1, 2. 1) Ánni nga kanño jmi chjota israelita tsín jaʼasʼensíni ya ʼNde jña tsakʼinle nga kʼoaile. 2) Ánni nga mandosinsíniná jmeni xi koantʼain je chjota israelita.

KʼIANGA tojeme kjoaʼasʼen je chjota israelita ya ʼNde jña tsakʼinle nga kʼoaile jmi mani xi kjoachajngi kisʼin kao yánchjín xi ya naxinandá Moab tsʼe. Kʼianga kʼoakisʼin, kanño jmi chjota israelita kʼien. Jenʼio kjoatse tjíokoyale nga tjoéle ʼNde jña tsakʼinle nga kʼoaile kʼoa toje kjoaʼasʼen tsakai. Tonga alikui kitjoele kjoanda jebi nga̱ tsín kisitjosonle je Jeobá kʼoa kjoachajngi kisʼin kao yánchjín xi ya Moab tsʼe (Números 25:1-5, 9).

² Je choa̱ jebi kui xá faʼaitʼani Biblia nga tjín xi bakóyaná (1 Corintios 10:6-11). Ya Biblia kʼoatso nga jenichxin fetʼa tiyoaa ndʼaibi kʼoa nga jeme kjoetʼa jmeni xi chon sonʼnde. Jetochoatsesa chale nga ya kuiyoaa ya sonʼnde chjotse (2 Timoteo 3:1; 2 Pedro 3:13). Tonga tjíokʼa je choʼndale Jeobá xi tsín tjíosítjoson kʼoa kjoachajngi tjíotsaojin. Kʼoa sʼani tjíobe jmeni xi kjima nga kʼoasʼin jée tsakajngile yaole. Kʼiatsa tsín kʼoakoa̱nnile jmeni xi kisʼin, tochale likui kjoaʼasʼen je sonʼnde jñani koa̱n kuiyoaa ngantsjai nichxin.

3. Ánni nga machjénsínile xi jechixan nga Jeobá katabasenkao nga tsín kjoa ska̱jin kjoabixanle. (Chótsenlai sén xi fitsʼiani kjoaʼmiya jebi.)

 ³ Je chjotale Cristo xi jechixan machjénní nga Jeobá koasenkao nga tsín kjoa ska̱jin kjoabixanle. Ánni. Kuinga ñaki to kjoachajngi síkjaʼaitsjen ndʼaibi je chjota (tʼexkiai Salmo 127:1). * Kjoaʼmiya jebi nkjín koya koakoyaná jmeni xi kuinyakao. Je xʼin kʼoa kao je chjoón tjínnele nga sikuinda jmeni xi símekon, nga miyole Niná katama, nga kʼoakatamakjoan josʼin mele Niná, nga kao kjoaxkóntokon kjoakao xínkjín, nga nda katabʼé kon xínkjín kʼoa nga katasíñakon xínkjín.

4. Jñá nroani kʼianga kjoachajngi tsaojin kʼani je chjotale Cristo.

⁴ Jñá nroani nga kʼoasʼin kjoachajngi tsaojin kʼani je chjotale Cristo. Yaa nroani nga kui kotsenle jmeni xi tsín tjínnele. Je Jesús i kitso: “Toʼyanibe xi kotsenle jngo chjoón nga maxkaile, jekisichajngi jajin ni̱ma̱le kao je” (Mateo 5:27, 28; 2 Pedro 2:14). Je xi kjoachajngi tsaojin kuinga pornografía kotsenle, nga kui bʼéxkia xo̱n xi kjoachajngi faʼaitʼa kʼoa nga ya faʼasʼen ya Internet jñani kjoachajngi faʼaitʼa. Kʼoati tjíokʼa xi kui kotsenle je pelíkula kʼoa kao programa xi faʼa ya telebisión jñani tokjoachajngi sʼín chjota kʼoa kʼoati fikotsenle obras de teatro jñani kui faʼa. Kʼoa saʼnda tjínkʼa xi ya fi jñani club nocturno ʼmi, ya ʼnde jñani tofayojti je xi xʼin kao yánchjín kʼianga te, kʼoa tsa maije̱ ya fi ya jñani masaje bʼaile jñani to kjoachajngi símekon.

