Kʼianga “kjoe Sonʼnde” tso én xi noʼyai, jméni xi fiya jkui. A kui fiya jkui nga jngo cháon sikjeson Sonʼnde, nga jtsí xkón kjoaʼaí kʼoa tsa kjoajchán koa̱n. Kʼianga kui síkjaʼaitsjen chjota, tjínkʼa xi tsokjón kʼoa tjínkʼa xi tokjoa male.

Je Énle Niná itso: “Kjoaʼaí xi kjoetʼa” (Mateo 24:14). Kʼoati “Armagedón” kʼoa “nichxinje xi tsʼe Niná” tsole je Biblia nga kui nchja̱ni je kjoafetʼa (Apocalipsis 16:14, 16). Tonga je relijión kjaʼaísʼin tsoya xi tʼatsʼe kjoafetʼa, kʼoatso kʼianga kjoaxkón kjoaʼaí kʼoa nʼiosa nkjín koya jmeni xi tso. Tonga ya Biblia tsoyaná jokjoantjínni xi tʼatsʼe kjoafetʼa. Tsoya nga jemachrianle kʼoa tsoya jmeni xi koa̱n sʼiaan nga kuinje̱ngilee yaoná. Kataʼyala jmeni xi tso je Biblia jokjoantjínni tʼatsʼe kjoafetʼa kʼoa jmékjoánni xi kjoetʼa.

1. ALIKUI TSA LʼÍ SIKJESON JE SONʼNDE

   Je Biblia itso: “Jé [Niná] tsakʼéjna je sonʼnde ya jñani tíjna; nikʼiajinla tjóxin jñani tíjna” (Salmo 104:5). Je testo jebi kʼoa kao xi kjaʼaínile tsoya nga likuikʼia sikje Niná je Sonʼnde kʼoa nga likui tsjoáʼnde tsa chjota sikjeson kʼoa tsa jme xi sikjeson (Eclesiastés 1:4; Isaías 45:18).

2. KʼIANI KʼOA JME ORANI NGA KJOAʼAÍ KJOAFETʼA

   Tjínkʼa je chjota xi kʼoatso nga tsín ʼya xi be kʼiani kjoaʼaí kjoafetʼa, tonga je Biblia tsoya nga Niná jetíjnale nichxin nga kjoaʼaí kjoafetʼa. Itso: “Tonga xi kjuichoka je nichxinbe, kʼoa je orabe nga kʼoakoa̱n, liʼya xi be, nijejin ánkje xi tsʼe ngʼajmi, nijejin ʼndíle Niná, tojngo je Nʼainá xi be. Tikuindao, tiyochonʼndao, tʼetsʼoao, nga̱ likui ʼyao kʼianibe nga kʼoakoa̱n” (Marcos 13:32, 33). Testo jebi tsoyakixi nga jetíjnale nichxin je Niná kʼiani “nga kʼoakoa̱n”.

3. ALIKUI TSA CHJOTA KJOAʼAÍKAO KJOAFETʼA KʼOA ALI TSA METEORITO JTSAO

   Jméni axo ʼyáni xosʼin nga kjoaʼaí kjoafetʼa. Ya libro xi tsʼe Apocalipsis itso: “Tsaʼbe ngʼajmi nga kisʼetixʼa̱. Koeni jngo naxín xi chxoa kji. Je xi tíjnasonle kʼoa tsakʼin: Nʼiotʼakon kao kjoakixi. [...] Tsaʼbe je cho̱, kao chjotatítjon xi tsʼe sonʼnde kao sondadole, xi tojngo tjío nga kʼoasʼin sʼin kjoajchán. Kontra koaile je xi tíjnason naxín, kʼoa kontra koaile je sondadole” (Apocalipsis 19:11-21). Testo jebi totsoyanile jmeni xi nchja̱ni, tonga xi majinná kuinga kʼoatso nga Niná si̱kasén je ánkjele nga sikjeson je xi kontra tjíole.

1. CHJOTAXÁ SONʼNDE

   Je Biblia itso: “Je Niná xi tíjna ngʼajmi jngo chjotaxá koasennda xi nikʼiajin tjóxin. Chjotaxá jebi ali tsa tikjaʼaíjin naxinandá koa̱nntsjani. Ñaki sichaoní kʼoa kjoaʼaxinní ngatsʼi chjotaxá xokjoan, kʼoa jé kʼoéjna ngantsjai nichxin” (Daniel 2:44). Tojosʼin jekaʼyaa ya punto  3, je “chjotatítjon xi tsʼe sonʼnde” tojngo sʼin yaole nga “sʼin kjoajchán. Kontra koaile je xi tíjnason naxín, kʼoa kontra koaile je sondadole” (Apocalipsis 19:19). Tonga je Chjotaxále Niná sikjesonní.

