Nʼiojin nda koatio je chjotasonʼnde kʼiatsa kʼoakoa̱n. Nichxin xi tiyoaa ndʼaibi, nʼio nkjín chjota xi kjoañʼai tjíofaʼá kʼianga ma̱ tjío, kʼoa tojngo jao mani xi nʼio nyiná. Jngo chjotaxá xi be jmeni xi machjénle je chjotale tsjoájinle jmeni xi machjénle. Jósi ngái ji, a koaanle je chjota nga kʼoasʼin koatexoma. (Tʼexkiai Jeremías 10:23.)

Jokji nga tífaʼato nó, je chjotaxá alikuini kʼoasʼín jme xi koyale chjota, kʼoa je xi ngisa tjíobʼetʼale kjoa jebi je xi ma̱ tjío. Tjínkʼa chjotaxá xi to taon be je chjota (Eclesiastés 4:1; 8:9). Tonga je Niná xi nʼio tse nganʼio tjínle kʼoakitso nga jngo chjotaxá kʼoéjnayangajaole ngatsʼi je chjotaxá xi tjín kʼoa jé tsakasénnda je chjotaxá xi koa̱nle sikuinda je chjota. (Tʼexkiai Isaías 11:4 kao Daniel 2:44.)

Je xi kiskoejin Jeobá nga koatexoma jé Jesucristo, je ʼNdíle. Je Jesucristo ñaki nda koatexoma (Lucas 1:31-33). Kʼianga tsakʼejna i̱ Sonʼnde je Jesús nʼio koankjaojinle je chjota. Ndʼaibi nga je Rey sʼin tíjna, sikatíojtín ngatsʼi je chjotale naxinandá kʼoa kjoaʼaxin ngayeje kjoañʼai. (Tʼexkiai Salmo 72:8, 12-14.)

A sasénle ngatsʼi chjota nga je Jesús koatexomale. Mai. Tonga je Jeobá nʼio tsejta (2 Pedro 3:9). Kʼoa kuinga títsjoáʼndenile je chjota nga katasíkʼantjaiya yaole. Jemachrianle nga kjoaʼaxin chjotatsʼen je Jesús kʼoa kjoanyʼán kjoaʼaíkao i̱ Sonʼnde kʼoa tsín tijme kjoajkon sʼe̱ni. (Tʼexkiai Miqueas 4:3, 4.)