5. Ánni nga si̱kuindasíñá je ni̱ma̱ná.

⁵ Tjíokʼa xi kjoachajngi tsaojin xi totʼatsʼe nga je nʼio sínʼiotʼa jngo chjota xi tsín chjoónle kʼoa xi tsín xʼinle mani. Je chjotasonʼnde nʼio tsjoake nga xájndí sʼín kʼoa alikui bʼéchjoale yaole. Xi ijngosani, chjotajéeñá ngatsʼiaa kʼoa koaanle kʼoanachaná je ni̱ma̱ná. Kʼiatsa tsín si̱kuindaa je yaoná, tochale tobijbi je koa̱ntsjoachaa jngo chjota xi tsín chjoónná kʼoa xi tsín xʼinná mani (tʼexkiai Jeremías 17:9, 10). * Je Jesús kʼoakitso kʼianga ya ni̱ma̱ná nroajinni je xi chʼaotjín, tsa si̱kʼieen kʼoa tsa si̱chajngiaa (Mateo 15:19).

6, 7. 1) Jméni xi ma kʼiatsa kui xi chʼaotjín tíjnajin ni̱ma̱ná. 2) Jósʼin tjínnele koatechjoale yaole xi jechixan nga tsín kjoachajngi jtsaojin.

⁶ Kʼianga jao chjota xi nda sasénle xínkjín, ngisa choa ñʼai tíjna nga kui simekon xi chʼaotjín ya jinni̱ma̱le. Tsakui nichxin kui kjoakaoni xínkjín jmeni xi toje tjínnele kʼoakuitsole tsa chjoónle kʼoa tsa xʼinle. Tsakui nichxin totjín totjen kjoa koasjaini xínkjín kʼoa toxá ya ndiaa koaini jñani faʼa xi ijngo tojoni nga ya tsaojin xínkjín. Nga kʼoasʼín, tobijbi sa matsjoake sa matsjoake xínkjín. Sa ñʼai sa ñʼai male nga síkjinle xínkjín. Kʼoa nga jenʼio tsjoake xínkjín alikui tikʼoamanile nga tsjiontʼa xínkjín. Be nga chʼao tjíosʼín tonga likui tikʼoamanile nga síkatío xínkjín (Proverbios 7:21, 22).

⁷ Tochan síchajin jmeni xi tso je kjoatéxomale Jeobá. Kʼianga kui tjíosíkjaʼaitsjen xi chʼaotjín kʼoa josʼin fáonajmí tochan tsoa ntsja xínkjín, bʼéndsoʼa xínkjín, tsoakjá xínkjín kʼoa kajon yaole xínkjín. Je xi koa̱n kʼoasikao tojéní je chjoónle kʼoa tsa xʼinle. Jeche̱n tjíotsaoya nga kʼoatjíosʼín. Xijema, kʼianga tsín tichókjoakaonile jmeni xi tjíosímekon tochan síchajngi (Santiago 1:14, 15). Koanni tsakʼéchjoale tsakai yaole nga tsínkui jée kitsaojin. Koanni kitsjoaʼnde tsakai nga je Jeobá tsakinyakao nga tsabexkón je kjoabixanle. Kataʼyala jósʼin jchaxkoán je kjoabixan.

8. Jósʼin basenkao xi jechixan kʼianga miyole Niná ma nga tsín kjoa tsaojin.

⁸ (Tʼexkiai Salmo 97:10.) * Kʼianga miyole  Niná ma xi jechixan, nʼio ñʼai tjínle nga kjoachajngi tsaojin. Ánni. Kʼianga sa be sa be je Jeobá kʼoa jokjoan ngisa bʼénele yaole nga kjenngile kʼoa nga tsjoake ma xínkjín. Kui xi tsjoánganʼiole nga tsínkui simekon xi chʼaotjín kʼoa nga tsín kjoachajngi tsaojin (Efesios 5:1-4). Xi ijngosani, be kʼianga kjoañʼai tsjoále Niná je chjotachajngi kʼoa kao chjota xi xájndí sʼín (Hebreos 13:4). Kuinga bʼénesínile yaole nga jao nga kixi fitʼale xínkjín.

