi Irina ʼmi, i kitso: “Alikui koa̱n koa̱nchriantʼalee Niná kʼiatsa tsín ʼyaa joʼmi”. Tojosʼin kaʼyaa ya kjoaʼmiya xi títjon, je Niná mele nga si̱chriantʼalee. Kuinga ya Biblia i̱ tsosíniná je Niná: “Anña Jeobá. Kui jebi jaʼaínna” (Isaías 42:8).

A ñaki nʼiokjoán mandosinle Jeobá nga jchai kʼoa nga si̱chjain je jaʼaínle. Tikjaʼaitsjenlai jebi. Je jaʼaínle Niná ño letra xi én hebreo kichjini. Tetragrámaton ʼmi kʼoa me ñato jmi kʼa faʼaitʼa je xo̱njchá xi títjon kichji xi Escrituras Hebreas ʼmi. Kui jaʼaín jebi xi ngisasa nʼio nkjín kʼa faʼaitʼa tikʼoajinni tojme jaʼaínni. Jebi kui xi bakó nga je Jeobá kui xi mele nga katabe chjota je jaʼaínle kʼoa nga katasíchjén. *

Tjínkʼa chjota xi kʼoasʼin síkjaʼaitsjen nga tsínná kjoaxkóntokon xi kao Niná kʼiatsa jaʼaínle si̱chjén nga̱ nʼio tsje kʼoa nʼio tjínle nganʼio. Kjoaixiní nga tsín nda sʼiaan kʼiatsa chʼaosʼin si̱chjén je jaʼaínle Niná. Tojosʼin nga tsín ndatjín kʼiatsa chʼaosʼin si̱chjén je jaʼaínle miyoná. Tonga je Jeobá kui xi mele nga je chjota xi tsjoake katabexkón je jaʼaínle kʼoa katatsoyale chjota joʼmi (Salmo 69:30, 31; 96:2, 8). Tikjaʼaitsjain nga i̱ná kitsole Jesús je chjotale kʼianga kitsoyale josʼin kʼoetsʼoa: “Nʼainajin xi tijnai ngʼajmi, kataʼyaxkón jaʼaínli”. Koaan kʼoainganʼioá nga katabitjotsje je jaʼaínle Niná kʼianga kʼuínyalee chjota joʼmi. Tsa kʼoasʼiaan ngisa koa̱nchriantʼalee (Mateo 6:9).

Je Biblia kʼoatso nga kuenta sʼín Niná ʼyani “xi kʼoasʼin síkjaʼaitsjenjin je jaʼaínle”, tsakui nichxin je tínchja̱ni én jebi je chjota xi bechjí jaʼaínle Niná (Malaquías 3:16). Xi tʼatsʼe chjota jebi, je Jeobá itso: “An sikuinda nga̱ be je jaʼaínna. Kuinchjaana kʼoa kjuinrʼoele. Yaa tjen koatejnakoa nga kjoanikjaojin sʼe̱le” (Salmo 91:14, 15). Nʼio chjíle nga jchaa kʼoa nga si̱chjén je jaʼaínle Jeobá kʼiatsa mená nga miyoná koa̱n.