JNGO jtín mani je xti, xi testigole Jeobá ma, xi jngo pelíkula mele koaikotsenle. Kinrʼoé nga kʼoatjíotso je xtiskuela xínkjín nga nʼio nda sʼe pelíkula jebi. Kʼianga kicho ya cine, kiskotsenle je xo̱n xi faʼaitʼa pelíkula kʼoa tsabe nga tosíxkón kjoan ki̱cha̱ kjoajchán nroatʼa kʼoa nga me to kjiojti je yánchjín xi nroatʼa. Jósʼin xti jebi. A kjoaʼasʼeen ya cine kʼoa a skótsen kjoanʼiole pelíkula jebi.

Jebi kui bakó nga nʼio nkjín koya jmeni xi nʼia xi koa̱n nda sikʼéjnaná ngixko̱n Jeobá kʼoa xi koa̱n chʼaosʼin sikʼéjnaná. Sakʼoa tjín jmeni xi mená sʼiaan, tonga nga nda nikjaʼaitsjenjiaan sakʼoani nikʼantjaiyaa je kjoafaʼaitsjenná. A to jao tjín tokoan tsa kʼoasʼiaan axo sakʼoa ndatjín nga nikʼantjaiyaa kjoafaʼaitsjenná.

Nga tsjoachaa je Jeobá kui xosíkaoná nga bʼaitʼalee yaoná kʼoa chanisʼenngindá yaoná. Kʼoa kui xi mená nga kixi koanngíntʼalee je Niná. Tonga je Na̱i, xi kontra tíjnaná, kui xi mele nga tsín kixi katamaa (Apoc. 12:17). Tjínnele nga kʼoakʼoé tokoán nga si̱xálee je Jeobá kʼoa nga si̱tjosoán je kjoatéxomale. Kʼianga jetsakʼaitʼalee yaoná je Jeobá nʼiojin chʼaotjín tsa si̱kʼantjaiya ijngokʼá kjoafaʼaitsjenná. Alikuijin tiso̱koniná kjoabijnachon.

Jetsʼato jao jmi kaoni jaon siento nó tjínle, nga jngo xkóson xi tsʼe oro kisinda je rey Nabucodonosor kʼoa kʼoakitso nga katabinyále xkóle ngatsʼi chjota. Kʼoakitso nga je xi tsín kʼoasʼin yaa si̱kʼatsaoya ya nga̱já xi tíbʼájnga̱. Jan mani xti xi tsín kisitjoson, xi je Jeobá tsakʼétsʼoale, xi Sadrac, Mesac, kʼoa Abednego tsakʼin. Kʼianga tsín tsakʼétsʼoale xkóson jebi yaa kinikʼatsaoya ya nga̱já xi tíbʼájnga̱. Tonga jé Jeobá tsakʼasjentjai. Xti jebi alikui kini ninga xkón tsakatio, xi ngisa kisikjaʼaitsjen kuinga kixi koaitʼale je Niná (Dan. 3:1-27).

Jóbixoán xi tʼatsʼe profeta Daniel. Je Daniel tosi tonda tsakʼétsʼoale Niná ninga kʼoatsakʼinle  nga ya nikʼatjenya ya jña tjío xa. Tosi tonda kʼoakisʼin josʼin jengale nga jan kʼa bʼétsʼoa nga jngo nichxin. Je Daniel alikʼia kisikʼantjaiya kjoafaʼaitsjenle, ñaki kʼoatsakʼé kon nga tosi tonda je Niná xi kixi kʼoetsʼoale. Nga kʼoakisʼin, je Jeobá tsakʼasjentjai Daniel “ya jinle xa” (Dan. 6:1-27).

Je choʼndale Niná xi tjío ndʼaibi kʼoati ñaki kixi tjíofitʼale je Jeobá. Jngo ndʼiaskuela xi ya tíjna ya África, jngo jtín xti xi testigole Jeobá ma xi kʼoatsakʼinle nga katasʼín saludar je bandera tonga likui kʼoakisʼin. Kʼoatsakʼinle nga kuichonsje kʼiatsa tsín kʼoasʼin. Tochoatse jaʼato nga kicho ya naxinandá je xi séntítjonle ngatsʼi maestro xi tjín ya naxinandá kʼoa tsakjákaonajmí kʼa je xti xi testigole Jeobá ma. Xti jebi kao kjoaxkóntokon kʼoa kao kjoanʼiojin kitsoya anni nga tsín sʼínni saludar je bandera. Saʼnda nga kʼia, alikui tijo tjíoʼminile kʼoa alikui tisʼenenile ya ndʼiaskuelale nga kjoaʼatone je kjoatéxomale Jeobá.