9. 1) Jmé xi tsakasenkao José nga kixi koan. 2) Jméni xi bakóyaná je choa̱le José.

⁹ Tjínkʼa chjotale Cristo xi faʼatone kjoatéxomale Niná kʼianga je símiyo chjota xi ñatjen síxá, xi tsín testigole Jeobá ma. Kʼoa tjínkʼa xi ya tsaojin kjoa ya tʼaxále. Jngo ti xi José tsakʼin xi kʼoakoantʼain. Je chjoónle naile jé José koantsjoake. Chjoón jebi ñaki nyaon nyaon si kisikao. Kʼoa chan kichoka nichxin nga kiskenʼndó José kʼoa kitsole: “Sojnakaonái”. Tonga alikui koanjyole José, tosa tokitoka. Jméni xi tsakasenkao nga kixi koan. Kuinga tsín mele sicha je kjoamiyo xi kisʼele kao Jeobá. Kʼianga kixi koan José, kitjoʼale xále kʼoa ndoyá kichani. Tonga nga kichoka nichxin, je Jeobá kisichikontʼain (Génesis 39: 1-12; 41:38-43). Jméni xi bakóyaná je choa̱le. Tojñani nga tiyoaa, a yaa tʼaxáná axo xinní, kʼoéchjoalee yaoná je kjoa xi jée ska̱nijinná.

10. Je xi kʼoakjoan josʼin mele Niná, jósʼin binyakao nga tsín kjoachajngi tsaojin.

¹⁰ Ya Biblia kui nchja̱ni jngo ni̱ma̱ xi chjotse, xi tsonile jngo chjota xi kʼoakjoan josʼin mele Niná. Je chjotale Cristo xi kʼoakjoan ñaki kixiní joni tsa Jeobá. Kʼianga kʼoakjoan xi jechixan, alikui kjoachajngi tsaojin (Efesios 4:24). Kʼiatsa kʼoakoa̱nkjoan josʼin mele Niná koaanle skoéxkó je yaole kʼoa alikui kui simekon xi chʼaotjín kʼoa alikui jée ska̱jin (tʼexkiai Colosenses 3:5, 6). Kʼianga koa̱nle skoéxkó yaole machjénní nga kʼoenele yaole nga tsínkui simekon xi kjoachajngi tjenkao. Kʼoati kʼoechjoale yaole nga tsínkui kʼoasʼin je xi kui ska̱nijin kjoa jebi (Job 31:1). Kʼianga sítjoson je kjoatéxomale Jeobá, jtike ma xi chʼaotjín kʼoa bʼénele yaole nga kui kʼoasʼín xi ndatjín (Romanos 12:2, 9).

11. Ánni nga ngisa nʼio sʼejnasíni kjoabixanle je xi Jeobá kjenngile.

¹¹ Kʼiatsa je xi jechixan xi mele kʼoakoa̱nkjoan josʼin mele Jeobá tjínnele nga je skénngile (Colosenses 3:10). Tobʼelañá, je Jeobá tjínle kjoamatokon, kjoanda, kjoanangitokon, kjoandʼétokon kao kjoatsejta. Kʼiatsa kʼoatisʼin je chjoón kao je xʼin, je kjoabixanle nʼio sʼe̱jna kʼoa jé Jeobá sichikontʼain (Colosenses 3:12). Kʼoa tsa tsjoáʼndele yaole nga sʼe̱le je kjoanyʼánle Cristo nda satío kon kʼoa nyʼán koatiokao xínkjín (Colosenses 3:15, TNM). Kʼoa tsa tsjoake xínkjín kʼoenele yaole nga sisinle xínkjín kʼoa nga skoe̱xkón xínkjín (Romanos 12:10).

