1, 2. Jósʼin kitsjoanganʼiole Jesús je chjotale kʼianga jejaʼáyale.

JAO mani chjotale Jesús xi tjenya yandiaa xi ya tjíofi jngo ʼnde xi tejngo kilómetro tíjnale ya Jerusalén. Nʼio ba tjíole nga kʼoasʼin kʼien Jesús kʼoa kje tjíojinjinle kʼiatsa jejaʼáyanile. Toʼikoan tsʼatsen Jesús kʼoa kitsjenkao yandiaa. “Tsakʼétsʼiakao nga kitsoyatsenle ngayije xi tjítʼa xo̱n Escrituras xi tʼatsʼe, saʼnda xi tsʼe Moisés kao ngatsʼi chjota xi kinchja̱ya tʼatsʼe Niná.” (Luc. 24:13-15, 27.) Ñaki nda kisatio kon kʼoa nʼio tsjoa koanle je ni̱ma̱le nga koanjinle “jo tso én xi tjítʼa xo̱n Escrituras” (Luc. 24:32).

² Kʼianga tikuini nichxin, kʼianga koanxon, nga jao chjotale ki ijngokʼani Jerusalén. Kʼianga kitsaojin je pastro tsakʼéyanajmíle jmeni xi koan. Kʼoa kʼianga tjíonchja̱, je Jesús tsʼatsenle ngatsʼi. Je pastro nʼio kitsokjon kʼoa likui be tsa ñaki je Jesús xi tsʼatsenle. Ya Biblia kʼoatso josʼin kitsjoanganʼiole Jesús je chjotale. Itso: “Kiskoʼaiʼndele kjoafaʼaitsjenle, jméni nga koa̱nchoyasínile xi tjíotʼa xo̱n Escritura” (Luc. 24:45).

3. 1) Ánni nga sakʼoa nroajensíni tokoán josʼin tinixálee Jeobá. 2) Jméni xi tsjoa koaya tokoán.

³ Tsakui nichxin sakʼoa ba sʼe tokoán tojo koanle je chjotale Jesús. Ninga je Jeobá tinixálee sakʼoa nroajen tokoán  kʼianga tsín makjainle chjota kʼianga ʼmiyasoán (1 Cor. 15:58). Kʼoati satío tokoán kʼianga je chjota xi ʼmiyalee Biblia alikui ndi̱to̱n síkʼantjaiya yaole. Kʼoa tsakui nichxin saʼnda kʼoasjengi je Jeobá. Tonga jméni xi sʼiaan nga tsjoa katasatíoná nga kʼoasʼiaan je xále Niná. Je xi koasenkaoná kuinga katamachoyaná josʼin tsoyanile je choa̱ xi kisikatío Jesús. Janla choa̱ xi tsakatío Jesús kataʼyaa kʼoa kataʼyala jmeni xi bakóyaná.

4. Jósʼin tsoyanile je choa̱ xi kisikʼéjna Jesús tʼatsʼe chjota xi tsojmi bʼéntje xi bajnafe.

⁴ (Tʼexkiai Marcos 4:26-29.) Jósʼin tsoyanile je choa̱ xi kisikʼéjna Jesús tʼatsʼe je chjota xi tsojmi bʼéntje xi bajnafe. Je chjota xi tsojmi bʼéntje xi bajnafe jé tsoyanile je xi jetsoyason je Énle Niná kʼoa je na̱xi̱n jé tsoyanile je én xi bakóyasonle je chjota xi ndʼé tjío ni̱ma̱le. Je chjota xi tsojmi bʼéntje kʼoati “bajnafe nga nitje̱n, bisótjen nga nichxin” tojo sʼín ngatsʼi je chjota. Je na̱xi̱n alikui xátí mangʼa, bʼachxinle saʼnda nga sʼentje kʼoa saʼnda nga sʼexkó. Nga kʼia, “je na̱xi̱n mantje, majchá”, tojé mi. Tikʼoasʼinni, jngo chjota xi jetíkotʼaya kʼoati tobijbi mataja kjoamakjainle, machriantʼale je Jeobá. Kʼoa xijema, chan kʼoabʼé kon nga je Niná sixále. Tsjoátʼale yaole je Jeobá kʼoa fisʼenngindá.

