Nga nʼio male bʼanacha chjotasonʼnde kʼoa nga tijeni xi xá tsʼe gobierno sʼele kuinga bʼanachasíni. Kʼianga tsín jme kjoachʼanacha sʼe̱le jngo chjotaxá tjínnele nga xin kjoaʼaíni. Je Biblia síkʼaxki jngo chjotaxá xi tsín i̱ Sonʼnde tsʼe. Kʼoa je Jesús, nga tsakʼejna sonʼnde kʼoakitsole chjotale nga katasíjé chjotaxá jebi kʼianga kʼoetsʼoa. Chjotaxá jebi jéní Chjotaxále Niná (Mateo 6:9, 10).

Je Chjotaxále Niná ñaki tíjnaní, yaa ngʼajmi tíjna kʼoa jeme kjoaʼaxin ngatsʼi gobierno xi tjín ndʼaibi (Salmo 2:8, 9; Apocalipsis 16:14; 19:19-21). Jngo koya kjoanda xi kjoaʼaíkao kuinga kjoaʼaxin je kjoachʼanacha. Kataʼyala anni nga tsín manile gobierno faʼáxin je kjoachʼanacha. Kʼoati jchaa anni nga ñaki makjainsíniná nga je Chjotaxále Niná xi koa̱nle kjoaʼaxin.

JÑÁ NROANI KJOA: Je gobierno kui sokóʼanile yaole je tao̱nbasen xi tsjoá je naxinandá. Nga nʼio tse tao̱n síxákao sakʼoa maxkaiʼale kʼoa kuinga síchésonni. Kʼoa tjínkʼa chjota xi bʼéchjíʼmale tojoni nga tsín nʼio tse tao̱nbasen sikʼéchjí. Tonga nga koa̱njnda ijngokʼani tao̱n jebi, je gobierno síkin je tao̱nbasen, kʼoa nga kʼoama sa tse sa tse kjoachʼanacha sʼe. Tokʼoala kjimantsjai kʼoa jéni bʼéchjí je ʼndíchjota xi kixi tjíosʼín.

JÓSʼIN SʼE̱NDAJIN: Je nganʼio xi tjínle Chjotaxále Niná tʼatsʼe tínroani je Niná, Jeobá, xi ngisasa tse nganʼio tjínle (Apocalipsis 11:15). * Je Chjotaxále Niná alikui tao̱nbasen sikʼéchjí chjota kʼianga kʼoasʼin jme xi tjínndajinle. Koaan tsjoále chjota xi koatexomale jme xi machjénle nga̱ tíjnanda nga tsjoá kʼoa tjínle nganʼio (Isaías 40:26; Salmo 145:16).

JÑÁ NROANI KJOA: Je Susan Rose-Ackerman, xi bʼaxki̱ ya kjoaʼmiya xi títjon, kʼoatso nga tokʼia tjóxin je kjoachʼanacha kʼiatsa je xi ngʼajko̱ tjío tsín tikʼoanachani. Kʼianga ya bʼétsʼiakaoni gobierno nga faʼáxin kjoachʼanacha ya jñani chotʼa je tsojmi xi xin naxinandá faʼaini kao xi xin ʼnde fikao chjota kʼoa nga kʼoati tsole polisía nga tsín katabʼanacha tonga tsín jotsole je xi ngisa ngʼa xá tjínle, je chjota alikui tisínʼiotʼani. Kʼoa ninga je xi ngisasa kixi kʼoati chʼao sʼín. Tojo tso ya Biblia: “Niʼyajin xi tsje i̱ sonʼnde xi ndasʼin ngantsjai” (Eclesiastés 7:20, Dios habla hoy, 1994).

JÓSʼIN SʼE̱NDAJIN: Je Jesucristo, Rey xi kiskoejin Niná nikʼiajin nga chʼaosʼin, alikui kʼoasʼin josʼín je chjota. Jetsakakó nga tsín tsjoáʼnde nga ʼya xi kʼoechjíʼmale. Je xi tíbatéxoma sonʼnde, je Na̱i, kʼoakitsole Jesús nga tsjoále “ngayije kjoatéxomale sonʼnde” kʼiatsa koasenxkónyʼintʼale kʼoa kʼoetsʼoale. Tonga Jesús alikui kʼoakisʼin (Mateo 4:8-10; Juan 14:30). Je Jesús nʼio kixi koan, saʼnda tsín kiskoé je droga xi tsakʼaile kʼianga tífaʼá kjoañʼai, ningalani koasenkao droga jebi nga tsín tsen koa̱nle yaole tonga bení nga jchangale kjoafaʼaitsjenle tsakuilani skoé (Mateo 27:34). Kʼoa ndʼaibi nga ya ngʼajmi tíjna Jesús nda koatexomale chjotasonʼnde (Filipenses 2:8-11).

