1, 2. 1) Jméni xi kitso je Jesús tʼatsʼe nichxin xi totífikjetʼa. 2) Jméni xi chótʼayá i̱ kjoaʼmiya jebi.

KʼIANGA ya tíjna Jesús ya nindo xi Olivos ʼmi kʼoa tíkotsenle je yo̱ngo̱ xi tíjna ya Jerusalén, yaa tjíokao xi ño pastrole xi Pedro, Andrés, Santiago kʼoa Juan tsakʼin. Kʼoakitsole jmeni xi koa̱n je nichxin xi totífikjetʼa, kʼianga je Rey sʼin kʼoéjna. Je Jesús kʼoakitsole nga jngo “choʼnda xi nʼiotʼakon, xi nda be xá” kʼoéjnayangajaole i̱ Sonʼnde. Choʼnda jebi jé tsjoále kjoankjíntokon xi tsʼe Niná je chjotale Cristo kʼianga koa̱nchjénle (Mateo 24:45-47).

² Xijekoan, je Jesús jngo kjoa tsakʼéyanajmíle xi tʼatsʼe te yánchjínxo̱ngó (tʼexkiai Mateo 25:1-13). Kui jchaa i̱ kjoaʼmiya jebi. Jan koya tjínni xi jchaa. Xi títjon, jméni xi koanmele Jesús nga katamajinná. Xi majaoni, jósʼin tjíosítjoson choa̱ jebi je chjotale Cristo xi ya koai ngʼajmi. Kʼoa jósʼin kuichomani xi kao je. Xi majanni, jósʼin koasenkaoná tsanda ñá ndʼaibi nga jngó jngoá.

3. Nichxin kjoatse, jósʼin kitsoya je xo̱n xi nichjén xi tsʼe te yánchjínxo̱ngó kʼoa jósʼin kichotsjoá.

³ Ya kjoaʼmiya xi jaʼato kuiná tsaʼyaa josʼin títsoya “je choʼnda xi nʼiotʼakon, xi nda be xá” jmeni xi bʼéyanajmí je Biblia. Ngasʼa kui nʼio kʼoakitso jmeni xi tsoyanile, tonga ndʼaibi jetokui kʼoatso jmeni xi bakóyaná. Tobʼelañá, je choa̱ xi tsʼe te yánchjínxo̱ngó. Nichxin kjoatse, je xo̱n xi nichjén kui kʼoakitso jmeni tsoyanile je lʼí, je siti̱ kao je cho̱tsínsiti̱. Tonga kʼianga kui nʼio kuenta nʼia xi tʼatsʼe jebi tosani to chajin jmeni xi ngisa chjíle nga kataʼyaa. Kʼoa i̱ kjoaʼmiya jebi kui jchaa jmeni xi bakóyaná.

4. 1) ʼYáni chjota xi kuixan, kʼoa jósʼin ʼyañá. 2) ʼYáni je yánchjínxo̱ngó, kʼoa jósʼin ʼyañá.

⁴ Kʼianga jchaa jmeni xi koanmele Jesús nga katamajinná, kuikjoanla títjon kataʼyaa ʼyáni xi tsoyanile je chjota xi síkʼaxki̱ je choa̱ xi tsakʼéjna. ʼYáni je chjota xi kuixan. Jéní Jesús. Jósʼin ʼyañá. Ñandia nga tije Jesús kui kisingósonkaoni yaole jngo chjota xi kuixan (Lucas 5:34, 35). Kʼoa ʼyáni je yánchjínxo̱ngó. Jéní barré “xi tochoa mani”, xi tsonile, je chjotale Cristo xi ya koai ngʼajmi. Jósʼin ʼyañá. Ñandia kʼianga kʼoakitso je Jesús kʼianga je chjotale xi ya koai ngʼajmi kui mangóson je choʼnda xi tjíotile je lʼíle kʼianga tjíokoyale je naile nga jngo kjoabixan faʼaini (Lucas 12:32, 35, 36). Kʼoa choa̱ jebi kʼoati kui síkjaʼaitsjenjinná jmeni xi tjínnele sʼin je xi te yánchjínxo̱ngó. Tjínnele nga tjíotile je lʼíle nga kjoaʼaí je xʼin xi kuixan. Kʼoa je pastro Pablo kao Juan kʼoati yánchjínxo̱ngó kisingósonkao je chjotale Cristo xi ya koai ngʼajmi (2 Corintios 11:2; Apocalipsis 14:4). Jebi kui xi bakóná nga je xokitsole Jesús je chjotale xi ya koai ngʼajmi kʼianga tsakʼéjna choa̱ xi tsʼe te yánchjínxo̱ngó.

