Xkón sʼin tibiyoaa nga chjota tjíobatéxomaná. A tosi tonda tsjoáʼnde Niná nga chjota koatexoma i̱ Sonʼnde. Mai. Tojosʼin jekaʼyaa, jeme kjoaʼaxin je chjotaxá sonʼnde kʼoa kao kjoañʼai xi jenkjín siento nó tjínle nga tjíojin chjota kʼoa alikui ʼya xi titotaon jchani. Je Niná xi kisinda Sonʼnde kʼoa xi kisindaná kui xi mele nga kataʼyaa nga jeme kʼoasʼin. Jósʼin bájinkonná Niná xi tʼatsʼe jebi.

Tikjaʼaitsjenlai tsa tjín jña tiʼmi. Xi títjon chótʼai kuijin je mapa jñani faʼaitʼa josʼin ndiaa kʼuín. Kʼoa kʼianga jetjenyandiai, jchajin nga kʼoakjoanchon josʼin faʼaitʼa je mapa. Kʼoajinsʼin jchani nga jeme bichochriain jñani tiʼmi. Kʼoatisʼinni je Biblia, je Niná kui xá kitsjoaniná nga jo mapa sʼin koa̱nchjénná. Nʼio nkjín koya faʼaitʼa jmeni xi koa̱n jngo tjíjtsa Sonʼnde nga kjesa faʼaijin kjoafetʼa. Jokji nga tífaʼato nichxin tiʼyañá nga kʼoakjima jmeni xi kitso Jesús. Kʼoa kui xi bakóná nga sa chrian sa chrian tíjna je kjoafetʼa.

Je Biblia tsoyaná jmeni xi koa̱n nga kjesa faʼaijin kjoafetʼa. Kʼoatso nga nʼio nkjín koya jmeni xi koa̱n xi kjesa kʼoamajin. Kataʼyala kʼaa jmeni xi koa̱n kʼoa jokoa̱nchon.

1. KJOA XI SʼE̱ JNGO TJÍJTSA SONʼNDE Je én xi tongini kinokjoa xi faʼaitʼa ya Mateo kapítulo 24 faʼaitʼa je choa̱ xi sʼe̱. Jmeni xi koa̱n kui koako nga tojeme kjoaʼaí kjoafetʼa (bersíkulo 3 kao 14). Sʼee kjoajchán, kjinrá, kjoaʼa cháonnʼio tojñani, sʼee kjoatsʼen, likui tisʼe̱ni kjoatsjoacha kʼoa relijión ndiso kʼoanachale chjota (bersíkulo 6 saʼnda 26). Kjoaixi nga tísʼe kjoa jebi ngantsjai. Tonga ñatjen kʼoakoa̱n nga tojeme kjoaʼaí kjoafetʼa. Kʼoa kʼoati kʼia kʼoakoa̱n je xi ngi jan koya jchaa.

2. JOKJOAN CHJOTA Je Biblia kʼoatso nga chʼao koa̱nkjoan je chjota kʼianga jetíjna “nichxin xi kjoetʼa”. Itso: “Sʼee chjota xi to yaole tsjoake koa̱n, xi chʼaondai, xi nchja̱tʼa yaole, xi ngʼakon, xi chʼao tsole xínkjín, xi tsʼantjaikjoake xijchále, xi niʼi̱tséjin tsjoá kjoanda, xi tsín tsje tjín, xi tsínle kjoatjaochajin, xi síkitsón énle, xi bángi kao kjoandiso, xi tokjaʼaíngá sʼín, xi toán, xi taon be xi nda, xi jao nkjaín, xi toxkia sʼín, xi tosíxkón male, xi ngisa matsjoake kjoaská kaoni tsa Niná” (2 Timoteo 3:1-4). Ali tsa tondʼaijin ndʼaibi nga tjín chjota xi kʼoakjoan, tonga tokʼianí nga jetíjna “nichxin xi kjoetʼa” nga sa chʼao sa chʼao koa̱nkjoan je chjota. Kuinga kʼoatsosíni Biblia nga nʼio ñʼai koa̱nchon. A kʼoakjimakjoan je chjota nichxin xi tiyoaa ndʼaibi.

3. TJÍOSÍKITSÓN SONʼNDE JE CHJOTA Je Biblia kʼoatso nga Niná sikjeson “je xi sikitsón sonʼnde” (Apocalipsis 11:18). Jósʼin tíbitson je Sonʼnde ndʼaibi. Kʼoati kjimachon jokoanchon nichxinle Noé. Je Biblia itso: “Je sonʼnde ñaki chʼao koanchon ngixko̱n Niná xi kixi, kʼoa ñaki kjoatsʼen kisʼejnakitse. Kʼoa je Niná tsabe je sonʼnde nga tíbitson”. Kuinga i̱ kitsonile je Noé: “Sikjesonña” (Génesis 6:11-13). A tsí kjoaixi nga sa tsʼen sa tsʼen kjima je chjota nichxin xi tiyoaa ndʼaibi. Kʼoa ali tsa tokuijin xi kjima, je ki̱cha̱ xi tjíosínda je chjota koaanle nga ngotjo sikjesonni je Sonʼnde kao chjota. Kʼoa je chjota kʼoati tjíosíkitsón jmeni xi machjénná nga biyochoán, tobʼelañá, je ntjao̱, je nandá, je jñájchá, je xo̱ngá kʼoa nkjínsa koya xi tjín i̱ Sonʼnde xi jetíbitson.

