Nkjín nó nga kʼoakitso je xo̱n xi nichjén nga je Na̱i xi Gog xi tsʼe Magog tsole ya Biblia kʼianga jetsakichonjenngi i̱ Sonʼnde. Ánni nga kʼoakitsosíni je xo̱n xi nichjén. Kuinga kʼoatso je libro xi tsʼe Apocalipsis nga je Na̱i kʼoetʼale naxinandále Niná jngo tjíjtsa Sonʼnde (Apocalipsis 12:1-17). Kuinga kʼoatsakixónsíñá nga je Na̱i xi kʼoati Gog ʼmile.

Tonga alikuini kʼoasʼin tíjna. Kataʼyala anni. Xi títjon, kʼianga kʼoatso Biblia nga ni̱kʼien je Gog, kʼoatso nga je kʼoexále Jeobá je cho̱ xi fitjen, xi yao kjine, kao cho̱jñá nga katakjine yaole Gog (Ezequiel 39:4). Je Biblia kʼoati tso kʼianga je Jeobá ya kʼoeñe ya Israel (Ezequiel 39:11). Tonga nga espíritu je Na̱i alikui koa̱n nga cho̱ ski̱ne yaole kʼoa nga i̱ sʼe̱ñe i̱ Sonʼnde. Xi ijngosani, je Biblia kʼoatso nga jngo jmi nó nikʼéjnaʼyanʼio ndi̱tja̱n je Na̱i. Kui xi tsonile, nga tsín cho̱ ski̱ne yaole kʼoa nga tsín sʼe̱ñe (Apocalipsis 20:1, 2).

Xi majaoni, je Biblia kʼoatso nga kuitjoni ndi̱tja̱n je Na̱i kʼianga jekjoe xi jngo jmi nó kʼoa nga “kʼoanachale naxinandá xi tjío nga ño xi̱ngi̱le sonʼnde, ya Gog kʼoa ya Magog, jméni nga kʼoasʼin kʼoexkósíni xi tʼatsʼe kjoajchán” (Apocalipsis 20:8). Kʼiatsa tijelani Na̱i xi Gog ʼmi, tijejin kʼoanachanile yaole. Kuinga kʼoabixónsíñá nga tsín je Na̱i xi Gog tsole libro xi tsʼe Ezequiel kao Apocalipsis.

ʼYáni je xi Gog xi tsʼe Magog ʼmi. Kʼianga jchaa, machjénní nga chótʼayá je Biblia kʼoa jchaa ʼyáni xi kʼoetʼale naxinandále Niná. Je Biblia síkʼaxki je Gog xi tsʼe Magog, je rey xi ya tsʼe norte, kʼoa kao “chjotatítjon xi tsʼe sonʼnde” xi kʼoetʼale naxinandále Niná (Ezequiel 38:2, 10-13; Daniel 11:40, 44, 45; Apocalipsis 17:14; 19:19). Tsakui nichxin tijeni ngatsʼi tonga kjaʼaí kjaʼaí jaʼaín tjínle. Ánni nga kʼoabixónsíñá. Kuinga kʼoatso Biblia nga tsjónjin yaole ngatsʼi naxinandá xi tjín sonʼnde kʼianga tokjoetʼani nga kʼoetʼale naxinandále Niná kʼoa kʼiaa koaitsʼia je kjoajchán xi Armagedón ʼmi (Apocalipsis 16:14, 16).

Kʼiatsa si̱ngósoán bersíkulo jebi, xi kui tínchja̱ni kʼianga kʼoetʼale naxinandále Niná je  Gog, koa̱njinná nga tsín je Na̱i xi Gog xi tsʼe Magog ʼmile. Je Gog xi tsʼe Magog nkjín naxinandá tínchja̱ni. A je rey xi tsʼe norte koandiaale naxinandá jebi. Alikui ʼyaa. Tonga tochale tsa kʼoakoa̱n, nga̱ je Jeobá itsole Gog: “Kjuinroani ʼya ʼndeli, jñani nʼio kjin ʼnde ya norte, kʼoa nkjín naxinandá tjenkaoli, ñaki naxín tjíosonle ngatsʼi, jngo jtín mani, jngo jtín chjotakjoajchán” (Ezequiel 38:6, 15).

Je profeta Daniel kʼoati me tso én xi kiski tʼatsʼe rey xi tsʼe norte. Kitso: “Sʼee én ya jña tjoni tsʼuí kao ya norte xi koa̱nkjaojinle, kʼoa nʼio jtile nga kuitjo kʼoa koa̱nmele nga nʼio nkjín sikjeson. Kʼoa je ndʼianajñole yaa koatioʼnyobasenle ndáchikon kao nindo tsje xi Naskánakji; kʼoa toyaa tjen kuicho kʼoa alikui ʼya xi koasenkao” (Daniel 11:44, 45). Én jebi mangóson kao jme xi kitso je Ezequiel xi tʼatsʼe Gog (Ezequiel 38:8-12, 16).

Jmé xi koa̱n kʼianga kʼoetʼale naxinandále Niná. Daniel 12:1 itso: “Kʼianga kui nichxin koasenndo je Miguel, je chjotatítjon xi tsjoánganʼiole je naxinandáli. Kʼoa nga kui nichxin nʼio tse kjoañʼai sʼe̱ xi kjesa kʼoamajin josaʼnda nga kisʼe naxinandá”. Én jebi kui tínchja̱ni kʼianga sʼe̱jna kjoañʼai xi nʼio tse. Bersíkulo jebi itsosa: “Kʼianga kui nichxin je naxinandáli kuitjontjai, ngatsʼi je xi ya tjíotʼaxo̱n je libro xi kijna”. Jósʼin tsoyanile Daniel 12:1. Kui tsoyanile nga je Jesucristo, xi kʼia kitjoele xá nga nó 1914 sitoánntjainá kʼianga sʼe̱jna Armagedón. Én jebi kʼoati mangóson jme xi tso Apocalipsis 19:11-21 tʼatsʼe jmeni xi sʼin je Jesucristo kʼianga sitoánntjai naxinandále Niná.

Tonga ʼyáni xi Gog kʼoa Magog tsole ya Apocalipsis 20:8. Jé ngatsʼi chjota xi koatiochjoale Jeobá kʼoa kʼoetʼale naxinandále kʼianga jekuichokjetʼa xi jngo jmi nó. Chjota jebi jtike koa̱n je naxinandále Niná tojo sʼin je Gog xi tsʼe Magog. Tonga je Niná kʼoatisʼin sikʼien chjota jebi tojo sikao je Gog xi tsʼe Magog kʼianga kjoaʼaí Armagedón (Apocalipsis 19:20, 21; 20:9). Kuinga Gog kʼoa Magog tsonile Biblia je chjota xi yátsʼi̱n kuinyale Niná kʼianga kuichokjetʼa xi jngo jmi nó.

Ñá xi testigole Jeobá maa nʼio mandosinná nga chotʼayá Biblia. Kuinga nʼio tjenyatokon biyosíñá ánni nga koa̱njinsíniná ʼyáni xi rey xi tsʼe norte koa̱n nichxin xi machrianle. Toʼyani xi kʼoetsʼiakao nga kʼoetʼaná xi choʼndale Niná maa, ʼyañá nga je Gog xi tsʼe Magog kʼoa kao chjotale ni̱kjeson. Kʼoa je Jesucristo, xi rey tíjnaná, kʼoasjentjainá kʼoa tsjoáʼnde nga ya kuiyoaa ya sonʼnde chjotse, jñani sʼe̱ kjoanyʼán kʼoa tsín tixkón kuiyoñá (Apocalipsis 7:14-17).