1-3. Ánni nga ñaki kʼoatsakʼésíni kon je Pablo nga koa̱n je Jeobá sinʼiotʼa. (Chótsenlai sén xi faʼaitʼa ibi.)

JE CHJOTALE Cristo xi tsakatio ya naxinandá Roma kʼianga siglo 1 nʼio xkón tsakatio. Je chjota romano ñaki totaon tsabe nga kitjenngike. Kʼoakitso nga jtike chjota kʼoa nga je xokisʼin nga kití je naxinandá. Nʼio nkjín chjotale Cristo kitsoa, tjínkʼa xi ya kisikʼatsaojinle cho̱toán nga katakjine. Tjínkʼa xi yá tsakátʼa kʼoa tsakaká tjínkon nga njio nga kui kisiʼisenni ya naxinandá. Je chjotale Cristo jetokiskoyasale nga kjoa kjoaʼatojin.

² Kʼianga kʼoasikji ñʼai kjoa tjíofaʼatojin je chjotale Cristo, je chjota romano kʼoati kitsoa je pastro Pablo. Tsakui nichxin kui kisikjaʼaitsjen je Pablo tsa koasenkao je chjotale Cristo xi ngikʼa. Ánni. Ñandia kʼianga nʼio ñʼai kjoa jaʼatojin kʼoa aliʼya xi tsakasenkao. Tonga je Pablo kʼoakitso nga je Jesús kisichjén je Jeobá nga kitsjoale nganʼio xi koanchjénle. Saʼnda kʼoakitso nga tsakʼasjentjai ya “tsʼoa xa” (2 Timoteo 4:16, 17). * (Tʼexkiai nota.)

³ Je Pablo ñaki kʼoatsakʼé kon nga koa̱n sinʼiotʼa je Jeobá. Ánni. Nga̱ kui kisikjaʼaitsjen josʼin tsakasenkao ngasʼa. Alikui jao kisʼele nga je  tsjoále nganʼio xi machjénle nga ska̱le je kjoa xi tífaʼatojin kʼoa xi kjoaʼatojinsa nga koa̱nskanni. Ñaki kʼoatsakʼé kon nga je Nainá kʼoasjentjai tojmeyeje kjoa xi kjoaʼatojin (2 Timoteo 4:18). Ñaki kʼoatsakʼé kon nga je Jeobá kao Jesús koasenkao ngantsjai ninga tsín koasenkao je ndsʼe̱. Alikui jao kisʼele.

4, 5. 1) ʼYáni xi koasenkaoná ngantsjai. 2) Jméni xi sʼiain nga ngisasa nʼio koa̱nmiyui je Jeobá.

⁴ A jesa kitjatojin je kjoa xi ñʼai tjín kʼoa aliʼya xi tsakasenkaoli koanli. Tsakui nichxin koantsínli xá kʼoa tsa kjoa kisʼeli ya ndʼiaskuela. Tsakui nichxin chʼin kisʼeli kʼoa tsa jngo kjoa xi nʼio ñʼai tjín kitjatojin. Tsakui nichxin ñaki totsʼe kisʼeli nga tsín ʼya xi tsakasenkaoli. Kjoaixiní, sakʼoa tjín kjoa xi nʼio ñʼai tjín xi tsín koa̱nle kʼoendajin xi to chjota. Jméni xi sʼiaan tsa kʼoakoaan. Je Biblia kʼoatso nga je Jeobá si̱nʼiotʼaa (Proverbios 3:5, 6). A koaan si̱nʼiotʼaa je Jeobá. Jaon. Nʼio nkjín choa̱ faʼaitʼa Biblia je xi bʼéjngo tokoán nga basenkao Jeobá je choʼndale nga kjoa faʼatojin.

⁵ Kʼiatsa kjoa tijnajin kʼoa liʼya xi tíbasenkaoli, ali tsa majen makjájinli. Kʼoati tʼiain jokisʼin je Pablo. Takui nga ñaki ninʼiotʼai je Jeobá. Kʼoati kuenta tʼiain jósʼin tísíkuindali. Tsa kʼoasʼiain, ngisa nʼio koa̱nnʼiotʼasai je Jeobá kʼoa nʼio koa̱nmiyosai.

6. Ánni nga ñʼai masíniná nga ninʼiotʼaa je Jeobá kʼianga ñʼai tjín kjoa xi tibitjatojiaan.

