1. Ánni nga machjénsíni nga sa nʼio sa nʼio katasʼejna je kjoamiyo xi tjínná kao Jeobá.

JE KJOAMIYO xi tjínná kao Jeobá ñá xi testigole maa nʼio chjíle. Nʼio machjén nga kʼoénelee yaoná nga sa nʼio sa nʼio katasʼejna je kjoamiyo xi tjínná kao Jeobá. Tsa tsín kʼoasʼiaan, je sonʼndele Na̱i kʼoa kao jée xi kichʼá koaan sikinroajen tokoán.

2. 1) Jósʼín je xi miyo fáo. (Chótsenlai nota.) 2) Jméni xi sʼiaan nga ngisasa nʼio katasʼejna kjoamiyo xi tjínná kao Jeobá.

² A ñaki miyo sʼin ʼyatokuin je Jeobá. A meli nga sa nʼio sa nʼio koa̱nmiyui je Niná. Ya Santiago 4:8 kʼoatsoná jmeni xi koa̱n sʼiaan: “Tichriantʼalao Niná, kʼia kʼoati je sichriantʼano nga jon”. Tojo tso én jebi, kʼiatsa meli nga miyoli koa̱n Jeobá kʼoa miyo kuitsoli, jméni xi machjén. * (Tʼexkiai nota.) Kʼiatsa si̱chriantʼalai je Jeobá kʼoati sichriantʼali tsanda je. Kʼianga ngisasa nʼio si̱chriantʼalai, ngisa nʼio koa̱nmiyui. Kʼoati sʼe̱ tokuin jokisʼe tsʼe Jesús kʼianga kitso: “Je Nʼainá xi kisikasénna, je xi kjoakixi”.  Kʼoa kʼoati i̱ kitso: “Tonga an ʼbexkoan Nʼainá” (Juan 7:28, 29). Kataʼyala jmeni xi koa̱n sʼiaan nga si̱chriantʼalee je Jeobá.

3. Jósʼin koa̱n kuinókjoakoaa je Jeobá.

³ Kʼiatsa mená nga si̱chriantʼalee je Jeobá, nʼio machjén nga chja̱kaonajmiá. Tonga jósʼin chja̱kaonajmiá. Tojngola choa̱ si̱kʼéjnaa, kʼiatsa jao mani chjota xi kjin tjío kʼoa miyo fáo kʼoa mele kjoakaonajmí xínkjín, jméni xi sʼín. Kji kitʼale xínkjín kʼoa tsa maije̱ teléfono nchja̱le xínkjín. Kʼoakjoánti sʼinni je kjoamiyo xi tjínná kao Jeobá. Jósʼin nokjoakoaa. Kʼianí nga kjitʼa bʼetsʼoalee (tʼexkiai Salmo 142:2). * Kʼoa jósʼin fákaoná je Jeobá. Kao Biblia. Kʼianga kuinóʼyalee jmeni xi tsoná, tjínnele kjitʼa kʼoéxkiaa je Biblia kʼoa si̱nkjínlee tokoán jmeni xi bʼexkiaa (tʼexkiai Isaías 30:20, 21). * Tojosʼin jchaa kjoaʼmiya jebi, kʼiatsa kʼoasʼin chja̱koaa je Jeobá, ngisa nʼio koa̱nmiyosaa.

4, 5. 1) Jósʼin fákaoniná Jeobá kao Biblia. 2) Jngola choa̱ tʼejnai.

⁴ ʼYañá kʼianga basenkao ngatsʼi chjota xi tjín sonʼnde je én xi faʼaitʼa Biblia. Tonga kʼoati basenkaoná nga jngó jngoá nga nichriantʼalee je Niná. Machjénní nga kuenta sʼiaan josʼe tokoán kʼianga bʼexkiaa kʼoa nga chotʼayá je Biblia. Kʼoati si̱kjaʼaitsjenjiaan josʼin si̱chjén jmeni xi bʼexkiaa. Kʼiatsa kʼoasʼiaan, jngoyale tífákaoná je Jeobá. Kʼoa nga ʼyaa nga basenkaoná ngisa mamiyosa (Hebreos 4:12; Santiago 1:23-25).