Si̱kjaʼaitsjenla xi tʼatsʼe Joseph. Je chjoónle cáncer kisʼele kʼoa ngotjo kʼienni. Je familiale Joseph alikui jokitso josʼin sʼe̱ñe je ʼndíkʼien chjoónle. Tonga je familiale je ʼndíkʼien chjoónle ali tsa testigole Jeobá ma. Kui koanmele kʼoasʼin je kostumbre xi tjínle xi tsín sasénle Niná. Je Joseph itso: “Nga tsín tsjoaʼnde an tosa jé xtiná tsakʼénengále, tonga kʼoati nʼio tsakatio tsanda je. Je xínkjín kʼoasʼin tsakʼéndajin nga koatiokontʼain nga kʼoasʼin je kostumbre xi tjínle ya ndʼianajin. Tonga kʼoakixinle nga tsín ya ndʼiana kʼoakatasʼín. Bení nga tsín kʼoanʼiaijin je kostumbre xi tjínle kʼoa nga tsín kʼoati kisʼin je ʼndíkʼien chjoónna. Kʼoa nga jenʼio tse kichobayanijin xi tʼatsʼe jebi chaan xin niʼya kʼoakisʼin”.

Je ndsʼee Joseph itsosa: “Jokji tse tsakatejnajian kjoa jebi kisijéle nganʼio je Jeobá nga tsín katafaʼatone familiana je kjoatéxomale. Je Jeobá kinrʼoéna nga tsakʼetsʼoale kʼoa tsakasenkaonajin nga kixi tsakinyaijin ninga nʼio kisʼenenajin nga kuitjátonaijin je kjoatéxomale”. Je Joseph kao xtile alikui tsa to kiskosonnile tsa koa̱n sikʼantjaiya josʼin síkjaʼaitsjen.

Tochoatse jaʼato nga jekisʼejna sʼuí Paxko nga nó 32, jngo chjoón xi Fenicia tsʼe kichokonle Jesús ya naxinandá Sidón. Je chjoón jebi ngotjo ngosá kʼoakitsonile Jesús nga katamʼaonsjejin je na̱i xi tíjnajin yaole tsotile. Tonga je Jesús alijo kitso. Kʼoa i kitsole je chjotale. “Totʼatsʼe barré xi kicha, xi tsʼe ndʼiale Israel kinikasénnina.” Kʼianga je chjoón jebi tosi tonda kʼoakitso, je Jesús i kitsole: “Likui nda nga chjoé nioxtilale ʼndíxti, kʼoa níaʼndí nikʼatsaole”. Tsakakó nga nʼio tse kjoamakjain tjínle chjoón jebi kʼoa i kitso: “Jaon, Señor, tonga níaʼndí kjine xkoa̱ʼndí xi tsaongi yámixa̱le xi tsʼe naile”. Jesús kʼoakisʼin jmeni xi kisijéle kʼoa koannda je tsotile (Mat. 15:21-28).

Kʼianga kʼoakisʼin je Jesús jé Jeobá kiskenngile nga̱ tíjnanda nga síkʼantjaiya kjoafaʼaitsjenle kʼianga koa̱n kʼoasʼin. Tobʼelañá, nga kʼoakitso je Niná nga sikjeson je chjota israelita nga kʼoasʼin jngo nra̱ja̱ʼndí xi tsʼe oro kisinda, je Niná kitsjoaʼndele je Moisés nga kʼoakitsole nga tsín kʼoakatasʼín jmeni xi kitso (Éx. 32:7-14).

Je pastro Pablo jé Jeobá kao Jesús kiskenngile. Je Pablo kʼoasʼin kisikjaʼaitsjen choatse nga tsín koa̱n koaikao je Juan Marcos nga kjin koaitsoyason, nga̱ kʼianga títjon je Marcos kitsjionkon je Pablo kao Bernabé. Tonga nga koanskanni, je Pablo tsabe nga jekisindaya yaole Marcos kʼoa nga nʼio nda koasenkao. Kʼoa kuinga i̱ kitsonile je Timoteo: “Chjoai Marcos, nroakoai. Kjaínga koa̱nchjénna xi tʼatsʼe xábi” (2 Tim. 4:11).

Kʼoa ñá jónʼia. Kʼianga chjénngilee je Nʼainá xi tíjna ngʼajmi kʼoati koa̱n si̱kʼantjaiyaa josʼin nikjaʼaitsjeen, nga̱ je Niná tjínle kjoamatokon, kjoatsejta kʼoa kao kjoatsjoacha. Tobʼelañá, koaan si̱kʼantjaiyaa josʼin  nikjaʼaitsjeen tʼatsʼe xi ngikʼa. Ñá chjotajée maa, kʼiatsa je Jeobá kao Jesús xi síkʼantjaiya kjoafaʼaitsjenle, a tsín ngisa kuenta sʼiaan ñá josʼin tjío xi ngikʼa kʼoa si̱kʼantjaiyaa josʼin nikjaʼaitsjeen xi tʼatsʼe.

