A jesa kichjonangilai yaoli jebi. Kʼiatsa jaon, ali tsa tojijin xi kui nikjaʼaitsjain. Jngo tjíjtsa Sonʼnde nkjín chjota xi mele skoe̱ jme xi nʼio chjonangilee yaoná. A jchañá jokjoantjínni.

Miyón chjota xi jebe. Yaa Biblia koansjaile jmeni xi ñaki tsakʼéjngo kon. A meli jchai jmeni xi tso je Biblia. Kʼiatsa jaon, tsakui nichxin koa̱nmeli nga jngo testigole Jeobá kuitsoya kjoatjaoli jmeni tso je Biblia. *

Kʼianga kʼoaʼmile chjota nga katakotʼaya je Biblia, kʼoatso kʼa nga tsínle nichxin, nga nʼio ñʼai tjín kʼoa tsa maije̱ likui mele nga yaole kjuenkjoale. Tonga tjín chjota xi kotʼaya je Biblia. Kʼoa itso kʼa chjota jebi:

• “Kiña ya yo̱ngo̱ xi tsʼe katóliko kao xi tsʼe protestante, ya yo̱ngo̱le relijión sij, ya monasterio xi tsʼe chjota budista kʼoa saʼnda kiskotʼayaña Teología ya universidad. Tonga alikui koansjaiyejena jmeni xi kjonangile yaona. Kʼoa jngo chjoón xi testigole Jeobá ma kichosíkjanetʼa xo̱ntjoa niʼyana. Tokʼoakoanna nga ñaki Biblia kisichjén nga kitsoyana xi kjonangile yaona, kʼoa nga kʼoakitsona nga kuitsoyana, koanjyona.” (Gill, Inglaterra.)

• “Nʼio nkjín koya kiskonangia xi tʼatsʼe kjoabijnachon, tonga jmeni xi kitsoyana je xi pastor tíjna ya yo̱ngo̱ jña fia alikui tsakʼéjngo tokoan. Tonga, jngo testigole Jeobá xi to Biblia kisichjén nga kʼoakitsona jmeni xi jao tjínna tsakai kʼoa ñaki kisʼejngo tokoan. Kʼianga kʼoakitsona tsa mena nga kʼuínyasana, jaon kixinle.” (Koffi, Benín.)

• “Kui koanmena skoe josʼin tjío xi jekʼien. Kʼoasʼin koankjainna nga koa̱nle sikiʼaonná, kʼoa jóxótse tso je Biblia kixinña. Kʼiaa kiskotʼaya kao jngo miyona xi testigole Jeobá ma.” (José, Brasil.)

• “Tsakʼexkiaña Biblia tonga alikui koanjinna. Ñandia nga ya niʼyana kicho je testigole Jeobá kʼoa nkjín koya xi kitsoyana xi faʼaitʼa ya Biblia. Kʼoa kuinga koanmesanina nga skoe.” (Dennize, México.)

• “Kui kiskonangile yaona tsa ñaki mandosin kjoaixile Niná xi tʼatsaan. Tsakʼetsʼoale je Niná xi síkʼaxki̱ ya Biblia. Kʼoa nga koannyaonni, je testigole Jeobá kichokonna kʼoa kʼiaa kiskotʼaya je Biblia.” (Anju, Nepal.)

Jmeni xi kitso nga jngó jngó je chjota jebi kui bakóná nga ñaki kʼoatjín je én xi kitso Jesús, nga i̱ kitso: “Tsjoa tjíole je xi be nga machjénle tʼatsʼe Niná” (Mateo 5:3, TNM). Ngatsʼiaa mená nga tsjoa sʼe̱ná, kʼoa toje Niná xi koa̱nle koandiaaná nga tsjoa sʼe̱ tokoán. Kʼoa tokʼianí nga chótʼayá je Biblia.

Jósʼin jchani jmeni xi tso je Biblia. Kʼoa jósʼin koasenkaoli. Kataʼyala.