⁵ Tojngola choa̱ si̱kʼéjnaa. Ya Mateo 6:19, 20 je Jesús i kitso: “Ali kjoanyinájin bʼexkó i̱ sonʼndebi”. Jósʼe tokoán kʼianga bʼexkiaa én jebi. Kʼiatsa je Jeobá títjon tinikʼéjnaa, tsenjin koa̱nná nga tsjoa tjínle nga kʼoatinʼia. Tonga tsa tsín tokjimaniná josʼin tiyoaa kʼoa likui nʼio tinixálee je Jeobá jchajián nga je Jeobá tíbakóná jmeni xi sʼiaan nga nʼiosa si̱chriantʼalee.

6, 7. 1) Jósʼin bijnaa kao Jeobá kʼianga chotʼayá Biblia. 2) Jmé xá chotʼayañá je Biblia.

⁶ Kjoaixiní, kʼianga chotʼayá Biblia be yaoná jmeni xi tjínnele si̱kʼantjaiyaa kʼiatsa mená nga ngisasa nda si̱xálee Niná. Tonga kʼoati ʼyaa jokjoan je Niná kʼoa jmeni xi ñaki kao kjoatsjoachale kʼoasʼínni. Kʼianga ʼyaa jebi, ngisasa nʼio matsjoachaa. Kʼoa je ngisasa nʼio matsjoakená. Kʼoa je kjoamiyo xi tjínná kao je Niná ngisasa nʼio sʼejna (tʼexkiai 1 Corintios 8:3).

⁷ Kʼiatsa mená nga si̱chriantʼalee je Jeobá, nʼio machjén nga kataʼyaa jme xá tichotʼayáñá je Biblia. Je Jesús kʼoakitso tsa mená kuiyoaa ngantsjai nichxin  machjénní nga nda kataʼyaa je Jeobá (Juan 17:3). Kjoaixiní nga naskánatjín xi ʼyaa kʼianga chotʼayá Biblia. Tonga ali tsakuijin xá chotʼayañá. Kui xá chotʼayañá kʼianga jchasaa je Jeobá (tʼexkiai Éxodo 33:13; * Salmo 25:4).

8. 1) Jósʼin síkjaʼaitsjen kʼa xíngiaa kʼianga bʼéxkia jmeni xi kisikao Jeobá je rey Azarías. 2) Kʼianga ñaki nda ʼyaa je Jeobá, jméni xi tsín jao tjínná.

⁸ Kʼiatsa ñaki miyo sʼin jchatokoán je Jeobá, alikui kui si̱kjaojiaan tsa jme kjoani xi tsín bʼéyanajmí anni kʼoakisʼinni je Niná. Tobʼelañá, si̱kjaʼaitsjenla jmeni xi koantʼain je xi rey tsakʼejna ya Judá xi Azarías tsakʼin. Kʼianga tíbatéxoma, je naxinandá niná ndiso tjíobʼétsʼoale. Tonga rey jebi alikui kui choa̱ kitjenngi, nga̱ je Biblia kʼoatso nga “tosi tonda kui kʼoakisʼin xi kixi tíjna ngixko̱n Jeobá” (2 Reyes 15:1-5). Ninga kʼoalani kisʼin, je Niná jngo chʼintáo kitsjoale. Ya Biblia alikui kʼoatso anni. Tsakui nichxin tjín xi kʼoakuitso nga tsín nda kisʼin Niná nga kʼoasʼin kjoañʼai kitsjoale. Tonga nda ʼyaa je Jeobá kʼoa ʼyañá nga ñaki kjoatéxomakixi fitjenngi jmeni xi sʼín (Jeremías 30:11). Ninga tsínlani ʼyaa anni nga kjoañʼai kitsjoanile Niná rey jebi, alikui jao tjínná nga ñaki kixi jmeni xi kisʼin.

9. Ánni nga kjoañʼai kitsjoanile Jeobá je rey Azarías.