Kʼiatsa mená nga kuichotjenngiaa xi tʼatsʼe xále Niná machjén nga si̱kʼantjaiyaa kjoafaʼaitsjenná. Tjínkʼa xi tjíokotʼaya Biblia kʼoa xi jekjoatse fi kjoajtín xi tsín manʼio kon nga fisʼenngindá. Kʼoa tjínkʼa ndsʼee xi to jao sʼele tsa koa̱n nga precursor sʼin sixá, ninga koa̱nni nga kʼoasʼin sixá. Kʼoa tjínkʼa ndsʼee xi tsín mele nga xá sʼe̱nele ya jinjtín (1 Tim. 3:1). Tsakui nichxin kʼoakjimai. Je Jeobá kʼoatsoli nga chjoai xá jebi kʼoa kataʼyai jokji kjoatsjoa tjenkao. Tikʼantjaiyai kjoafaʼaitsjenli kʼoa kataʼyai jokji kjoatsjoa tjenkao nga nixálee Niná kʼoa kao xíngiaa.

Je Ella xi ya tísíxá ya sucursal xi tsʼe testigole Jeobá ya África itso: “Kʼianga tosʼa jeʼe̱ i̱ Betel alikui ʼbe tsa tse koatejna. Ninga mena nga sixále Jeobá kao ngayeje ni̱ma̱na kʼoati nʼio tjentʼale je familiana. Nga títjon, nʼio kisikjaʼaitsjen je familiana. Je xi ñatjen tsakatejna kisinʼio tokoán, kʼoa kuinga tsakatejnaña. Kʼianga jete nó tíjna i̱ Betel, kui xi mena nga tosi tondalasa i̱ koatejna nga sixále je ndsʼee kao tichjaa”.

A faʼaitsjenli jmeni xi koanle je Caín nga kʼoasʼin koanxinkonke je ndsʼe̱ kʼoa nganʼio koanjtike. Je Niná kʼoakitsole je Caín nga nda kʼoéjna ijngokʼani ngixko̱n kʼiatsa kui kʼoasʼin jmeni xi ndatjín. Je Niná kʼoakitsole je Caín nga katasíkinjele je jée xi “tíjnajchxo xo̱ntjoa” niʼyale. Je Caín koan kisikʼantjaiya kjoafaʼaitsjenle kʼoa jokjoan kʼiatsa je xi koanmele, tonga to kjoa koanle jmeni  xi kitsole Niná. Je Caín kisikʼien je ndsʼe̱ kʼoa je títjon xi chjota kisikʼien (Gén. 4:2-8).

Kʼoalati kataʼyaa xi tʼatsʼe je rey Uzías. Nga títjon, kui kʼoakisʼin xi kixi tíjna ngixko̱n Jeobá kʼoa ñaki je Niná tsakásjai ngantsjai. Tonga xijekoanni, chʼao kisʼin kʼoa ngʼakon koan. Jaʼasʼen ya yo̱ngo̱ kʼoa kitsjoatʼale xongó je Niná, ninga tsín naʼmi ma. Kʼianga kʼoakitsole naʼmi nga tsínkui kʼoakatasʼín jmeni xi tsín je bʼakaole kʼoa nga katasíkʼantjaiya je kjoafaʼaitsjenle, alikui kʼoakisʼin. Je Uzías nʼio koanjtile kʼoa alikui kuenta kisʼin jmeni xi kitsole je naʼmi. Nga kʼoakisʼin, je Jeobá jngo chʼin kitsjoale, kjiʼndojon yaole (2 Crón. 26:3-5, 16-20).

Tjín nichxin nga nʼio machjén nga si̱kʼantjaiyaa je kjoafaʼaitsjenná. Tobʼelañá, je Joachim kʼiaa kisʼenngindá nga nó 1955, tonga nga nó 1978 tsakichonsjejin ya jinjtín. Nga jejaʼato kan nó, kʼoakoannile jmeni xi kisʼin kʼoa ijngokʼa testigole Jeobá koan. Chriansʼa, jngo xi chjotajchínga sʼin tíjna kiskonangile ánni kʼoasikji nkjín nó kiskoyakaosíni nga ijngokʼa tsakʼejnajinni ya naxinandále Niná. Je Joachim i kitso: “Nʼio jti kisʼe tokoán kʼoa nʼio ngʼakon koan. Tonga kʼoamanina nga kʼoasikji tse kiskoya. Jokji tse nga tsín tiya tsakatejnajinña je naxinandále Niná, tsaʼbeña nga kui xi ñaki kixi bakóya je testigole Jeobá”. Koanchjén nga kisikʼantjaiya kjoafaʼaitsjenle kʼoa kʼoakoannile jmeni xi kisʼin ndsʼee jebi.

Tsakui nichxin kʼoati jngo kjoa kuitjátojiaan jñani nga machjén nga si̱kʼantjaiyaa kjoafaʼaitsjenná kʼoa jonʼia. Tiyondajián nga kʼoasʼiaan nga̱ kui xi mená nga nda kuiyoaa ngixko̱n je Jeobá (Sal. 34:8).