Tikjaʼaitsjenlai jebi: A koanle je chjota nga ngotjo kisikjesonni xínkjín nichxin kjoan  jngo siento nó ján. Maijin. Tonga ndʼaibi koaanle kʼoasʼin. Yaa ʼyañá nga nʼio nkjín ki̱cha̱ tjíosínda xi koa̱nle sikjeson chjota kʼoa nga jetíbitson Sonʼnde. Je chjota alikui majinle jokji xkón tíjna nga kʼoakjoan ki̱cha̱ tjíosínda kʼoa tsín be tsa chʼaosʼin kuichotsjoá nga tsín male síchjén je tsojmi xi sʼa kjimatsen ndʼaibi. Xi nda bʼé tokoán kuinga kʼoatso je Niná nga tsín tsjoáʼnde nga je chjota sikjeson je Sonʼnde. Tiʼani nga kjesa kʼoasʼínjin, tosa je Niná tongini sikjeson chjota jebi.

4. TÍʼMIYASON ÉNLE NINÁ JNGO TJÍJTSA SONʼNDE Ijngo koya xi síkʼaxki̱ ya Mateo tʼatsʼe je xá xi koa̱n jngo tjíjtsa Sonʼnde, itso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14). Kʼoa nga kʼoasʼin kʼuínyason alikui koa̱nngóson josʼin tjíotsoyason je yo̱ngo̱. Xi nʼio sa̱kóyason kui “énnda xi tʼatsʼe je kjoatéxomale ngʼajmi”. ʼYáni xi kʼoasʼin tjíotsoyason je énnda chjotse xi tʼatsʼe Chjotaxále Niná, xi tjíotsoyason jngo tjíjtsa Sonʼnde.

Je pájina xi tíjnale testigole Jeobá ya Internet, jw.org, kui xá tíjnani nga sikʼabíson “je énnda xi tʼatsʼe je kjoatéxomale ngʼajmi”. Tsʼato ñato siento én faʼaitʼa nga tsoya xi tʼatsʼe Chjotaxále Niná. A tíjna ijngo relijión xi kjaʼaí xi kʼoasikji bʼénele yaole nga kui tsoyale chjota xi tʼatsʼe Chjotaxále Niná. Nʼio tongini nga kjesa matsenjin je Internet, je testigole Jeobá tokʼoa jeʼyale nga tsoyason je énnda chjotse xi tʼatsʼe Chjotaxále Niná. Saʼnda tjen nó 1939, je Xo̱n xi Bájinkonná itso én xi faʼaitʼa: “Xo̱n xi Bájinkonná tʼatsʼe Chjotaxále Jeobá”. Kʼoa jngo libro xi tsʼe relijión nchja̱ni itso: “Liʼya xi mangósonkao jokji tsoyason kʼoa jotjín ʼnde tsoyason [je testigole Jeobá]”. Kʼoa je énnda chjotse xi tsoyason je testigole Jeobá kuinga je Chjotaxále Niná jeme kjoaʼaísíkje je sonʼnde tsʼen jebi.

Jokji nga tijnai a tiʼyaní nga tíbitjoson je én xi tongini kinokjoa xi faʼaitʼa kjoaʼmiya jebi. Jokji xi jngo siento nó jetífaʼato, rebista jebi kui títsoya jokjimachon jngo tjíjtsa Sonʼnde kʼoa je xi bʼéxkia tjíobe nga kui tíbitjoson je choa̱ xi sʼe̱ nichxin fetʼa. Tonga je chjota xi tsín makjainle kʼoasʼin síkjaʼaitsjen nga totísʼenda je én xi kʼoatso jmeni xi koa̱n kʼoa nga tojo kʼoachon jochon  ngantsjai. Kʼoatso nga tokui nga sʼejinniná ndʼaibi nga tjín ki̱cha̱ xi bájinkonná kʼoa nga tsín sʼe̱jinná tsa tsínlani. Ninga kʼoatso kʼa chjota, nkjín mani xi kʼoatso nga nʼio tjínle kjoandosin jmeni xi kjima nichxin xi tiyoaa ndʼaibi.

Kuinga kʼoabixónñá, nga̱ jngo jtín mani je chjota científico xi bʼasje je xo̱n xi Bulletin of the Atomic Scientists ʼmi, kʼianga nó 2014 i kitsole je Consejo de Seguridad de las Naciones Unidas tʼatsʼe jokji xkón jetjío je chjota: “Kʼianga jenʼio nda kichotʼayajinjin jokjimachon kʼoabixuínjin nga koa̱n kui sikjeson je chjota jmeni xi sʼa kjimatsen ndʼaibi”. Kʼoa nga kʼoakjima, nʼio nkjín chjota xi kjimajinle, jolani je xi bʼasje rebista jebi kʼoa kao xi bʼéxkia, nga jenichxin fetʼa tiyoaa kʼoa nga jemachrianle nga kjoaʼaí kjoafetʼa. Tonga alikui kuinókjoaan. Ánni. Nga̱ koaan kuinje̱ngilee yaoná.