2. KJOAJCHÁN, KJOATSʼEN KʼOA KAO XI TSÍN KIXI TJÍN

   Je Niná “kjoaʼaxin kjoajchán ngakjijnda sonʼnde” (Salmo 46:9). “Tojé chjota xi kixi xi koatio i̱ sonʼnde, kʼoa je xi tsín jme jée tjínle je xi i̱ koatio. Tonga je xi tsʼen tjóxin i̱ sonʼnde, kʼoa tjóneyaa je xi bʼanacha.” (Proverbios 2:21, 22.) Kʼoa ya Apocalipsis kʼoatso nga Niná “sichjotse ngayije” (Apocalipsis 21:4, 5).

3. RELIJIÓN XI TSÍN KʼOASʼÍN JOSʼIN MELE NINÁ KAO CHJOTA

   Je libro xi tsʼe Jeremías itso tʼatsʼe chjota xi to jaonkjaínni: “Je profeta to énndiso tjíonchja̱, je naʼmi likui nda choa̱ tjíobatío. [...] Kʼoa jméni xi sʼin nga kjoaʼaí kjoafetʼa” (Jeremías 5:31, Martín Nieto, 1992). Jmé xi koa̱nle chjota jebi. Je Jesús i kitso: “Nkjín xi kʼuikuitsona kui nichxinbe: Señor, Señor, a tsí kinokjoayaijin kao jaʼaínli, kʼoa kao jaʼaínli kichjaʼaxinnijin na̱i xi ndajin, kʼoa kao jaʼaínli ali kʼoakji nkjín kjoaxkón kinʼiaijin. Kʼoa kʼia sikixiyale: Nikʼiajin tsaʼbexkonno, tinyaxinnáo chjota xi kjoatsʼen mano” (Mateo 7:21-23).

4. CHJOTA XI KJOATSʼEN TSJOAKE KʼOA XI KUI TSJOAKE XI TSÍN KIXI TÍJNA

   Je Jesús i kitso: “Je lʼí jaʼai i̱ sonʼnde, tonga chjotasonʼnde ngisa koantsjoake kjoanjio kaoni lʼí, nga̱ kjoatsʼen xi kisʼin. Kui nga tíjnanele kjoañʼai” (Juan 3:19). Kʼianga nichxinle Noé, jngo chjota xi kixi koan, je Niná kisikjeson je chjotatsʼen. Ya 2 Pedro 3:5 saʼnda 7 itso: “Kao nandábe kicha je sonʼnde xi kisʼe kʼia nichxinbe nga tsangason nandá. Tijeni énle Niná tíbʼétjao je ngʼajmi kao sonʼnde xi tjín ndʼai, jméni nga kuiti̱síni kui nichxin nga sʼe̱ndajinle kjoa, nga cha̱ chjota xi tsín bexkón Niná”.

Jokoan nichxinle Noé mangóson jokoa̱n nichxin xi jemachrianle “nga sʼe̱ndajinle kjoa, nga cha̱ chjota xi tsín bexkón Niná”. Je xi jeson nichxin kjoatse jé chjota ali jejin sonʼnde. Kʼoatisʼinni nichxin xi nroa, kʼianga “sʼe̱ndajinle kjoa” je chjota, je Niná sikjeson je xi kjoatsʼen tsjoake kʼoa xi kontra koatiole. Tonga je Niná sikuinda je xi miyole mani, tojosʼin kisikuinda je Noé kao familiale (Mateo 24:37-42).

¡Nʼiojin ndasʼin kuiyoaa kʼianga jekjoaʼaxin Niná ngayeje kjoatsʼen xi kijnajtsa i̱ sonʼnde! Je kjoafetʼa xi nchja̱ni je Biblia tosa tsjoa bʼé tokoán ʼndele nga kuinókjoaan. Tonga tsakui nichxin kui tinikjaʼaitsjain jókji tsesa chale nga kjoaʼaí kjoafetʼa kʼoa jméni xi koa̱n sʼiain nga kuinje̱ngilai yaoli. Kataʼyala jótso je Biblia.