5. 1) Kʼiáni bitjoson je choa̱ xi tsʼe te yánchjínxo̱ngó. 2) Jósʼin ʼyañá.

⁵ Kʼiáni kuitjoson je choa̱ xi tsʼe te yánchjínxo̱ngó. Kʼiaa nga tífikjetʼa je nichxin. Kʼoa kʼiáni kuitjoson je én xi kisikjetʼani Jesús nga “jaʼai” je chjota xi kuixan kitso (Mateo 25:10). Je Xo̱n xi Bájinkonná xi tsʼe 1 sá julio nó 2013 kui tsakakóyaná nga jin kʼa síkʼaxki ya Mateo 24 kao 25 je én xi kjoaʼaí tso. Kʼoati kitsoyaná nga kʼia kjoaʼaí Jesús nga jetíbichókjetʼa je kjoañʼai xi nʼio tse kʼianga kjoaʼaísíjtsoʼa chjota kʼoa sikjeson jmeni xi chon sonʼnde. Kʼoa kui kʼoabixónsíñá nga je choa̱ xi tsʼe te yánchjínxo̱ngó kʼia bitjoson je nichxin xi totífikjetʼa kʼoa kʼiaa kjoaʼaí Jesús nga tísʼéjna kjoañʼai xi nʼio tse.

6. Jméni xi tsakakóyaná Jesús nga tsakʼéjna choa̱ jebi.

⁶ Jméni xi koanmele Jesús nga katamajinná tʼatsʼe choa̱ jebi. Kʼianga jchaa, kuila chótʼajiaan jmeni xi tso bersíkulo xi ngikʼa. Ya kapítulo 24 xi tsʼe Mateo, je Jesús jngo “choʼnda xi nʼiotʼakon, xi nda be xá” kinchja̱ni. Choʼnda jebi jngo jtín mani kʼoa jé tjíobándiaale je chjotale Cristo nichxin fetʼa xi tiyoaa ndʼaibi. Je Jesús kʼoakitsole je jtín jebi nga ñaki kixi katama. Kʼianga tsakʼéyanajmí je choa̱ xi tsʼe te yánchjínxo̱ngó, kui xi koanmele nga kʼoati kixi katama ngatsʼi chjotale xi ya koai ngʼajmi, xi koatio nichxin fikjetʼa. Kʼoa jméni xi koanmele nga katamachoyale. Kuinga tjenyatokon koatio ngatsʼi kʼiatsa tsín mele sicha je kjoanda xi tjínle nga ya ngʼajmi koai (Mateo 25:13). Jósʼin tjíosíchjén choa̱ jebi je chjotale Cristo xi ya koai ngʼajmi. Kataʼyala.

7, 8. 1) Ánni nga tjíondasíni je yánchjínxo̱ngó xi isenkon. 2) Jósʼin tjíobationda je xi ya ngʼajmi koai.

⁷ Kʼianga tsakʼéjna choa̱ je Jesús kʼoakitso nga aon mani yánchjínxo̱ngó xi “chi̱kón”, xi tsonile, nga chini. Kuinga kʼoakitsonile nga tsín tjíonda kʼianga jaʼai je chjota xi kuixan. Kʼoa je xi ngi aon kʼoakitso nga “isenkon”, xi tsonile, nga be jokisʼin. Kuinga kʼoakitsonile nga jetjíonda nga jaʼai chjota xi kuixan. Tongini jetsakationda kʼoa tjenyatokon jetjío. Nga te je yánchjínxo̱ngó tjínnele nga tjíonda tsakai kʼoa nga tjíotile je lʼíle nga nitje̱n. Je yánchjínxo̱ngó xi isenkon yʼatʼaxinsa siti̱ xi koanchjénle tonga je xi ngikʼa alikui tjennda. Kʼoa jósʼin tjen tjíobationda je chjotale Cristo xi kixi kjima, xi ya koai ngʼajmi, kʼianga kjoaʼaí je Jesús.