5. Ánni nga kui kisichjénsíni Jesús je choa̱ xi tsʼe chjota xi tsojmi bʼéntje xi bajnafe.

⁵ Ánni nga kui choa̱ jebi kisichjénsíni Jesús. Kui xi koanmele Jesús nga katamachoyaná kʼianga je Jeobá xosʼín nga sa matse sa matse je Énle Niná ya jinni̱ma̱le chjota xi mele (Hech. 13:48; 1 Cor. 3:7). Ñá tobʼentjeñá kʼoa basenndálee tonga alikui bʼenelee kʼoa alikui nixátíyalee nga mangʼa. Tojo ma je chjota xi kinchja̱ni Jesús, alikui ʼyaa josʼin kjimangʼa. Kʼoa nga tsen tinijchá yaoná, likui ʼyaa josʼin kjimantjejin ni̱ma̱le chjota je Énle Niná. Tonga tsakui nichxin, nga jekoa̱nni, je chjota jebi yani sixákaoná nga kʼuínyasonlee chjota (Juan 4:36-38).

6. Jókʼoé tokoán tʼatsʼe je chjota xi ʼmiyalee Biblia jokji tse koa̱ntajani kjoamakjainle.

⁶ Jméni xi bakóyaná je choa̱ jebi. Xi títjon, machjénní nga kʼoakʼoé tokoán nga tsín ñá kʼoakoa̱nná jokji tse koa̱ntajani kjoamakjainle je chjota xi ʼmiyalee Biblia. Ninga bʼainganʼiolee chjota jebi jokji tjen kʼoamaná, alikui bʼenelee nga katakanísʼenngindá yaole. ʼYañá nga je xi kuitsoni tsa mele tsjoátʼale Niná yaole. Je Jeobá tokʼia nga sasénle nga bʼaitʼalee yaoná kʼiatsa ñaki tsjoacha kjoaixiaa (Sal. 51:12; 54:6; 110:3).

7, 8. 1) Jmésani xi bakóyaná je choa̱ xi tsakʼéjna Jesús tʼatsʼe je chjota xi tsojmi bʼéntje xi bajnafe. Jngola choa̱ tʼejnai. 2) Jméni xi bakóyaná jebi xi tʼatsʼe Jeobá kao Jesús.

⁷ Xi majaoni, kʼianga majinná josʼin tsoyanile je choa̱ xi tsakʼéjna Jesús kui xi basenkaoná nga tsín nikinroajeen je tokoán kʼiatsa likui tokjoán nda bichótsjoá josʼin ʼmiyaa, machjénní nga tsejta katamaa (Sant. 5:7, 8). Kʼiatsa tibʼenelee yaoná nga tibisenkoaa jokji tjen kʼoamaná je xi ʼmiyalee Biblia tonga tsa tsín mantjejin ni̱ma̱le je Énle Niná, ali tsakuijin xi tsonile tsa tsín nda maestro kjimaa. Je Jeobá tíbe ni̱ma̱le chjota kʼoa basenkao je chjota xi nangitokon xi mele nga sikʼantjaiya yaole (Mat. 13:23). Jotjín chjota fisʼenngindá alikui xi tsonile tsa maná kʼoa tsa mai josʼin ʼmiyaa. Je Jeobá alikui kui fini jotjín chjota nrʼoéná kʼianga ʼmiyasoán.  Je xi nʼio bechjí kui jokji tibʼenelee yaoná (tʼexkiai Lucas 10:17-20; 1 Corintios 3:8).