⁹ Jñani nga xin testo kʼoati masjaitʼasaná xi tʼatsʼe Azarías, kʼoa Uzías sʼin tsaʼyale (2 Reyes 15:7, 32). Ya 2 Crónicas 26:3-5, 16-21 kʼoatso nga “tosi tonda kui kʼoakisʼin xi kixi tíjna ngixko̱n Jeobá”. Tonga kʼoati tso nga ngʼakon koan nga koanskanni. Ñandia kʼianga kui kʼoakisʼin xi toje naʼmi bʼakaole. Ñokan kaoni jngo mani je naʼmi xi kʼoakitsole nga tsín ndatjín jmeni xi tísʼín kʼoa tsakatéchjoale. Tonga rey jebi nʼio ngʼakon koan tosa tokoanjtile alikui tsakʼaʼén. Choa̱ jebi kui basenkaoná nga ʼyaa anni nga kjoañʼai kitsjoanile Jeobá.

10. 1) Ánni nga tsín machjénsíni nga katasʼejinyejená jmeni xi sʼín je Jeobá. 2) Jósʼin jchañá tsa ñaki kixi jmeni xi sʼín ngantsjai.

¹⁰ Nʼio tse jmeni xi bakóyaná choa̱ jebi. Jmeni xi tso Biblia xi tʼatsʼe rey Azarías jemajngoni tokoán anni nga kjoañʼai kitsjoanile Niná. Tonga ya Biblia nkjínsa chjota síkʼaxki̱ xi tsín kʼoatsoyeje anni nga kʼoakoantʼainni. A kʼoakuixoán nga tsín nda kisʼin je Jeobá. Axo ñaki tjínjngo tokoán nga kui kʼoasʼín ngantsjai je Jeobá xi kixi tíjna (Deuteronomio 32:4). Jmeni xi faʼaitʼa Biblia basenkaoná nga nda ʼyaxkoaan je Jeobá kʼoa nga koa̱n si̱nʼiotʼaa. Kʼiatsa ʼyaxkoaan kʼoa tsjoachaa, alikui kjoan machjén nga jchaa anni nga kʼoasʼínni kʼianga jmeni xi sʼín. Tonga jósʼin jchañá tsa ñaki kixi jmeni xi sʼín ngantsjai. Kʼiaa nga chótʼayá Biblia. Kʼoasʼin nga nʼio nda miyoná koa̱n je Jeobá (Salmo 77:12, 13).

11-13. Jósʼin ʼyañá kʼianga nrʼoéná je Jeobá kʼianga bʼetsʼoalee. (Chótsenlai sén xi fitsʼiani kjoaʼmiya jebi.)

¹¹ Kʼianga bʼetsʼoalee je Niná, chʼasjengʼañá, bʼailee kjoanda kʼoa nijelee nganʼiole. Kʼoasʼin machriantʼanilee  (Salmo 32:8). Tonga tsa mená nga ñaki miyoná katama je Jeobá, ñaki kʼoakʼoé tokoán kʼianga nrʼoéná kʼianga bʼetsʼoalee.

¹² Tjínkʼa xi kʼoatso nga tsín nrʼoéná Niná kʼianga bʼetsʼoalee. Kʼoatso nga tokui nga bʼetsʼoañá nga nda sʼe je tokoán. Nga tokui nga bʼetsʼoañá nga kui nikjaʼaitsjenjiaan je kjoa xi tjínná kʼoa nga koa̱nná josʼin ñásoa kʼoéndajiaan. Kjoaixiní nga koa̱n kʼoasʼin koasenkaoná je kjoabʼetsʼoa. Tonga kʼianga bʼetsʼoalee je Jeobá, ñaki nrʼoéná. Jósʼin ʼyañá.