⁸ Je xi ya koai ngʼajmi ñaki tjíonda nga kui kʼoasʼin jmeni xi títsole je Jeobá saʼnda nga kjoetʼa nichxin. Jméni xi tjíosʼín. Xi títjon, bení nga tsínkui koaitjenngi jmeni xi tjín sonʼnde kʼianga Jeobá tjíosíxále, kʼoa kao kjoatsjoa sítjoson. Xi majaoni, ñaki kʼoatjío kon nga kixi koaitʼale je Jeobá ninga tsín be kʼiani kuichokjetʼa xi chon sonʼnde, nga̱ tsjoakení je Jeobá kao Jesús. Kʼoa xi majanni, alikui tao̱n fitjenngi, alikui kjoajndí fitjenngi kʼoa alikui to yaole fini josʼín chjotasonʼnde. Jé mangóson je yánchjínxo̱ngó xi isenkon, xi tjenyatokon tsakatio nga tjíotile je lʼíle. Kʼoati tjíonda kʼoa tsejta kjima nga tjíokoyale je chjota xi kuixan, ninga kjibʼachxinle koa̱nle (Filipenses 2:15).

9. 1) Jméni xi tongini tíbájinkon Jesús je chjotale xi ya koai ngʼajmi. 2) Jméni xi tjíosʼín je xi ya koai ngʼajmi kʼianga i̱ tso én xi tjíonrʼoé: “Koeni je xʼin nroa”. (Chótsenlai nota.)

⁹ Je yánchjínxo̱ngó xi isenkon nʼio tjenyatokon tsakatio. Tonga ánni kʼoakitsosíni Jesús nga tsakjayofe ngatsʼi kʼianga tsabe nga tíbʼachxinle je chjota xi kuixan. Kui kʼoakitsoni nga tsín katasíchangale yaole je xi ya koai ngʼajmi kʼianga tjíokoya nga kjoaʼaí je Jesús. Je Jesús bení nga kʼoati jchangale jngo xi tjenyatokon tíjna tsa tsín sikuinda yaole. Kuinga je chjotale Cristo xi ya koai ngʼajmi xi kixi kjima nʼio tjíobʼénesínile yaole nga tjenyatokon tjíobatio. Jméni xi tjíosʼín. Je Jesús kʼoakitso nga i̱ tso én xi kinrʼoéle je yánchjínxo̱ngó: “Koeni je xʼin nroa”. Kinrʼoé ngatsʼi tonga toje xi aon xi tjenyatokon tsakatio (Mateo 25:5, 6; 26:41). Je xi ya koai ngʼajmi jeʼi̱ tso én xi tjíonrʼoé nichxin fetʼa xi tiyoaa ndʼaibi: “Koeni je xʼin nroa”. Kʼoa jótjíosʼín. Tjíobení je choa̱ xi tjín nga jeme kjoaʼaí je Jesús kʼoa jetjíonda. * (Tʼexkiai nota.) Kataʼyala josʼin bichókjetʼa kjoa jebi kʼoa kuentala sʼiaan jmeni xi ma nga kui nichxin.

10. Jméni xi tsakui nichxin kuixoán tʼatsʼe kjoachobanajmí xi kisʼele je yánchjínxo̱ngó xi chini kao xi isenkon.

¹⁰ Títjon kjoanla fáonajmí je yánchjínxo̱ngó xi chini kao xi isenkon kʼianga tojeme  kjoaʼaí je chjota xi kuixan. Je xi chini kʼoakitsole je xi isenkon nga katatsjoále siti̱ xi kʼoetʼaʼíni je lʼíle. Tonga je xi isenkon alikui kitsjoale (tʼexkiai Mateo 25:8, 9). Tsakui nichxin kʼoakoa̱n kʼianga tojeme kjoaʼaí Jesús, kʼianga toje tífikjetʼa je kjoañʼai xi nʼio tse. Kʼoa tsakui nichxin i̱ kuixoán: “Ánni nga tsín kuinyakaosíni xi kjaʼaí je xi kixi koa̱n xi ya ngʼajmi koai”. Kʼianga jchaa xi tʼatsʼe jebi, machjénní nga kuenta sʼiaan kʼianga toje katasʼechoa̱ xi ya koai ngʼajmi nga kui nichxin.