JÑÁ NROANI KJOA: Nʼio nkjín naxinandá jñani totjíchoa̱ nó bʼantjaiyani je xi xá tjínle, kʼoa jebi kui xi basenkao chjota nga faʼáxin je chjota xi xá tjínle, xi tjíosíchesonle, ninga tikʼoasʼínngáni je xi tjoé xá. Tonga nʼio tse kjoachʼanacha sʼe kʼianga satío campaña kʼoa kʼianga ma botar. Kʼoati ma ya naxinandá  jñani tjín tao̱n. Tobʼelañá, je chjotanyiná, nga nʼio tse tao̱n tsjoá nga satío campaña, sakʼoa je jebinyáʼa chjota xi xá tjínle.

Je juez xi John Paul Stevens ʼmi, xi ya tíjnajin Tribunal Supremo xi tsʼe Estados Unidos, kʼoakitso joma kʼianga kʼoasʼin chjotanyiná tsjoánganʼiole je chjota xi xá tjoé, kʼoakitso nga ngisa ñʼai tjínle “nga ndasʼin [kʼianga tjoéle xá], nga sitjoson kjoatéxoma kʼoa nga sinʼiotʼa je chjota”. Kuinga nʼio nkjín chjota xi kʼoasʼin síkjaʼaitsjensíni nga nʼio tse kjoachʼanacha tjínle je partido político.

JÓSʼIN SʼE̱NDAJIN: Nga tondiaa kʼoéjna je Chjotaxále Niná alikui tisʼe̱ni campaña kʼoa kao kjoachʼanacha xi tjenkao nga̱ tsín tisʼe̱ni chjotaxá sonʼnde (Daniel 7:13, 14). Je Chjotaxále Niná alikui chjota kiskoejin, jé Niná kiskoejin, kuinga tsín ʼya xi kʼoéjnayangajaosínile. Nga tondiaa kʼoéjna kui xi koasenkao nga kui kʼoasʼin jmeni xi nda sikatío je chjotale tokʼia saʼndani.

JÑÁ NROANI KJOA: Tsakui nichxin kʼoasʼin nikjaʼaitsjeen nga je xi koasenkao chjota nga tsín tikʼoanachani kuinga katabitjosa kjoatéxoma. Tonga je chjota xi be kʼoatso nga ngisa ngotjo bitjatoneñá kʼianga nʼio nkjín kjoatéxoma tjín. Xi ijngosani, nʼio tse sʼengi kʼianga bitjoson je kjoatéxoma xi bʼéchjoa kjoachʼanacha kʼoa toxiyani jokji bitjoson.

JÓSʼIN SʼE̱NDAJIN: Je kjoatéxoma xi tjínle je Chjotaxále Niná ngisa nda tikʼoajinni je kjoatéxomale chjotaxá sonʼnde. Tobʼelañá, je Jesús, ʼndele nga nʼio nkjín kjoatéxoma tsjoá xi kʼoatso jmeni xi koa̱n sʼiaan kʼoa jmeni xi mai, tosa tojngo kjoatéxoma xi nʼio choa ñʼai sʼin tíjna kitsjoa, kitso: “Ngayije kjoa xi meno nga síkaono chjota, kʼoatisʼin tikaonio nga je” (Mateo 7:12). Je kjoatéxoma xi tjínle Chjotaxále Niná kui ngisa fini nga si̱kʼantjaiyaa jotjío kjoafaʼaitsjenná, ali tsakuijin kʼoatso jmeni xi nʼia. Je Jesús kitso: “Tsjoacha katamai je xíngi josʼin nga tsjoachai je yaoli” (Mateo 22:39, TNM). Je Niná bení jotjío ni̱ma̱ná, kʼoa bení ʼyani xi sítjoson kjoatéxomale (1 Samuel 16:7).