⁶ Tikjaʼaitsjenlai tsa jngo kjoa xi nʼio ñʼai tjín tijnajin kʼoa nʼio kjimakjaojinli. Tsakui nichxin nʼio tifasjailai nga katasʼendajin kʼoa tinijélai nganʼio je Jeobá. Kʼiatsa kʼoatinʼiai, tʼejngui tokuin kʼoa tininʼiotʼai je Niná nga je koasenkaoli (tʼexkiai Salmo 62:8 * kao 1 Pedro 5:7). Kʼiatsa meli nga ñaki miyole koai̱n je Jeobá, machjénní nga si̱nʼiotʼai. Kjoaixiní, ali tsa choa ñʼai tíjna. Ánni. Kuinga tsín tokjoan bitjoson sakʼoa jme xi nijélee je Jeobá kʼianga bʼetsʼoalee (Salmo 13:1, 2; 74:10; 89:46; 90:13; Habacuc 1:2).

7. Ánni nga tsín tokjoan tsjoá sakʼoasíniná je Jeobá jme xi nijélee kʼianga bʼetsʼoalee.

⁷ Ánni nga tsín tokjoan tsjoá sakʼoasíniná je Jeobá jme xi nijélee kʼianga bʼetsʼoalee. Kʼianga koa̱njinná, je Biblia kʼoatso kʼianga je Jeobá Nʼainá mani kʼoa ñá xtile mañá (Salmo 103:13). Je xi xijchá ma alikui totsjoántsjaile jmeni xi síjé je ʼndíxtile. Kʼoa nga jme xi tsjoále, alikui tokjoan tsjoá sakʼoale. Xi ijngosani, je ʼndíxti sakʼoaa kui síjé tsojmi xi matsjoake nga títjon tonga likui timatsjoakeni nga jemani. Je xi xijchá ma kʼoati be tsa tsín nda sikao je ʼndíxtile jmeni xi tjíosíjé kʼoa tsa kʼoetʼaleje̱ xi kjaʼaí chjota. Kʼiatsa tokjoan tsjoále jmeni xi sijé je ʼndíxtile, je xi xijchá ma choʼnda kjima. Tonga je xijchá be jmeni xi machjénle je ʼndíxtile kʼoa kʼiani nga machjénle. Kʼoakjoánti sʼín je Jeobá. Je Jeobá tsjoakená, be jmeni xi machjénná kʼoa be kʼiani tsjoáná. Kuinga machjénsíni nga chóyakaola tsa jme xi kanijélee (kʼoati me tso én xi koa̱nsjaili ya Isaías 29:16; 45:9).

8. Jméni xi tsoná Jeobá josʼin koasenkaoná.

 ⁸ Kʼoati tikjaʼaitsjain kʼianga be je Jeobá jokji tjen kaná nga jngó jngoá (Salmo 103:14). Je Jeobá tsjoántsjainá je nganʼio xi machjénná. Tsakui nichxin likui tichókjoakaoniná koa̱nná. Tonga je Jeobá kʼoatsoná nga jé koasenkaoná kʼiatsa nʼio ñʼai kjoa xi tibitjatojiaan (tʼexkiai 1 Corintios 10:13). Je Jeobá bení jokji tjen nga ska̱ná kʼoa bʼéjngo tokoán nga ʼyaa jebi.

9. Jméni xi sʼiain kʼiatsa tsín tokjoan tsjoáli Jeobá jme xi tinijélai.

⁹ Kʼiatsa tsín tokjoan tsjoáli jme xi tinijélai je Jeobá, tsejta katamai. Tikjaʼaitsjain kʼianga mele koasenkaoná, tonga koyakaola kʼoa kʼiakjoán tsjoáná nga machjénná. Ya Biblia kʼoatso nga nʼio mele Jeobá nga koasenkaoná kʼoa nga koakoná kjoamatokon, nga̱ ñaki kixiní. Kʼoa kʼoatso nga nʼio tsjoa tjíole xi je sínʼiotʼa (Isaías 30:18).

10-12. 1) Ánni nga tsín choa ñʼai tíjnasíni nga nikuindaa tsa jngo familianá xi chʼin tjínle. 2) Kʼianga jngo kjoa tjínná kʼoa je Jeobá ninʼiotʼaa, jósʼin biyoaa kao je. Jngola choa̱ tʼejnai.