¹³ Si̱kjaʼaitsjenla je Jesús. Kʼianga kjesa faʼaijin i̱ Sonʼnde, tsabe josʼin kisitjoson Jeobá jmeni xi kisijéle chjota kʼianga tsakʼétsʼoale. Kʼoa kʼianga jaʼai i̱ Sonʼnde je Jesús, tsakʼétsʼoale Niná kʼoa kʼoakitsole jotjín kon kʼoa jomale. Ñandia kʼianga tsʼajnda nitje̱n tsakʼétsʼoa (Lucas 6:12; 22:40-46). Xi ijngosani, kʼoakitsole je chjotale nga katabʼétsʼoa. A kʼoakisʼin kʼiatsa belani nga tsínni nrʼoé je Jeobá kʼianga bʼetsʼoalee. Maijin. Tsabe kʼianga nrʼoéná je Jeobá. Kuinga i̱ kitsosínile: “Tsjoale kjoanda nga kʼoasʼin kanoʼyanái [...,] nga noʼyanái ngantsjai” (Juan 11:41, 42). Kʼoati ñaki tjíojngo tokoán tsanda ñá kʼianga nrʼoéná je Jeobá kʼianga bʼetsʼoalee (Salmo 65:2).

14, 15. 1) Ánni nga ñaki kʼoakʼuínkixinilee jmeni xi mená kʼianga kʼoétsʼoalee. 2) Jósʼin tsakasenkao je kjoabʼetsʼoa jngo tichjaa.

¹⁴ Tsakui nichxin sakʼoa tsín ʼyaa josʼin sítjoson Jeobá jmeni xi kanijélee. Tonga tsa ñaki kʼoakʼuínkixilee jmeni xi mená ngisa jchaa josʼin kuitjoson. Kʼoa ngisa nʼio koa̱nmiyosaa. Kʼiatsa ñaki ni̱ma̱ná kʼoakʼuínnilee jmeni xi makjaojinná, sichriantʼaná.

¹⁵ Kataʼyala je choa̱le jngo tichjaa xi Carmen ʼmi. * (Tʼexkiai nota.) Kʼoatso kʼianga fitsoyason kʼianga kjesa majin jubilar, tonga alikui tsjoake nga kʼoasʼin tsoyason. Kʼianga jekoan jubilar tichjaa Carmen, jngo xi chjotajchínga sʼin tíjna kʼoakitsole nga precursora regular katasíxá. Je tichjaa itso: “Kisitjosonña jme xi kitsona, tonga kʼoati nyaon nyaon kisijéle je Jeobá nga tsjoake̱ katama nga xínyasoan”. A kinrʼoéle je Niná. Jaon. Jejanle nó ndʼaibi je Carmen nga precursora tísíxá. Kʼoa  kui xi tíbasenkao nga ngisa kjimale títsoyason kʼoa kʼoati tíbasenkao je nganʼio xi tjíotsjoále tichjaa xi ngikʼa. Kʼoa ndʼaibi jenʼio tsjoake nga tsoyason. Tonga kʼoatso nga je xi ngisasa nʼio chjíle kuinga ngisasa nʼio kjimamiyo je Jeobá. Tojosʼin tiʼyaa, tichja jebi nʼio tsakasenkao je kjoabʼetsʼoa kʼianga ñaki miyole koanni je Jeobá.

16, 17. 1) Jméni xi sʼiaan nga sa miyo sa miyoná katama je Jeobá nga nyaon nyaon. 2) Jméni xi jchaa ya kjoaʼmiya xi ijngo.

¹⁶ Koaan si̱chriantʼasalee je Jeobá. Kuinga machjénsíni nga tosi tonda kuinóʼyalee nga nyaon nyaon chótʼayá je Biblia, kʼoati kuinókjoakoaa kʼianga kʼoétsʼoalee. Kʼiatsa kʼoasʼiaan, ngisa nʼio koa̱nmiyosa Niná kʼianga nyaon nyaon. Kʼoa nga tsjoánganʼioná, chókjoakaoná jme kjoa xi kuitjátojiaan.

¹⁷ Kjoaixiní, ninga kjitʼa kʼoétsʼoalee je Jeobá, tsakui nichxin tojo kjoa kuitjátojiaan. Tsakui nichxin likui tisi̱nʼiotʼañá je Jeobá. Kʼoa tsakui nichxin kʼoasʼin si̱kjaʼaitsjeen nga tsín nrʼoéná nga bʼetsʼoalee kʼoa tsa tosa tsín tisi̱miyoñá kuixoán. Kʼiatsa kʼoakoaan, jméni xi sʼiaan. Xi tʼatsʼe jebi, ya jchaa ya kjoaʼmiya xi ijngo.