Nichxin kjoatse, je Niná jues tsakinyánda kʼianga tsakʼasjentjai je naxinandále kʼianga totaon tsaʼya (Jueces 2:18). Je Biblia kʼoatso nga nichxin nga sijé kuenta Niná kjoatsjoa tjenkao. Je Jeobá, xi Jues tíjnale ngayeje Sonʼnde, kʼoasjentjai chjota nga kjoañʼai tjíofaʼá. (Tʼexkiai Salmo 96:12, 13 kao Isaías 26:9.)

Je Niná, jé Jesús tsakasénnda nga jues sʼin kʼoéjna kʼianga kʼoendajinle chjota xi tjíokon kʼoa kao xi jekʼien (Hechos 10:42; 17:31). Kʼianga kui nichxin, kʼiaa sikjaʼáyale Jesús je chjota xi tsín tsabe tʼatsʼe Jeobá ánni nga sʼe̱sínile ʼnde nga skótʼaya xi tʼatsʼe kʼoa koa̱ntsjoakesíni. (Tʼexkiai Hechos 24:15.)

Je Biblia kʼoatso nga jngo jmi nó sʼe̱jna. Nichxin jebi kʼiaa kjoaʼáyale chjota xi jekʼien kʼoa tjóʼndele nga skoe̱ xi tʼatsʼe Niná kʼoa sitjosonle (Revelación 20:4, 12, TNM). Nʼio nkjín chjota xi kʼoasʼin makjainle nga kui kuenta koa̱n jmeni xi kisʼin nga kje mʼejin. Tonga je Biblia kʼoatso nga kui kuenta koa̱n jmeni xi sʼin kʼianga jekjoaʼáyale. (Tʼexkiai Romanos 6:7.)

Je Biblia kʼoati ijngo nichxin síkʼaxki̱ kʼianga sijé kuenta Niná. Nichxin jebi toxijña kjoaʼaí kʼianga kjesa fitsʼiajin xi jngo jmi nó. Nichxin jebi kʼianí nga kjoaʼaí kjoafetʼa, tojosʼin tsaʼyaa ya kjoaʼmiya xi tjío jña fitsʼiani rebista jebi. Nga kui nichxin, je Niná kʼiaa sikjeson je chjotatsʼen (2 Pedro 3:7). Kuinga machjénsíni nga koakoá nga ñaki tsjoachaa je Niná. (Tʼexkiai 2 Pedro 3:9, 13.)