Je kjoabiyale Jesús kui xi ngisasa tjínle kjoandosin nga̱ tokʼoasʼin nga tjoé ijngokʼanile chjota jmeni xi kisicha. Je chjota alikui kʼoasʼin koannda nga kui xi chʼaotjín kʼoasʼin, nga tjóchʼinle kʼoa nga kuiyá (Génesis 1:31). Tonga totʼatsʼe Adán, je chjota xi títjon koannda, nga jée jaʼasʼenni i̱ Sonʼnde. Kʼoa je Jesús kitsjoa kjoabijnachonle kʼianga ndaí kuiyolee je jée kao kjoabiya. (Tʼexkiai Mateo 20:28 kao Romanos 6:23.)

Nʼio tse kjoatsjoacha tsakakó je Niná nga kʼoasʼin kisikasén ʼNdíle i̱ Sonʼnde nga kʼienntjainá (1 Juan 4:9, 10). Je Jesús kʼoakitsole je chjotale nga jngo kjoabichi katabʼéjna kʼianga katasíkjaʼaitsjenya kjoabiyale kʼoa nga nioxtila kao bino katasíchjén. Kʼianga xki̱ nó nikjaʼaitsjenyá kjoabiya jebi bakoñá nga bʼailee kjoanda je Niná kʼoa kao ʼNdíle nga kʼoasikji kjoatsjoacha tsakakóná. (Tʼexkiai Lucas 22:19, 20.)

Kʼianga kʼoakitsole Jesús je chjotale nga katasíkjaʼaitsjenya kjoabiyale kʼoakitsole nga jngo kjoa kʼoendajin kao je (Mateo 26:26-28). Je kjoa xi tsakʼéndajin kui xi kiskoxʼáʼndele chjotale kʼoa kao chjota xi kjaʼaí nga rey kʼoa naʼmi sʼin koatio ya ngʼajmi. Miyón mani chjota xi sikjaʼaitsjenya kjoabiyale Jesús, tonga tojé xi ya koai ngʼajmi xi koakje̱n nioxtila kʼoa skʼuí je bino. (Tʼexkiai Apocalipsis 5:10.)

Jeme jao jmi nó tjínle nga tíkjoejin Jeobá je chjota xi rey sʼin koatio ya ngʼajmi (Lucas 12:32). Chjota jebi tochoa mani, alikui mangóson jotjín mani je chjotankjín xi i̱ koatio ngantsjai nichxin i̱ Sonʼnde. (Tʼexkiai Apocalipsis 7:4, 9, 17.)