⁸ Xi majanni, alikui tongantsjai nga jchaa josʼin tjíosíkʼantjaiya yaole je chjota. Tobʼelañá, jngo misionero xi jngo chjoón kao xʼinle títsoyale, nga jao chjota jebi kʼoakitso nga jemele kuitsoya je Énle Niná. Je misionero kʼoakitsole nga títjon kjoanla tsín tina̱jno̱ katakjenni. Tokʼoakoanle misionero nga kʼoakitso chjota jebi nga jenkjín sá nga tsín tina̱jno̱ kjenni. Koanchoyale nga tsín kixi tíjna nga na̱jno̱ skién ninga toʼma kʼoasʼin. Je Jeobá skoe̱ní tsa kʼoasʼin kʼoa jtike je xi jaonkjaín. Jé xi kitsoni a skiénsa na̱jno̱ axo mai ya ngixko̱n je misionero axo ñaki tondiaa koatechjoale yaole. Ninga tsín tsabe je misionero nga jeni kisikʼantjaiya yaole chjota jebi, jé kjoatsjoacha xi kisʼele kao Jeobá xi tsakinyakao nga kui kʼoakisʼin xi ndatjín.

9. Jósʼin tsoyanile je choa̱ xi tsakʼéjna Jesús tʼatsʼe naʼya xi je kji.

⁹ (Tʼexkiai Mateo 13:47-50.) Jósʼin tsoyanile je choa̱ xi tsakʼéjna Jesús tʼatsʼe naʼya xi je kji. Je Jesús kʼoakitso nga kʼianga ʼmiyasoán je én xi tʼatsʼe Chjotaxále Niná kui mangóson je naʼya xi je kji xi bichonngindá ya ndáchikon. Joni jngo naʼya xi je kji nga kjoé tojokjoan jti̱ni, kʼianga ʼmiyasoán kʼoati ma, miyón chjota chjakoaa kʼoa chjakaoñá toʼya chjotani (Is. 60:5). Yaa ʼyanile jebi nga miyón mani chjota xi bichó nga xki̱ nó kʼianga satíoná kjoajtíntse kʼoa kao nga faʼaitsjenya je kjoabiyale Cristo. Tjíokʼa je chjota jebi xi kui mangóson je jti̱ xi ñaki nda kʼoa yaa batiojin je jtín xi tsʼe Cristo. Tonga kʼoati tjín je xi ya mangóson je jti̱ xi tsín nda, kʼoa je Jeobá alikui sasénle.

10. Ánni nga kui choa̱ tsakʼéjnasíni Jesús tʼatsʼe naʼya xi je kji.

¹⁰ Ánni nga kui choa̱ jebi tsakʼéjnasíni Jesús. Kʼianga kʼoasʼin tjoʼajin je jti̱, ali tsa kʼiajin tínchja̱ni nichxin nga sijé kuenta Niná kʼianga kjoaʼaí je kjoañʼai xi nʼio tse. Kui tsoyanile jmeni xi kjima je nichxin xi to tífikjetʼani. Je Jesús alikui kʼoakitso nga choʼndale Jeobá koa̱n ngatsʼi je xi sa̱sénle je énnda xi tsʼe Chjotaxále Niná. Nʼio nkjín mani xi faʼai kjoajtínná kʼoa xi tjíokotʼaya Biblia xi tsínni mele nga tsjoátʼale yaole je Jeobá (1 Rey. 18:21). Kʼoa tjínkʼa xi tsín tifaʼaini kjoajtínná. Kʼoa tjínkʼa xti xi tokʼoa jekotʼaya xijchále nga kitsin tonga alikui ñaki tsjoake je Jeobá. Je Jesús kʼoakitso nga jngó jngóñá nga chjoéjiaan jmeni xi mená sʼiaan. Kʼiatsa kui chjoéjiaan xi ndatjín, je Jeobá jngoyale “tsojmichjí” sʼin skoe̱konná (Ageo 2:7).

11, 12. 1) Jósʼin basenkaoná je choa̱ xi tsakakóya Jesús tʼatsʼe naʼya xi je kji. 2) Jméni xi bakóyaná jebi xi tʼatsʼe Jeobá kao Jesús.

