XI NGISA TÍNCHJA̱NI REBISTA JEBI: A TSJOACHANÍ JE XÁ XI NʼIAI
A jejaʼato nichxin nga nʼio kisixá chjota
Je Alex ñaki faʼátsele nga tíkjomi ijngo kaxa̱ kʼianga tísíkʼasʼen je karro xi fikao chʼále chjota, kʼoa itso: “Alikuijin kʼia nda koatejna nga kui xá jebi sʼian. A kuicho nichxin nga nda koatejna. Tongisala nda koatejna tsa tsín kʼoasikji nʼio sixá”.
Ali tsa tojejin Alex xi tsín tsjoake nga xáʼai sʼín. Jngo chjota xi mecánico síxá, xi Aaron ʼmi, itso: “Me ngatsʼi chjota nga kʼoasʼin síkjaʼaitsjen nga kjoasoa tjenkao nga kui xá nʼia xi nʼio nangi tíjna. Kʼoatso nga to ndʼai nga kui xá tjíosʼín kʼoa nga jngo xá xi nda tjíokoyale”.
Nʼio nkjín chjota xi kʼoatso nga tsín tjínnele nga xáʼai sʼin. Ánni. Tsakui nichxin kuinga tokui fitjenngi jmeni xi tso telebisión, radio kao Internet, nga kʼia nda kuiyoaa tsa nʼio síxkón kjoan tsojmi sʼe̱ná kʼoa lijme xi si̱kjaojiaan. Itso jngo chjota xi Matthew ʼmi xi mantenimiento síxá: “Je chjota kʼoasʼin síkjaʼaitsjen nga kuinga nʼio síxáni nga tsín male kʼoasʼín xá xi ngisa nda”. Kʼoa jngo xi conserje síxá, xi Shane ʼmi, kʼoati tso tsanda je. Itso: “Je chjota mele kʼoatjín kuinjele jotjín njele ngasʼa tonga kui xi mele nga tochoa sixá”.
Tonga kʼoati nʼio nkjín chjota xi tsjoake nga nʼio síxá. Je Daniel xi kan aon nóle, xi chjinexjáo síxá, itso: “Tsjoa sʼená kʼianga ʼyaa jme kjoanda xi tjenkao je xá xi tinʼia”. Kʼoa je Andre, xi kanjan nóle, kʼoati i̱ tso: “ʼBeña nga tokʼia nda sʼe tokoán kʼoa tsjoa sʼená kʼianga nixá. Tsa tochoa si̱xá alikuijin tsjoa sʼe̱ná, tokoa̱ntsʼeñá”.
Ánni nga tsjoa tjíosíni kon je Daniel kao Andre ninga nʼio síxá. Kuinga tjíofitjenngi je kjoafaʼaitsjen xi tsjoá je Biblia. Je Biblia kʼoatsoná nga kʼoénelee yaoná kʼoa nga tsín katamatsʼekoaa je xáná. Tonga kʼoati bakóyaná josʼin tsjoa kʼoé tokoán kʼianga nixá.
Jmé kjoafaʼaitsjen xi faʼaitʼa ya Biblia xi koasenkaoná nga tsjoa sʼe̱ná kʼianga si̱xá. Kataʼyala kʼaa kjoafaʼaitsjen jebi ya kjoaʼmiya xi fisani.