11. 1) Jméni xi koa̱n nga tojeme koaitsʼia je kjoañʼai xi nʼio tse. 2) Jókitsonile je yánchjínxo̱ngó xi isenkon kʼianga kʼoakitsole je xi chini nga katafikatse je siti̱.

¹¹ Kʼianga kjesa fitsʼiajin je kjoañʼai xi nʼio tse, ngatsʼi je xi ya koai ngʼajmi, je xi kixi koa̱n, tokʼoa jekasʼechoa̱ (Apocalipsis 7:1-4). Kui xi tsonile nga ñaki jeya koai ya ngʼajmi. Tonga jméni xi koa̱nle je xi tsín tjenyatokon koatio kʼoa tsín kixi koa̱n kʼianga tojeme kjoaʼaí kjoañʼai xi nʼio tse. Alikui sʼe̱choa̱. Kʼianga jekoaitsʼia kjoañʼai xi nʼio tse kʼoa nga skoe̱ nga tínikjeson ngatsʼi je relijión ndiso, ñaki tokʼoakoa̱nle. Tsakui nichxin kʼiani koa̱njinle kʼianga kje tjíondajin nga kjoaʼaí je Jesús. Kʼiatsa kʼia sijé nganʼio, jméni xi koa̱n. Kʼoakoa̱n jokoan je yánchjínxo̱ngó xi chini. Nga tsín kitsjoale siti̱le je xi isenkon, nga tosa kʼoakitsole nga katafikatse. Tonga nga basen nitje̱n alikui ʼya xi tsakaténale. Kui xi tsonile, nga tsín tikʼiani.

12. 1) Kʼianga jetíjna je kjoañʼai xi nʼio tse, jméni xi koa̱nle je xi tsín kixi koa̱n kʼianga kjesa sʼechoa̱jin. 2) Jmé xi kuitsole Jesús je xi ya koa̱nngósonkao je yánchjínxo̱ngó xi chini koan.

¹² Kʼianga jetíjna je kjoañʼai xi nʼio tse, je xi ya koai ngʼajmi, je xi kixi koa̱n, alikui kuinyakao je xi tsín kixi koa̱n. Jelikui tikʼiani. Kʼoa jméni xi si̱kao je xi tsín kixi koa̱n. Kʼoati koa̱n jokoan je yánchjínxo̱ngó xi chini koan je xi siti̱ kikatse: “Jaʼai xʼinbe. Je xi tjíonda, jaʼasʼen kao je ya kjoabixan, kʼia kisʼechjoa xo̱ntjoa”. Kʼianga kjoaʼaí je Jesús nga toje tífetʼa je kjoañʼai xi nʼio tse, yaa sikatíoxkó ngatsʼi je xi kixi koa̱n ya ngʼajmi (Mateo 24:31; 25:10; Juan 14:1-3; 1 Tesalonicenses 4:17). Kʼoasjengi je xi ya koa̱nngóson je yánchjínxo̱ngó xi chini koan. Tsakui nichxin i̱ kuitso: “Señor, Señor, tindóʼainajin”. Tonga je Jesús kʼoakuitsole jokuitsole ngatsʼi xi tsín kixi kjima: “Xi kjoakixi xi xinno, likui ʼbexkonno” (Mateo 7:21-23; 25:11, 12).

13. 1) Ánni kʼoabixónsíñá nga tsínkui xi kitsonile Jesús nga nkjín chjotale xi ya koai ngʼajmi xi tsín kixi koa̱n. 2) Ánni kʼoabixónsíñá nga tsín jao tjínle Jesús nga kixi koa̱n je chjotale xi ya koai ngʼajmi. (Chótsenlai sén xi fitsʼiani kjoaʼmiya jebi.)

