XI NGISA TÍNCHJA̱NI REBISTA JEBI: KOAAN MIYOLE NINÁ KOAI̱N
A miyole Niná mai
“Nga miyona ma je Niná alikui tsokjoan, alikui jme xi chana kʼoa nda tijna. Tsen mana nga síkuindana ngantsjai kʼoa nga kui xi mele Niná nga ndasʼin koatejna.” (CHRISTOPHER, JNGO TI XI GHANA TSʼE)
“Je Niná bení kʼianga ba tjínná, kʼoa bakóná nga nʼio tsjoakená kʼoa nga kuenta sʼínná.” (HANNAH, JNGO TSOTI XI TEJAN NÓLE XI ESTADOS UNIDOS TSʼE)
“Kʼianga miyona mani je Niná kui xi ngisasa nʼio chjíle kʼoa ñaki nyʼán sʼe tokoan.” (GINA, JNGO CHJOÓN XI ÑACHAN AON NÓLE XI JAMAICA TSʼE)
Je Christopher, Hannah, kʼoa kao Gina alikui tojé xi kʼoasʼin síkjaʼaitsjen. Kʼoa nʼio nkjín chjota xi tjín jngo tjíjtsa Sonʼnde xi ñaki kʼoatjío kon nga miyo tsole je Niná. Kʼoa ji, jótjín tokuin. A chrian tijnalai Niná. A meli nga si̱chriantʼalai. Tsakui nichxin i̱si: “A koaan nga jngo xi to chjotasonʼnde nga miyole koa̱n je Niná xi nʼio tse nganʼio tjínle. Kʼiatsa koa̱n nga miyole koaan, jméni xi tjínnele sʼiaan”.
KOAAN CHRIAN KUIYOLEE NINÁ
Je Biblia kʼoatso nga koa̱n miyoná koa̱n je Niná. Kʼoatso nga je Niná “miyona” kitsole je Abrahán, jngo chjota hebreo xi tsakʼejna nichxin kjoatse (Isaías 41:8). Kʼoa Santiago 4:8 kʼoati i̱ tsoná: “Tichriantʼalao Niná, kʼia kʼoati je sichriantʼano nga jon”. Kuinga kʼoabixónsíñá nga koa̱n miyole koaan je Niná. Tonga nga tsín matsen je Niná, jósʼin koa̱n si̱chriantʼanilee kʼoa miyole koaan.
Kʼianga jchaa xi tʼatsʼe jebi, kuila si̱kjaʼaitsjeen josʼin mamiyole xínkjín jngo chjota. Kʼiaa fitsʼiani nga tosʼa bexkon xínkjín kʼoa kʼoatsole xínkjín joʼmi. Kʼoa nga kjitʼa fáonajmí, nga kʼoatsole xínkjín josʼin síkjaʼaitsjen kʼoa jotjío kon ngisa mamiyosa. Kʼoa nga bʼénele yaole nga kʼoasʼín nga jngó jngó jmeni xi tsjoake xi ijngo, ngisa mamiyosa. Kʼoati ma xi kao Niná. Kataʼyala jmeni xi koa̱n sʼiaan.
Tsa kʼoati meli jchai xi tʼatsʼe jebi
XO̱N XI BÁJINKONNÁ
A ʼyaní joʼmi je Niná
Je Niná sikʼéjnatseen jaʼaínle ya Biblia itso: “Anña Jeobá. Kui jebi jaʼaínna”.
