Alikuijin kuitso tokuin nga i̱ kʼuínlai jngo chjota xi tsín ʼyaxkuin kʼoa xi tsín nanda ʼyai: “Tsa jme xi koa̱nchjénli, tokʼoatʼinnái”. Tonga tsa miyoli mani koa̱njin tokuin nga kʼoakʼuínlai. Je xi miyo fáo kʼoasʼín jmeni xi síjéle xínkjín.

Je Biblia kʼoatso kʼianga kʼoasʼín je Jeobá jmeni xi nda bʼé kon je chjota xi bʼétsʼoale. Tobʼelañá, je rey David, xi miyole Niná koan, i kitso: “Nʼio nkjín koya jmeni xi tinʼiai, ji Jeobá Ninána, saʼnda je xáli kʼoa kao je kjoafaʼaitsjenli xi tibakonáijin [...], nʼio toxkia nkjín mani, alikuijin an koa̱nxki̱na” (Salmo 40:5). Xi ijngosani, je Jeobá saʼnda tsjoále jme xi tsjoa satíoni kon je chjota xi kje bejin, tsjoále tsojmi xi batiokonni (Hechos 14:17).

Nga kʼoasʼín je Jeobá, nga kui tsjoále xi ngikʼa jme xi tsjoa satíoni kon, kʼoati koyale nga je xi miyole mani kui kʼoakatasʼín jmeni xi koayatsjoa ni̱ma̱le je (Proverbios 27:11). Tonga jméni xi sʼiain kʼianga nda katasʼele Niná. Je Biblia itso: “Ali nichajinjion nga nda sʼiaon, kʼoa nga kuinyakao xikʼa, nga̱ kui kjoatjao xi sasénle Niná” (Hebreos 13:16). A kui xi tsonile nga tokui xi machjén nga kui kʼoasʼiaan xi ndatjín kʼoa nga kuinyakoaa xi ngikʼa.

Je Biblia itso: “Tsa tsín makjainná, likui nda sʼekon Niná xi tʼatsaan” (Hebreos 11:6). Je Abraham, kʼiaa “miyole Niná tsakʼinle” kʼianga jekisʼele kjoamakjain xi “tʼatsʼe Niná” (Santiago 2:23). Je Jesucristo kʼoati kitso nga tjínnele sʼe̱ná kjoamakjain xi tʼatsʼe Niná ánni nga sichikontʼainsíniná (Juan 14:1). Jósʼin sʼe̱nili je kjoamakjain xi síjéle Niná ʼyani xi mele nga sichriantʼale. Koaan kui kʼoétsʼiakaoni nga jngo estudio katabʼaili xi tsʼe Biblia. Tsa kʼoasʼiain, jchaní jmeni xi “mele Niná” kʼoa koaan kui kʼoasʼiain jmeni “xi sasénle nga je”. Kʼianga sa tse sa tse jchai xi tʼatsʼe Jeobá kʼoa nga si̱tjosuin jmeni xi síjé, je kjoamakjainli sa taja sa tajaa koa̱n kʼoa sa koa̱nchriantʼa sa koa̱nchriantʼalai (Colosenses 1:9, 10).