¹³ A kui xi kitsonile Jesús nga nʼio nkjín chjotale xi ya koai ngʼajmi xi tsín kixi koa̱n kʼoa kjaʼaí xi koatioyangajaonile. Majain. Kʼianga katamajinná jebi, kuila si̱kjaʼaitsjeen jmeni xi tso kapítulo 24 xi tsʼe Mateo. Kʼianga kʼoakitsole je choʼnda xi nʼiotʼakon nga tsín choʼnda tsʼen katama, ali tsakuijin xi kitsonile tsa kʼoakoa̱n. Totsakájinkonní nga tsín kʼoakatama. Kʼoakjoánti tjínni tʼatsʼe choa̱ xi te yánchjínxo̱ngó. Kʼoati totsakájinkon je xi ya koai ngʼajmi. Tojosʼin nga aon koanni je yánchjínxo̱ngó xi isenkon koan kʼoa aon xi chini koan, nga jngó jngóní chjotale Cristo xi ya koai ngʼajmi xi kuitsoni tsa tjenyatokon kʼoéjna kʼoa tsa kixi koa̱n. Je Pablo kʼoati tso én tsakájinkon je ndsʼe̱ xi kʼoati ya ngʼajmi  koai (tʼexkiai Hebreos 6:4-9; kʼoati me tso én xi koa̱nsjaili ya Deuteronomio 30:19). Je Pablo kʼoati nʼio kinchja̱le je ndsʼe̱, tonga kʼoati kitsole nga tsín jao tjínle nga kixi koa̱n. Kʼianga kinchja̱ni Jesús tʼatsʼe xi te yánchjínxo̱ngó kʼoati kui xi bakó nga tsín jao tjínle nga kixi koa̱n je chjotale xi ya koai ngʼajmi. Bení nga kixi koa̱n nga jngó jngó kʼoa nga so̱kole kjoanda.

14. Ánni nga kʼoati binyakaosíni je “xi kjaʼaí barré” je choa̱ xi tsakʼéjna Jesús.

¹⁴ Je xi tsakʼéyanajmí Jesús kui tsakakóya nga tjenyatokon kuiyoaa. Ninga jelani kinchja̱ni choa̱ jebi je chjotale Cristo xi ya koai ngʼajmi, je “xi kjaʼaí barré” kʼoati binyakao choa̱ jebi (Juan 10:16). Ánni. Kuinga i̱ kitso Jesús: “Je kjoa xi xinno nga jon, kʼoaxínle ngatsʼi: Tjenyatokon tiyo” (Marcos 13:37). Je Jesús kui xi mele nga katabationda ngatsʼi je chjotale kʼoa nga tjenyatokon katabatio. Kʼoati koa̱n skénngile je choa̱le je xi ya koai ngʼajmi kʼoa nga kui ngisa títjon katasíkʼéjna xá xi tsʼe Niná nga kuitsoyason. Xi ijngosani, alikui koa̱n choa̱le kjuintjenngiaa yánchjínxo̱ngó xi chini koan nga je yánchjínxo̱ngó xi isenkon kisijéle siti̱le. Alikui koa̱n nga kjaʼaí xi kixi koa̱nngajaoná kʼoa koationdangajaoná kʼoa xi tjenyatokon koationgajaoná. Nga jngó jngó ñá nga si̱xántjé yaoná. Je Jesús jeme kjoaʼaí nga sijtsoʼa ngatsʼi chjota, kʼoa jngó jngóñá nga kʼoailee kuenta. Kuinga machjénsíni nga tongini kuiyondaa.

15. Ánni nga nʼio tsjoa sʼesíniná xi chjotale Cristo maa tʼatsʼe kjoabixanle Jesús kao je xi kuixankao.

¹⁵ Ngatsʼiaa xi chjotale Cristo maa nʼio tsjoa sʼená tʼatsʼe kjoabixan xi kisikʼaxki̱ Jesús. Kʼianga jekjoetʼa Armagedón, je xi ya koai ngʼajmi jé kuixankao je Cristo ya ngʼajmi (Apocalipsis 19:7-9). Kʼoa je xi i̱ koatio i̱ Sonʼnde kʼoati kuinyakao kjoanda jebi. Ánni. Kuinga je kjoabixan jebi kui xi tsonile nga nʼio ndasʼin je chjotaxá xi koatexomale ngatsʼi chjota. Ni ya ngʼajmi koanngián kʼoa ni i̱ Sonʼnde kuiyoaa, kʼoénelee yaoná nga kuiyondaa kʼoa tjenyatokon kuiyoaa. Tsa kʼoasʼiaan, nʼio naskásʼin kuiyoaa kʼianga kjoaʼaíkao Jeobá je kjoanda xi tsjoáná nichxin xi nroaján.