JÑÁ NROANI KJOA: Jao koya tjínni jmeni xosíkao je chjota xi xá tjínle kʼoa kao je chjotanaxinandá nga bʼanacha: kuiní kjoaxkaiʼa kʼoa nga to yaole fini. Kʼianga kʼoasʼin kixojen je niʼya xi kanikʼaxki̱ná ya kjoaʼmiya xi títjon, kuinga kʼoakoanni nga je chjota xi tsakʼénda tsakʼéchjíʼmale je chjotale gobierno tojoni nga kitsjoaʼndele nga kui material xi choa chjíle kisichjén.

Kʼianga tjóxin je kjoachʼanacha machjénní nga sa̱kóyale chjota jmeni xi tjínnele sʼin nga tsín to yaole katafini kʼoa nga tsín xkaiʼa katama. Tonga je gobierno alikui kʼoamale kʼoa alikui mele nga tsoyale chjota jme xi tjínnele sʼin.

JÓSʼIN SʼE̱NDAJIN: Je Chjotaxále Niná koaanle kjoaʼaxin kjoachʼanacha nga̱ kui tsoyale chjota nga nda kjoafaʼaitsjen katasʼele. * Jme xi tsoyale binyakao chjota nga síkʼantjaiya kjoafaʼaitsjenle (Efesios 4:23). Kʼoa kui xi binyakao nga ʼndele nga xkaiʼa koa̱n kʼoa nga to yaole sikjaʼaitsjen, tosa tsjoa satío kon kʼoa mandosinle xi ngikʼa (Filipenses 2:4; 1 Timoteo 6:6).

JÑÁ NROANI KJOA: Ninga nda tjío chjota kʼoa ninga tjínle kjoachjine, tjínkʼa xi tsín kixi jme xi sʼín kʼoa bʼanachaa. Nkjín chjota xi be xi kʼoatso nga kuinga kʼoasʼín chjota nga tsín manile gobierno faʼáxin je kjoachʼanacha. Tokui xi sʼín nga binyakao choa je chjota xi kachʼanachale.

JÓSʼIN SʼE̱NDAJIN: Je Convención de las Naciones Unidas contra la Corrupción kʼoatso nga machjén nga “kixi koa̱n, nga tsín kʼoanacha, kʼoa nga sitjoson” énle gobierno kʼianga tjóxin je kjoachʼanacha. Ninga ndatjín jmeni xi tso, tonga je Chjotaxále Niná ali tsa tokʼoajin tsole chjota nga kʼoakatamakjoan, kʼoatsole nga ñaki katasítjoson. Je Biblia kʼoatso nga je chjotaxkaiʼa kao chjotandiso likui sʼe̱le kjoanda xi kjoaʼaíkao je Chjotaxále Niná (1 Corintios 6:9-11; Apocalipsis 21:8).

Je chjota koaanle sitjoson je kjoatéxomale Niná, tojo kisʼin je chjotale Cristo xi títjon tsakatio. Tobʼelañá, kʼianga jngo chjotale Cristo xi Simón ʼmi koanmele tao̱n tsjoále je pastro tojoni nga katatsjoále nganʼiotsje, je pastro koankaile kʼoa kitsole: “Tikʼantjaiyai kjoafaʼaitsjenli xi tʼatsʼe je kjoatsʼenli”. Je Simón tsabe nga tsín ndatjín jme xi tísímekon kʼoa kʼoakitsole je pastro nga katabʼétsʼoantjai ánni nga tsín tikʼoasʼin sikjaʼaitsjensíni (Hechos 8:18-24).

Tojñani tsi, koaan je koatexomali Chjotaxále Niná (Hechos 10:34, 35). Je Chjotaxále Niná títsoyale chjota jngo tjíjtsa Sonʼnde, kʼoati koa̱n kuitsoyali tsanda ji jokoa̱n sʼiain. Je testigole Jeobá ñaki kao kjoatsjoa koakoli josʼin chotʼaya je Biblia. Tsa tojngo jao minuto si̱ʼai nga xki̱ xomana jchaní “je énnda xi tʼatsʼe kjoatéxomale Niná”. Kʼoati jchai josʼin kjoaʼaxin Niná je kjoachʼanacha (Lucas 4:43). Chja̱kaonajmí je testigole Jeobá xi tjín jñani tsi kʼoa tsa maije̱ titjásʼain ya Internet, ya jw.org.