¹⁰ Ya párrafo 2 kui kʼoakatsoná nga je Pablo kichʼasjentjai ya “tsʼoa xa” (2 Timoteo 4:17). Kʼiatsa nʼio ñʼai tjín kjoa xi tijnajin kʼoa kʼoatjín tokuin jokisʼe tsʼe Pablo, jméni xi sʼiain. Nʼio machjén nga si̱nʼiotʼai je Jeobá. Tobʼelañá, tsa jngo familiali tinikuindai xi chʼin tjínle. Jejin Jeobá tinijélai nganʼio nga katabasenkaoli kʼoa tsa jme xi sʼiain nga kui kʼoasʼiain xi kixi tíjna. * (Tʼexkiai nota.) Koaan tʼejngui tokuin nga̱ be Jeobá jme kjoa tibitjatojin. ʼYaní nga je koasenkaoli kʼianga ska̱li kʼoa nga kixi kʼuíntʼalai (Salmo 32:8).

¹¹ Tonga tsakui nichxin alikui tíbasenkaoli Jeobá koa̱nli. Tsakui nichxin kjaʼaí kjaʼaí tso je chjinexki josʼin koa̱nsinle je xíngi xi chʼin tjínle. Tsakui nichxin kʼoasʼin kinikjaʼaitsjain nga je sinʼio tokuin je familiali, tonga tosa tokjimatsesa je kjoa. Kʼiatsa kʼoakjimai, nʼio machjén nga tosi tonda si̱jélai nganʼio je Jeobá kʼoa nga tosi tonda si̱chriantʼalai (tʼexkiai 1 Samuel 30:3, 6). * Xijekoa̱n, kʼianga koa̱njinli nga je Jeobá tíbasenkaoli, ngisa nʼiosa koa̱nmiyui.

¹² Kataʼyala tʼatsʼe jngo tichjaa xi Linda ʼmi. * (Tʼexkiai nota.) Nʼio tse kisikuinda je xijchále saʼnda nga kʼien. Kʼoatso kʼianga je xʼinle, je ndsʼe̱ kʼoa kao je nga chan tsín tibeni jmeni xi sʼin. Sakʼoa ñaki tsín tiska̱nile koanle. Tonga jeni be ndʼaibi nga je Jeobá tsakinyakao nga kiskale. Ñaki kʼoatjín kon je Linda nga je kitsjoale nganʼio xi koanchjénle, kʼoa ngisa kʼianga tsín tibeni jokisʼin.

13. Jósʼin kisinʼiotʼa je Jeobá jngo tichjaa xi Rosa ʼmi.

¹³ Kʼiatsa ñaki je Jeobá si̱nʼiotʼaa, jé koasenkaoná kʼianga jngo kjoa xi nʼio ñʼai tjín kuitjátojiaan. Kʼoakoantʼain jngo tichjaa xi Rosa ʼmi. Je xʼinle alikui testigole Jeobá ma kʼoa jekʼoasʼin tjínndajinle je xʼinle nga tsjión. Kʼoa nga kʼia, je ndsʼe̱ Rosa jngo chʼin xi nʼio táo kiskatʼale. Kʼoa nga jeki sá jé kʼien je chjoónle je ndsʼe̱. Ñaki tsín tibeni jokisʼin je Rosa. Kʼianga jeme nda kisʼe tse je kon, precursora regular sʼin kisixá. Tonga sajé na̱le kʼienngá.  Jméni xi tsakasenkao nga kiskale ngayeje kjoa jebi. Kuinga nyaon nyaon tsakʼétsʼoale je Jeobá, tsakʼétsʼoale ninga tokui tʼatsʼe kjoa xi i̱natjín. Kʼoatso je tichjaa nga ñaki nʼio miyole koanni je Jeobá. Kʼoati tso nga je kisinʼiotʼa je Jeobá ʼndele nga to yaole sinʼiotʼa kʼoa tsa chjota sinʼiotʼa. Ñaki tsabe nga je Jeobá tsakasenkao nga tsín jme xi kichale kʼianga nganʼio koanchjénle. Ñaki tsen koanle nga ya tíjnakao je Jeobá.