¹¹ Jósʼin basenkaoná je choa̱ xi tsakakóya Jesús tʼatsʼe naʼya xi je kji. Kʼianga machoyaná je choa̱ xi tsakʼéjna Jesús kui xi basenkaoná nga tsín yaoná nibalee kʼoa nga tsín tokoán nikinroajeen kʼiatsa je chjota xi ʼmiyalee Biblia kʼoa tsa ʼndíxtiná kaile nga Jeobá sixále. Tsakui nichxin nʼio tsakʼenelee yaoná jokji kicho nganʼioná nga kinikatíondaa. Jngo chjota ali tokui nga miyole Jeobá koa̱nni nga sasénle jmeni xi ʼmiyalee. Kʼoa je ʼndíxti alikui tokui nga miyole Jeobá koa̱nni nga kui koanjchíngakao. Kʼiatsa tsín mele nga je Jeobá koatexomale alikuijin koa̱n nga choʼndale Jeobá koa̱n.

¹² A kui xi tsonile jebi kʼianga je  chjota xi jekisikatío je xi kixi tíjna nga tsín tikjoaʼaíkatiojinni i̱ jinjtín. Kʼoa a kui xi tsonile jebi nga tsínle kjoachoya jngo xi kje tsjoátʼajinle yaole je Jeobá. Mai. Tiʼndesale nga koa̱n simiyo je Jeobá nga kjesa faʼaijin je kjoañʼai xi nʼio tse. Je Jeobá tjíonchjale kʼoa títsole: “Nroanrʼoe ijngokʼanáo kʼoa an kjuíkon ijngokʼano” (Mal. 3:7). Xi tʼatsʼe jebi nʼio nda bakóyaná je choa̱ xi tsakʼéjna Jesús tʼatsʼe je ti xi ki (tʼexkiai Lucas 15:11-32).

13. Jósʼin tsoyanile je choa̱ xi tʼatsʼe ti xi ki.

¹³ Jósʼin tsoyanile je choa̱ xi tsakʼéjna Jesús tʼatsʼe ti xi ki. Je nʼai xi síkʼaxki̱ choa̱ jebi nʼio tjínle kjoamatokon kʼoa jé tsoyanile je Nʼainá xi tíjna ngʼajmi, je Jeobá. Je ti xi tokisíkjeya je kjoatjao xi tsakʼaile jé tsoyanile je xi síkatío je jtín xi tsʼe Cristo. Yaa fijin ijngokʼa je sonʼndele Na̱i kʼoa jngoyale yaa fi “jngo ʼnde xi kjintʼa” tíjna ngixko̱n Jeobá (Efes. 4:18; Col. 1:21). Tjínkʼa xi beni yaole kʼianga tsín nda tjíosʼín kʼoa faʼainrʼoe ijngokʼani je Jeobá. Alikui choa ñʼai tíjna nga kʼoasʼín, tonga nga sʼele kjoanangitokon kʼoa nga kʼoamanile jéele, je Jeobá síchatʼale kʼoa kjoétjao ijngokʼani (Is. 44:22; 1 Ped. 2:25).

14. Ánni nga kui choa̱ tsakʼéjnasíni Jesús tʼatsʼe je ti xi ki.

¹⁴ Ánni nga kui choa̱ jebi tsakʼéjnasíni Jesús. Je Jesús kui xi tsakakó kʼianga kui xi mele Jeobá nga katafaʼai ijngokʼani chjota i̱ naxinandále. Je nʼai xi síkʼaxki̱ choa̱ jebi kʼoatsakʼé kon nga kjoaʼaí ijngokʼani je ʼndíle. Kʼianga tsabe je ʼndíle nga jetínroa kjoan kitokanrʼoe.Xi koanmele nʼai jebi kuinga katabe je ʼndíle nga koa̱n kuicho ijngokʼani. Je choa̱ jebi koaan koasenkao xi jekisikatío xi kixi tíjna nga ijngokʼa katanroanrʼoeni je Jeobá. Tsakui nichxin jenʼio kinroajen kjoamakjainle, tsakui nichxin soale, kʼoa nʼio ñʼai koa̱nle nga kjoaʼaí ijngokʼani, tonga nʼio chjíle nga kʼoenele yaole. Kʼianga faʼai ijngokʼani nʼio tsjoa sʼele je Jeobá, je Jesús kao je ánkje (Luc. 15:7).