12. Jméni xi machjén nga nda koatio xi jechixan, jósi ngái ji.

¹² Jao xíngiaa xi jechixan kʼoakitso jmeni xi tsakinyakao nga ñaki nda sʼin tsakatiokao xínkjín nga jechixan. Je xi xʼin ma kʼoakitso nga je kjoatsjoacha xi ngisa nʼio chjíle kʼoa nga nʼio bʼénele yaole nga bakóle xínkjín. Kʼoati kitso nga machjén kjoandʼé. Je chjoónle kʼoatisʼin síkjaʼaitsjen. Kʼoatso nga nʼio chjíle nga sʼená kjoanda. Kʼoa kʼoatso nga nʼio bʼénele yaole nga jao nga nangitokon ma ninga sakʼoa ñʼai male.

13. 1) Jméni xi machjén nga nʼio sʼe̱jna je kjoabixan. 2) Ánni nga nʼio machjénsíni.

¹³ Kʼianga nʼio sʼe̱jna kjoabixanle xi jechixan machjénní nga énndʼé kjoakao xínkjín kʼoa nga énsin énnda kjoakao xínkjín (Efesios 4:32). Tonga nʼio nkjín xi tsín kʼoasʼín, kʼoa alikui nda bʼejna kjoabixanle. Tjín chjota xi ngisa naskásʼin fákao chjota xi tsín bexkon kʼoa kao cho̱ xi tjíole tikʼoajin tsa chjoónle kʼoa tsa xʼinle. Kʼiatsa éntsʼen sichjén, tsa kuinchja̱ti, tsa skíʼndáxá kʼoa tsa én ai kjoakao xínkjín alikui nda koatiokao xínkjín (Efesios 4:31). Tsa sikʼaxki̱ xínkjín kʼoa tsa jme xi kuitsole kʼoati síkiʼaon kjoafaʼaitsjenle.

14. Jméni xi tsín koa̱n kʼoasʼin xi jechixan.

¹⁴ Kʼianga ñaki nda koatio xi jechixan, machjénní nga kjoakaonajmí xínkjín. Kʼianga kʼoatso je Biblia nga tjín “nichxin nga jyó biyoaa”, ali tsakuijin xi tsonile, nga tsín tikuinókjoakaoñá xíngiaa (Eclesiastés 3:7). Jngo tichjaa xi jechixan, xi Alemania tsʼe, kʼoatso nga machjén nga chobanajmiá kʼiatsa jme kjoa tjín. Kʼoatsokixi nga sakʼoa ñʼai maná nga tsín nijtilee yaoná, tonga tsa jngo xi tsín tikuinchja̱ni, nikiʼaonñá xíngiaa. Kʼoa tsa tsín skósonnile jokuitsole xínkjín kʼoa josʼin tongisa koa̱ntsesa je kjoa. Kʼiatsa je chjoón kao je xʼin likui kjimangóson jmeni xi tjíofáoni, alikui koa̱n skíʼndáxákao xínkjín kʼoa tsa tsín tikjoakaoni xínkjín. Bʼénele yaole nga kjitʼanangi bʼéndajin kʼianga tsín kjoa katabichómani.

15. Kʼianga nʼio kʼoéjna je kjoabixan, jméni xi sʼin je chjoón kao je xʼin.

¹⁵ Kʼianga nʼiosa sʼe̱jna je kjoabixan, je chjoón kao je xʼin tjínnele nga kʼoakuitsole xínkjín josʼin síkjaʼaitsjen kʼoa jotjío kon. Nʼio chjíle jotsole xínkjín, tonga kʼoati nʼio chjíle josʼin fákao xínkjín. Kʼoa ninga kjoa tjíojin machjénní nga nda skósonnile jotso én xi kuinchja̱. Machjénní nga énndʼé kjoakao xínkjín kʼoa nga skoe̱xkón xínkjín. Tsa kʼoasʼin, ngisa kjuinrʼoéle xínkjín (tʼexkiai Colosenses 4:6). Kʼoati machjén nga kui én sichjén xi tsjoánganʼiole xi ijngo (Efesios 4:29).

16, 17. Ánni nga machjénsíni kʼianga je chjoón kao je xʼin nga katabe jmeni xi nda satíoni kon nga jngó jngó kʼoa nga siñakon xínkjín.