14. Jósʼin koasenkaoli Jeobá kʼiatsa jngo xíngi kuichonsjejin.

¹⁴ Ijngosa kjoa xi nʼio ñʼai tíjna kʼiaa nga jngo xíngiaa bichonsjejin naxinandále Niná. Tikjaʼaitsjenlai, tsa jngo xíngi kuichonsjejin, ʼyaní nga kʼoatso Biblia nga tsín koa̱n je chja̱koai (1 Corintios 5:11; 2 Juan 10). Tonga nga nʼio tsjoachai xíngi tsakui nichxin nʼio ñʼai koa̱nli nga nitjosuin kjoatéxoma jebi. Jósʼin koasenkaoli Jeobá. Jé tsjoáli nganʼio xi machjénli nga kixi kʼuíntʼalai kʼoa nga si̱tjosuin kjoatéxomale. Jé tinʼiotʼai yaoli kʼoa ngisa tichriantʼasalai.

15. Ánni nga jaʼatonesíni kjoatéxomale Jeobá je Adán.

¹⁵ Kjoa jebi mangóson kao jme xi kisʼin je Adán. Ánni nga kiskinesíni to xi kitsjoale Eva. A kʼoasʼin kisikjaʼaitsjen nga koa̱n kjoaʼatone jme xi kitsole Niná kʼoa tsín jme xi koa̱nle. Mai. Je Biblia kʼoatso nga “Adán likui kichʼanachale” (1 Timoteo 2:14). Ánni nga tosa je chjoónle kisitjosonsínile ʼndele nga Jeobá sitjosonle. Kuinga ngisa tsjoake koan je chjoónle tikʼoajinni je Jeobá (Génesis 3:6, 17). Jmé xi bakóyaná jebi.

16. ʼYáni xi ngisa koa̱ntsjoachaa tikʼoajinni toʼya chjotani, kʼoa ánni.

¹⁶ Jme xi kisʼin Adán kui bakóyaná nga tjínnele ngisa tsjoacha koaan je Jeobá tikʼoajinni toʼya chjotani (tʼexkiai Mateo 22:37, 38). Ánni. Nga̱ kui xi koasenkao familianá ni tjíosíxále kʼoa ni mai je Jeobá. Kuinga, tʼenesínilai yaoli nga tsjoacha katamai je Jeobá kʼoa sa tse sa tse tinʼiotʼai yaoli nga nyaon nyaon. Kʼiatsa nʼio nikjaojin josʼin tíjna je xíngi xi kabichonsjejin naxinandále Niná, kʼoatʼinlai Jeobá jotjín tokuin (Romanos 12:12; Filipenses 4: 6, 7). * (Tʼexkiai nota.) Ninga nʼio ba mali, ngisasa nʼio timiyui je Jeobá. Kʼoasʼin koa̱nnʼiotʼasai kʼoa jchaní nga ngisa nda kuichotsjoá kʼiatsa si̱tjosonlai.

17. Kʼiatsa nʼio kʼuínyasoán, jméni xi tsín jao sʼe̱ná.

¹⁷ Ánni nga tsakʼasjentjaisíni Jeobá je Pablo ya “tsʼoa xa”. Je Pablo kʼoakitso nga kui xá kichʼasjentjaini nga tosi tonda kuitsoyason kʼoa koa̱njngole je xá xi tsakánele je Niná (2 Timoteo 4:17). Je Jeobá kʼoati kui xá títsjoáná tsanda ñá ndʼaibi nga kʼuínyasoán. Jé Niná tinixákoaa (1 Corintios 3:9; 1 Tesalonicenses 2:4). Kʼiatsa nʼio kʼuínyasoán, alikui jao tjínná nga je Jeobá tsjoáná ngayeje jmeni xi machjénná (Mateo 6:33). Xi ijngosani, ngisa choa ñʼai koa̱nná nga chóyalee josʼin tsjoáná Jeobá jmeni xi kinijélee nga tsakʼetsʼoalee.

18. Jméni xi sʼiaan nga ngisasa koa̱nmiyoná je Jeobá kʼoa nga ngisasa nʼio si̱nʼiotʼaa.

¹⁸ Tʼenelai yaoli nga nyaon nyaon nga ngisasa nʼio timiyui je Jeobá. Kʼiatsa jngo kjoa xi nʼio ñʼai tjín tijnajin, takui nga ngisasa tinichriantʼalai je Jeobá. Tʼexkiai kʼoa chótʼayai je Biblia, kʼoa tikjaʼaitsjenjin jmeni xi chotʼayai. Tosi tonda tʼetsʼoalai Niná kʼoa tosi tonda tixálai. Kʼiatsa kʼoasʼiain, alikui jao sʼe̱ tokuin nga je Jeobá koasenkaoli nga ska̱li je kjoa xi tjínli ndʼaibi kʼoa kao xi sʼe̱li nichxin xi nroaján.