Je Biblia kʼoatso jmeni xi koa̱n nga kjoaʼaí kjoafetʼa. Mateo 24:21, 22 itso: “Nga̱ kʼia nʼio tse sʼe̱ kjoañʼai xi tsín tsa kʼoakoan saʼnda nga totsʼinle kjoa, saʼnda ndʼai [...]. Kʼoa tsa je nichxinbe tsín tsa kjuinroajen, nijngojin chjota xi kuitjontjai”. Tonga kʼoati tso nga sʼe̱ chjota xi kuinje̱ngile yaole, itso: “Je sonʼndebi faʼatoní [...]. Tonga je xi sítjoson jo tso Niná ñaki kʼoasʼin bʼejna ngantsjai” (1 Juan 2:17).

Jméni xi sʼiaan nga kuinje̱ngilee yaoná. A tsojmi kuinyatjaolee yaoná. Mai. Je Biblia kui kjoafaʼaitsjen jebi tsjoáná: “Tsa ngayije kjoabi kuixo̱yaní, [tikʼaitsjaon] jósʼin mangínkao yaono xi tʼatsʼe kjoa xi tsje, kʼoa jósʼin ʼyaxkón Niná. Jetichoyakao yaono, nʼio metakon nga kjoaʼaí nichxinle Niná” (2 Pedro 3:10-12). Je én xi faʼaitʼasa basenkaoná nga majinná nga je xi kuixo̱ya jéní chjotaxá sonʼnde kʼoa kao chjota xi tsjoánganʼiole, xi bʼasjengi Chjotaxále Niná. Kʼianga kjoaʼaí kjoafetʼa alikui tsojmi kʼoasjentjainá ninga kui kuinyatjoá.

Je xi kʼoasjentjainá kuinga kʼoasʼin kjuinkoaa yaoná josʼin mele Niná kʼoa nga kixi kjuintʼalee (Sofonías 2:3). ʼNdele nga tokʼoasʼin si̱kjaʼaitsjeen jotso je chjota kʼoa nga likui kuenta sʼiaan je choa̱ xi bakó nga jenichxin fetʼa tiyoaa, tosa tjenyatokon kuiyolee “nichxinle Niná”. Koaan kuitsoyali je testigole Jeobá jotso Biblia jméni xi sʼiain nga kuitjontjai.