¹⁶ Kʼianga nʼiosa sʼe̱jna je kjoabixan, je chjoón kao je xʼin kʼoati machjén nga skoe̱ jmeni xi nda  satíoni kon xínkjín kʼoa nga siñakon xínkjín (tʼexkiai 1 Corintios 7:3, 4). Kuinga machjénsíni nga jekjoanla títjon katasíkjaʼaitsjen tsa chjoónle kʼoa tsa xʼinle (Filipenses 2:3, 4).

¹⁷ Tsakui nichxin, jngo xi tsín bakó kjoatsjoacha kʼoa tsa maije̱ kaile nga kjoáyokao xínkjín. Tjínkʼa xʼin xi kʼoasʼin síkjaʼaitsjen nga tsín xʼin tsa tjao koa̱nle je chjoónle. Tonga ya Biblia kʼoatsole je xi xʼin ma nga katamajinle jotjín kon je chjoónle (1 Pedro 3:7). Xi ijngosani, je xʼin tjínnele nga katamachoyale nga tsín tsa tokui xi machjénle je chjoónle nga koájnakao. Tjínnele nga tjao katamale jokji tse nga ya tíjnakao. Tsa kʼoasʼin ngisa tsjoa sʼe̱le je chjoón nga kjoáyokao xínkjín. Kʼiatsa koakole kjoatsjoacha xínkjín ngisa choa ñʼai koa̱nle nga tsjoále xínkjín jmeni xi machjénle nga nda satío kon kʼoa nga siñakon xínkjín.

18. Jméni xi sʼin xi jechixan kʼiatsa mele nga nʼio sʼe̱jna kjoabixanle.

¹⁸ Ali anni nga xínkjín kʼoanachanile xi jechixan. Tonga kʼianga jngo xi kʼoasʼín, tsakui nichxin likui tsakakóle kjoatsjoacha xi machjénle xi ijngo (Proverbios 5:18; Eclesiastés 9:9). Je Biblia kʼoatso nga katafayokao xínkjín xi jechixan kʼoa nga tokʼia tsín jme xi katasʼín tsa toxá kafáoyani nga jao. Tonga nga tsín nʼio tse nichxin katafaʼato. Ánni. Kuinga tsín je Na̱i kʼoanachale tsa tsín koa̱nle skoéxkó je yaole (1 Corintios 7:5). Nʼiojin chʼao koa̱n kʼiatsa je Na̱i kʼoanachale kʼoa kjoachajngi sʼin. Kʼianga je chjoón kao je xʼin tsjoále xínkjín jmeni xi machjénle kʼoa síñakon xínkjín, bakóní nga mandosinle jmeni xi machjénle xi ijngo kʼoa nga tsín to yaole fini. Kuinga kʼoasʼínni nga tsjoake xínkjín, ali tsakuijin nga tjínnele kʼoasʼin. Kʼiatsa mele nga nʼio sʼe̱jna kjoabixanle, machjénní nga koakole kjoatsjoacha xínkjín kʼoa nga katafayokao xínkjín (1 Corintios 10:24).

19. 1) Kʼianga nʼiosa sʼe̱jna je kjoabixan, jméni xi sʼiaan. 2) Ánni nga nʼio machjénsíni.

¹⁹ Kʼianga nʼiosa sʼe̱jna je kjoabixanle, je chjoón kao je xʼin ñaki kʼoakatabatío kon nga kixi koa̱nle Jeobá kʼoa kao xínkjín (Mateo 19:5, 6). Nʼiojin chʼaosʼin kuichomani kʼiatsa jngo xi sichajngi nga tochoasa chale nga kuitjásʼeen je ʼNdenaxó. Kʼianga jesíkʼaxki̱ je chjota israelita xi kanño jmi mani xi kʼoasʼin kisichajngi kao je yánchjín xi Moab tsʼe, je Biblia itso: “Je xi síkjaʼaitsjen nga nʼio kixi tíjna, katasíkuinda yaole nga tsín ska̱” (1 Corintios 10:12). Nichxin xi tiyoaa ndʼaibi, ngisa nʼio machjén nga kʼoénelee yaoná nga tsje sʼin kuiyoaa kʼoa nga nyʼán kuiyoaa (2 Pedro 3:13, 14).