15, 16. 1) Jméni xi bakóyaná je choa̱ xi tsakʼéjna Jesús tʼatsʼe je ti xi ki. Tatiola kʼai choa̱. 2) Jméni xi bakóyaná jebi xi tʼatsʼe Jeobá kao Jesús.

¹⁵ Jósʼin basenkaoná je choa̱ xi tsakakóya Jesús tʼatsʼe je ti xi ki. Tjínnele nga chjénngilee choa̱le je Jeobá. Kʼianga ʼya xi faʼai ijngokʼani i̱ jinjtín alikui  koa̱n tsa nʼio “kixi” chʼa̱sjee yaoná kʼoa likui nda chjoéyaa. Kʼiatsa kʼoasʼiaan, alikuijin nda kuiyoaa ngixko̱n Jeobá (Ecl. 7:16). Je xi bakóyasaná kuinga kʼoasʼin jchatokoán je xi kasíkatío je jtín joni “jngo barré xi kacha” nga koa̱n kjoaʼaí ijngokʼani (Sal. 119:176). Kʼoa tsa jngo chjota koa̱nsjainá xi jekisikʼéjna je jtínle Niná, a kjoásjailee josʼin kuisenkoaa nga katafaʼai ijngokʼani. A kjitʼaa nangi kʼoakʼuínlee je xi chjotajchínga sʼin tjío nga katabinyakao. Kʼoajin sʼiaan tsa machoyaná je choa̱ xi tsakʼéjna je Jesús.

¹⁶ Je xi faʼaikatiojin ijngokʼani naxinandále Niná, nʼio tsjoá kjoanda nga kʼoasikji kjoamatokon bakó Jeobá. Nga kʼoati bakó kjoatsjoacha je jtín kʼoa tsjoánganʼiole. Jngo ndsʼee xi jekan aon nó tjínle nga tsakichonsjejin itso: “Je kjoatsjoa xi tjínna saʼnda nga ijngokʼa tsakatejnajinña sa kjimatse sa kjimatsee jokji nga tísíkinjenyʼánjonna je Jeobá (Hech. 3:19). Nʼio tjínle kjoatsjoacha Jeobá. Ñaki jé tíjnajinle jngo familia xi ñaki nʼio tsjoake xi tʼatsʼe Niná”. Jngo tichjaa xi sʼa tsoti xi aon nó nga koanskanni jaʼaikʼejnajin ijngokʼani naxinandále Niná itso: “Alikui ʼbe josʼin xínyano jotjín tokoán tʼatsʼe kjoatsjoacha xi kinchja̱ni je Jesús kʼoa josʼin tsakakóna. Je naxinandále Jeobá nʼio chjíle”.

17, 18. 1) Jméni xi kabakóyaná nga jan choa̱ jebi. 2) Jméni je xi sʼiaan.

¹⁷ Jméni xi kabakóyaná nga jan choa̱ jebi. Xi títjon, tjínnele nga katamachoyaná nga tsín ñá kʼoakoa̱nná jokji tse koa̱ntajani kjoamakjainle je chjota xi ʼmiyalee Biblia. Tojé Jeobá xi be. Xi majaoni, alikui tongatsʼi je chjota xi faʼaikatiojinná kao xi kotʼaya Biblia xi mele nga Jeobá sixále. Xi majanni, ninga tjíokʼa xi síkatío Jeobá, kʼoakʼoé tokoán nga koa̱n kjoaʼaí ijngokʼani. Kʼoa nga jekjoaʼaíni, nda chjoéyaa kʼoa kʼoasʼin koakoñá je kjoatsjoachale Jeobá.

¹⁸ Nga jngó jngoá tosi tonda kjoásjee je kjoankjíntokon, kjoamajintokon kao je kjoachjine. Tojosʼin tsaʼyaa je choa̱ xi tsakatío je Jesús, chjónangilee yaoná: “Jméni xi bakóyaná je choa̱ jebi. Ánni nga ya kisʼetʼasíni je Biblia. Jósʼin koa̱n si̱chjén. Jméni xi bakóyana tʼatsʼe Jeobá kao Jesús”. Kʼiatsa kʼoasʼiaan, tibakoñá nga kjimajinná je én xi kinchja̱ je Jesús.